¹ Gbeɖeka le gbɔngbɔngbe ɔ, Yesu to ebo ɖeka ciwo jí yí wo kan eliku dó yí vayi gɔ. ² Eyi yi nukplanviwo tɔ junuku lɔ sunsun yí gbijigbijiɛwo do alɔmɛ yí sɔ́ ekui lɔwo ɖuɖuɔ. Eyí Falisitɔ ɖekawo biɔ wo se be: «Nyi yí jɔ yí mí wawa enu ci yí mìwo 'se de ɖe emɔ be wo a wa gbɔngbɔngbe ɔ?» ³ Yesu ɖoŋci nɔ́ wo be: «Mí de hlɛn enu ci yí Davidi wa sasa gacimɛ yí shive ciciɛ, yiŋtɔ kodo amɛ ciwo yí kplɔɛ do kpɔ ba? ⁴ É ɖo Mawuxwe mɛ yí ɖu kpɔnnɔ ciwo yí wo na Mawu kaka yí gbe na amɛ ciwo yí kplɔɛ do hɛnnɛ. Vɔ le ese ɛmɛ ɔ, avɔsatɔwo ɖekɛ yí ɖo gbe a ɖu kpɔnnɔ hɔnwo.» ⁵ Yesu gbe sɔ kpii nɔ wo be: «Agbetɔvi lɔ nyi etɔ nɔ gbɔngbɔngbe lɔ.» ⁶ Gbɔngbɔngbe bu ɔ, Yesu vayi Mawusɛnxu yí le enu kplan amɛwo. Amɛɖeka ci yí enuɖushimɛ 'lɔ ku nɔ le hɔn lɔ. ⁷ Esedɔwatɔwo kodo Falisitɔwo jijiɛ a do ehwɛ nɔ Yesu. É yí na taɖo yí wo leleɛ ŋkuvi do nu kpɔ be yi a da edɔ nɔ amɛɖe le gbɔngbɔngbe mɛ. ⁸ Vɔ ɔ, Yesu yɛ nya susu ciwo ɖeɛ yí wo le. Eyi é nu nɔ amɛ ci yí alɔ ɖeka ku nɔ lɔ be: «Shite le amɛshamɛ ŋmɛ.» Eyi ŋsu lo shite. ⁹ Le i godu mɛ ɔ, Yesu va biɔ wo se be: «Mìwo seci lɔ nu ɖee, nyi yí je be wo ɖo a wa le gbɔngbɔngbe ɔ? Enunyui alo enuvɔn? Xɔ wo a xɔ amɛ gan loo alo ta wo a tashi amɛ nɔ́ a trɔn?» ¹⁰ Yesu glo wo pleŋ lɔ kpɔ júun yí va nú nɔ amɛ ci yí abɔ ɖeka ku nɔ lɔ be: «Vlu Alɔ lɔ.» Kaka a vlui ahan vɔ, alɔ lɔ mi nii. ¹¹ Vɔ ɔ, enu ve esedɔwatɔwo kodo Falisitɔwo nu lɔwo nú sugbɔ yí wo vayi tɔ enu ci yí wo a sɛn eŋ wa kodo Yesu jaja kpɔ le wowoɖeɖewo mɛ. ¹² Le ŋkeke hɔn ji ɔ, Yesu yí eto ɖeka jí yí a wa gbedoɖa . É wa gbedoɖa nɔ Mawu le ezan blebu lɔ mɛ. ¹³ Eyí ci yí eŋ ke ɔ, e yɔ yí nukplanviwo yí cán amɛ wive le wo mɛ keŋ yí ná nyikɔ wo be amɛdɔdɔwo. ¹⁴ Amɛdɔdɔ wive lɔwo ge: Simɔ ci yí Yesu na nyikɔ be Piyɛ kodo nɔviɛ Anŋdre, sɔkpenɔ Ʒaki, Filipu kodo Batelemi ¹⁵ Matiye, Toma, Ʒaki ci yí nyí Alufe eviɛ kodo Simɔ ci yí nyí ejunyikohwlɛngangantɔ lɔ, ¹⁶ gbe sokpenɔ Yuɖa Ishikaliwoti ci yí a va sa yesu. ¹⁷ Yesu ɖyiɖyiɛ le eto lo jí kodo amɛ ciwo yí é can. Ci yí wo va ɖo nyigban tagba ɖeka jí fini ci yí yi nukplanviwo lɔ ahwa yí vá bɔdo ɔ, Yesu ci ete. Amɛ sugbɔ ɖekawo can lɔ ahwa so afishiafi le Ʒude 'kan lɔ mɛ Ʒeluzalɛmu jugan mɛ Tii kodo Sidɔn jugan ciwo yí le axutu mɛ yí va bɔdo hɔn hɛnnɛ. ¹⁸ Wo va hɔn yí a va ɖo eto Yesu yí gbe va nɔ a da wowo 'dɔwo nɔ wo. Yesu da edɔ nɔ amɛ ciwo mɛ yí gbɔngbɔnvɔnwo le hɛnnɛ. ¹⁹ Amɛshamɛ jijiɛ be ye a tɔ a lɔ yí ɖo ɔ, ŋsɛn ɖeka totoɔ le mɛ yí dada edɔ nɔ wo pleŋ ²⁰ Yesu fɔn ekɔ yí kpɔ nukplanvi wo yí nu nɔ wo be: «Enu yí nyɔ nɔ míwo ciwo yí nyi abɔnɔwo, ɖó ɔ, míwo tɔ yí nyí Mawu 'fiɔduxu lɔ. ²¹ Enu yí nyɔ nɔ míwo ciwo yi shive ciciɛ eviɛ ɖo ɔ, mí a va ɖu enu a ɖɔ exodu! Enu yí nyɔ nɔ míwo ciwo yí le avin fan eviɛ ɖo ɔ, mí, a va ko nukui!. ²² Enu yí nyɔ nɔ mí, nɔ amɛwo gbe eŋua nɔ mí, nɔ amɛwo nya mí yí nunuɔ enyɔ vɔnwo do mi nu nɔ ci yí mí xɔenyɛ Agbetɔvi lɔ jí se ŋci. ²³ Nɔ eŋ hɔn va ke nɔ mí eji le jɔ mí yí mí a ɖu ewe; ɖo efɛncu gangan deka le ete kpɔ mí le jiŋkushi mɛ. Nɛnɛ ke yí amɛ hɔn lɔwo tɔgbiwo do aya nɔ Mawu 'ŋɛ dotɔwo vayí do nɛ. ²⁴ Vɔ ɔ, babɛɛ nɔ míwo ci wo yí nyí ehotɔnɔwo ɖo ɔ, mí kpɔ nyɔ na vɔ! ²⁵ Babɛɛ nɔ míwo ciwo shi yí nyí enuwo pleŋ sun le eviɛ mɛ yɛ , ɖo ɔ, shive a va ci mí! Babɛɛ nɔ míwo ciwo yí koko nukui le eviɛ mɛ yɛ, ɖo ɔ, mí a va ci ŋshishi mɛ yí a le avin fan. ²⁶ Babɛɛ nɔ mí nɔ amɛshamɛ kankanfu mí ɖo ɔ, nɛnɛ yí wowo tɔgbiwo wanɔ kodo amɛ ciwo yí kannɔ ŋsu be yewo nyi Mawu 'ŋɛdotɔwo sasa nɛ. ²⁷ Vɔ ɔ, ŋ nunuɔ nɔ míwo ciwo yí ɖoɖo eto ŋ be: «Mí lɔn míwo ketɔnɔwo yí awa enyui nɔ amɛ ciwo yí gbe eŋua nɔ mí. ²⁸ Mí cu shi nɔ amɛ ciwo yí sɛnsɛn ekpɛn nɔ mí yí a wa gbedoɖa nɔ Mawu do eta nɔ amɛ ciwo yí ɖeɖeɛ efun nɔ mí. ²⁹ Nɔ amɛɖe xo etomɛ nɔ eo do akpaxwe ɖé ɔ, na gbe trɔ eɖiɛ nii nɔ a xo. Nɔ amɛɖe xɔ ao 'wu le eo shi kodo akpasɛnsɛn ɔ , tashii nɔ a xɔ ao vuvwu hɛnnɛɛ. ³⁰ Na enu amɛɖekpokpoi ci yí a biɔ enu eo yí no amɛɖe sɔ ao enuɖe ɔ, ŋgbe vayi biɔ enu lɔ yi o. ³¹ Enu ci yí mí ji nɔ be amɛwo le wanɔ yewo ɔ, míwo cán mí a wɛɛni nɔ wo. ³² Nɔ e nyí be amɛ ciwo yí lɔnnɔ mí ɖekɛ yí mí lɔnnɔ ɖee, akpe hin yi gbe le hɔn yí wo a va do nɔ mí ɔ? Ɖo ɔ, enuvɔnwatɔwo can lɔnnɔ amɛ ciwo yí lɔnnɔwo. ³³ Eyi nɔ e nyi kpɔ be amɛ ciwo yí wanɔ enyui nɔ mí ɖekɛ yí mí wanɔ enyui nɔ ɖee , akpe hin yí gbe le hɔn yí wo a va do nɔ mí ɔ? Ɖo ɔ, enuvɔnwatɔwo can wanɔ nɛnɛ hɛnnɛ. ³⁴ Nɔ e nyi kpɔ be amɛ ciwo yí mí kpɔ be no mí do enu nɔ wo ɔ, wo a gbe va kpɔ a trɔ jo nɔ mí ɖekɛwo yí mí do nɔ enu nɔ ɔ, akpe hin yí gbe le hɔn yí Mawu a va do nɔ mí ɔ? Ɖo ɔ, enuvɔnwatɔwo can donɔ enu nɔ enuvɔnwatɔwo nɔ wa a gbe va trɔɛ jo nɔ wo sunsuinɖe. ³⁵ Vɔ ɔ, mí lɔn míwo ketɔnɔwo, a wa enyui nɔ wo yí a do enuwo nɔ amɛwo keŋ a mi emɔ kpɔkpɔ be wo a va trɔɛ jo nɔ mí. Gahonmɛ ɔ, efɛcu a sugbɔ no mí yí mí a va trɔ Mawu ci yí le eji boo eviɛwo. Ɖo ɔ, eyɛ can nyɔnɔ dɔmɛ nɔ enumajeŋu nɔamɛtowo kpdo amɛvɔnwo. ³⁶ Mí nyí dɔnusoikpɔnɔamɛtɔwo shigbe lehanci yí míwo 'da nyi dɔnusoikpɔnɔamɛtɔ do nɛnɛ.» ³⁷ Yesu kplan enu amɛ ciwo yi le gbɔ be: «Mí ŋgbe ɖoɖoɔ kojo kodo amɛɖe nɔ Mawu a ɖo kojo kodo mí o. Mí ŋgbe dodoɔ ehwɛ nɔ amɛɖe nɔ Mawu a va do nɔ ehwe nɔ mí o. Mí sɔ enu ke amɛwo. Nɛnɛ ɔ, Mawu a sɔ enu ke mí. ³⁸ Mí na enu amɛwo nɔ Mawu a na enu mí. Nɔ e jijiɛ a va cui nɔ mí ɔ, a sɔ agban ci yí xɔnɔ enu nyuiɖe a sɔ drii sunsuinɖe a toi do hunhuin yí á ɖe kɔdo ji kaka yí a ɖɔ a kɔkɔ. Ɖo enu dre nu ci yí mí sɔ dre enu yí na amɛ ɔ, e yí ke wo a sɔ drii nɔ mí hɛnnɛ.» ³⁹ Yesu gbe do labalu nɔ wo be: «Ŋkuvitɔntɔntɔnɔ ɖe d'a sɛn eŋ kplɔ eha lɔ ŋkuvitɔntɔntɔnɔ o. Nɔ wo wa nɛnɛ ɔ, wo amɛve lɔwo pleŋ a je edu mɛ. ⁴⁰ Nukplanvi ɖe de nyanɔ edɔ sɔwu yí 'xwetɔ o. Vɔ ɔ, edɔkplanvi ci yí kplan edɔ ɖegbɔ va nyanɔ edɔ shigbe yí 'xwetɔ nɛnɛ. ⁴¹ Nyi yí na taɖo yí e kpɔkpɔ egbejɔɛ le ŋkuvi mɛ nɔ nɔvio yí d'é kpɔkpɔ acikpu ci yí le aotɔ mɛ o ɔ? ⁴² Le yí e wɛɛ yí a nu nɔ nɔvio be: " Nɔvi kaflaa, ma ɖe egbejɔɛ le ŋkuvi mɛ nɔ eo" gankagan yí d'e kpɔkpɔ acikpu ci le aotɔ mɛ do o ɔ? Ayemɛnuwatɔ, ɖe acikpu le ao ŋkuvi mɛ doŋkɔ. Gahɔnmɛ ɔ, na kpɔ enu nyuiɖe yí a ɖe egbejɔɛ le ŋkuvi nɔ nɔvio .» ⁴³ Yesu kplan enu amɛwo yí nu be: «aci nyui de sɛnnɔ eku vɔn o yí aci vɔn de sɛnnɔ eku nyui o nɛ. ⁴⁴ Eku ciwo yí aci ɖeka sɛn yí wo kpɔnɔ yí sɔ jenɔshi aci ci yí aci lɔ nyí. Wo de gbɛnnɔ figisɛnsɛnwo le ŋjawo mɛ o. Nɛnɛ ke yí wo d gbɛnnɔ vɛn 'cikusɛnsɛnwo le aŋwakanwo mɛ o nɛ. ⁴⁵ Amɛ ci yí nyí amɛnyui ɔ, enunyui ciwo yí e dra do deɖɛ dó yí 'ji mɛ yí e ɖenɔ toi dó agogbe. Amɛ ci yí nyí amɛvɔn yɛ ɔ, enu vɔin ciwo yí yɛ drado daɖɛ dó yí 'ji mɛ yíé ɖenɔ yoi dó agogbe. Ɖo ɔ, enyɔ ci yí ɖɔ ejimɛ nɔ amɛ yí tonɔ le aglan mɛ nɔ amɛ. ⁴⁶ Yesu gbe nu nɔ amɛ lɔwo be: Yesu gbe do labalu nɔ wo be: « Nyi yí na taɖo yí mí yɔyɔ ŋ be axwetɔ keŋgan yí mí de wawa do enyɔ ciwo yí ŋ nunuɔ nɔ mí ji o ɔ? ⁴⁷ Amɛɖekpokpoi ci yí va ŋ gbɔ yí sese anyi 'nyɔwo yí wawa do wo ji ɔ, ma dre amɛ ci yí e ɖyi nɔ mí. ⁴⁸ É ɖyí ŋsu ɖeka ci yí jijiɛ a cu exɔ yí ku edu yí e cito nyuiɖe kaka yí ɖo exɔ lɔ 'nyiɖuwo do ekpegbaja jí. Eyí gacimɛ yí ztɔwo ɖɔ yí va gban do exɔ lɔ nu can ɔ, exɔ lɔ gbe le ete goŋgoŋ. Ɖo ɔ, wo wa aɖaŋ yí cui. ⁴⁹ Vɔ ɔ, amɛ ci yí se enyo lɔwo yí d'é wawa do wo ji o ɔ, e ɖyi ŋsu ɖeka ci yí cu exɔ do ekɔ ji kpoŋ, anyiɖu ɖe maɖo nii. Eyí gacimɛ yí etɔwo va ɖɔ yí va gban do exɔ lo nu ɔ, exɔ lɔ juin yí gban hannyahannya.»