¹ Le i godu mɛ ɔ, Yesu yiyiɛ juganwo kodo kɔxwiwo mɛ yí sɔ́ le Mawu 'fiɔɖuɖu 'ŋɛnyui lɔ doɔ nɔ amɛwo. Nukplanvi wive lɔwo kplɔɛni do

² Nyɔnu ɖeka, ciwo mɛ yí Yesu nya gbɔngbɔnvɔnwo ti le yí gbe da edɔwo nɔ́ cán kplɔnɔ wo dó. Wowo domɛtɔ ɖeka yí nyí Mali ci yí wo yɔnɔ be Mali Magidalatɔ, amɛ ci mɛ yí Yesu nya gbɔngbɔnvɔn amadrɛ ti le,

³ kodo Ʒani ci yí nyí Shuza, Elodi Ancipasi 'nuwojikpɔtɔ ashiɛ sɔkpenɔ Suzanu kodo nyɔnu sugbɔ bu ciwo yí sɔ́ wowo dɔkunuwo sɔ́ kpekpeɛ do Yesu kodo yi nukplanviwo nú ⁴ Amewo lɔ́ ahwa yí vá bɔbɔ do Yesu gbɔ. Jugan vovovowo mɛ yí wo só. Eyi ci yí wo vá bɔdo gbɔ́ gijii vɔ, Yesu do labalu cɛ nɔ wo bé :

⁵ Jinukuwutɔ ɖeka yi jinuku wú gbé do yi 'bo mɛ. Gacimɛ yí é le nuku lɔ wuɔ ɔ, nuku ɖekawo je emɔtu. Amɛwo ɖó afɔ wo jí yí xeviwo vá cán wo ɖu.

⁶ Eɖewo je ekpenyigban ji, fini ci yí ekɔ de su egbɔ le go, yí wo mi ɖegbɔ ɔ, wo fiɔn. Ɖó ɔ, nyigban de fá nɔ́ wo nyuiɖe go. ⁷ Nuku ɖewo je aŋwakanwo vlu yí cɔ́n wo ji.

⁸ Vɔ ɔ, jinuku lɔ ɖewo je nyigban zozu ji yi mi yi shin yí gbe sɛn eku sugbɔ. Ekui ɖeka ɖeka sɛ́n ekui ekave howui, ekave howui.» Eyi Yesu va sɔ́ kpii be : «Nɔ́ eto li nɔ amɛɖe ɔ, lé se !» ⁹ Gacimɛ yí Yesu nu enyɔ hɔnwo ɖegbɔ ɔ, yi nukplanviwo va biɔ́ɛ se be labalu lɔ ci yí yi dó gɔnmɛ ɖe mɛ.

¹⁰ É ɖoŋci nɔ́ wo bé : «Miwo ɔ, Mawu dansin yi 'fiɔɖuxu lɔ mɛ 'nuwlawlawo nɔ́ mí. Vɔ ɔ, amɛ kpɛtɛwo ɔ, wo xoxoɔ nuxu so nú nɔ́ wo sɔto labalu mɛ. Gahɔnmɛ ɔ, ''nɔ́ ŋkuviwo gbe le ete nɔ wo cuaan ahan cán ɔ, nɔ́ wo ŋgbe kpɔ enuɖe go. Eyi nɔ́ wo gbe seseɛ etonu ahan cán ɔ, nɔ́ wo ŋgbe se gɔnmɛ nii nyuiɖe go''.» ¹¹ Yesu ɖoŋci nɔ́ yi nukplanvi lɔwo bé : «Labalu lɔ gɔnmɛɖeɖe ge : «Mawu 'nyɔ lɔ yí nyí jinuku lɔ ci yí wo wú.

¹² Amɛ ɖewo le shigbe emɔtu fini ci yí jinuku lɔwo je nɛnɛ. Wo senɔ enyɔ lɔ. Vɔ ɔ, fini ci yí wowo seseɛ Mawu 'nyɔ lɔ le ɔ, ehɔn lɔ ké yí Legba gbe va xɔɛni le susu mɛ nɔ wo le nɛ yí sɔ́ xexeɛ emɔ nɔ́ wo nɔ́ wo ŋgbe xɔ enyɔ lɔ jí se nɔ́ Mawu a hwlɛn wo gán go.

¹³ Amɛ buwo gbe li yí le shigbe ekpenyigban jí fini ci yí jinuku lɔ vá je nɛnɛ. Nɔ́ wowo se Mawu 'nyɔ lɔ ɔ, wo xɔɛni kodo jijɔ. Wo xɔnɔ enyɔ lɔ jí se trololo lɔ, vɔ ɔ, kpɔ d'é donɔ eke le wo mɛ go. Ɖo le efunkpekpe hwenu ɔ, nɛnɛmunɔwo de gbe sɛn eŋ xɔnɔ Mawu ji se go. ¹⁴ Amɛ buwo gbe li hɛnnɛ yí le shigbe aŋwakanwomɛ fini ci yí jinuku lɔ je nɛnɛ; nɔ́ amɛ hɔwo se Mawu 'nyɔ lɔ ɔ, xexe cɛ mɛ xaxawo kodo dɔkunuwo gbe sɔ kpé nɔ́ xexemɛ vivisesewo vá vlunɔ cɔn jinuku lɔ jí le wo mɛ yí d'é gbe wanɔ edɔ nyuiɖe go.

¹⁵ Vɔ ɔ amɛɖewo li yí nyí nyigban zozu ci han ji yí jinuku lɔ ɖewo vayi je. Nɔ́ amɛ hɔnwo se Mawu 'nyɔ lɔ, wo xɔɛni kodo eji faa. Wo nɔnɔ egbeji nɔ́ enyɔ lɔ yí nɛnɛ ɔ, wo sɛnnɔ eku sɔ́ to vevidonu mɛ.» ¹⁶ Yesu gbe do labalu nɔ wo ké bé : «Amɛɖe de tɔnɔ kaligban yí sɔ́ tɔka cɔinni alo yí sɔ́ donɔ baci gɔnmɛ go. Vɔ ɔ, sɔ wo sɔɛni dado kaligbanhɛnnu jí nɔ́ á kpɔ enu nɔ́ amɛ ciwo yí a ɖó axwe lɔ mɛ.

¹⁷ Ɖo ɔ, enu ciwo pleŋ yí wo wlá a tó je dandanŋgbe yí enu ciwo pleŋ yí le eʒinmɛ a tó je agogbe.

¹⁸ Mí le ebu nɔ enyɔ ciwo yí mi seseɛ; dó amɛ ci shi yí enu le ɔ, wo a gbe na enu yi dó jí. Vɔ nɔ́ enu de le amɛɖe shi o ɔ, kankin ci yí á bu be yi le eye shi cán wo a gbe xɔɛ le shi.» ¹⁹ Yesu 'nɔlɔ kodo Yesu nɔviɛwo vá kɔ dɛ. Vɔ wo de sɛ́n eŋ te sɔɛ go; ɖó amɛwo sugbɔ gbíŋ yí bɔdo gbɔ́.

²⁰ Amɛwo vayi nu nɔ́ Yesu be : «Enɔo kodo nɔviowo le xexenu yí jijiɛ a kpɔ́ eo.»

²¹ Eyi Yesu ɖoŋci nɔ́ wo bé : «Enɔnye kodo nɔvinyɛwo yí nyí amɛ ciwo yí seseɛ Mawu 'nyɔ lɔ yí wawa do jí.» ²² Gbeɖeka ɔ, Yesu kodo yi nukplanviwo ɖó etɔjihungangan ɖeka mɛ yí e nu nɔ́ wo bé: «Mí na nɔ́ mì a yi ago hunɖaa jí nɔ́ axu lɔ.» Eyi wo só yí ɖédo. ²³ Vɔ gacimɛ yi wo ku etɔjihun lɔ yí yigɔ ɔ, Yesu dɔn alɔn. Zeɖeka tɔntɔn vɔ, ayagangan ɖeka tɔ́ xoxo le axu lɔ jí yí lɔ́lɔ eshi ɖaɖa etɔjihun lɔ mɛ kaka yi é jijiɛ aɖɔ̀. Wo le afɔkù mɛ. ²⁴ Eyi yí nukplanviwo tegogoi yí fɔín yí nú nii bé: «Axwetɔ Axwetɔ mì a vɔ!» Yesu fɔn yí wa adan do aya gangan lɔ kodo axushimlimli lɔwo. Eyi ayaxoxo gangan lɔ ɖo ete zeɖeka yí eɖa ɖo kleɖeɖe. ²⁵ Le i godu mɛ ɔ, Yesu biɔ yí nukplanviwo se bé: «Fini yí míwo xɔse lé ɔ?» Vɔ ɔ, nukplanvi lɔwo vɔ́n, yí enu lɔ kpaca wo sugbɔ yí wo biɔbiɔ wowonɔnɔwo se bé: «Mí yí amɛ cɛ yɛ ɔ,? É dɔdɔ edɔ́ ayaxoxo ganganwo kodo eshi yí wo seseɛ egbe nii.» ²⁶ Yesu kodo yi nukplanviwo va ɖó Ʒelaza 'kan mɛ fini yí kpaŋkɔ Galile 'kan mɛ. ²⁷ Hwecinu yí Yesu ɖyiɖyiɛ le etɔjihungangan lɔ mɛ je nyigban ɔ, jugan lɔ mɛ ŋsu ɖeka ci yí gbɔngbɔvɔnwo ɖeɖeɛ efun nɔ tó yí va dó ego yi. É gbe do awu kpɔ yɛ ɔ, d'é sɔ o yí de nɔnɔ axwe ɖe mɛ o. Vɔ ɔ ekpetuwo mɛ, fini ciwo yí wo ɖyinɔ amɛ dó yí é nɔnɔ. ²⁸ Ci yí é kpɔ Yesu ɔ, é dó axwa yɔɛ cícící yí vá je ekloji dó akɔmɛ nii yí nu nii kodo ŋsɛn bé: «Nyí é jijiɛ a wa kodo ŋ ɔ, Yesu Mawu ci yí lé ejí boo evie? Ŋ de kuku nɔ eo, ŋgbe dó gbazavi nɔ ŋ o.» ²⁹ Ŋsu lɔ nu nɛnɛ; ɖó ɔ Yesu ɖe egbe do gbɔngbɔnvɔn lɔ jí vayi b& yí lé tó lé mɛ. Ejiejiɔ, gbɔngbɔnvon lɔ wanɔ enu kodo ŋsu lɔ yí wo donɔ awlɛga alɔwo kodo afɔwo nii keŋ a sɔ́ líi dó texwe ɖeka. Vɔ ɔ, é sonɔ wo soi yí gbɔngbɔnvɔn lɔ kplɔɛni kpe zogbejí ³⁰ Eyi Yesu biɔ gbɔngbovɔn lɔ se bé: «Lé yí wo yɔnɔ eo do ɔ?» É ɖoŋci nii bé «Wo yɔnɔ ŋ bé ahwakɔn.» Ɖó ɔ, gbongbɔnvɔn sugbɔ yí lé mɛ. ³¹ Le i godu ɔ, gbɔngbɔnvɔn lɔwo ɖe kuku nɔ́ yesu veviɖé bé nɔ yi nya yewo toi le amɛ lɔ mɛ ɔ, yi ŋgbe dɔ yewo ɖaɖa ekuwodi o. ³² E hɔn, lé eto lɔ gɔnmɛ ɔ, eha sugbɔ ɖekawo lé hɔn yí lé enu ɖugɔ. Gbɔngbɔnvɔn lɔwo ɖe kuku nɔ Yesu bé yi lé nya yewo ɖaɖa eha lɔwo mɛ. Yesu ɖe emɔ nɔ wo. ³³ Eyi wo to le ŋsu lɔ mɛ yí ɖó eha lɔwo mɛ yí wowo shí eju so eto gɔnmɛ hwlihwlihwli yí je axu lɔ mɛ yí yí nu shi yí kú. ³⁴ Ci yí amɛ ciwo yí kplɔ eha lɔwo va ɖugbumɛ kpɔ enu ci yí jɔ ɔ, wo shí yí vayi kankan enyɔ lɔ nɔ amɛwo le jugan lɔ kodo kɔxwiwo mɛ. ³⁵ Eyi amɛwo to a vayi kpɔ enu ci yí jɔ. Ci yí wo vá ɖo Yesu gbɔ ɔ, wo kpɔ ŋsu ci mɛ yi gbɔngbɔnvɔnwo tó le lɔ yi e le Yesu 'kɔnmɛ. É va le yiɖeki mɛ yí do enuwo. Eyi wo vɔn. ³⁶ Amɛ ciwo yi kpɔ́ enu ciwo pleŋ yí jɔ do gbɔngbɔvɔnwo ŋsu lɔ kodo ehawo jí nunuɔ lehanci Yesu da edɔ nii dó nɔ́ a amɛwo. ³⁷ Eyi Ʒelaza 'kanmɛtɔwo pleŋ ɖe kuku nɔ Yesu bé yi le so lé yewo gbɔ́: ɖó ɔ, vɔnvɔn ɖo wo sugbɔ. Yesu ɖo etɔjihungangan mɛ keŋ a só. ³⁸ Eyi ŋsu ci mɛ yí é nya gbɔngbɔnvɔn toi le lɔ vá ɖe kuku nii be ye a kplɔ do. Vɔ ɔ, Yesu trɔɛ yí nú nii bé: ³⁹ «sóyí axwe mɛ Keŋ a yi nu enu ciwo pleŋ yí Mawu wa nɔ eo nɔ amɛwo.» Ŋsu lɔ yí nyao yí vayi tɔ enu ci yí yesu wa nii kánkánkán nɔ amɛwo le jugan lɔ pleŋ mɛ. ⁴⁰ Hwecinu yí Yesu trɔgbɔ so ago hunɖaa ji nɔ axu lɔ ɔ, amewo lɔ ahwa yí vá dó ego yi, ɖó ɔ, wo le ete kpɔɛ sasa. ⁴¹ Mawusɛnxu ci yí le hɔn lɔ 'ga ɖeka vá ɖó. Wo yɔni bé Ʒayilɔsi. ci yí é kpɔ yesu ɔ, e je ekloji dó akɔnmɛ nii yí ɖe kuku nii be yi lé vá ye 'xwe mɛ; ⁴² ɖó ɔ, eviɛ nyɔnuvi akogu ɖeka ci yí a ɖoɖoɔ exwe wivé han, le edɔ yí lé baɖaxo. Gacim€ yí yesu yigɔ axwe lɔ mɛ ɔ, amɛwo lɔ́ ahwa kplɔɛ dó yí xɛxɛgɔ gijigiji. ⁴³ Le hɔn ɔ, nyɔnu ɖeka le ahwakɔn lɔ mɛ. So exwe wive ge ɖii yí ehun ŋɛŋɛgɔ le nu. É zán yi pleŋ 'howo dó edɔ lɔ dada mɛ le dotowo gbɔ. Vɔ ɔ, ede d'é sɛn eŋ yí dɛɛ nii o. ⁴⁴ É to godu agé nɔ Yesu yí tesɔɛ keŋ yí tó alɔ awu gangan 'tuga nii. Eyi kaka a tɔ alɔ awu nii ahan vɔ, ehun ci yí ŋɛŋɛgɔ le nu lɔ ɖó ete nii zeɖeka. ⁴⁵ Yesu biɔ se bé: «Mi yí tɔ alɔ ŋ ɔ? » Amɛɖe de lɔn be ye tɔ alɔ yi o. Eyi piyɛ nu nii bé: «Cicagan, amɛwo xaxa eo gijigiji to afishafi nɛ!» ⁴⁶ Gankegan ɔ, Yesu gbe nu bé: «Amɛ ɖeka tɔ alɔ ŋ, ɖó ɔ, ŋ kpɔ bé ŋsɛn ɖeka tó so ŋ mɛ.» ⁴⁷ Ci yí nyɔnu lɔ kpɔ bé Yesu nya enu ci yí ye wa ɔ, e hunhugɔ gegege yi vá je ekloji do akɔnmɛ nii. E nu enu ci yiă na taɖó yí e tɔ alɔ yi kodo lehanci yí edɔ lɔ gbe mi nii le tete dó nii lé amɛshamɛ ŋmɛ. ⁴⁸ Eyi yesu nu nii bé: «Evinyɛ, ao xɔse hwlɛn eo gan. soyi le fafa mɛ.» ⁴⁹ Gacimɛ yí Yesu le enyɔ hɔn wo nuɔ nɔ nyɔnu lɔ ɔ, eŋɛdu só axwe mɛ yí va nɔ mawusɛnxu 'ga lo bé: «Evio nyɔnuvi lɔ kú ŋgbé gbé do aya nɔ cicagan lɔ o.» ⁵⁰ Vɔ ɔ, yesu se eŋɛ ci yí wo dó ɖaɖa Ʒayilɔsi, mawusɛnxu 'ga lɔ yí nu nii bé : «Jika ŋgbe só eo o, x Mawu jí se kpoŋ, evio nyɔnuvi lɔ a gan.» ⁵¹ Hwecinu yí wo va ɖó axwe lɔ mɛ ɔ, d'é ɖe emɔ nɔ amɛɖe yi e kplɔɛ dó sɔwu Piyɛ , Ʒan kodo Ʒaki gbe sɔkpenɔ nyɔnuhwɛ lɔ 'dalɔ kodo enɔlɔo. ⁵² Amɛshamɛ le avin fángɔ yí le ekui fángɔ dó ɖeviɛ 'ta. Eyi Yesu nu nɔ wo bé : «Mí ŋgbe f́n avin o. Ɖeviɛ de kú o, alɔn yí é dɔndongɔ.» ⁵³ Ci yí Yesu nu nɛnɛ nɔ́ wo ɔ, wo tɔ kokoi: ɖo ɔ, wo nya b& ku yí :deviɛ kú. ⁵⁴ Ci yí enu le nɛnɛ cán ɔ, Yesu le alɔnu nɔ deviɛ yi do axwa yí nu bé: «Nyɔnuvihwɛ, shi ete!» ⁵⁵ Eyi gbɔngbɔn gbe trɔva nyɔnuvihwɛ lɔ mɛ yí é fɔn yí shi ete zeɖeka. Yesu do bé wo le na ́ enuɖuɖu yí nɔ́ yi a ɖu. ⁵⁶ É jí eŋ nɔ́ deviɛ 'dalɔ kodo enɔlɔ sugbɔ. Vɔ ɔ, Yesu do ese nó wo bé wo ŋgbe vayi nu enu ci yí jɔ nɔ amɛɖe o.