¹ Yesu nu nɔ́ amɛwo be: "Enu ci nu yi wo a sɛn eŋ dré jiŋkushi 'fiɔɖuxu lɔ dó ge: gbeɖeka ɔ, aggbledetɔ ɖeka fɔ́n ezan yí a xɔ ehodɔwatɔwo dó yi vɛncikan mɛ. ² É nui kodo wo dó eho gajɔn ɖeka ji nɔ́ ŋkeke 'dɔwawa yi dɔ́ wo ɖaɖa vɛŋcican lɔ ji ³ Agbledetɔ lɔ gbe to dógashiɖekɛ mɛ nu yí kpɔ́ ehodɔwatɔ bú ciwo yí le egodoxu edɔɖemawa. ⁴ Eyi é nu nɔ́ wo be "Miwo cán mí yi nyaŋ vɛncikan mɛ a yi wa edɔ nɔ ŋ. Na cú eho ci yí je nɔ mí." ⁵ Ci yí é nu ahanɔ, wo só yí yi yi vɛncikan lɔ mɛ. Agbledetɔ lɔ gbe to dó egawivemɛ nu kodo fiɛshi egatɔmɛ nu yí gbe dɔ amɛwo ɖaɖa yi vɛncikanmɛ shigbe lehanci yí é wɛɛ do vayisasa nɛnɛ. ⁶ Kpɛtɛkpɛtɛ lɔ ɔ, é vá tó dó wetrɔ egantɔn mɛ nu yí le egodoxu lɔ. É biɔ wo se be "Nyi yí ná taɖo yí mí le elɛ kaka je gacɛmɛ edɔɖemawa ɔ? ⁷ Wo ɖoŋci nii be "Amɛɖe de xɔ mí do edɔmɛ go" Eyi agbledetɔ lɔ nu nɔ́ wo be "Miwo cán mí yi nyaŋ vɛncikan mɛ a yi wa edɔ nɔ ŋ" ⁸ Ci yí ezan va dó ɔ, agbledetɔ lɔ nú nɔ́n amɛ ci yí kpɔkpɔ edɔwatɔ lɔwo jí nii be "yɔ edɔwatɔ lɔwo yí a cú amɛɖeka amɛɖeka 'fɛn nii. Tɔ́ efɛn lɔ cucu so amɛ ciwo yí vá vá vɛncikan lɔ mɛ kpɛtɛkpɛtɛ jí yí a vá sɔ vɔ do amɛ ŋkɔtɔwo jí." ⁹ Eyi wo cú gajɔnho ɖeka ɖeka nɔ́ amɛ ciwo yí vá vá vɛncikan lɔ mɛ do wetrɔ egaatɔn mɛ nu. ¹⁰ Ci yí wo vá ɖó amɛ ciwo yí vá vɛncikan lɔ mɛ doŋkɔ jí ɔ, wowo bubuɔ be yewo a xɔ sɔwu gajɔnho ɖeka ɖeka hɔ́n. Vɔ ɔ, gajɔnho ɖeka ɖeka lɔ yí wo gbe cu nɔ́ wo. ¹¹ Gacimɛ yí wo le eho lɔ xɔgɔ ɔ, wo to enyɔ toto nɔ́ agbledetɔ lɔ ¹² be: "Amɛ ciwo yí è va xɔ kpɛtɛkpɛtɛ ɔ, egaxoxo ɖeka 'dɔ́ yí wowo wa. Vɔ mìwo nɔ nyidɔn nu yí wa edɔ so nyidin kaka ezan do yí è va cú efɛn ŋmɛɖeka nɔ́ mìwo kodo wowo!" ¹³ Vɔ ɔ, agbledetɔ lɔ ɖoŋci nɔ́ amɛɖeka le wo mɛ be "ŋ de wa enuɖe kodo eo go. D'é nyi gajɔnho ɖeka jí yí mí nú do nɔ́ gbeɖeka 'dɔwawa ba? ¹⁴ Xɔ ao 'ho a yi axwe ɖ'aa. Gajɔnho ɖeka yí dró ŋ yí ŋ cu nɔ́ eo kodo amɛ ci yí vá vɛncikan lɔ mɛ kpɛtɛkpɛtɛ. ¹⁵ D'é nyí enu ci yí dró ŋ yi na sɔ nyaŋ 'ho waa ba? Hwan è hwan eŋ nɔ́ ci yí ŋ sɔ nyaŋ 'ho wa enyui nɔ amɛwo a? ¹⁶ Nɛnɛ yí amɛ godutɔwo a vá trɔ́ amɛ ŋkɔtɔwo yí amɛ ŋkɔtɔ wo a vá trɔ amɛ godutɔwo dó nɛ." ¹⁷ Gacimɛ yí Yesu yiyiɛ Ʒeluzalɛmu ɔ, é yɔ́ yi nukplanvi wive lɔwo yi ekpa yi nú nɔ́ wo be: ¹⁸ "Mi ge yigɔ Ʒeluzalɛmu viɛ ge, fini ci yí wo a sa Agbetɔvi lɔ do avɔnsatɔwo 'gawo kodo esedɔwatɔwo yí wo a nú be yi wu ehwɛ, yí je nɔ eku ¹⁹ yí a sɔ doashi nɔ́ amɛmanyí yuɖatɔwo. wowo a gbalii yí a dó sɔvaba nii yí a kiin dó acisoga nu yí le yi ŋkeke amɛtɔntɔ lɔ gbe ɔ, á fɔn so ekuwodi" ²⁰ Gahɔnmɛ ɔ, Zebede eviɛwo 'nɔlɔ gogo yesu kodo eviɛ lɔwo yí doŋdo nii yí jí be ye a biɔ enu yi. ²¹ Eyi Yesu biɔɛ se be : "Nyi yí é jí be na wa nɔ eo ɔ?" É ɖoŋci nɔ Yesu be "Ɖò egbe nɔ ŋ be gacimɛ yí ye a vá nyí efiɔ ɔ, evinyɛ cɛwo domɛtɔ ɖeka a nɔ ɖushimɛ nɔ eo yí evetɔ a nɔ emiɔmɛ nɔ eo." ²² Eyi Yesu nu be: "Mí de nya enu ci yí mí biɔbiɔ go. Vɔ ɖee, mí a kpé efunkpekpe kɔkpu ci nu gbe ŋ gbɔgbɔ ji a nu a?" Wo ɖoŋci nii be "ɛɛ mí a kpe jí" ²³ Eyi Yesu nu nɔ́ wo be " Mí a nu efunkpekpe kɔkpu lɔ shigbe enyɛ nɛnɛ nyao. Vɔ ɔ, d'é nyí enyɛ yí a cán amɛ ciwo yí a nɔ ɖushimɛ alo emiɔnmɛ nɔ ŋ go. Edanyɛ dra texwe hɔn lɔwo dó daɖɛ nɔ amɛ ciwo yí é can" ²⁴ Ci yí nukplanvi amɛwo kpɛtɛwo sii ɔ, wowo kpena amɛve lɔwo 'nú vé wo nú ²⁵ Yesu va yɔ́wo pleŋ lɔ bɔ yí nú nɔ́ wo be: "Mí nya be akɔtawo 'gawo Ʒinnɔ wowo 'jumɛviwo jí yi amɛkɔsuwo cán gbe Ʒinnɔ ejumɛvi lɔwo jí ²⁶ Vɔ ŋgbe nyi ahan nɔ́ míwo go. Nɔ́ miwo domɛtɔ ɖé jí be ye a nyí megan ɔ, le 'nyi edɔwavi nɔ́ amɛ kpɛtɛwo pleŋ. ²⁷ Eyi nɔ́ amɛɖe jí be ye a nyi ŋkɔnɔtɔ le mí mɛ ɔ, é ɖó a nyí miwo hwashi. ²⁸ Ahan yí Agbetɔvi lɔ de vá be amɛwo a nyí edɔwavi nɔ́ eye go do nɛ. Vɔ ɔ, é vá be ye a nyi edɔwavi nɔ́ amɛwo yí a sɔ ye 'gbe cu efɛn do eta nɔ amɛ sugbɔ nɔ́ wo a vo." ²⁹ Ci yi Yesu kodo yi nukplanvi lɔwo só le Ʒeliko jugan mɛ yí yigɔ ɔ, ahwa gangan ɖeka kplɔɛ do ³⁰ ŋkuvitɔntɔntɔnɔ amɛve ɖeka wo nɔ anyinɔnɔ do emɔtu. Ci yí wo se be Yesu vayigɔ ɔ, wo tɔ́ axwa dodo yɔ́ɛ be "Axwetɔ Davidi eviɛ, ku ŋshishi nɔ mí" ³¹ Ahwa ci yí kplɔ Yesu do lɔ ka aɖyi do wo be wo ŋgbe gbe do axwa go. Vɔ wo vá dodoɔ axwa dó jí yí yɔ́ Yesu be "Axwetɔ, Davidi eviɛ, ku ŋshishi nɔ́ mí!" ³² Eyi Yesu ci ete yí yɔ́ wo yí biɔ́ wo se be "Nyi yí mí jí be na wa nɔ míɔ?" ³³ Wo ɖoŋci nii be: "Axwetɔ, wɛ́ɛ nɔ mìwo ŋkuviwo a tɔ́ enu kpɔkpɔ" ³⁴ wowo nu wa ɖeka nɔ́ Yesu yí é sɔ alɔ tɔ ŋkuviwo nɔ́wo. Eyi Zeɖeka vɔ, wo amɛve lɔwo tɔ́ enu kpɔkpɔ yí kplɔ Yesu do.