¹ Ci yí Yesu nu enyɔ hɔnwo pleŋ nɔ́ ahwa ci yí vá bɔdo gbɔ́́ degbɔ ɔ, é yi Kafanawɔmu kɔxwimɛ. ² Sɔjakavehowiga ɖeka le shi yí nyí amɛvevi nii. Vɔ le hwehɔnnu lɔ ɔ, edɔwavi lɔ ledɔ kaka yí le ekudinu. ³ Eyi gacimɛ yí sɔjakavehowiga lɔ se Yesu nyikɔ vɔ, é dɔ Yudatɔwo mɛgan ɖekawo ɖaɖɛɛ bé wo lé vayi ɖe kuku nii bé yi lé va hwlɛn ye 'dɔwavi gán nɔ́ eye. ⁴ Megan lɔwo vá ɖo Yesu gbɔ yí tɔ́ kuku ɖeɖe kodo ŋsen be : «É je be à wa do enyɔ ci yí sɔjakavehowiga hɔn lɔ nunuɔ nɔ eo ji. ⁵ Ðo ɔ, é lɔn mìwo jukɔn. É yí cu Mawusenxu lɔ nɔ́ mí» ⁶ Eyi Yesu kplɔ wo dó yi wo ɖedo. Wo kpɔkpɔ axwe lɔ ɖá a gbɔxwe yí sɔjakavehowiga lɔ dɔ́ yi 'xlɔ́ ɖekawo ɖaɖɛ bé wo le vayi nu nii bé : «Axwetɔ, ŋ de je yí à vá nyaŋ 'Xwé mɛ go. ⁷ Enu hɔn yí ná taɖo yí enyɛŋto kpɔ́ bé ŋ de je yí a vá eo gbɔ go nɛ. Vɔ ɔ, nù enyɔ ɖeka kpoŋ nɔ́ edɔ lɔ a mi nɔ́ nyaŋ dɔwavi. ⁸ Ðó enyɛŋtɔ ɔ, mɛgan buwo 'cɛkpakpa gɔnmɛ yí ŋ le yí sɔja ɖewo le gɔnmɛ nɔ ŋ hɛnnɛ. Nɔ́ ŋ nu nɔ́ ede be : ''Yi'' ɔ, é yinɔ. Nɔ ŋ nu nɔ́ ebu be : ''Wa enu cɛ han ɔ'', é wɛɛni.». ⁹ Ci yi Yesu se enyɔ hɔnwo ɔ, ŋsu lɔ 'nu kpacɛɛ yí é trɔ kpanŋkɔ amɛ ciwo yí lɔ́ ahwa yí kplɔɛ do yí nú be : «Ŋ nunuɔ nɔ mí be kaka je Israyɛli 'ju lɔ ŋtɔ mɛ can ɔ, ŋ de kpɔ amɛɖe yí é ɖo xɔse cɛhan go.» ¹⁰ Sɔjakavehowiga lɔ 'mɛdɔdɔ lɔwo trɔvayi yi 'xwe mɛ yí kpɔ́ edɔwavi lɔ yí edɔ lɔ mí nii yí é bi gléŋ. ¹¹ Le i godu mɛ ɔ, Yesu kpe kɔxwi deka ci yí wo yɔnɔ bé Nayinu mɛ. Yi nukplanviwo kodo amɛ sugbɔ ɖekawo kplɔɛ do. ¹² Gacimɛ yí Yesu gogogoɔ kɔxwi lɔ 'gbonu ɔ, wo sɔ́ ecɔ ɖeka vayigɔ dyidyi gbe. Kposhi ɖeka eviɛ ŋsuvi akogu yí ku. Kɔxwi lɔ mɛtɔ sugbɔ kplɔ kposhi lɔ dó. ¹³ Ci yi Axwetɔ kpɔ́ kpɔshi lɔ ɔ, yi 'nú wa ŋshishi nii yí é nu nii bé : «Ŋgbè gbe fan avi go !» ¹⁴ Ci yí Yesu nu nɛnɛ nɔ́ kpɔshì lɔ degbɔ ɔ, é gogo ecɔdaka lɔ keŋ yí tɔ́ alɔ i. Hwehɔnnu ɔ, amɛ ciwo yí hiin vayigɔ ci ete. Eyi Yesu nu bé : «Ðajɛvi hwe, shite !» ¹⁵ Eyi amɛkuku lɔ fɔ́n yí nɔ anyinɔnɔ yí tɔ́ nuxu xoxo. Nɛnɛ ɔ, Yesu sɔ dó alɔmɛ nɔ enɔlɔ. ¹⁶ Vɔnvɔn ɖó amɛ lɔwo pleŋ. Wo tɔ́ Mawu kafukafu yí nunuɔ be : «Mawu 'ŋɛdotɔ gangan ɖeka vá ɖó míwo domɛ !» Wo gbe nunuɔ be : «Mawu vá dó alɔ yi jukɔ.» ¹⁷ Enu hɔn ci yi Yesu wa gban do Ʒude 'kan lɔ plɛŋ kodo afi ciwo yí trɔdi mɛ. ¹⁸ Ʒan amɛ ci yi wanɔ ʒinʒindotɔmɛ Mawu tɔ nɔ amɛ nukplanviwo vayi nu enu hɔn ciwo pleŋ yí jɔ nɔ wowo 'xwetɔ. Eyi é yɔ amɛve le wo mɛ. ¹⁹ Yi dɔ wo ɖaɖa Axwetɔ gbɔ́ bé wo lé wo lé vayi biɔɛ se be : «Eo yí nyí Kliso lɔ ci yi ɖó a vá a alo mì ɖó a gbe kpɔkpɔ emɔ nɔ́ amɛbu ?» ²⁰ Ci yí nukplanvi amɛve lɔwo vá ɖo Yesu gbɔ ɔ, wo nú nii bé : «Ʒan amɛ ci yi wanɔ ʒinʒindotɔmɛ Mawu tɔ nɔ amɛ dɔ́ mì ɖaɖa bé mìwo lé vayi biɔ eo se be : "Eo yi nyí Kliso lɔ ci yí ɖó a va a alo mì ɖó a gbe kpɔkpɔ emɔ nɔ̀ amɛ bu ?''» ²¹ Le gahɔnmɛ cucucu ci yí nukplanvi amɛve lɔwo le Yesu gbɔ, é da edɔ vovovo nɔ edɔnɔ sugbɔ, é nya gbɔngbɔnvɔnwo ti nɔ́ amewo yí na yí ŋkuvitɔntɔntɔnɔ sugbɔ tɔ enu kpɔkpɔ. ²² Le i godu mɛ ɔ, é ɖoŋci nɔ́ wo bé : «Mí yi nu enu ci yí mí kpɔ kodo ci yí mí se nɔ Ʒan be : ŋkuvitɔntɔntɔnɔwo le enu kpɔ ɔ, ekplɛxotɔwo le zɔnlin zɔɔn nyuiɖe, edɔ mimiɛ nɔ ekponɔwo, etokunɔwo sese ɛ etonu, amɛkukuwo fɔnfɔn yí wo le eŋɛnyui lɔ doɔ nɔ wamɛnɔwo. ²³ Enu yí nyɔ́ nɔ́ amɛ ci yí ŋ d'a nyi afɔklɛnnu nɔ go !» ²⁴ Hwecinu yí Ʒan 'mɛdɔdɔ lɔwo trɔyi ɔ, Yesu va tɔ́ nuxu xoxo so Ʒan nu nɔ́ ahwa ci yí bɔdo gbɔ́ bé : «Nyi yí mí vayi kpɔ le zogbe mɛ ɔ ? Klogbu 'ci yí jihɔn lɔlɔ yɔ a ?

²⁵ Ðee, nyi yí mí vayi kpɔ ɔ ? Ŋsu ɖe ci yí dó cigan 'wuwo yí mí vayi kpɔ a ? Vɔ amɛ ciwo yí donɔ enu hɔn hanwo yí gbe nɔnɔ agbe ɖuɔ, efiɔwo 'xwewo mɛ yí wowo nɔnɔ !

²⁶ Nyi yí mí vayi kpɔ taŋ ɔ ? Mawu 'ŋɛgbetɔ yɔ́ a ?

²⁷ Ðo Ʒan nu yi Mawu 'nyɔ wemawo xo nuxu so bé : ''Na dɔ nyaŋ 'ŋɛdotɔ ɖaɖa keŋ nɔ́ á vayi dra emɔ dó dɛ nɔ eo''»

²⁸ Ŋ nunuɔ nɔ mí be wo de ji amɛɖe le xexe cɛ mɛ yí é wu egan Ʒan go. Gankegan ɔ, amɛ ci yí nyí amɛ hwɛhwɛ kpɛtɛkpɛtɛ le Mawu 'fiɔɖuxu lɔ mɛ wu egan yi

²⁹ Jukɔn lɔ pleŋ kaka sɔ je tagajɔtɔwo cán jí ɖo eto ci yí Yesu nu. Wo kpɔ́ nyá bé Mawu nyi amɛjɔjɔɛ yí lɔn yí Ʒan wa ʒinʒindotɔmɛ Mawu tɔ nɔ wo

³⁰ Vɔ ɔ, Falisitɔwo kodo esedɔwatɔwo de lɔn yí xɔ edro ci yí Mawu ɖó do wo nú lɔ go yi gbé bé Ʒan d'a wa ʒinʒindotɔmɛ Mawu tɔ nɔ yewo go. ³¹ Yesu gbe nu ké bé : «Mi nu yí na dre egbɛviwo dó ɔ ?

³² Wo dyi devihwɛ ciwo yí nɔnɔ anyinɔnɔ do egodoxuwo yí a dó axwa yí a le enyɔ nuɔ ɖaɖa wowonɔnɔwo bé : ''Mí xo enu nɔ́ mí yí mí gbe ewe ɖuɖu. Mì ji ecɔ 'hawo nɔ́ mí yí mí gbe avi fanfan''. ³³ Ðo Ʒan amɛ ci yi wanɔ ʒinʒindotɔmɛ Mawu tɔ nɔ amɛ vá. D'é nunuɔ vɛn go. Nɛnɛ ɔ, mí nunɔ bé : ''Gbɔngbɔnvɔn yí nle mɛ.''

³⁴ Agbetɔvi lɔ vá. Yɛ ɖuɖuɔ enu yí nunuɔ vɛn yí mí nunɔ bé : "Mí kpɔ sukanuɖutɔ kodo ahanutɔ hɔn ɖa ! É nyi exlɔ kodo tagajɔtɔwo kodo enuvɔnwatɔ buwo !''

³⁵ Vɔ ɔ, ŋununyanya zé le yi 'mɛwo mɛ.» ³⁶ Falisitɔ ɖeka vá yɔ́ Yesu gbeɖeka bé yi le vá ɖu enu le ye 'xwe. Eyi Yesu yi ŋsu lɔ 'xwe mɛ yí nɔ anyinɔnɔ yí a ɖu enu.

³⁷ Nyɔnu ci yí enuvɔwawa' jɔnɔ eji nɔ ɖeka le jugan lɔ mɛ. Ci yí é se be Yesu le enu ɖuɔ le Falisitɔ lɔ 'xwé mɛ ɔ, é vá yí hɛn amihwɛnte egu ɖɔɖɔ ɖeka doashi

³⁸ yí vayi le godu nɔ́ Yesu yí le yi 'fɔwo gbɔ́. É le avi faan yí yi ɖashiwo kɔkɔ do afɔwo jí nɔ́ Yesu keŋ yí sɔ́ yi 'dawo sɔ cucucuɔ afɔ lɔwo. É kikiɛ eshi nɔ afɔwo nii yí sɔ́ amihwɛte ci yí é hɛn lɔ wú dó wo ji. ³⁹ Ci yí Falisitɔ ci yí yɔ Yesu va yi 'xwé mɛ, kpɔ enu hɔn ɔ, é nú le yiɖeki mɛ be : «Nɔ́ é nyí bé Mawu 'ŋɛdotɔ yí ŋsu cɛ nyi sasa nyao ɔ, á jeshi amɛ cí ŋmɛ yí ŋmɛ yí nyɔnu hɔn ci yí tɔtɔ alɔ yi nyi. Nyɔnu ci enuvɔnwawa jɔnɔ eji nɔ yi é nyi !»

⁴⁰ Gahɔnmɛ ɔ, Yesu va xɔ nuxu yí nú nɔ́ Falisitɔ lɔ bé : «Simɔ, ŋ ɖo enyɔ ɖeka yí a nú nɔ́ eo.» Simɔ ɖoŋci nii bé : «Cicagan, xò nuxu.» ⁴¹ Eyi Yesu nu bé : «Amɛ amɛve ɖekawo ɖu eho do ehodonɔamɛtɔ ɖeka. Amɛɖeka ɖu gajunho kotokun sanŋdiatɔ di yí amɛvetɔ ɖu gajunho kotokun eka howo di

⁴² Ci yí eɖe de sɛ́n eŋ cú eho lɔ nii le wo kodo eve lɔ mɛ o ɔ, é wa xomɛvu nɔ wo yí sɔ́ efɛn lɔ ke wo kodo eve. Le wo kodo eve lɔ mɛ ɖee, mi yí a lɔn ehodonɔamɛtɔ lɔ sɔwu ɔ ?

⁴³ Simɔ ɖoŋci nii bé : «Le nyaŋ 'nukpɔkpɔ mɛ ɔ, amɛ ci yí é sɔ efɛn gangan ke yí a lɔin sɔwu.» Yesu nu nii bé : «Ao nyɔ jɔ.» ⁴⁴ Le i godu mɛ ɔ, Yesu trɔ yí kpanŋkɔ nyɔnu lɔ yí nú nɔ Simɔ be : «É kpɔkpɔ nyɔnu cɛ a ? Ci yí ŋ va ao 'xwé ɔ, d'è ná eshi ŋ be enyɛ lé sɔ́ klɔ́ afɔ go. Vɔ nyɔnu lɔ ɔ, yɛ sɔ́ yi ɖashiwo sɔ́ klɔ́ afɔwo nɔ́ ŋ cucu wo kodo yi 'ɖawo.

⁴⁵ D'è dó egbe nɔ ŋ yí xɔ ŋ nyuiɖe go. Vɔ so gacimɛ yí nyɔnu cɛ lɔ ɖó axwe lɔ mɛ ɔ, d'é mí eshi kiki nɔ afɔwo nɔ́ ŋ go. ⁴⁶ D'è shi ami do eta nɔ ŋ go. Vɔ nyɔnu lɔ kɔ amihwɛte lɔ dó afɔwo nú nɔ́ ŋ.

⁴⁷ É yí ná taɖo ɔ, ma ɖe mɛ nɔ eo be lɔnlɔn gangan ci yí nyɔnu lɔ ɖe dansin nɔ́ ŋ dansin bé wo sɔ́ yi nuvɔn sugbɔ lɔwo kii vɔ amɛ ci yí wo sɔ́ enu hwɛɖeka ke ɔ, lɔnlɔn hwɛhwɛ yi é ɖenɔ dansin nɔ́ amɛ.» ⁴⁸ Eyi Yesu va nú nɔ́ nyɔnu lɔ bé : «Wo sɔ́ ao 'nuvɔnwo sɔ́ ke eo»

⁴⁹ Amɛ ciwo yí bɔ ɖuɖuɔ enu lɔ kodo Yesu tɔ nunu le wowoɖekiwo mɛ be : «Mi ŋmɛ yí nyí ŋsu cɛ yɛ ci yí sɔ́ enuvɔnwo kekeɛ amɛ ɔ ?»

⁵⁰ Vɔ ɔ, Yesu nu nɔ́ nyɔnu lɔ bé : «Ci yí è xɔ ŋ ji se ɔ, è gan. Seyi axwe le fafa mɛ.»