¹ Ci yí Yesu kodo yi nukplanviwo gogoɔ Ʒeluzalɛmu yí ɖoɖoɔ Bɛtifaʒe kɔxwimɛ le olivuci 'kpo gbɔ́ age ɔ, Yesu dɔ edɔ yi nukplanvi amɛve ² be: "Mí yi kɔxwi ci yí le ŋkɔ nɔ mí hɔn mɛ. Mí a kpɔ esɔkɛtɛ ashi ɖeka le eka mɛ yí eviɛ le axa nii. Mí cui yí a kplɔɛ vɛ nɔ ŋ. ³ Nɔ́ amɛɖe biɔ enyɔ ɖe mí se ɔ, mí a ɖoŋci nɔ́ amɛ lɔ be "Axwetɔ yí hiin."́ Nɔ mí nú ahan vɔ, wo a tashii nɔ mí zeɖeka." ⁴ Nɛnɛ ɔ, enyɔ ci yí Mawu nu daɖɛ to eŋɛdotɔ lɔ jí a jɔ. ⁵ "Mí nu nɔ Siyɔn jugan lɔ be: kpɔ ɖa ao 'fiɔ gbɔgbɔ eo gbɔ, amɛfacu ɖeka yí é nyi, é zɔ́n esɔkɛtɛ ashi ɖeka jí esɔkɛtɛ eviɛ ci yí hɛn nɔ agban ɖeka jí yí gbɔgbɔ" ⁶ Yesu nukplanvi amɛve lɔwo yi kɔxwi lɔ mɛ yí va yi wa do enyɔ ci yí Yesu nu nɔ́ wo jí ⁷ wo kplɔ esɔkɛtɛ ashi lɔ esɔkɛtɛ hwɛvi lɔ và yí sɔ́ wowo vuvɔwuwo vlú dó wo jí yí Yesu nɔ anyi nɔnɔ do jí. ⁸ Amɛ sugbɔ sɔ wowo vuvɔwuwo ɖó dó emɔ jí nii yí amɛ buwo sosoɔ aci 'lɔvi ciwo jí makpa le yí ɖoɖoɔ do emɔ lɔ jí. ⁹ Amɛ ciwo yí le ŋkɔ kodo amɛ ciwo yí le godu nɔ Yesu le axwa doɔ be: "kanfukanfu nɔ́ Davidi eviɛ! Mawu le yra amɛ ci yí gbɔgbɔ le yi nyikɔ mɛ. Kanfukanfu le jiŋkushi boo!" ¹⁰ Ci yí Yesu vayi ɖo Ʒelizalɛmu ɔ, eʒin tɔn le jugan lɔ pleŋ mɛ. Amɛwo biɔbiɔ se só Yesu ŋ be: "Mi yí nyí ŋsu hɔn ɔ? ¹¹ Ahwa ci yí kplɔ Yesu do lɔ ɖoɖoɔ ŋci be "Mawu ŋɛdotɛ Yesu, ci yí so Nazalɛti le Galile 'kan mɛ yɔ" ¹² Yesu yi Mawuxwe lɔ mɛ yí nya afisatɔ ciwo yile ehɔn lɔ tii. E trɔ ekplɔnwo cɔ́n manyi nɔ́ ehoɖɔlitɔwo yi gbe trɔ ʒinkpinwo cɔ́n manyi nɔ́ hwannisatɔwo hɛnɛ. ¹³ É nu nɔ be "wo ŋwlii ɖɛ be : "woa a yɔ́ nyaŋ 'xwemɛ be gbedoɖatɛxu." Vɔ ɔ míwo vá sɔ́ trɔ flafinɔ ganganwo 'gu jí!" ¹⁴ Ŋkuvitɔnnɔ kodo ekplɛxotɔ ɖeka wo tegogo Yesu le Mawuxwe lɔ mɛ yí é da edɔ nɔ wo. ¹⁵ Ci yí avɔsatɔwo 'gawo kodo essedɔwatɔwo kpɔ́ jeshidu ciwo yí é wawa kodo ɖevi ciwo yí le axwa doɔ le Mawuxwe lɔ mɛ be "kanfukanfu nɔ́ Davidi eviɛ!" ɔ, é vé wo ŋ. ¹⁶ Eyi wo biɔ Yesu be: "È se enyɔ ci yí nunuɔ a?" Yesu ɖoŋci nɔ́ wo be: "ɛɛ, ŋ sisiɛ. Mí de hlɛn enu ci yí wo ŋwlɛ do Mawu 'nyɔ wemawo mɛ be: "É wɛɛ be ɖevixwɛ̀wo kodo ɖevifɛnfinwo kankanfu eo" ba?" ¹⁷ Le i goduɔ, Yesu só gbe wo ɖɛ yí vayi dɔn Betani kɔxwimɛ. ¹⁸ Nyidin, ci yí Yesu trɔ gbɔgbɔ va Ʒeluzalɛmu jugan lɔ mɛ ɔ, shive ciciɛ. ¹⁹ Eyi é kpɔ figici ɖeka le emɔ yi tegogoi , vɔ kpɔ d'é kpɔ sɛnsɛn ɖele jí go. Amawo ɖekɛ yi é kpɔ le jí. É nu nɔ́ aci lɔ bé: "D'à gbe sɛn kpɔ go!" Eyi zeɖeka vɔ, aci lɔ xu so eji kaka kɔdó ekewo ji. ²⁰ Ci yí nukplanviwo kpɔ enu ci yí jɔ ɔ, e ji ŋ nɔ wo yí wo biɔ Yesu se be: " le figici lɔ pleŋ xú dó zeɖeka ahan ɔ?" ²¹ Yesu ɖoŋci nɔ wo be: "le nyɔnɔnui mɛ ɔ, ŋ nunuɔ nɔ mí be nɔ mí xɔ Mawu ji se yí mí de xoi kpɔ go ɔ, mí a sɛ́n wa enu ci yí ŋ wa nɔ figici lɔ. Hɛnɛ cán ɔ, mí a sɛń eŋ nu nɔ́ eto cɛ be "Ho a yi je axu mɛ" yi a gbe va mɛ. ²² Enu ciwo pleŋ yí mí a wa gbedoɖa kodo xɔse yí a biɔ Mawu ɔ, mí a xɔ wi." ²³ Yesu yi Mawuxwe lɔ mɛ yí tɔ enu kplankplan amɛwo yí avɔsatɔwo 'gawo kodo mɛgan ciwo yí le jukɔn lɔ mɛ tegogoi yí biɔ́ɛ se be : "Acɛ hin de yí è so le enu cɛwo wao ɔ? Mí yí ná acɛ lɔ eo ɔ? " ²⁴ Eyi Yesu nu nɔ́ wo be "Enyɛ can ma biɔ enyɔ ɖeka mí se. Nɔ́ mí ɖoŋci nɔ́ ŋ ɔ, ma nu fini ci yí ŋ kpɔ acɛ le yí wawa enu cɛwo nɔ́ mí. ²⁵ Agbetɔwo gé, Mawu gé, mi yí dɔ́ Ʒan ci yí wanɔ ʒinʒindotɔmɛ Mawu tɔ ɖaɖa ɔ?" Vɔ ɔ wo tɔ drɔɛdrɔɛ kpɔ́ le wowonɔnɔwo mɛ be: "Nɔ́ mì ɖoŋci nii be Mawu yí dɔ́ Ʒan ɖaɖa viɛ ɔ, á va biɔ mì se se be nyi yí jɔ yí mìwo de xɔ Ʒan 'nyɔwo jí se o mɛ. ²⁶ Vɔ ɔ, nɔ mì ɖoŋci nii be agbetɔwo yí dɔ́ Ʒan ɖaɖa viɛ ɔ, mì ɖó a vɔn nɔ ahwakɔn lɔ. Ɖo ɔ, amɛshiamɛ sɔ Ʒan do Mawu '́ŋɛdotɔ jí" ²⁷ Ci yí é le nɛnɛ ɔ, wo ɖoŋci nɔ́ Yesu be: " Mì de nyá amɛ ci yí dɔ Ʒan ɖaɖa go." Eyi Yesu nu be: " Enyɛ can ŋ d'a nú acɛ ci yí ŋ sɔ le enu hɔnwo waa nɔ́ mí go." ²⁸ Yesu nu be: "Mí ɖo eto yi a se enyɔ cɛ yí a nú dó nu. ŋsu ɖeka wa evi ŋsuvi amɛve ɖɛ. Gbeɖeka ɔ, é nú nɔ́ mɛgan xowutɔlɔ be : " evinyɛ, egbɛ ɔ, váyi wa edɔ le vɛncikan mɛ." ²⁹ Ɖevi lɔ ɖoŋci nii be: "oo, na yi go." Vɔ sabaaɖe ɔ, susu trɔ́ nɔ ɖevi lɔ yí é yi vɛncikan lɔ mɛ. ³⁰ Ŋsu lɔ gbe dɔ edɔ lɔ ké ɖevi amɛvetɔ lɔ yí yɛ ɖoŋci nii be: " é nyɔ́, mɛgan. Na yi". Gankegan kpɔ́ d'é yi go. ³¹ Le ɖevi amɛve lɔwo mɛ ɖee, hin deyi wa do edalɔ 'dro jí ɔ?" Eyi wo ɖoŋci nɔ́ Yesu be: "Ɖevi ŋkɔtɔ yí wa dó edalɔ 'dro jí." Hwehɔnnu yí Yesu va nu nɔ wo le be: "Le nyɔnnui mɛ ɔ, ŋ nunu ɔ, nɔ́ mí be: tagajɔtɔwo kodo hashiwatɔwo a ɖó Mawu 'fiɔɖuxu lɔ mɛ do ŋkɔ nɔ mí. ³² Ɖo ɔ, Ʒan ci wanɔ ʒinʒindotɔ mɛ Mawu tɔ vá mí gbɔ yí va kplan enu mí so Mawu 'dro wawa nu. Kpɔ́ mí d'é xɔɛ jí se go. Vɔ ɔ tagajɔtɔwo kodo hashiwatɔwo xɔ yi 'nyɔ lɔ jí se. Mí kpɔ́ enu hɔn tɔxu gankegan kpɔ́ susu d'é trɔ nɔ́ mí yí mí a xɔɛ ji se go." ³³ " Mí ɖo eto yí a se labalu bú. Agbledetɔ ɖeka li yí ɖó vɛncikan ɖeka yí cu ekpa trɔ doi. É ku vɛnfiɔnnu 'du gangan ɖeka dó ekpe mɛ dó mɛ. Ŋsu lɔ cu botakpɔtɔxɔ ɖeka dó ebo lɔ mɛ. ³⁴ Ci yi é wa enu lɔwo nɛnɛ ɖegbɔ ɔ, é sɔ vɛncikan lɔ xaya nɔ vɛngbledematɔwo yí yi mɔ jí. Ci yi jinukucancan gamɛ vá ɖó ɔ, ebo tɔ lɔ dɔ yi dɔwavi ɖekawo ɖaɖa vɛngbledematɔ lɔwo gbɔ nɔ́ wo a va xɔ jinuku ci yí wo

ma nii gbɛ.

³⁵ Vɔ ɔ, vɛngbledematɔ lɔwo lé edɔwavi lɔwo yí xo ɖeka le wo mɛ, yí wu amɛevetɔlɔ, yí dada ekpe amɛtɔntɔlɔ kaka yɛ ku. ³⁶ Gahɔn mɛ ɔ, ebetɔ lɔ gbe dɔ́ edɔwavi buwo ɖaɖa yi vɛngbledematɔ lɔwo gbɔ. Edɔwavi lɔ wowo su egbɔ sɔwu ŋkɔtɔwo. Vɔ ɔ, vɛngblemadetɔ lɔwo gbe wa enu ci yí wo wa kodo amɛ ŋkɔtɔwo han kodo amɛ evetɛ lɔwo. ³⁷ Le hɔnwo godu ɔ, ebotɔ lɔ vá dɔ yi ŋtɔ 'vi ɖaɖa wo gbɔ yí bubuɔ be nɔ wo kpɔ ye viye ɔ vɛngbledematɔ lɔwo a ɖó bubu yi nu. ³⁸ Vɔ ci yí vɛngblematɔ lɔwo kpɔɛ ɔ, wo nú nɔ́ wowo nɔnɔwo be: "Amɛ ci yí a va ɖu cinɔ agble lɔ esɔgodu mɛ ge. Mí na nɔ mì awui nɔ́ agble lɔ a trɔ mìwotɔ!" ³⁹ Eyi wo lii yí sɔ danŋkpe sɔ to vɛncikamɛ lɔ 'kpatámɛ yí wui" ⁴⁰ Eyi Yesu va biɔ se be: "Nɔ́ vɛncikangbledetɔ lɔ vá vá ɖee, nyi yí á wa kodo vɛngbledematɔ hɔn wo ɔ? ⁴¹ Wo ɖoŋci nii be: " nɔ́ é vá ɔ, a wu vɛngbledematɔ waŋshishi waŋshishi hɔnwo yí a sɔ yi vɛncikan lɔ jó nɔ́ vɛngbledematɔ bú ciwo yí a sɔnɔ jinuku ci yí wo ma nii va dó gamɛ jí." ⁴² Le enyɔ hɔn godu ɔ Yesu biɔ wo se be "Mí de hlɛn enu ci yí wo ŋwlɛ do Mawu 'nyɔ wemawo mɛ kpɔ bá? "Ekpe ci yí exɔ cutɔwo gbe ɔ, é yí trɔ ehovevo kpé le exɔ lɔ cucu mɛ. Mawu lɔ yí wɛɛ nɛnɛ. Enujiŋ é nyi nɔ́ mìwo agbetɔwo!" ⁴³ Yesu va nu kpii nɔ wo be : "Eyi ná taɖo ŋ nunuɔ nɔ mí be Mawu a ɖe mí tii le yi 'fiɔɖuxu lɔ mɛ yí a sɔ́ jó nɔ akɔta ci yí sɛn eku ⁴⁴ Amɛɖe kpokpoi ci yí a je ekpe cɛ jí a kankan yí amɛ ci jí yí ekpe cɛ a je a cuku." ⁴⁵ Avɔsatɔwo 'gawo kodo Falisitɔwo se labalu ciwo yí Yesu dodoɔ yí mɔŋje mɛ be yewo nu yí yi xoxoɔ nuxu so. ⁴⁶ Eyi wo tɔ́ fini ci yí wo tó a lii jiji. Vɔ ɔ, wo vɔnvɔb ahwakɔn lɔwo. Ɖó ɔ ahwakɔn lɔwo sɔ yesu shigbe Mawu 'ŋɛdotɔ nɛnɛ.