¹ Hwehɔnnu ɔ, Yesu nukplanviwo gogoi yi biɔɛ se be: "Mi yi nyi amɛ kpɛn kpin le jiŋkushi fiɔɖuxu lɔ mɛ ɔ?" ² Eyi Yesu yɔ ɖevihwɛ ɖeka vá wowo dodomɛ ³ yí nú nɔ́ wo be : " le nyɔnɔnui mɛ ɔ, ŋ nunuɔ mi be nɔ́ mí de trɔ́ míwoɖekiwo yí ji yi vá le shigbe ɖevihwewo nɛnɛ o ɔ, mí d'a yi jiŋkushi fiɔɖuxu lɔmɛ gbeɖe o. ⁴ É yí na taɖo ɔ, amɛ ci yi nyi amɛ kpɛnkpin le jiŋkushi fiɔɖuxu lɔ mɛ yí nyi amɛ ci yí sɔ́ yiɖeki hwenɔ yí vá nɔnɔ shigbe ɖevihwɛ cɛhan nɛnɛ. ⁵ Nɔ amɛɖe kpɔ dó ŋ nu yi xɔ ɖevi cɛwo domɛtɔ ɖeka ɔ, enyɛŋtɔ yi e xɔ." ⁶ Yesu nu be: "Nɔ́ amɛɖe nyí afɔklɛnu nɔ́ amɛmanyinuɖe hɔn ciwo yi xɔ ŋ ji se domɛtɔ ɖeka dó enuvɔ mɛ ɔ, nɔ́ wo sa ekpe gangan ɖeka dó ekɔ nii yí sɔ́ daŋkpɛn axu gɔnmɛ ɔ, a nyɔ́ nii sɔwu. ⁷ Xexe lɔ le jɔgbevɔin mɛ ge a! Afɔklɛnuwo d'a dɛ́n le mɛ go. Vɔ ɔ, babɛ nɔ amɛ ci ji yí nɛnɛ 'nú a tó yi avá! ⁸ Nɔ ao 'lɔ alo ao 'fɔ nyi afɔklɛnnu nɔ eo ɔ, sòi daŋkpɛn do jijitexu. A nyɔ́ eo be à yi agbe adoduitɔ lɔ mɛ kodo alɔ ɖeka alo afɔ ɖeka sɔwu be ci alɔ amɛve alo afɔ amɛve ale eo shi yi wo a sɔ́ eo daŋkpɛn do e zomavɔ mɛ. ⁹ Eyi nɔ́ ao ŋkuvi nyí afɔfkɛnnu nɔ eo ɔ, ɖii yí a sɔ́ɛ daŋkpɛn dó jijitexu. Á nyɔ́ nɔ́ eo be á yi agbe adoduitɔ lɔ mɛ kodo ŋkuvi ɖeka sɔwu bé ci ŋkuvi amɛve ale eo shi yí wo a sɔ́ eo daŋkpɛn dó ezomavɔ mɛ." ¹⁰ Yesu nu be: "MÍ kpɔ nyuiɖe nɔ́ mi ŋgbe wa enuɖe kodo amɛmanyi enuɖe cɛwo domɛtɔ ɖe go. Ŋ tɛtɛ egbe do jí nɔ́ mí be wowo dɔlawo le edanyɛ gbɔ hweshiahwenu le jiŋkushi. ¹¹ Ɖó ɔ, amɛ ciwo yí bú yí Agbetɔvilɔ vá avá h́wlɛngan. ¹² Hin yí mí kpɔ so enyɔ cɛ nu ɔ? Ŋsu ɖeka yí wa lɛngbɔ ekave howi ɖɛ yí ɖeka bú nú le mɛ. Dá tashi kpɛtɛwo dó ekpo ɖeka ji yí ayi ji ci yi bú lɔ kpɔ ba? ¹³ Le nyɔnɔnui mɛ ɔ, na nu nɔ mi be nɔ́ é sɛ́n eŋ vayi kpɔ kuɖeka ci yi bú lɔ ɔ, á ná jijɔyi sɔwu ekave howo hoashiɖekɛ ciwo yi de bú lɔ o. ¹⁴ Nɛnɛke yí míwo 'da ci yi le jiŋkushi de lɔnnɔ be amɛ kuɖeka lé bú le amɛ manyienuɖe cɛwo mɛ go nɛ." ¹⁵ Yesu nu bé: "Nɔ́ nɔvio xɔsetɔ wu ehwɛ do eo ɔ, ɖeka vayi kpɛ yí a ɖe ehwɛ lɔ mɛ nii. nɔ́ é sii nɔ eo ɔ, á nyi è xɔɛ gan. ¹⁶ Vɔ nɔ́ d'é sii nɔ eo goɔ, kplɔ̀ amɛɖeka alo amɛ amɛve bɔdo eoɖeki nú nɔ́ mí a xo enyɔ lɔ le kunuɖetɔ amɛve alo amɛton ŋmɛ shigbe lehanci yí wo ŋwlii do Mawu 'nyɔ we mamawo mɛ daɖɛ dó nɛnɛ. ¹⁷ Vɔ nɔ́ d'é sii nɔ amɛ lɔwo o ɔ, nui nɔ́ Mawu 'há lɔ. Nɔ́ de sii nɔ Mawu 'ha lɔ o ɔ, sɔ eyɛ 'shigbe maxɔsetɔ alo tagajɔtɔ nɛnɛ. ¹⁸ Le nyɔnɔnui mɛ ɔ, ŋ nunuɔ nɔ mí be: "eenu ciwo pleŋ yí mí a gbe le nyigban ji ɔ, wo á gbé wo le jiŋkushi yi enu ciwo pleŋ yí mí a lɔn le nyigba ji ɔ, wo a lɔn wo e jiŋkushi. ¹⁹ Le nyɔnui mɛ, ŋ gbe nunuɔ nɔ mí hɛnnɛbe nɔ́ amɛ amɛve xɔ egbe do enuɖe ji le nyigban ji yi biɔɛ ɔ, edanyɛ ci yí le jiŋkushi a sɔ́ɛ ná wo. ²⁰ Ɖó fini ci yi amɛ amɛve alo amɛ amɛtɔn a bɔdo le nyaŋ nyikɔ mɛ ɔ, ŋ le wowo domɛ." ²¹ Hwehɔnnu ɔ, Piyɛ gogo Yesu yí biɔɛ se be: "Axwetɔ, ze nɛni yí nɔvinyɛ a wu ehwɛ do ŋ yi na sɔ́ kii ɔ? Zeadrɛ yɔ́ a?" ²² Yesu ɖoŋci nii bé: Oo, ŋ de nú nɔ eo be zeadrɛ yɔ́ go. Vɔ ɔ, ze ekahowi howo texwe amadrɛ. ²³ É yí ná taɖo yí wo a sɛ́n eŋ dre jiŋkushi 'fiɔɖuxu lɔ dó enyɔ cɛ nu be: efiɔ ɖeka ji gbeɖeka be ye 'dɔwaviwo avá jó kɔnŋta nɔ eye. ²⁴ Ci yí é tɔ jí ɔ, wo kplɔ edɔwavi ɖeka vá nii yí yɛ ɖu shikalho linlɔn ɖeka dii. ²⁵ Ci yí edɔwavi lɔ de sɛ́n eŋ cu efɛnlɔ nii o ɔ, yi 'gá ɖe egbe be wo lé sɔ́ yi kodo ashiɛ kodo wa hwashi yí a sa yi agbe sa enu ciwo pleŋ yí le shi yi a sɔ́ eho lɔ cú efɛ lɔ nɔ́ eye. ²⁶ Eyi edɔwavi lɔ doŋdo do akɔnmɛ nii yi nu nii be: "ŋɖe kuku nɔ́ eo be eo lé ná yí gamɛ hwɛɖeka ŋ nɔ́ ma cú efɛ lɔ pleŋ nɔ́ eó!" ²⁷ Yí 'nú wa ɖeka nɔ́ ega lɔ yí é sɔ efɛn lɔ kii yi tashi yí éyi. ²⁸ Ci yí edɔwavi hɔn so ɖedo ɔ é vayi do ego yi kpena edɔwaviwo domɛtɔ ɖeka ci yí ɖu eho hwɛhwɛ ɖeka dii, le emɔ jí. É lé awu do ekɔmɛ nii yi bɔ ŋ." ²⁹ Yi kpena lɔ je ekloji dó akɔnmɛ nii yi nu nii bé : "ŋɖe kuku nɔ́ eo lé ná gamɛ hwɛɖeka ŋ nɔ́ ma cú efɛn lɔ nɔ́ eo! ³⁰ Vɔ ɔ, é gbe yí kplɔ yi kpena lɔ yi cu do gakpamɛ nɔ́ a nɔ hɔn kaka a sɔnanɔ hwecinu yí á cú efɛn lɔ pleŋ nii ɖegbɔ. ³¹ Ci yi yi kpenawo kpɔ́ enu ci yí jɔ́ ɔ, é kpaca wo sugbɔ yí wo vayi to yi pleŋ nɔ́ wowo gá. ³² Eyi ega lɔ dɔ́ yi wo vayi kplɔ edɔwavi lɔ va nii. Yi enu nii be: Edɔwavi xomɛvetɔ! Ci yi eɔ ɖe kuku nɔ́ enyɛ ɔ, enyɛ ŋ sɔ efɛn manumanu hɔn ci yi eɔ ɖu do enyɛ sɔ ke eo. ³³ Nyi yí ná taɖo yí eɔ d'a kú ŋshishi nɔ́ ao kpena shigbe lehan yi enyɛ ŋku ŋshishi nɔ eɔ do nɛnɛ go ɔ? " ³⁴ Dɔmɛ ve ega lɔ sugbɔ yi e cui do gakpamɛ nɔ́ wo a dó aya nii kaka a sɔnanɔ hwecinu yí á va cu yi 'fɛn lɔ pleŋ nii vɛ. ³⁵ A sɔ́ cú eta nɔ enyɔ lɔ ɔ, Yesu nu bé: nɛnɛhan yí edanyɛ ci yí le jikushi a vá wa kodo mí nɔ́ miwo domɛtɔ ɖeka ɖeka de sɔ́ enu kenɔ nɔviɛ kodo yi ji blebu o nɛ."