¹ falisitɔwo kodo sadukitɔwo tegogo Yesu yí a doi kpɔ. Wo nú nii be yi le wa jiŋkushimɛ jeshidu ɖeka nɔ́ yewo a kpɔ́ yí a nyá be Mawu yí dɔ́ɛ ɖaɖa. ² Vɔ Yesu ɖoŋci nɔ́ wo be: "nɔ ewe yí exɔ, ɔ, mí núnɔ be "esɔ ci yí gbɔgbɔɔ xexemɛ a hun, ɖoɔ, xexemɛ bia" ³ yí nyidin kucukucu ɔ, mí núnɔ be: "Eshi a ja gbɛ; ɖóɔ xexemɛ le fucuu". Nɔ xexe lɔ a nɔ do eɖeɔ, mí kpɔnɔ eyɛ yí nyanɔ gankegan kpɔ́ mi de kpɔnɔ enu ci yi jɔjɔ go. ⁴ Egbɛviwo amɛvɔnwo egbejimanɔtɔwo jijiɛ jeshidu a kpɔ. Vɔ kpɔ wo d'a gbe wa jeshidu buɖe nɔ́ wo sɔ́ zeto Mawu 'ŋɛdotɔ ʒonasitɔ nu go. " Ci Yesu nú ahan ɔ, é só le wo gbɔ yí ɖedó. ⁵ Yesu nukplanviwo ŋlɔbe kpɔnnɔwo sɔsɔ gbɔxwe yí yi ago eɖetɔ lɔ ji nɔ axu lɔ. ⁶ Eyi Yesu nú nɔwo be "Mí kpɔ nyuiɖe le Falisitɔwo kodo sadukitɔwo kpɔnnɔcikewo nú" ⁷ Eyi nuplanviwo tɔ nunu nɔ́ wowo nɔ wowonɔnɔwo be "Ci yí mi de hɛn kpɔnnɔ oɔ, eyi dɔ taɖo yí é nunuɔ ahan." ⁸ Yesu nya be wo le enyɔ hwlɛn le wowonɔnɔwo mɛ yí nú be "Nyi yi na taɖo yí mí le enyɔ hwlɛn so kpɔnnɔ mahɛn ŋci ɔ? Mí gbe Mawu jí makan do ge a! ⁹ Mi de se enyɔ ci yí gɔnmɛ ŋ nunuɔ hɔɖeoba? Mi de ɖoɖoɔ eŋui kpɔnnu a matɔn ciwo yí ŋ sɔ na mí yí mí ma nɔ ŋsu hlɛhlɛnmɛ kotokun amantɔn (5000) kodo kpɔnnɔ kishi nɛni ci yí kpɔtɔ yí mí lɔ oba. ¹⁰ Mí de ɖoɖoɔ eŋui kpɔnnu ama drɛ ci yí ŋ sɔ́ ná mí yí mí ma nɔ́ ŋsu hlɛnhlɛnmɛ kotokun amɛnɛ(4000) kodo kpɔnnɔ kishi nɛni ci yí kpɔtɔ yí mí lɔ oba? ¹¹ Hwecinu yí ŋ nunuɔ nɔ mí be míwo le kpɔ nyuiɖe le Falisitɔwo kodo sadukitɔwo kpɔnnɔcike nu ɖee, lé é wɛɛ do yí mí de nya be d'é nyi kpɔnnɔ nú yí enyɛ, ŋ xoxoɔ nuxu so ɔ?" ¹² Hwehɔnnu yí nukplanviwo vá nyá le be d'é nyi cike ci yí wo sɔ nyanɔ kpɔnnɔ 'wɔ nú yí xoxoɔ nuxu so nɔ yewo nɛ go. Vɔ ɔ, Falisitɔwo kodo sadukitɔwo 'nukplanmɛnyɔwo nú yí yi xoxo nuxuso nɔ́ yewo. ¹³ Yesu yi sezale Filiputɔ 'kan mɛ agbé. É biɔ yi nukplanviwo se be: "Mi yí amɛwo nunɔ be agbetɔvi lɔ nyi ɔ?" ¹⁴ Eyi wo ɖoŋci nii be " amɖekawo nunɔ be eo nyi Ʒan amɛ ci yí wanɔ ʒinʒindotɔmɛ Mawutɔ, amɛɖewo nunɔ be eo nyi Eli yí amɛ buwo gbe nunɔ be eo yí nyi Ʒelemi alo Mawu 'ŋɛdotɔwo domɛtɔ ɖeka" ¹⁵ Eyi Yesu va biɔ wo se be: "Míwo ɖee, mi yí miwo nunɔ be ŋ nyi ɔ? ¹⁶ Simɔ Piyɛ xɔ nuxu yí ɖoŋci nii be: "Eo yí nyi Klisolɔ, Mawu agbeagbe lɔ eviɛ." ¹⁷ Gahɔnmɛ yí Yesu nu nii be: "Enu yí nyɔ́ nɔ́ eo, Simɔ, Ʒonasi eviɛ. Ɖo d'é nyi agbetɔ yi ɖe nyɔnɔnui hɔn dansin nɔ eo go. Vɔ ɔ, edanyɛ ci yí le jeŋkushi yí ɖii eo. ¹⁸ Ecɛyɛ ɔ na ná nyik eo be Piyɛ ci gɔnmɛ yí be ekpegbaja. Ekpegbaja hɔn jí yí na cu nyaŋ 'hamɛ dó nɛ yí eku d'a kpɔ emɔ le nu go. ¹⁹ Na sɔ́ jiŋkushi 'fiɔɖuxu safliwo na eo. Enu ci yí agbé le nyigban jíɔ, wo a gbii le jiŋkushi yí enu ci yí á lɔn le nyigban jiɔ, wo a lɔn le jiŋkushi." ²⁰ Gahɔnmɛ yí Yesu ɖe egbe nɔ́ yi nukplanviwo le veviɖemɛ be wo ŋgbe nú nɔ amɛɖe be eye yí nyi Kliso lɔ go nɛ. ²¹ Sɔso hwehɔnnu ɔ, Yesu tɔ enyɔ mɛ ɖeɖe nɔ yi nukplanviwo be: "ŋ ɖo a yi Ʒelusalemu. Nɔ ŋ va yi ɖo hɔn ɔ mɛganwo, avɔsatɔwo 'gawo kodo esedɔwatɔwo a ɖe efun nɔ ŋ sugbɔ wo a dɔ yi wo awu ŋ. Eyi le ŋkeke amɛtɔntɔ lɔ gbe ɔ, na fɔń so ekuwodi." ²² Eyi Piyɛ kplɔɛ yi ekpa yí vayi ka aɖyi enyɔ lɔ dii be: "Mawu ŋgbe lɔn nɔ́ enu hɔn a jɔ do eo jí go. Gbeɖe, Axwetɔ, a jɔ go!" ²³ Vɔ ɔ, Yesu trɔ yí nú nɔ́ Piyɛ be "Gbò yi ɖaa Legba ! Afɔklɛnnu yí è nyi nɔ́ ŋ le anyi 'mɔ jí. Ɖo ɔ, d'è ɖeɖeɛ susu shigbe Mawu nɛnɛ go; è ɖeɖeɛ susu shigbe agbetɔ nɛnɛ." ²⁴ Yesu nu nɔ yi nukplanviwo be: " amɛɖe ji be ye a kplɔ ŋ do, é ɖó a ŋlɔbe yiŋtɔ 'drowo yí a dró yí cisoga keŋ yí a kplɔ ŋdo. ²⁵ Ɖó nɔ́ amɛɖe ji be ye a hwlɛn ye 'gbe gan ɔ, a bui. Vɔ ɔ nɔ́ amɛɖe bú yí 'gbe do nyaŋ 'ta ɔ a gbe yi kpɔɛ. ²⁶ Ele hinde yí a nyi nɔ amɛ, nɔ xexemɛ dɔkunuwo pleŋ suin gankegan yí é bu yi 'gbe ɔ? Nyi yí a sɛn eŋ sɔ xwle yi gbe ɔ? ²⁷ Ɖo Agbetɔvi lɔ a vá trɔ gbɔ le edalɔ klɛnklɛn mɛ kodo yi dɔlawo yí a vá ɖó texwe nɔ amɛɖeka amɛɖeka shigbe le é nɔ agbe do nɛnɛ. ²⁸ Le nyɔnɔnui mɛ ɔ, ŋ nunuɔ nɔ mí be : amɛɖewo le elɛ viɛ yí wowo d'a kú gbɔxwe yí a kpɔ́ Agbetɔvilɔ yí a gbɔgbɔɔ shigbe efin nɛnɛ go."