¹ gbehɔngbe lɔ ke ɔ Yesu to le axwe mɛ yí va nɔ anyinɔnɔ do axwo 'tu. ² Eyi amɛwo lɔ́ ahwa yi va cɔin sugbɔ kaka yi é glo yi é va yi nɔ anyinɔnɔ do etɔjihun gangan ɖeka mɛ le axwu lɔ ji yiamɛ lɔwo le agoji. ³ E kplan enu sugbɔ wo sɔto labaluwo mɛ be: "Gbeɖeka ɔ, jinukuwutɔ ɖeka yi jinuku wugbe. ⁴ Gacimɛ yí é le jinuku lɔ wuɔ ɔ, jinuku ɖekawo je emɔtu yí xeviwo va sɔ wo ɖu, ⁵ eɖewo je ekpenyigban ji, fini ci yí ekɔ de su egbɔ le, yi gbe mi trololo. Ɖo eku de Ʒin wo sugbɔ go. ⁶ Vɔ ci yí nyidɔn va tɔ veve ɔ, wo fiɔn yí gbe ku. Ɖo ɔ, eke de yi egu nɔ wo sugbɔ go. ⁷ Jinuku ɖewo je aŋwakan mɛ yí aŋwakanwo flu yi cɔn wo ji; ⁸ vɔ ɔ, eɖwo je nyigban zozu ji yí sɛn eku: eku ɖekawo sɛn eku ekeve howi, ekeve howi, ebuwo sɛ eka howi eka howi yi ebuwo ke gbe sɛn egban egban." ⁹ Eyi Yesu va nu nɔ wo be: " Nɔ eto li nɔ amɛɖe ɔ le se!" ¹⁰ Eyi nukplanviwo tegogoi yí biɔɛ se be: "Nyi yi jɔ yí é do labalu yí sɔ xoxoɔ nuxu nɔ amɛlɔwo ɔ?" ¹¹ E ɖo ŋci nɔ wo be: " Míwo ɔ, Mawu dansin jiŋkushi 'fiɔɖuxu lɔ mɛ 'nuwlawlawo nɔ mí. Vɔ ɔ, Amɛ kpɛtɛwo ɔ, wo de dansin wo nɔ wo go. ¹² Ɖo amɛ ci shi yí enu le ɔ, wo a gbe nii doji yí a le shi zan. Vɔ nɔ enuɖe de le amɛɖe shi ɔ, kankin ci yí a le shi can ɔ, woa gbe xwɛ le shi. ¹³ Enu ci yi taɖo yi ŋ xoxo nuxu nɔ wo sɔto labalu mɛ nɛ. Ɖo nɔ ŋkuviwo gbe le ete nɔ wo cuaan ahan can ɔ, wo de kpɔkpɔ enu go yi nɔ wo gbe le eto ji can ɔ, wo de seseɛ enyɔ ɖe kaka yi a va yi se yi gɔnmɛ go. ¹⁴ Nɛnɛ ɔ, enyɔ ci yi Mawu nu sɔto yi 'ŋɛdotɔ Ezayi ji va mɛ. É nu be: 'Mí a se enyɔ ci yi wo nu nyuiɖe vɔ kpɔ mí da se yi gɔnmɛ go; ŋkuviwo a le ete nɔ mí nyuiɖe, vɔ kpɔ mí da kpɔ enuɖe go. ¹⁵ Ɖo ɔ, enu de gbe wawa eɖe le lanmɛ nɔ jukɔn cɛ go. jukɔn lɔ mɛtɔwo cu wowo 'towo, yí ŋwla wowo ŋkuviwo a mi enu kpɔkpɔ, a mi enu etonusese, ami enu gɔmɛsese, gahɔmɛ nɔ wo ŋgbe va trɔ woɖekiwo a ji nɔ ma da edɔ nɔ wo go." ¹⁶ Míwo yɛ ɔ enu yí nyɔ nɔ mí. Ɖo míwo 'towo seseɛ enu! ¹⁷ Le nyɔnɔnyui mɛ ɔ, ŋ nunuɔ nɔ mí be Mawu 'ŋɛdotɔ kodo amɛ jɔjɔɛ sugbɔ ji be yewo a kpɔ enu ci yi míwo kpɔkpɔ cɛ yi wo de kpɔɛ go, yewo a se enu ci yi míwo seseɛ cɛ yi wo de si go." ¹⁸ Ecɛviɛ " mi ɖo eto a se labalu ci yi ŋ do so jinukuwutɔ lɔ nú gɔnmɛɖeɖe. ¹⁹ Amɛ ci yí se yi xonɔ nuxu so efiɔɖuɖu lɔ nu gankegan yi de senɔ yi gɔnmɛ o le shigbe emɔtu fini ci yí jinuku lɔ je nɛnɛ. Legba vá ɖenɔ enyɔ ci yi é se le susu mɛ nii. ²⁰ Amɛbu gbe li yi le shigbe ekpe nyigban nɛnɛ, fini ci yi ́ jinuku lɔ je ; nɔ́ eyɛ se enyɔ lɔ, ɔ, eyɛ xɔɛni zeɖeka kodo jijɔ. ²¹ Vɔ ɔ, kpɔ de donɔ eke le mɛ go. Eyí sabaa ɔ, a gbe bu le susumɛ nii ɖo nɛnɛ mɛ ɔɔ, nɔ́ é tɔ aya ɖuɖu alo wo tɔ efun ɖeɖe nii dó Mawu nyɔ lɔ ji, zeɖeka ɔ, d'é gbe xɔnɔ Mawu ji se go. ²² Amɛbu gbe li hɛnnɛ yí le shigbe aŋɔakanwo mɛ fini ci yí jinuku lɔ je nɛnɛ. Amɛ hɔn senɔ enyɔ lɔ vɔ ɔ, xexe cɛ mɛ xaxawo kodo dɔkunu fluamɛ fluamɛwo va fɔnnɔ nii yí kponɔ adan nɔ enyɔ lɔ yí yɛ de gbe wanɔ ɖekpokpoi go. ²³ Kpɛtɛ lɔ ɔ, amɛɖe ɖeka li yí nyí nyigbanzozu ci han ji yí jinuku lɔ je. Nɔ́ amɛ hɔn se enyɔ lɔ, é senɔ yi gɔmɛ yi sɔ wanɔ edɔ yí é sɛnnɔ eku le mɛ É sɛnnɔ ekave howi ekave howo , egban." ²⁴ Yesu gbe do labalu bu be: " Nɔ wo a xo nunu so jiŋkushifiɔɖuxu lɔ nu ɔ, wo hɛn wo a nu be : ŋsu ɖeka kan jinuku 'nyui do yi bomɛ. ²⁵ Gbeɖeka le ezanmɛ hwecinu yí amɛshamɛ le alɔn dɔn ɔ, ŋsu lɔ ketnɔ va dó égbevɔin ɖeka dó eliku lɔ mɛ. ²⁶ Ci yí enu lɔwo va mi yí vá tɔ evi kpankpan ɔ, egbe vɔin lɔ vá zé hɛnnɛ. ²⁷ Eyi ŋsu lɔ 'dɔwaviwo va biɔɛ se be : "Axwetɔ, ci yí è kan jinuku 'nyui dó ao 'bomɛ ɖee, fini yí egbe vɔin cɛ so yí va mi do mɛ ɔ?" É ɖoŋci nɔ́ wo be : " ketɔ ɖeka yí wɔɛ nɛnɛ." ²⁸ Eyi yi 'dɔwavi lɔwo biɔɛ se be: " È lɔn be mìwo le vayi ho egbevɔin lɔwo si a?" ²⁹ Ŋsu lɔ ɖoŋci nɔ wo be: "gbeɖe. Ɖó nɔ́ mi le egbe vɔin lɔwo ho si ɔ, mí d'a nya gbɔxwe yí a vayi hohoɔb eliku lɔwo kodii go. ³⁰ Mí tashi wowo amɛve lɔwo nɔ́ wo a shin do eju. kaka a sɔ nanɔ hwecinu yí wo a ɖe jinukuwo. Na nunɔ edɔwatɔwo hwehɔnnu be wo le ho eta eta yí tɔ́ ezo wo. le i godu ɔ, wo a sɔ́ eliku lɔ gbá ava nɔ ŋ."" ³¹ Yesu gbe do labalu bu nɔ́ wo be: "jiŋkushifiɔɖuxu lɔ le shigbe acikuwliwli ɖeka nɛnɛ. Ŋsu deka doi do yi 'bomɛ. ³² Aciku hɔn yí wli sɔwu acikuwo pleŋ nɛ. Vɔ ci yi é va mi yí shin ɔ, é va gangan sɔwu xɔkpan 'gb"le ciwo yí yi 'lɔviwo va ɖo atɔwo do mɛ. ³³ Yesu gbe do labalu bu nɔ wo be: "Nɔ́ wo a xo nuxu so jiŋkushi 'fiɔɖuxu lɔ nu ɔ, wo hɛn wo a nu be jiŋkushifiɔɖuxu lɔ le shigbe kpɔnnɔcike ci yí nyɔnu ɖeka ɖeɖe ɛ kɔdo kpɔnnɔɣɔ sugbɔ ɖeka mɛ kak i pleŋ vá ho jekɛɛ nɛnɛ." ³⁴ Yesu nu enyɔ hɔnwo pleŋ nɔ amɛ ciwo yí lɔ́ a hwa yí va gbɔ sɔto labaluwo mɛ. D'égbenɔ labalu ma do nɔ amɛwo gbeɖe, nɔ́ é kplankplan enu wo go. ³⁵ É wanɔ nɛnɛ nɔ́ enyɔ ci yí mawuŋɛdotɔ ɖeka nu a jɔ: "Na xo nuxu sɔ tó labalu mɛ, na xo nuxu so enu ciwo yí le wlawla mɛ so hwecinu yí ŋ wa xexe lɔ nú." ³⁶ Ci yí Yesu so le ahwakɔn lɔwo gbɔ yí yi axwe mɛ ɔ, yi 'nukplanviwo tegogoi yí biɔ sogbɔ be: "Ɖè labalu ci yí è do so egbevɔin ci yí le bomɛ lɔ nu gɔnmɛ nɔ́ mì." ³⁷ Yesu ɖoŋci nɔ́ wo be: " Amɛ ci yí kan jinuku 'nyui lɔ yí nyí agbetɔvi lɔ. ³⁸ Yí ebo ci ji yí wo kiin do nyí xexe lɔ. Jinuku nyui lɔ nyi amɛ ciwo yi nyi jiŋkushifiɔɖuxu lɔ tɔ yí egbevɔin lɔ nyí amɛ ciwo yí nyí legba tɔ. ³⁹ Ketɔnɔ ci yí va dó egbe vɔin lɔ dó ebo lɔ mɛ yí nyi legba yí jinukucancan hwenu lɔ nyi hwecinu yí xexe a trɔń yí edɔwatɔwo nyi dɔlawo ⁴⁰ Lehanci yí wo bla egbe vɔin lɔ yí sɔ danŋkpɛn do ezo mɛ do' ɔ, nɛnɛ lɔ ké yí a va nyi vɔvɔnu nɛ. ⁴¹ Agbetɔvi lɔ a va do yi dɔlawo ɖaɖa yí wo a vá bɔ amɛ ciwo pleŋ yí dɔnnɔ amɛ kpɛtɛwo so xɔse 'mɔ jí kodo enuvɔnwatɔwo yí alɔ wo sii le yi 'fiɔɖuxu lɔ mɛ, ⁴² Yi a sɔ́ wo danŋkpɛn dó ezo gangan lɔ mɛ. Ehɔntɔxu yí wo a fan avi yí a ɖu aɖukli le nɛ. ⁴³ Vɔ yi amɛ ciwo le egbeji nɔ Mawu a le ezɔ daa le wowo 'da 'fiɔɖuxu lɔ mɛ shigbe le ewe danɔ ezo do nɛnɛ. Nɔ́ eto li nɔ amɛɖe ɔ, lé se!" ⁴⁴ Jiŋkushi 'fiɔɖuxu lɔ le shigbe dɔkunu ɖeka ci yí le wlawla mɛ le ebo ɖeka mɛ nɛnɛ. ŋsu ɖeka kpɔ dɔkunu hɔn yí gbe sɔ wla. Eji jɔɛ kaka yí é vayi sa enu ciwo pleŋ yí le shi yí sɔ eho lɔ xwle ebo lɔ ⁴⁵ "Jiŋkushi 'fiɔɖuxu lɔ gbe le shigbe ajɔtɔ ci yí le cigan jenuwo jiɛ nɛnɛ. ⁴⁶ Ci yí é kpɔ cigan jenu vehoveho ɖeka ɔ, é váyi sa enu ciwo pleŋ yí le shi yí sɔ eho lɔ xwlii." ⁴⁷ Yesu gbe yi enyɔ lɔ ji be: "Jiŋkushi 'fiɔɖuxu lɔ gbe shigbe eɖɔ ci yí wo da ɖaɖa axu mɛ yí é le kpavi hamɛhamɛwo nɛnɛ. ⁴⁸ Nɔ kpavi ɖɔɛ ɔ, eɖɔdatɔwo dɔinni va agogbe yí nɔnɔ. anyinɔnɔ yí à tra kpavi lɔwo mɛ. wo sɔnɔ kpavi 'nyuiwo dó kishi mɛ yí sɔnɔ ciwo yí de nyɔ́ o danŋkpɛn. ⁴⁹ Nɛnɛ yí anyi hwecinu yí xexe lɔ a trɔn nɛ. Mawudɔlawo a can nyuiwo le axa nɔ amɛvɔnwo. ⁵⁰ Yí a sɔ amɛvɔn lɔwo danŋkpɛn dó ezo gangan lɔ mɛ. Hɔntɔxu yí woafan avi yí a ɖu aɖukli le nɛ." ⁵¹ Yesu yi enyɔ lɔ ji yí biɔ yi nukplanviwo se be: "Mí se enyɔ ciwo yí ŋ nu pleŋ gɔnmɛ a?" Wo ɖóŋci nii be: "ɛɛ." ⁵² Eyí é nu nɔ́ wo be: "ahan yí é le do taɖo yí nɔ́ wo kplan enu esedɔwatɔ ɖé so jiŋkushi 'fiɔduxu lɔ nú ɔ, eyɛ a le shigbe axwe 'gá ci yí ɖeɖeɛ enu yoyuwo kodo enu xoxwiwo toi le yi dɔkunuwo mɛ ⁵³ nɛnɛ." Ci yesu do labalu hɔnwo ɖegbɔɔ, é só le hɔntɔxu. ⁵⁵ Yi ́ yi jugan ci mɛ yí é nɔ yí shin yí tɔ enu kplankplan amɛwo le Mawusɛnxu ci yí le hɔntɔxu lɔ.. Lehanci yi é kplankplan jí eŋ nɔ amɛ ciwo yí kpɔ tɔxu yí wowo biɔbiɔ wowoɖekiwo se be: "fini yí é kpɔ́ ŋununyanya hɔn só ɔ? Fini yi é kpɔ ŋsɛn le yí le jeshidu cɛwo wa ɔ? ⁵⁴ D'é nyi acikpatɔ eviɛ yɔ bá? D'é nyi nɔviɛ ŋsuwo yí nyi Ʒaki, Ʒozɛfu , Simɔ kodo Ʒudi bá? ⁵⁶ Nɔviɛ nyɔnuwo pleŋ de le mí mɛ yɛ bà? Fini yí é vayi kpɔ́ ŋununyanya kodo ŋsɛn cɛwo só ɔ?" ⁵⁷ Enu cɛ nyi afɔklɛnu nɔ́ wo yí wo de xɔ Yesu ji se go. Eyi Yesu va nú nɔ wo be: "Axwe Mawu 'ŋɛdotɔ de nuini nɔ́ amɛ yí wo sɔɛni go." ⁵⁸ Jimaxɔse wowotɔ na be Yesu de sɛ́n eŋ wa jeshidu sugbɔ le ehɔntɔxu go.