¹ Ci yí Yesu nu enyɔ cɛwo ɖegbɔ ɔ, é nu nɔ́ yi nukplanviwo be: ² "Mí nya bé nyisɔ yi kpɔtɔ yi wo a ɖu atadodoamɛxwe lɔ. Hwehɔnnu yi wo a sa Agbetɔvi lɔ yí wo a lii yí a kiin dó acisoga ji nɛ. " ³ Eyi avɔsatɔwo gawo kpdo jukɔn lɔ mɛganwo vayi bɔdo avɔsatɔ ganganlɔ, kayifu xwe mɛ, ⁴ yí sɔ́ gbeta be yewo a be a lé Yesu keŋ yí a wui. Vɔ wo gbe nu bé: "Mí de ɖó a lii le exwe ji teŋ go. ⁵ Nɔ́ d'é nyí nɛnɛ go ɔ, jukɔn lɔ a va tɔ́ hunnyahunnya wawa." ⁶ Yesu yi Simɔ ci yí je ekpo sasa xwé le Betani. ⁷ Ci yí wo le ekplɔn nu yi le enu ɖuɔ ɔ, nyɔnu ɖeka hɛn amihwɛnte ehovevitɔ egu ɖɔɖɔ ɖeka dó alɔmɛ. É tegogo Yesu yí sɔ́ amihwɛte lɔ kodo eta nii. ⁸ Ci yi Yesu nukplanviwo kpɔ́ enu cí yí Nyɔnu lɔ wa ɔ, d'é jɔ eji nɔ wo eɖeeɖe go. Eyi wo biɔ se bé : "Nyi yí jɔ yi nyɔnu cɛ gblegble amihwɛnte ehovevitɔ ciɖe ahan ɔ? ⁹ Nɔ́ wo hɛn sa ɖee, wo d'a sa amihwɛte lɔ eho nɔnui yí a sɔ́ eho lɔ má nɔ́ wamɛnɔ wo bá!" ¹⁰ Yesu nya enyɔ ci nuɔ yi wo le yí biɔ́ wo se bé : "Nyi yi jɔ yí mí le efun ɖeɛ nɔ nyɔnu lɔ ɔ? Enunyui yi é wa nɔ ŋ. ¹¹ Ɖó enyɛ yɛ ɔ, ŋ d'a le mí gbɔ tɛgbɛ go. Vɔ ɔ, wamɛnɔwo wowo le mí gbɔ gashagamɛ. ¹² Ci yí nyɔnu cɛ kɔ ami lɔ dó ŋ ji ɔ, é doŋkɔ yí dra anyi lankpu do ko amihwɛnte sɔ́ ɖɛ́ nɔ́ anyi ɖyiɖyi gbe. ¹³ Le nyɔnnui mɛ ɔ, ŋ nunuɔ nɔ mí be afishafi ci yí wo a nú Eŋɛnyui lɔ le kodo axwa le xexe lɔ pleŋ mɛ ɔ, wo a lɔ exo so enu ci yí nyɔnu lɔ wa nu yí a ɖoɖoɔ eŋuii." ¹⁵ Ecɛyɛ ɔ, Yuɖa Ishikaliwɔti ci yí nyí Yesu nukplanvi wive lɔwo domɛtɔ ɖeka vayi kpɔ avɔsatɔwo 'gawo yí biɔ́ wo se be: Nɔ́ ŋ sa Yesu nɔ mí ɖee, nyi yi mí a ná ŋ ɔ. " ¹⁴ Eyi wowo hlɛn gajunho egban yí sɔ jó nii. ¹⁶ Gahɔnmɛ ɔ, Yuɖa tɔ fini ci yí á to yí asa Yesu nɔ wo jiji. ¹⁷ Le ŋkeke ŋkɔtɔ ji nɔ́ kpɔnnɔ cikemado xwe lɔ ɔ, Yesu nukplanviwo vá gbɔ́ yí biɔ́ɛ se be: " Fni yí è ji be mì a ɖa enu le nɔ eo le Atadodoamɛxwe lɔ ji nɔ ná va ɖu ɔ?" ¹⁸ Eyi Yesu nu nɔ́ wo be: "Mí yí jugan lɔ mɛ le mɛleli gbɔ́ a nú nii be: "Mɛgan nú bé wo lé nú nɔ́ eo be: anyi gamɛ sun. Ao 'wé yí enyɛ kodo anyi nukplanviwo a ɖu Atadoamɛxwe lɔ le."" ¹⁹ Nukplanvi lɔwo yi yí vayi wa do nyɔ ci yí Yesu nu nɔ́ wo ji yí ɖa enu nɔ́ Atadodoamɛxwe lɔ ɖuɖu. ²⁰ Fiɛshimɛ ɔ, Yesu kodo yi nukplanvi wive lɔwo nɔ anyinɔnɔ do ekplɔn nu yí a ɖu enu. ²¹ Ci yi wo ɖuɖu ɔ enu ɔ, Yesu nu bé: "Le nyɔnɔnui mɛ ɔ, ŋ nunuɔ nɔ mí bé míwo domɛtɔ ɖeka jijiɛ a sa ŋ" ²² Eyi nukplanvi lɔwo xá le wowoɖekiwo mɛ sugbo yi tɔ́ Yesu biɔbiɔse ɖeka ɖeka be: "Cicagan, enyɛ yɔ a?" ²³ Yesu ɖoŋci nɔ wo be: "amɛ ci yí enyɛ kodo yi fin 'lɔ bɔ dogo dó agban mɛ yí jijiɛ a sa ŋ. ²⁴ Agbetɔvi tɔ a kú shigbe lehan ci yi wo ŋwlii do Mawu 'nyɔ wemawo mɛ daɖɛ dó nɛnɛ. Vɔ ɔ babɛ nɔ́ amɛ ci yí a sɛɛ. Nɔ́ wo de ji sasa haan go , a nyɔ́ nii sɔwu!" ²⁵ Eyi Yuɖa, amɛ ci yí jijiɛ a sɛɛ biɔ se be: "Mɛgan, enyɛ yɔ a? " Yesu ɖoŋci ni be: "eo yí nii." ²⁶ Ci yí wo ɖuɖuɔ enu lɔ ɔ, Yesu sɔ kpɔnɔ ɖeka yí do akpe nɔ Mawu do jí yí mii mɛ yí sɔ ná yí nukplanviwo yí nu be: "Mí xɔ a ɖu. Eɛɛ yí nyi nyaŋ ŋcilan." ²⁷ Le i godu ɔ, Yesu sɔ vɛn kɔkpɔ ɖɔɖɔ ɖeka yí do akpe nɔ́ Mawu do jí yí sɔ ná yí nukplanviwo yí nú be: "Mí pleŋ mí sɔ nu. ²⁸ Ɖóɔ, ecɛ yí nyi nyaŋ 'hun, ehun ci mɛ yí mawu ɖó ekpe yí nublabla jí le. É kɔdo nyigban dó eta nɔ amɛ sugbɔwo 'nuvɔnwosɔsɔke ²⁹ ŋ nunuɔ nɔ mí be ŋ d'à gbe va nu vɛn buɖe kpɔ gbɔxwe yí a va nu vɛn yoyu le edanyɛ 'fiɔɖuxu lɔ mɛ go. ³⁰ Eyi ci yí wo ji akpedodo 'hawo ɖegbɔ ɔ, wo kpe olivu 'to jí ³¹ Yesu nu nɔ́ yí nukplanviwo be: " ezan cɛ mɛ ɔ na nyi afɔklɛnnu nɔ mí. Ɖó ɔ, wo ŋwlɛ dó Mawu 'nyɔ wemawo mɛ daɖɛ be: "Wo a vá wu lɛngbɔkplɔtɔ lɔ yí lɛngbɔ lɔwo a gbanhlɛn. ³² Vɔ ɔ, nɔ ŋ va fɔ́n so ekuwodi ɔ, na yi Galile 'kan mɛ yí a nɔ ete kpɔ mi le ehɔn." ³³ Eyi Piyɛ nu nii be: "nɔ́ a nyí afɔklɛnnu nɔ amɛwo pleŋ cań ɔ, enyɛ yɛ ɔ d'à nyii nɔ enyɛ gbeɖe go. ³⁴ Yesu ɖoŋci nii be: "ŋ nunuɔ nɔ eo le nyɔnɔnui mɛ be egbɛ cɛ ezanmɛ, gbɔxwe yí kloklo a ɖe a tɔ ɔ, a gbe zetɔn be ye de jeshi ŋ ɖɛ go." ³⁵ Hwehɔnnuɔ, Piyɛ nu be "Gbeɖe; nɔ wo nu be wo a wu ŋ kodo eo cán ɔ, ŋ d'à nu kpɔ be ŋ de jeshi eo ɖɛ go." Eyi nukplanvi kpɛtɛwo gbe nu nɛnɛ hɛnnɛ. ³⁶ Yesu kodo yi nukplanvi lɔwo vayi ɖo fini ci yí wo yɔnɔ be Gecemani. E nu nɔ wo be: "Mí nɔ anyinɔnɔ do elɛ nɔ ma yí dó egbe ɖaɖa le hunɖaa yí a gbɔ." ³⁷ Eyí é kplɔ Piyɛ kodo zebede eviɛ ŋsuvi amɛve lɔwo hɛn. Vɔnvɔn tɔ́ Yesu ɖoɖo yí 'lanmɛ shinshinshin nii. ³⁸ Eyi é nu nɔ wo be: "ŋ seseɛ vevi le nyɛɖeki mɛ kaka a ku. Mí nɔ ete kpɔ ŋ le elɛ yí a nɔ 'zanŋte kodo ŋ." ³⁹ Ci yí é teyi ŋkɔ hwɛɖeka ɔ, e je ekloji yí cɔ́n ŋmɛ anyi yi tɔ́ egbe dodoɖaɖa be: "Edanyɛ, nɔ enu é nyi ajɔ ɔ na nɔ efunkpekpe kɔkpu cɛ a tó akpa nɔ́ ŋ. Ŋgbé nyi ci ŋ dro yí a jɔgo. Vɔ ɔ, ci é dro." ⁴⁰ Le i godu ɔ, Yesu gbɔ va nukplanvi amɛtɔn lɔwo gbɔ yí va kpɔ yí wo le alɔn dɔn. Eyí é nu nɔ Piyɛ be: "Mí de sɛnŋ nɔ zanŋte kodo ŋ egaxoxo ɖeka kpetii go? ⁴¹ Mí nɔ ŋzɔn yí dodoɔ egbeɖaɖa nɔ mí ŋgbe va je tetekpɔmɛ go. Ɖó ɔ, agbetɔ gbɔngbɔn jinɔ be ye a wa enunyui, vɔ ɔ yi ŋcilan de kpenɔ ji go." ⁴² Yesu gbe teyi azɔge ké yí gbe dó egbeɖaɖa be: "Edanyɛ, nɔ́ vevesese cɛ d'à sɛ́n eŋ tó akpa nɔ ŋ go yí é nyí se na sii kokokoɔ, na ná nɔ ma wa ao dró!" ⁴³ Ci yi é gbe trɔ va yí nukplanvi lɔwo gbɔ ɔ, é gbe va kpɔ yí wo le alɔ́n dɔ́ɔn. alɔn wu egan wo. ⁴⁴ Yesu gbe te le wo nu zetɔntɔ lɔ yí gbe sɔ enyɔ ciwo é nu vayi pɛpɛpɛ gbe sɔ dó egbeɖaɖa ⁴⁵ Yí trɔ gbɔ va yi nukplanvi lɔwo gbɔ yí biɔ wo se be: " Mí kpɔtɔ le alɔn dɔɔn yí gbe gbɔngbɔn domɛ a? Gamɛ sun yí wo a sa agbetɔvi lɔ nɔ enuvɔnwatɔwo. ⁴⁶ Mi fɔn, a va mì a yi. mí kpɔ ɖá, amɛ ci yí sasa ŋ va ɖó!" ⁴⁷ Enyɔ lɔ nuɔ Yesu le yí Yuɖa ci yí nyi nukplani wive lɔwo domɛtɔ ɖeka va kɔɖɛ. Ahwa gangan ɖeka sɔ́ ewi kodo Yuɖatɔwo jukɔ lɔ mɛganwo yí dɔ wo ɖaɖa. ⁴⁸ Yuɖa, amɛ ci yí sasa Yesu lɔ nú kodo ahwakɔn lɔ dó jeshidu ɖeka jí be: amɛ ci yí na ki eshi nɔ ɔ, é yí yɔ. Mí lii." ⁴⁹ Yuɖa tegogo Yesu zeɖeka yí nu nii be: " cicagan, ŋ do egbe nɔ eo!" Keŋ yí kí eshi nii ⁵⁰ Yesu ɖoŋci nii be: "exlɔnyɛ, enu cigbe yí é tó ɔ wɛ" eyi amɛ kpɛtɛ lɔwo teje Yesu jí yí lii. ⁵¹ Amɛ ciwo yí le Yesu gbɔ domɛtɔ ɖeka sɔ ewi yí kpa eto nɔ avɔsatɔ gangantɔ lɔ 'dɔwavi ɖeka. ⁵² Eyi Yesu nu nii be: " sɔ ao dekpi dó aku mɛ. Ɖó amɛ ciwo pleŋ a sɔ dekpi dó amɛ ji ɔ, dekpi ke wo a gbe va sɔ wu wo. ⁵³ D'é nya be nɔ ŋ hɛn sasa na yɔ Edanyɛ be yi le va kpdo ŋ nuyí zeɖekaɔ, a dɔ dɔla ahwakɔn wive ɖaɖa ŋ ba? ⁵⁴ Vɔ nɔ ŋ wɛ nɛnɛɔ, enyɔ ciwo yí wo ŋwlɛ dó Mawu 'nyɔ wemewo mɛ d'à jɔ go. Ɖó ɔ wo ŋwlɛ dó wo mɛ be nɛnɛ han yí enu lɔ a jɔ dó nɛ." ⁵⁵ Le i gadu ɔ, Yesu va biɔ ahwakɔn lɔ se be: "sɔ mí sɔ ewi kodo ekpowo yí va ŋ le gbe shigbe flanfinɔ gangan ɖe yi ŋ nyi nɛnɛ a? Gashagamɛ ɔ, ŋ nɔnɔ Mawuxwe mɛ a kplankplan enu amɛwo. ⁵⁶ Vɔ ɔ, kpɔ mí de le ŋ go. Vɔ ɔ eŋɛ ciwo yí Mawu 'ŋɛ dtɔwo do yí wo ŋwlɛ do Mawu 'nyɔ wemawo mɛ daɖɛ akpɔ emɔ a jɔ ɔ, é yí na yí enu ́lɔwo va yi do nɛnɛ han jí." Eyi yi nukplanviwo kan le gbɔ gbɛɛn. ⁵⁷ Amɛ ciwo yi lé Yesu plɔɛ yi kayifu avɔsatɔ gangantɔ gbɔ fini ci yí esedɔwatɔwo kodo mɛganwo va bɔ do ⁵⁸ Piyɛ nɔ azɔge nɔ Yesu vɔ yí kploɛ do kaka wo vayi ɖo avɔsatɔ gangan lɔgbogbu mɛ. É nɔ a nyinɔnɔ dó gbadenu kodo avɔsatɔ gangantɔ 'mɛcɔtɔwo a kpɔ lehanci yí enyɔ lɔ a va ci dó ⁵⁹ Avɔsatɔ gangantɔwo kodo sɛnsɛn 'hwɛxɔnu lɔ pleŋ jijiɛ kunu ɖeɖe ci ji yí wo a zɔn a sɔ só ekuhwɛ nɔ Yesu. Nɔ é gbe nyi ŋsukankan 'nyɔ yɔ cán . ⁶⁰ Amɛ sugbɔ va kankan ŋsu do enu nɔ́ Yesu le wo gbɔ. Vɔ kpɔ́ wo de kpɔ́ eɖe le wo mɛ a sɔ go. Le vɔvɔnu ɔ, ŋsu amɛve ɖekawo va vá nu be: ⁶¹ " ŋsu hɔn nu be ye a gban Mawuxwe lɔ yí a gbe trɔ a cui le ŋkeke amɛtɔn mɛ" ⁶² Eyi avɔsatɔ gangantɔ lɔ va so je ete yí biɔ Yesu se be : " D'à ɖo ehwɛ ci amɛ cɛwo dodoɔ nɔ eo lɔ nu ba?" ⁶³ Vɔ ɔ Yesu bɔ enu kpli. Eyi avɔsatɔ gangantɔ lɔ gbe nu nii be: "Lé Mawu agbeagbe lɔ nyikɔ mɛ ɔ, ɖó enyɔ cɛ ŋci nɔ́ mì: eo yí nyí Kliso Mawu eviɛ lɔ a?" ⁶⁴ Yesu ɖoŋci nii be: "Eoŋtɔ yí nuinuɛ Vɔ, ŋ nunuɔ nɔ mí be so egbɛ ji ɔ mí a va kpɔ Agbetɔvi lɔ yí a nɔ anyinɔnɔ do ɖushimɛ nɔ́ ŋsɛnwopleŋtɔ lɔ yí a gbɔgbɔ le Jeŋkushizɔmɛ." ⁶⁵ Hwehɔnnu yí avɔsatɔ gangantɔ lɔ drɛn awu le ekɔ yí a sɔ dansi be enyɔ ci Yesu nu lɔ mɛ́ eji nɔ eye keŋ yí nu be : "É zu Mawu! Mì de gbe hián kunu ɖetɔ ɖe go! Mí se lehanci yí é zu Mawu doeviɛ. ⁶⁶ Lé yí míwo kpɔɛ do ɔ? Eyi wo nu be: "Eku yí je nii" ⁶⁷ yí tɔ́ etan cucu dó ŋmɛ nii yí tɔ́ ekɔn tɔtɔɛ. Amɛɖowo xoxoɔ tomɛ nii. ⁶⁸ Yi bibiɔɛ se be: "Kliso lɔ miwo yí xoxoɔ eo ɔ? Yɔ amɛ lɔwo nyikɔwo nɔ mì!" ⁶⁹ Piyɛ le anyinɔnɔ le gbadenu le axwe lɔ mɛ gboxwe yí edɔwavi nyɔnu ɖeka tegogoi yi nu nii be: "eo can è zɔnnɔ kodo Yesu, Galile 'kanmɛtɔ lɔ." ⁷⁰ Vɔ ɔ Piyɛ mɔ enyɔ le amɛshamɛ ŋmɛ yí nu be: "ŋ de nya enyɔ ci é nunuɔ go." ⁷¹ Le i godu ɔ, Piyɛ kpe agbomɔnu agé. Edɔwavi nyɔnu ɖeka gbe kpɔɛ yí nu nɔ́ amɛ ciwo le ehɔntɔxu lɔ be :" ŋsu cɛ zɔnnɔ kodo Yesu Nazalɛlitɔ lɔ." ⁷² Eyi Piyɛ gbe mɔ enyɔ lɔ ke yí nu be : "ŋ ta mawu be ŋ de jeshi ŋsu hɔn ɖɛ go." ⁷³ Sabaaɖe ɔ, amɛ ciwo yí le ehɔntɔxu tegogo Piyɛ yí nu nii be: "Yesu 'nukplanviwo domɛtɔ ɖeka yí è nyi nyao. Lehanci é dodo egbe lɔ do dansin fni ci è so." ⁷⁴ Eyi Piyɛ do axwa yí nu be: "Mawu le dɔn eto nɔ ŋ nɔ́ ŋ kankan ŋsu. Ŋ ta mawu nɔ mí be kpɔ́ ŋ de jeshi ŋsu hɔn ɖɛ go!" Kaka Piyɛ a nu nɛnɛ vɔ, koklo ɖe atɔ. ⁷⁵ Eyi Piyɛ ɖo eŋui enyɔ ci yi Yesu nu nii sasa ji be: "Gbɔxwe yí koklo a ɖe atɔ ɔ, à gbe ŋ zetɔn." Le i godu ɔ, é to je xexenu yí tɔ avin fanfan sɛnŋsɛnŋɖe