¹ Yesu yɔ yí nukplanvi wive lɔwo bɔ yí ná ŋsɛm kodo acɛ wo dó gbɔngbɔnvɔnwo pleŋ jí nɔ wo a da edɔ nɔ edɔnɔwo. ² Le i godu mɛ ɔ, e dɔ wo ɖaɖa nɔ wo vayi do axwa yí a do Mawu 'fiɔɖuɖu 'ŋɛnyui lɔ nɔ amɛwo yí a da edɔ nɔ edɔnɔwo. ³ É nu nɔ wo be : «Mí ŋgbe hen enude gbɔxwe a zɔn emɔ lɔ o. Ekpo ci mí a lé do alɔnu fin, godu fin, enuɖuɖu fin, eho fin, mi ŋgbe hɛn o. Mí ŋgbe hɛn awu bu ɖé bɔdo ci yí mí do nú o.

⁴ Nɔ mí axwe ɖé mɛ yí wo xɔ mi ɔ, mi nɔ axwe lɔ mɛ kaka a sɔnanɔ gacimɛ yí mí a va só le hɔn lɔ. ⁵ Vɔ nɔ wo de xɔ mí medru le afide o ɔ, mí xuxu mi wo 'fɔ wo 'kɔwo dó hɔn lɔ keŋ a sɔ ɖe kunu mɔ wo be yewo kodo wowo de gbe le ekacaca ɖe mɛ o yí a so le wo gbɔ.»

⁶ Ci yí Yesu nu nɛnɛ nɔ nukplanvi lɔwo degbɔ ɔ wo je emɔ yí toto kɔxwi kɔxwiwo mɛ yí le eŋɛnyui lɔ doɔ nɔ amɛwo yí dada edɔ wo nɔ edɔnɔwo le afishafi. ⁷ Gahɔnmɛ ɔ, amɛwo kan seŋ so enu ciwo pleŋ yí jɔjɔ nu nɔ́ efiɔ Elodi Ancipasi, ci yí kpa acɛ do Galile 'kan lɔ jí. É caka le yíɖeki mɛ; dó ɔ, amɛɖekawo nunu ɔ be ʒan, Mawushile nɔamɛtɔ yí fɔn so ekuwodi. ⁸ Vɔ ɔ, amɛɖewo nunuɔ be Mawu 'ŋɛdotɔ Eli yí gbe to yí amɛ buwo gbe nunuɔ be yí le shigbe be Mawu 'ŋɛdotɔ ciwo yí wa edɔ vayi sasa domɛtɔ ɖeka han yí fɔ́n so ekuwodii ɛnɛ. ⁹ Vɔ ɔ, efiɔ Elodi nu be : «ŋ dɔ yí wo so eta nɔ ʒan Mawushilenɔamɛtɔ yɛ. Mi ŋmɛ yí và nyi amɛ ci nu yí wo nunuɔ enyɔ sugbɔ hɔn wo so ɔ ?» Eyi é tɔ jiji be ye a kpɔ Yesu. ¹⁰ Yesu 'mɛdɔdɔ lɔwo trɔgbɔva gbɔ́ yí vo tó enu ciwo pleŋ yí wo wa nii. Eyí Yesu kplɔ wo yí wowoɖekewo só yí jeŋkɔ Azɔge nɔ amɛwo le avaji nɔ́ jugan ci yí wo yɔyɔ be Betisayida.

¹¹ Vɔ ahwakɔn lɔwo mɔŋje mɛ be hɔn yí wo yikɔ nɛ yí kplɔ Yesu do. Yesu xɔ wo nyuiɖe. É xo nuxu nɔ́ wo soso Mawu 'fiɔɖuxu lɔ nú yí da edɔ nɔ amɛ ciwo yí le edɔwo. ¹² Ezan tɔ dodo. Eyí nukplanvi wive lɔwo te gogo Yesu yí nú nii be «Hwenu yì fini ci yí mí le gbe jinjin le axwe gbɔ́. É yí ná taɖo ɔ, tashi amɛ lɔwo nɔ wo a yí ji enuɖe a ɖu le kɔxwi kodo nukan ciwo yi gogo mi mɛ yí a kpɔ afi a dɔn.»

¹³ Vɔ ɔ, Yesu nu ɔ wo be : Míwŋtɔwo mí na enu wo nɔ́ wo a ɖu.» Nukplanvi lɔwo doŋci nii be : «Kpɔnnɔ amɛtɔn kodo kpavi amɛve kpaŋ yí le mi shi. Jí é jijiɛ vlavo be miwo lé yí xwle enuɖaɖu vɛ nɔ́ amɛ sugbɔ cɛwo a ɖu yɔ a ?»

¹⁴ Nyao ɔ, ŋsuwo su egbɔ le hɔn lɔ shigbe kotokun amatɔn (5000) nɛnɛ. Eyi Yesu nu nɔ nukplanvi lɔwo be : «Mí nu nɔ́ amɛ lɔwo nɔ́ wo a bɔdo eka howo eka howo yí a nɔ anyinɔnɔ.» ¹⁵ Nukplanvi lɔwo wa do jí nɛnɛ yí ná yí amɛ lɔwo pleŋ nɔ anyinɔnɔ.

¹⁶ Gahɔnmɛ yí Yesu sɔ kpɔn nɔ amatɔn kodo kpavi amɛve lɔwo yí ɖe ekɔ kpɔ j'ŋkushimɛ yí dó akpe nɔ Mawu. Le i godu ɔ, é ma vo mɛ yí sɔ́ ná yí nukplanviwo be wo le míi nɔ amɛ lɔwo.

¹⁷ Amɛshamɛ ɖu enu yi xodu ɖɔɛ kaka kpɛtɛ kpɔtɔ. Ci yí wo bɔ kpɛtɛ lɔwoɔ, wo dɔ́ kishi wive. ¹⁸ Gbeɖeka ɔ, Yesu teyi azɔge afiɖeka yí le gbedoɖa wagɔ. Yí nukplanviwo vá bɔdo gbɔ yí é biɔ wo se be : «Mí yí amɛ wo nunuɔ le ahwakɔn bwo mɛ be ŋ nyi ɔ ?»

¹⁹ Nukplanvi lɔwo ɖoŋci nii be : «Ameɖekawo nunuɔ be eo nyi ʒan Mawushilenɔamɛtɔ : amɛɖewo nunuɔ be eo nyi Eli yí amɛ buwo gbe nunuɔ be Mawu 'ŋɛdotɔ deka yí é nyí yí vá fɔn so ekuwodi.» ²⁰ Eyi Yesu va biɔ wo se be : «Vɔ ci míwo kpɔɛ ɖee, mi yí ŋ nyi ɔ ?» Piyɛ xɔ nuxu yí doŋci nii be : «Eo yí nyi Kliso Mawu to lɔ.»

²¹ Gahɔnmɛ ɔ, Yesu do ese nɔ́ wo veviɖe be wo ŋgbe nui nɔ ameɖekpokpoi ase o.

²² Le i godu mɛ ɔ, Yesu yi ji yí nu nɔ́ wo be : «É le veviɖe be Agbetɔvi lɔ a kpé efun sugbɔ yí mɛganwo, avɔsatɔwo 'gawo kodo esedɔwatɔwo a gbe yi 'nyɔ gbɔ yí a dɔ yí wo a wui. Eyi le ŋkeke amɛtɔntɔ lɔ gbe ɔ, afɔn so ekuwodi.» ²³ Le enyɔ hɔn wo godu ɔ, Yesu va nu nɔ́ amɛshamɛ be : «Nɔ́ amɛɖe jí be ye a kplɔ ŋ do ɔ, édo a ŋlɔbe yiŋtɔ 'drowo yí a dró yí 'cisoga ŋkeŋke keŋ yí a kplɔ ŋ do. ²⁴ Ɖó ɔ, nɔ́ amɛɖe jí be ye a hwlɛn ye 'gbe gan ɔ, a bui. Vɔ ɔ, nɔ́ a mɛɖe bú yí gbe do anyi 'ta ɔ, a gbe kpɔɛ. ²⁵ Ele ci yí á nyi nɔ́ amɛ nɔ́ xexemɛ dɔkunuwo pleŋ suin keŋgan yí e sɔ yi 'gbe bu alo é sɔ yí e sɔ yi 'gbe trɔn ɔ ? ²⁶ Nɔ́ enyɛ kodo anyi 'nyɔ wawa ŋkpɛn nɔ amɛɖe ɔ, amɛ hɔn 'nu a va wa ŋkpɛn nɔ Agbetɔvi lɔ gacimɛ yi a va trɔgbɔ le yi klɛnklɛn kodo Edalɔ sɔkpenɔ yi dɔla kɔkɔɛwo klɛnklɛnmɛ.

²⁷ Le nyɔnɔnui mɛ ɔ, ŋ nunuɔ nɔ mi be amɛɖewo le miwo domɛ le elɛ yɛ yí wowo d'a kú gbɔxwe yí a kpɔ Mawu 'fiɔɖuɖu lɔ yí á gbɔgbɔ o.» ²⁸ Le i kuɛshila ɖeka godu ɔ, Yesu kplɔ Piyɛ, Ʒan kodo Ʒaki yí wo la eto ɖeka jí keŋ a vayi wa gbedoɖa.

²⁹ Gacimɛ yí Yesu le gbedoɖa wa ɔ, Mawu trɔ́ nɔnɔmɛ nii, yi ŋmɛ trɔ ebu yí yi wuwo vá ɣé yi vá dada ezo ŋlɛŋlɛŋlɛ. ³⁰ Zeɖeka tɔntɔn vɔ, amɛ amɛve ɖekawo vá tɔ́ nuxu xoxo kodo Yesu. Mɔyizi kodo Eli yɔ.

³¹ Wo zé le Mawu klɛnklɛn mɛ yí xoxoɔ nuxu kodo Yesu so lehanci yí á va yi vɔ yi 'dɔ́ yí a ku le Ʒeluzalɛmu du nú. ³² Piyɛ kodo yi kpenawo dɔn alɔn kaka é yi eku nɔ wo. Ci yí wofɔn vɔ, wo kpɔ́ Yesu klɛnklɛn lɔ kodo ŋsu amɛve ciwo yí le ete kodoi.

³³ Eyi ci yí ŋsu amɛve lɔwo so lé Yesu gbɔ ɔ, Piyɛ nu nii be : «Cicagan, e nyɔ be mí a nɔ elɛ. Mí a cu Gbadɔ amɛtɔn. Ɖeka a nyi ao tɔ, ɖeka a nyi Mɔyizi tɔ yi kpɛtɛ a nyi Eli tɔ.» Piyɛ de gbe nya enyɔ ci yí á nu o. ³⁴ Gacimɛ yí Piyɛ le enyɔ hɔn wo nuɔ ɔ, jiŋkushimɛzɔ ɖeka cu gelii yí gbanble wo. Eyi ci yí nukplanvi lɔwo kpɔ azɔ lɔ cì yí cɔn wo nɛnɛ vɔ, vɔnvɔn dó wó.

³⁵ Eyi egbe ɖeka ɖyi le azɔ lɔ me be : «Amɛ ci yí nyi evinyɛ ci yí ŋ can; mí ɖo eto yí.»

³⁶ Ci yí egbe lɔ ɖyi nɔ nukplanvi amɛtɔn lɔwo ɖegbɔ vɔ, Yesu ɖeke yí wo vá kpɔ́ le hɔn lɔ. Wo bɔ enu kplii yí le azan hɔn ji ɔ, wo de nú enyɔ ɖe nɔ amɛɖe so enu ci yi wo kpɔ lɔ nú o. ³⁷ Le i ŋkegbu ci yí Yesu kodo nukplanvi lɔwo ɖyi so eto lɔ ji yí gbɔgbɔ ɔ, amɛwo lɔ ahwo yí vá dó ego Yesu.

³⁸ Ŋsu ɖeka le ahwakɔn lɔ mɛ yí dó axwa yɔ́ Yesu be : «Cicagan, ŋ ɖe kuku nɔ́ eo kpɔ evinyɛ gbɔ nɔ ŋ; dó ɔ, yi ɖekɛ yí ŋ wa ɖɛ.

³⁹ Gbɔngbɔnvɔn ɖeka ɖenɔ efun nii. Nɔ́ é tó ji zeɖeka ɔ, é donɔ axwo cícící yí yanɔ egu do nyigban yí fucukɔ a totoɔ le enu mɛ nii gɔɖɔgɔdɔ. Gbɔngbɔnvɔn lɔ donɔ aya nii sugbɔ yí é gbɔnnɔ enu gbɔxwe yí va hɔnnɔ nii.

⁴⁰ Ŋ ɖe kuku nɔ́ ao nukplanviwo be wo lé nya gbɔngbɔnvɔn hɔn lɔ toi le ɖeviɛ mɛ nɔ ŋ, vɔ wo de sɛnŋ wɛ o.» ⁴¹ Eyi Yesu nu be : «Míwo egbɛviwo, Mawu jí makandotɔwo amɛnyinakanwo ! Kaka vá sɔ donɔ hwecinu yí na nɔ mígbɔ sɛn yí ŋkeke nɛni yi na dó eji yí kpɔkpɔ lehanci mí de wannɔ do Mawu ji hɔn ɔ ?»

Le i godu mɛ ɔ, é nu nɔ evida lɔ be : «Kplɔ evio lɔ va ele nɔ ŋ.»

⁴² Gacimɛ yí wo kplɔ ɖeviɛ lɔ gbɔgbɔ Yesu gbɔ ɔ, gbɔngbɔnvɔn lɔ sɔɛ xwuin yí cukui sɛnŋsɛnŋɖe. Vɔ ɔ, Yesu ɖe egbe do gbɔngbɔnvɔn lɔ ji yí da edɔ nɔ ɖevi lɔ yí sɔ́ jó nɔ edalɔ. ⁴³ Eyi lehanci yi Mawu ŋsɛn gangan do ji eŋ nɔ amɛshamɛ. Ci yí enu cìwo yí Yesu wawa gbe kpɔtɔ kpakpaca amewo pleŋ ɔ, é nu nɔ yi nukplanviwo be :

⁴⁴ «Mi ke eto a se enyɔ cɛ nyuiɖe : Wo a sa Agbetɔvi lɔ nɔ amɛwo.»

⁴⁵ Vɔ ɔ, nukplanvi lɔwo de se enyɔ ci yí Yesu nunuɔ lɔwo gɔnmɛ o. Mawu sɔ́ gɔnmɛsese ci yí le enyɔ lɔ shí wlá dó wo nɔ wo ŋgbe mɔŋje i mɛ o. Kpɔ́ wo de gbe edɔn yí a biɔ́ gɔnmɛ se nii le Yesu gbɔ o. ⁴⁶ Nukplanvi lɔ wɔ tɔ́ enyɔ dɔndɔn kpɔ le wowoɖeɖewo mɛ so amɛ ci yí a nyi amɛ ci yí a nyi amɛ kpɛnkpin le wo mɛ nu.

⁴⁷ Yesu kpɔ enu je wowo susuwo mɛ. Eyi e kplɔ ɖevihwɛ ɖeka yí sɔ́ dado axa nɔ yidéki.

⁴⁸ Keŋ yí nú nɔ́ wo be : «Nɔ amɛɖe kpɔ́ dó ŋ nu yí xɔ ɖevi cɛwo domɛtɔ ɖeka ɔ, enyɛŋtɔ yí e xɔ. Eyi nɔ́ amɛɖe xɔ ŋ ɔ, d'é nyi enyɛ ɖekɛ yí é xɔ o; e xɔ Edanyɛ ci yí dɔ́ ŋ ɖaɖa hɛnnɛ. Ɖó amɛ ci yí nyi amɛ hwɛhwɛ kpɛtɛkpɛtɛ le mí pleŋ mɛ ɔ, éyí nyí amɛ kpɛnkpin le mí pleŋ mɛ.» ⁴⁹ Ʒan nu nɔ́ Yesu be : «Mí kpɔ́ amɛɖeka yí é le gbɔngbɔnvɔnwo nyagɔ le nyikɔ mɛ yí mí jí be mí a gbe nii. Ɖó ɔ, d'é le míwo bɔbɔ mɛ o.»

⁵⁰ Vɔ ɔ, Yesu ɖoŋci nii be : «Mi ŋgbe gbe nii o. Ci gɔnmɛ yí nyí kpɔ́ be nɔ amɛɖe de gbé míwo 'nyɔ o ɔ, míwo 'mɛ yí é nyi.» ⁵¹ Ci yí azan ci ji yí Mawu kɔ́ Yesu yi jeŋkushimɛ do gogogoɔ, Yesu sɔ gbeta sɛnŋsɛnŋɖe be ye a yi Ʒeluzalɛmu.

⁵² É dó amɛdɔdɔwo ɖaɖo Samali 'kan kɔxwi ɖeka mɛ doŋkɔ nɔ́ wo a yi dra enuwo dó ɖɛ gbɔxwe nɔ́ a va.

⁵³ Vɔ ɔ, kɔxwi lɔ mɛtɔwo de jí be yewo a xɔ Yesu o nɔ́ ci e nyi Ʒeluzalɛmu yí á vayi ŋci. ⁵⁴ Hwecinu yí nukplanvi Ʒaki kodo zan va se enyɔ lɔ ɔ, wo yɔ́ Axwetɔ yí nú nii be : «Cicagan, è ji be miwo lé ɖe egbe nɔ́ ezo a ɖyi so jeŋkushimɛ yí a fiɔn wo a ?»

⁵⁵ Vɔ ɔ, Yesu trɔ kpɔ́ wo yí wa adan do wo.

⁵⁶ Eyi wo só yí kpé kɔxwi bú mɛ.[Mí de nya gbɔngbɔn ci mɛ yí mí nyi o.] ⁵⁷ Ci yí wo le emɔ lɔ jí yí yigɔ ɔ, ŋsu ɖeka vá nú nɔ́ Yesu be : «Afiɖekpokpoi ci yí a yi ɔ, na kplɔnɔ eo do.»

⁵⁸ Yesu ɖoŋci nìi be : «Wataklɛwo kunɔ edu yí xeviwo dó atɔ dɛ yí nɔnɔ mɛ. Vɔ Agbetɔvi lɔ yɛ de wa afiɖe ɖɛ́ yí sɔnɔ eta danɔ do o.» ⁵⁹ Le i godu mɛ ɔ, Yesu nu nɔ ŋsu bu be : «Kplɔ ŋ do.» Vɔ ɔ, ŋsu lɔ doŋci nii be : «Axwetɔ ɖe emɔ nɔ́ ŋ nɔ́ ma yi ɖyi edanyɛ gbɔxwe.»

⁶⁰ Yesu doŋci nii be : «Tashi amɛkukuwo nɔ́ wo a dyi wowo 'mɛkukuwo. Vɔ eo yɛ ɔ, yì nu Mawu 'fiɔɖuxu lɔ mɛ 'nyɔwo nɔ́ amɛwo.» ⁶¹ Ŋsu bu gbe nu mɔ́ Yesu be : «Cicagan, na kplɔ eo do. Vɔ ɔ, dé emɔ nɔ́ ŋ nɔ ma yi klan anyi xomu keŋ yí a trɔgbɔ.»

⁶² Yesu doŋci nii be : «Amɛ ci yí le agble degɔ yí gbe le godu kpɔgɔ d'a sɛn eŋ wa edɔ ɖe nɔ́ Mawu 'fiɔɖuxu lɔ mɛ yiyi o.»