¹ Le ŋkeke hɔnwo ji ɔ, Ʒan amɛ ci yi wanɔ ʒinʒindotomɛ Mawu tɔ do zegbe ɖeka ji le ʒude 'kan mɛ yí le axwa doɔ yi dodoɔ eŋɛnyui lɔ be : ² "Mitrɔ míwoɖekiwo a ji. Ɖo ɔ, jiŋkushi 'fiɔɖuɖu lɔ gogo vɔ!" ³ Ʒan yi nyi amɛ ci nu yí Mawu 'ŋɛdotɔ Ezayi xo nuxu so sasa be: "Amɛ ɖeka le axwa do ɔ le zogbeji be: "Mí dra Mawu 'mɔ do, mí ɖe yi 'mɔ lɔwo nɔ wa jɔ:"" ⁴ Ʒan wa awu ci yi wo sɔ esɔ kpotɔnɔ 'fun tɔn kodo kpablanu ci yi wo sɔ gbaza wa ɖɛ. E ɖunɔ eklewo yi nunɔ anyishi ci wo ɖe le agbe mɛ do ji. ⁵ Ʒeluzalem juganmɛtɔwo kodo Ʒude 'kan mɛtɔwo pleŋ gbe sɔ kpenɔ Ʒuludɛn 'tɔ sasa lɔ balimɛtɔwo pleŋ vanɔ Ʒan gbɔ ⁶ yi va hunnɔ wowo nuvɔnwo gɔnmɛ le amɛshiamɛ ŋmɛ yi Ʒan wanɔ ʒinʒindotɔmɛ Mawu tɔnɔ wole Ʒuludɛn mɛ. ⁷ Ci yi Ʒan kpɔ be falisitɔ kodo sadukitɔ sugbɔ vava eye gbɔ nɔ ye a wa ʒinʒindotɔmɛ Mawu tɔ nɔ wo ɔ, e nu nɔ wo be: "Zakpata xomuwo, Mi yi dre le mí a wɛɛ do yi a to le eto ci yi Mawu jijiɛ a dɔn nɔ amɛ, majijiɖemɛ nɔ mi ɔ? ⁸ Mí nɔ agbe nyuiɖe yi a sɔ dansin be mí trɔ miwoɖekiwo yi ji. ⁹ Mí ŋgbe bubu ɔ, be nɔ li nunuɔ le míwoɖewo mɛ kpoŋ be! "Ablaham yi nyi míwo togbui" ɔ, yi sun go. Ɖo na nu nɔn mí be ekpe ciwo yí mí kpɔkpɔɔ hɔnɔ nɔ Mawu droɔ, asɔ wo trɔ jijimɛ viwo nɔ Ablaham ¹⁰ Eƒiɔ́ lɔ go le ekewoji nɔ aci lɔwo vɔ ge. Nɔ aciɖe de sɛn eku nyui go ɔ, wo a soi yi a sɔ dan ŋkpɛn do ezo mɛ. ¹¹ Enyɛ ɔ eshimɛ yi ŋ ʒin mí do le Mawu mɛ. Yi a sɔ dansin be mí trɔ míwoɖekiwo yi ji. Vɔ ɔ, amɛ ci wi le godu nɔ ŋ yi gbɔgbɔ ɔ, gbɔngbɔn kɔkɔɛ kodo ezo mɛ yi yɛ a ʒin mí do. Amɛ lɔ sɛnŋ sɔ wu ŋ. Yi ŋ de ji a ɖe 'ƒɔkpa wo le aƒɔ nii kpeti go. ¹² Atɛ le alɔ mɛ nii yi e jijiɛ a fu yi 'tiku yi doi do avamɛ ɖɛj vɔ ɔ, a lɔ́ egbejɔɛ (ehu) lɔ kɔ do ezo ci yi de cinɔ gbeɖe go mɛ." ^{13 14} Hwehɔnu ɔ, Yesu so le Galile 'kan mɛ yi va Ʒan gbɔ le Ʒuludɛn tɔsasa mɛ nɔ a ʒiin do eshi mɛ le Mawu mɛ. Ʒan gbe yi nu nii be: "Enyɛ yi ɖo a va eo nɔ na jin ŋ do 'tɔ mɛ le Mawu mɛ yi e va vá ŋgbɔ a?". ¹⁵ Vɔ ɔ, Yesu ɖo ŋci nii be: "xɔ egbe doji nɛnɛ yɛ gbɔhwe. Ɖo nɛnɛ han mì ɖo a wa do enu ciwo pleŋ yi Mawu dro ji do nɛ." Eyi Ʒan xɔ egbe. ¹⁶ Zeɖ"ka ci yi wo ʒin Yesu do 'shi mɛ le Mawu mɛ ɖe gbɔ yi e totoɔ le eshi lɔ mɛ, jiŋkushi hun nii yi e kpɔ yi Mawu gbɔngbɔn sɔ hwanlin nɔnɔ mɛ yi ɖyi je ji. ¹⁷ Eyi egbe ɖeka ɖyi so jiŋkushi yi nu be: " Amɛ cɛ yi nyi evinyɛ vevi; Ejijɔnɔ ŋ do nu"