¹ Le yi godu ɔ, Mawu gbɔngbɔn lɔ kplɔ Yesu yi zogbe ji nɔ legba a tii kpɔ ² ci yi Yesu bla enu ŋkeke eka kodo ezan eka yi shive ciciɛ. ³ Amɛdokpɔtɔ lɔ va gbɔ yi nu nii be: "Nɔ e nyi Mawu eviɛ nyɔnɔ nyui ɔ, ɖe egbe nɔ ekpe cɛwo nɔ wo a trɔ enuɖuɖuwo" ⁴ Yesu ɖoŋci nii be "Mawu nyui yi wo ŋwliin do afuɖeka le yi 'nyɔ wemawo mɛdaɖɛ be "D'é nyi enuɖuɖu ɖekɛ yi a na yi agbetɔ a nɔ agbe go. Vɔ ɔ, enyɔ ɖekpokpoi ci yi to nɔ le Mawu 'nu mɛ can nanɔ agbe amɛ." ⁵ Eyi legba kplɔɛ yi Ʒluzalemu, 'jugann kɔkɔɛ lɔ mɛ yi na yi e la Mawuwe lɔ tamɛ. ⁶ Yi nu nii be : "Nɔ enyi Mawu eviɛ lɔ nyɔnɔnui, tè jin. Ɖo wo ŋwlɛ do afiɖeka le Mawu'nyɔ wemawo mɛ daɖɛ be: "Mawu a ɖe agbe nɔ yi dɔlawo yi wo a xɔ eo do wowo 'lwo mɛ nɔ ŋgbe va sɔ afɔ gban do ekpe ɖenu gó" ⁷ Eyi Yesu ɖoŋci nii be: "Wo gbe ŋwlɛ do Mawu 'nyɔ wemawo mɛ daɖe hɛnnɛ be: "ŋgbe maAxwetɔ ao Mawu kpɔ go."" ⁸ Legba gbe kplɔɛ yi eto yiji yiji ɖeka ji yi dansɛn xexemɛ 'ƒiɔɖuxuwo pleŋ kodo wowo klɛnklɛnwo nii. ⁹ Yi nu nii be: " Na sɔ enu cɛwo pleŋ na eo nɔ e ji ekloji yi doŋdo nɔ ŋ." ¹⁰ Eyi Yesu nu nii be: "Tèyi ɖaa Legba! Ɖo wo ŋwlɛn do aƒiɖeka le Mawu 'nyɔ wemawo mɛ daɖɛ be: "Axwetɔ ao Mawu yi a doŋdo nɔ. Eyɛ ɖekɛ yi asɛn."" ¹¹ Ecɛyɛ ɔ, Legba lɔ tashii yi dɔla ɖekawo va gbɔ yi va leleɛ ebu nii. ¹² Ci yi Yesu se be wo lé Ʒan amɛ ci yi wanɔ ʒinʒindoshimɛ Mawu tɔ do 'gakpa mɛ ɔ, e so kpe Galile 'kan mɛ. ¹³ D'é ci Nazalɛti kɔxwi mɛ go. e tran yi kafanawɔmu koxwimɛ le Galile 'xu 'tú le zabulɔn kodo Nɛƒutali 'kanwo mɛ. ¹⁴ Nɛnɛ ɔ, enyɔ cɛ ciwo yi Mawu 'ŋɛdotɔ Ezayi do ŋkɔ yi nu daɖɛ a jɔ ¹⁵ "Zabulɔn kodo Nɛƒutali 'kanwo nyigban ciwoyi zɔn axu 'tu tiin le tagbe ɖaa nɔ Ʒuludɛn, Galile, ekan ɖeka ci mɛ yi amɛmanyi yuɖatɔwo le. ¹⁶ Jukɔn lɔ ci yi le vivici mɛ kpɔ klɛnklɛn gangan ɖeka yi amɛ ciwo yi le ekan lɔ mɛ le eku vivicimɛ kpɔ klɛnklɛn!" ¹⁷ Sohwehɔnnu yi Yesu do axwo yí tɔ́ Mawu 'nyɔ nunu nɔ amɛwo be: "Mí trɔ míwoɖekiwo a ji. Ɖó ɔ, jiŋkushi 'ƒiɔɖuɖu lɔ gogo vɔ!" ¹⁸ Ci yi Yesu zɔn Galile 'xu 'tu yi va yi gɔ ɔ, e kpɔ simɔ ci yiwo yonɔ be Piyɛ kodo nɔviɛ Anŋdre yi wo le eɖɔ daa. Ɖo ɔ, eɖɔdatɔwo yi wo nyi. ¹⁹ Yesu nu nɔ wo be:" Mí kplɔ ŋ do nɔ ma na nɔ mí a tɔ agbetɔwo kplɔkplɔ gbɛ shigbe lehanci mí lenɔ kpaviwo gbɛ do nɛnɛ." ²⁰ Eyi zeɖeka vɔ ɔ, wo tashi wowo 'dɔwo ɖɛ yi so kplɔɛ do. ²¹ Yesu zɔn yi ŋkɔ hwɛɖeka yi kpɔ fofo kodo nɔvi buwo, Ʒaki kodo Ʒan ciwo yi nyi Zebede eviɛwo . Wo le etɔjihun gangan mɛ kodo wowo 'da yi le eɖɔwo draa do. Yesu yɔ wo. ²² Zeɖeka vɔ ɔ, wo so gbe wowo 'da kodo etɔjihun gangan lɔ ɖɛ yi kplɔ Yesu do. ²³ Yesu ɖyi esa to Galile 'kan lɔ pleŋ mɛ yi le enu kplaan le Mawu sɛnxuwo yi le axwa doɔ yi sɔ le eŋɛnyui lɔ doɔ nɔ amɛ wo so jiŋkushi 'ƒiɔɖuɖu lɔ nu yi gbe le edɔ kodo lanmɛma leamɛshi vovovowo pleŋ daa nɔ amɛwo le jukɔ lɔ mɛ. ²⁴ Eyi yi nyikɔ gban do eto le sili 'ju lɔ pleŋ mɛ yi wo kplɔ amɛ ciwo pleŋ yi lé edɔ kodo amɛ ciwo pleŋ yi le gbazavi vovovowo seɛ vɛ nii: gbɔngbɔnvɔn le eji mɛ nɔ amɛɖewo yi amɛɖekawo le jigbudɔ wuɔ yi ata alo abɔ ku nɔ amɛɖewo le wo mɛ. Yesu da edɔ nɔ wo. ²⁵ Amɛɖekawo lɔ ahwa so Galile kodo Jugan Amɛwo 'kán mɛ yi kplɔ Yesu do. Amɛɖewo gbe lɔ ahwa so Ʒeluzalɛm jugan kodo Ʒude kodo ago hunɖaa ó ji nɔ Ʒuludɛn yi kplɔɛ do.