¹ Amɛwo kan seŋ só Yesu nu nɔ́ Elodi Ancipasi, amɛ ci yí kplɔkplɔ Galile 'kan Hluehɔnnu. ² Eyi é nu nɔ yi "dɔwaviwo be: "Ʒan Mawushilenɔamɛtɔ yí fɔ só ekuwodi! Eyi na taɖo yí yiɖo ŋsɛn yí wawa jeshiduwo. ^{3 4} Ɖó́ ɔ, Elodi xɔ nɔviɛ Filipu ashiɛ ci yí wo yɔnɔ be Elodi yadi yí sɔ ɖe yí Ʒan nu nii be: "ese de ɖé emɔ nɔ eo le ɖe Elodiyadigo." Enyɔ hɔn yí Ʒan nu nii yí é ɖe egbe yí wo lii yí cui dó gakpa mɛ. ⁵ Elodi ji be ye a wu Ʒan. Vɔ, é vɔnvɔn nɔ yuɖatɔwo Jukɔn lɔ. Ɖéɔ, Jukɔn lɔ bunɔ Ʒan dó mawuŋɛdotɔ ji. ⁶ Gankegan gbeɖeka ci yí Elodi le yí Jigbe zan duɔ, Elodiyadi eviɛ nyɔnuvi va ɖu ewe le mɛdruwo ŋmɛ. Lehanci é ɖu ewe lɔ do jɔ́ eji nɔ elodi. ⁷ Yi é ɖo egbe nɔ nyɔnuvi lɔ yí ta enu do jí be nɔ́ yi biɔ enu ɖe eye ɔ, ye a nii. ⁸ Eyi nyɔnuvi 'nɔlɔ kplan enu nyɔnuvi lɔ yí nyɔnuvi lɔ nu be: " Ná Ʒan Mawushilenɔamɛto 'ta ŋ dó kpanutasɛ mɛ le elɛ viɛ́. ⁹ Enyɔ lɔ wa ɖeka nɔ efiɔ lɔ yí é ci ŋshishi mɛ. Eyi é ɖe egbe be wo le vayi sɔɛ va nii. Ɖó ɔ, é tá enu do ji le mɛdruwo ŋmɛ. ¹⁰ Nɛnɛ ɔ, é dɔ́ amɛ ɖeka ɖaɖa yí yɛ vayi só eta nɔ́ nɔ́ Ʒan le Gakpa lɔ mɛ. ¹¹ Amɛ lɔ sɔ́ eta lɔ dó kpanutasɛ mɛ yí sɔɛ ná nyɔnuvi lɔ yí yɛ xɔɛ yí sɔɛva enɔlɔ. ¹² Eyi Ʒan 'nukplanviwo va sɔ́ yi 'cɔ lɔ yi yi ɖyi yi vayi nu le enu lɔwo jɔ do nɔ Yesu ¹³ Ci yí Yesu se enu ci yiwo wa kodo Ʒan ɔ é ɖo etɔjihun gangan ɖeka mɛ yí so le ehɔntɔxu. É kpe Fini ci yí amɛwo de su su egbɔ le go yi a nɔ ehɔntɔxu yiɖekɛ. Vɔ ɔ, ahwakɔn lɔwo gbe nya Finici yí é yigɔ yí toso jugan juganwo mɛ yí zɔ́n afɔ kplɔɛ do. ¹⁴ ci yí Yesu dyi le etɔjihum lɔ mɛ yí kpɔ ahwa gangan lɔ ɔ, amɛ lɔwo 'nu wa ɖeka nii yí é da edɔ nɔ dɔnɔ ciwo yí le wo mɛ. ¹⁵ Ci yí ezan do ɔ, Yesu 'nukplanviwo gogo Yesu yí nu nii be : " Ablixe yí fini ci mì le gbe jiji do axwe gbɔ. Ná emɔ amɛ lɔwo kpleŋ nɔ́ woa yi kɔxwi kɔxwiwo mɛ a yi xwle enu yí a ɖu." ¹⁶ Eyi Yesu nu nɔ́ wo be: " D'é Ʒán bé wo a yi kɔxwi kɔxwio mɛ ahan go. Míwoŋtɔwo, mí ná enu wo nɔ́ wo a ɖu !" ¹⁷ Vɔ ɔ, Nukplanviwo lɔwo nu nii be: "Kpnnɔ amatɔn kodo kpavi amɛve kpaŋ yí le mì shí le elɛ viɛ́" ¹⁸ Yesu nu nɔ wo be: "Mí sɔ́ wo vɛ nɔ ŋ. " ¹⁹ É ɖe egbe nɔ ahwakɔn lɔwo yí wo nɔ anyi nɔnɔ dó egbewo jí yí é sɔ kpɔnnɔ amatɔn lɔwo kodo kpavi amɛve lɔwo yí kpɔ́ Jiŋkushi yí dó ekpe nɔ́ Mawu. Ci yí é wa nɛnɛ ɖegbɔ ɔ, é má kpɔnnɔ lɔwo ma nɔ ahwakɔn lɔwo. ²⁰ Wo kpleŋ ɖu amnu yí xodu dɔ wo kaka ci yí nukplanvi lɔwo bɔ́ kpɛtɛ ɔ, é ɖɔ́ kishi wive. ²¹ ŋsu ciwo yí ɖu enu hlɛnhlɛnmɛ nyí kotokun ́amatɔn (5000) nyɔnuwo kodo ɖeviwo manɔ́mɛ. ²² Le yi godu Zeɖeka ɔ, Yesu Ʒin yi nukplanviwo ji be wo le ɖo etɔjihun gangan mɛ yí a jeŋkɔ ago eɖetɔ lɔ ji nɔ axu lɔ. Gahɔnmɛ ɔ, yiŋtɔ a klanklan ahwakɔn lɔwo. ²³ Ci yí Yesu klan wo ɖegbɔ, é yi eto ɖeka ji yí a vayi tɔ egbe dodoɖa wawa. Azan do yí yiɖekɛ kpɔtɔ le ehɔntɔxu. ²⁴ Etɔjihun gangan ci mɛ yí Yesu nukplanvi lɔwo le lɔ ɖó axu lɔ dodomɛ yí axu lɔ blabla yí va gbangban do nuú. Ɖó ɔ , jihɔn xo yí dodoɔ ego wo. ²⁵ Nyidin kucukúcú, Yesu zɔn zɔnlin to axu 'shi lɔ ji yí kpé wo gbɔ. ²⁶ Ci yi nukplanviwo kpɔɛ yí é zɔn eshiji yi gbɔgbɔ wogbɔ ɔ, wo vɔn yí nu be ! " ŋɔlin yɔ a !" yí tɔ vɔnvɔn 'xwa dodo. ²⁷ Vɔ zeɖeka ɔ, yesu xo nunu dó wo jí yi nu nɔ́ wo be: " mí ŋgbe vɔn go. Mí do eji, enyɛ yɔ!" ²⁸ Eyi Piyɛ xɔ nunu yí nu nii be : "axwetɔ, nɔ́ enyi kpɔ́ be eo yɔ ɔ, ɖè egbe nɔ́ ma zɔn eshiji yi a vá eo gbɔ." ²⁹ Yesu nu nii be : " và!" Eyi Piyɛ dyi le etɔjihun gangan lɔ mɛ yí tɔ zɔnzɔn to eshi lɔ ji yí kpé Yesu gbɔ. ³⁰ Ci yí é va kpɔ be Jihɔn sɛnsɛn eŋ ɔ, vɔnvɔn doi yí é tɔ eshi gɔnmɛ yiyi yí dóaxwa be: "axwetɔ xɔ́ nɔ ŋ!" ³¹ Eyí zeɖeka vɔ, Yesu do alɔ ɖaɖa yí lii yi nu nii be : "è gbe Mawu ji ma kando a! Nyi yí na taɖo yí è xoi kpɔ?" ³² Wowo amɛve lɔ ɖo etɔjihun gangan lɔ mɛ yí jihɔn lɔ mí xoxo. ³³ Ganhɔnmɛ yí amɛ ciwo yí le etɔjihun gangan lɔ mɛ va doŋdo nii yi nu be: "Mawuvi yí è nyi nyɔnɔnui." ³⁴ Yesu kodo yi nukplanviwo só etɔ lɔ ɖegbɔ yí vayi dó ʒenɛzalɛti 'kan mɛ. ³⁵ Ekan lɔ tɔwo kpɔ́ Yesu yí Jeshi yí dó eŋe ɖaɖa amɛ ci wo pleŋ yi le ekan lɔ mɛ yi wo kplɔ́ edɔnɔwo pleŋ vɛ nii. ³⁶ wo ɖeɖeɛ kukú nii be yi le lɔn nɔ́ wo a tɔ́ alɔ awutuga nii kpoŋ. Eyi amɛ ciwo pleŋ yi tɔ alɔ yi ɔ, edɔ mi nɔ́ wo.