¹ Le gahɔnwomɛ le gbɔngbɔngbe ɔ, Yesu to ebo ɖeka ciwo jí yí wo kan eliku do yí vayigɔ. Shive ciciɛ yi nukplanviwo yí wo tɔ́ jinuku lɔ sunsun ɖu. ² Ci yí Falisitɔwo KPɔ wo ɔ, wo nu nɔ́ Yesu be "kpɔ́ enu ci yí ao nukplanviwo wawa ɖa, wo wawa enu ci yí míwo 'sé de ɖe emɔ nɔ wo a wa gbɔngbɔngbe go!". ³ Eyi Yesu biɔ wo se be: "Mi de hlɛn enu ci yí Davidi wa kpɔ bá? Gbeɖeka, ci yi shive ciciɛ yiŋtɔ kodo amɛ ciwo yí kplɔɛni do ɔ, ⁴ e ɖó Mawuxwe lɔ mɛ yí yi kodo yi 'mɛ lɔwo ɖu kpɔnɔ ciwo yí wo sɔ́ sá avɔ nɔ́ Mawu. Vɔ kpɔ́ ese ɖe de ɖe emɔ nɔ́ wo be wo le ɖu nɛnɛ 'nu go. Avɔsatɔwo ɖeka yi Mìwo 'se lɔ ɖe emɔ nɛnɛ tɔ nɔ́. ⁵ Alo mí de hlɛn le ese ci yí Mawo sɔ́ to Mɔyizi ji mɛ be avɔsatɔ ciwo yí le edɔ mɛ le Mawuxwe mɛ gbɔngbɔngbe a da le gbɔngbɔngbe 'sewo ji gankegan yí wo d'a dó ehwe ɖe wo go ba? ⁶ Ŋ nunuɔ nɔ mí be enu le fini ci yi mí le cɛ yi wu egan Mawuxwe lɔ. ⁷ wo ŋwliin ɖɛ be : "ŋshishikukunɔ amɛ jiɛ ŋ le. Ŋ de jijiɛ go." Nɔ mí se enyɔ cɛwo gɔnmɛ nyuiɖe ɔ, mi d'a dodoɔ ehwe nɔ́ xomɛvo nɔwo go. ⁸ Ɖó ɔ, Agbetɔvi lɔnyí etɔ nɔ́ gbɔngbɔngbe lɔ." ⁹ Ci yí Yesu so le hɔntɔxu ɔ, é yi wowo Mausɛnxu ɖeka mɛ. ¹⁰ Amɛɖeka ci yí alɔ ɖeka ku nɔ́, le hɔntɔxu lɔ. Falisitɔwo jijiɛ a do ehwɛ nɔ́ Yesu. E yí na taɖo yi wo biɔɛ se be: "Míwo se ɖe emɔ be wo le da edɔ nɔ amɛ gbɔngbɔngbe a?" ¹¹ Eyi Yesu ɖoŋci nɔ́ wo be : "Mi yi le miwo domɛ yí nɔ lɛngbɔ kuɖeka ci yí le shi jie edu mɛ gbɔngbɔngbe d'a sɔɛ toi go ɔ? ¹² Agbetɔ xɔ ashi sɔwu lɛngbɔ. Ci yí é le nɛnɛ ɔ, mìwo 'sé ɖe emɔ bé wo lé wa enyui nɔ amɛ gbɔngbɔngbe." ¹³ Eyi Yesu nu nɔ ŋsu lɔ be: "Vlú ao 'lɔ." Ŋsu lɔ vlú alɔ lɔ yí edɔ mí nii yí alɔ gbɔ va shigbe lehanci yi eve tɔ lɔ le do nɛnɛ. ¹⁴ Eyi Falisitɔwo toyi ekpa keŋ a ɖe susu so lehanci yi wo a wɛɛ do yi a wu Yesu nu. ¹⁵ Ci yí Yesu se be wo bla egbe do eye nu ɔ, e so le fini ci yi é le lɔ. Amɛwo gbe lɔ ahwa kplɔɛ do yí é da edɔ nɔ edɔnɔwo pleŋ. ¹⁶ Vɔ ɔ, é do ese nɔ́ wo veviɖe be amɛɖe ŋgbe vayi nu amɛ ci ye nyi nɔ amɛɖe go. ¹⁷ Nɛnɛ ɔ, eŋɛ ciwo yí mawu do to yí 'ŋɛdotɔ Ezayi ji a jɔ: ¹⁸ "Nyan 'dɔwavi ci yí ŋ can lɔ ge. Amɛ ci yí ŋ de lɔnnɔ enu le ekɔ nɔ go. Eji jɔnɔ ŋ do nú. Na ná yí nyaŋ Gbɔngbɔn a le ji yí á dra lehanci yí na so kojo jɔjɔɛ amɛwo dó nɔ akɔtawo ¹⁹ D'a hwlɛn enyɔ kodo amɛɖe go yí d'á dó axwa go. D'á xo nuxu kaka yí amɛɖe a se yi 'gbemɛ le emɔganwo jí go. ²⁰ D'á ŋɛ́ klogbuci yí xlixa go yí d'á ci kaligban ci yí de jɛjɛɛ nyuiɖe go. Ahan yí awɛɛwɛɛ kaka a sɔna gacimɛ yí á na yi esejiwawado a ɖu eji. ²¹ Yi akɔtawo pleŋ a sɔ́ wowo 'mɔkpɔkpɔ da dó yi nyi kɔ ji nɛ" ²² We kplɔ ŋsu ɖeka vɛɛ nɔ Yesu. ŋsu hɔn de kpɔnɔ enu go. Yí de xonɔ nuxu go. Ɖo ɔ, gbɔngbɔnvɔn le eji mɛ nii. Yesu da edɔ nɔ ŋsu lɔ yí é tɔ nuxu xoxo yí gbe tɔ enu kpɔkpɔ. ²³ É ji eŋ nɔ́ ahwakɔn lɔwo yí wo nú be "Davidi eviɛ lɔ nɛ a? ²⁴ Ci yí Falisitɔwo se enyɔ hɔn ɔ, wo nu be: "Belizebuli gbɔngbɔnvɔnwo ga yí na ŋsɛn yii yí é sɔ́ nyanyan gbɔngbɔn vɔnwo!" ²⁵ Vɔ ɔ, Yesu nya susu ci ɖeɖeɛ gɔ. Eyi é nu nɔ wo be : "Nɔ egbe de le eju nɔ efiɔɖuxu lɔ ɖe mɛtɔwo go ɔ, efiɔɖuxu lɔ d'á sɛ́n eŋ li eke go.Nɔ jugan ɖe alo axwe ɖe mɛtɔwo le evu wagɔ le wowo nɔnɔwo mɛ ɔ, jugan lɔ alo axwe lɔ a gban. ²⁶ Eyi na taɖo nɔ legba nyanya Legba alo le ahwa wagɔ kodo yiɖeki ɖee, le yi 'fiɔɖuxu a wɛɛ a li eke do ɔ? ²⁷ Nɔ nyi kpɔ be Belizebuli gbɔngbɔnvɔnwo 'ga ŋsɛn yi ŋ sɔ́ le gbɔngbɔnvɔnwo nyagɔ ɖee, mi ŋsɛn míwo 'mɛwo sɔ nyanya wo gɔ ɔ? Míwo 'mɛwo ŋtɔwo yí ɖe dansin be miwo 'nyɔ de jɔ go. ²⁸ Vɔ ɔ, enyɛ yɛ ɔ, Mawu gbɔngbɔn yí na ŋsɛn ŋ yí ŋ sɔ nyanya gbɔngbɔnvɔnwo. Ci yí é lé nɛnɛ ɔ, jiŋkushishi 'fiɔɖuxu lɔ le mí gbɔ vɔ. Amɛɖekpokpoi de li yí a yi ŋsu agbo 'xwe mɛ yí a vati lɔ yi dɔkunuwo, nɔ amɛlɔ de doŋkɔ yi le ŋsu agbo lɔ yi blɛ́ɛ go. ²⁹ Vɔ nɔ́ e blɛ́ɛ ɖegbɔ ɔ á sɛn eŋ fi yi dɔkunuwo pleŋ dru fɛɛ. Nɔ amɛɖe de le kodo ŋ ɔ, á nyi amɛlɔ fɔn egu do ŋ nu. ³⁰ Nɔ́ amɛɖe de kplɔkpɔ amɛwo va ŋ gbɔ go, á nyi amɛ wo yí é nyanya do egbe nɔ ŋ. ³¹ Eyi na taɖo yí ŋ nunuɔ nɔ́ mí be nɔ́ amɛɖe wa enuvɔn alo nɔ́ amɛɖe zu Mawu ɔ, woa sɔ kii. Vɔ ɔ, nɔ amɛɖe zu gbɔngbɔn kɔkɔɛ ɔ, o d'a sɔ ku̇ kpɔ go. ³² Nɔ́ amɛɖe nu enyɔɖe yi sɔ fɔn egu do Agbetɔvi lɔ nu ɔ, wo a sɔɛ kii. Vɔ nɔ amɛɖe nu enyɔ yí fɔn egu do gbɔngbɔn kɔkɔɛ nu ɔ wo d'a sɔɛ kii le xexe cɛ kodo ci yi gbɔgbɔ mɛ go" ³³ "Aci 'nyui ɔ, eku nyui yí e sɛnnɔ yí aci vɔn a gbe sɛn ekuvɔn. Yí aci vɔn a gbe sɛn eku vɔn Nyɔnɔnyuitɔ ɔ, acikusɛnsɛn yí wo kpɔnɔ yi sɔdonɔ ieshi aci. ³⁴ ZAkpata 'kannuwo! Lé é wɛɛ do yí miwo ciwo nyi amɛvɔnwon a sɛnŋ nu enyɔ 'nyui ɔ? Ɖo enyɔ ci yí ɖɔ ejimɛnɔ amɛ ɔ, eyi é nunɔ. ³⁵ Enu nyui nɔnɔ ejimɛ nɔ amɛnyui yí nɔnɔ ejimɛ nɔ amɛnyui yí ɖenɔ tii yi amɛ vɔn ɔ, enuvɔin yí nɔnɔ ejimɛ nii yi e ɖenɔ tii. ³⁶ Ma nu nɔ mí be enyɔ gbali ciwo yi wo nu, yí wo a ɖo kojo do le kojo ɖogbe. ³⁷ Ɖo enyɔ ciwo yí é nu yi wo a kpɔ yi a sɔ ɖo kojo kodo eo, Enyɔ ciwo yí amɛ nu yí a ɖe dansin be yi wu ehwɛ alo yi de wu ehwɛ go." ³⁸ Esedɔwatɔ ɖkawo kodo Falisitɔ ɖekanwo nunɔ Yesu be: "Mɛgan, mì ji be eo le wa jeshidu ɖeka nɔ mí a kpɔ." ³⁹ Yesu ɖo ŋci nɔ wo be: "Egbɛwi amɛvɔnwo, egbejimanɔtɔwo jijiɛ jeshidu a kpɔ. Vɔ kpɔ wo da gbe wa jeshidu buɖe nɔ wo sɔ zeto Mawu. 'Ŋ ɛdotɔ Ʒonasi tɔ nu go. ⁴⁰ Ɖo le hanci yí Ʒonasi nɔ kpavi gangan domɛ sɔnanɔ ŋkeke amɛtɔn, ezan amɛtɔn do ɔ nɛnɛ lɔ ke yí agbetɔvi lɔ a va nɔ nyigan ćumɛ sɔnanɔ ŋkeke amɛtɔn, ezan amɛ tɔ do nɛ. ⁴¹ Ci yí Ʒoniasi do eŋɛnyui lɔ kodo axwa ɔ, Ninivo juganmɛtɔwo sii yí trɔ woɖekiwo yí ji. Vɔ yí amɛ trɔ le elɛ yɛ yí kpɛn sɔwu Ʒonasi. É yi na taɖo le kojo ɖgbe ɔ, Ninivu juganmɛtɔwo a va ci ete do ŋkɔnɔ egbɛviwo yi a do ehwɛ nɔ wo. ⁴² Le kojoɖogbe ɔ, efiɔ nyɔnu Fɔ detɔ a ci ete do ŋkɔ nɔ egbɛviwo yí a do ehwɛ nɔ wo. Ɖo nyɔnu lɔ so ekan jijiwo mɛ le nyigban lɔ ji yi a va se ŋnu nyanya' nyɔwo le Salomɔ gbɔ. Vɔ yi amɛ trɔ le elɛ yɛ yi kpɛn sɔwo Salomɔ !" ⁴³ "Nɔ gbɔngbɔn to le amɛɖe mɛ ɔ, e va yi dannɔ to zogbeji yi a jijiɛ fini ci yi a gbɔn le kpɔ. Nɔ de kpɔkpɔ eɖe ɔ, ⁴⁴ é nunuɔ le yiɖeki mɛ be ye agbe trɔ ye 'xwe xoxwi mɛ. Nɔ e trɔgbɔ é va kpɔ nɔ exɔ lɔ yí a le etu yí á le mɛmɛɖe yí enuwo a gbe le ɖoɖo le mɛ. ⁴⁵ Eyi gbɔngbɔnvɔn lɔ va yi kplɔnɔ gbɔngbɔnvɔn amadrɛ bu ciwo yí nyina eku sɔwui bɔdo yíɖeki nu sɔ hɛn gbɛ yí a va so axwe do mɛ. Hwehɔnnu ɔ, amɛ ci mɛ yí é to le sasa lɔ nɔnɔmɛ a gbe va dɔn do ji sɔwu le é le do sasa. Enu hɔn yi a va jɔ do egbɛvi lɔwo ji nɛ." ⁴⁶ Yesu gbe kpɔtɔ xoxoɔ nuxu nɔ ahwakɔn lɔwo gbɔhwe yí enɔlɔ kodo nɔviɛ ŋsuwo va le ŋhenu yi jijiɛ a kpɔɛ ⁴⁷ Eyi amɛɖeka nu nɔ Yesu be: " kpɔ ɖa! Enɔwo kodo nɔnviowo le ŋhenu yi jijiɛ a kpɔ eo" ⁴⁸ Yesu ɖo ŋci nɔ amɛlɔ be : "Mí yi nyi enɔnyɛ kodo nɔvinyɛwo ɔ?" ⁴⁹ Le yi goduɔ, é dansin yi nukplanviwo yí nu be: "Enɔnyɛ kodo nɔvinyɛwo ge! ⁵⁰ Ɖo amɛ ci yí wa Edanyɛ ci yi le jiŋkushi 'dro ɔ, é yi nyi nɔvinyɛ ŋsu kodo nɔvinyɛ nyɔnu kodo enɔnyɛ."