ETA 5

1 Gbeɖeka ɔ, Yesu le etan ci yí le Ʒenɛzalɛti jugan mɛ lɔ 'tu. Amɛ sugbɔ ɖekawo lɔ́ ahwa va bɔdo gbɔ yi a se Mawu 'nyɔ. 2 Yesu kpɔ etɔjihungangan amɛve ɖekawo le ago ji nɔ́ etan lɔ. Eɖɔdatɔwo dyi le wo mɛ yi le wowo 'ɖɔwo nyagɔ. 3 Yesu ɖo etɔjihungangan lɔwo domɛtɔ ɖeja , ci yí nyi Simɔ tɔ mɛ yí biɔ́ so Simɔ gbɔ be yi lé te etɔjihun lɔ só ago lɔ ji ɖaɖa etan lɔ ji hwɛ ɖeka. Le i godu mɛ ɔ, e nɔ anyínɔnɔ yi tɔ́ enu kplankplan ahwakɔn lɔwo. 4 Hwecinu yí é xo nuxu ɖegbɔ ɔ é nu nɔ́ Simɔ be: "Kú etɔjihun lɔ yi ŋkɔ do ji ayi fini ci yi etan lɔ eito le keŋ nɔ́ eo kodo ao kpenanwo a da eɖɔwo yi a le kpavi." 5 Simɔ ɖoŋci nii be: "Cicagan, mi do egbla le ezan blebu lɔ mɛ. Vɔ ɔ, mí de kpɔ́ kpaví ɖé yi le go. Gankegan ci yi è nu nɛnɛ ɔ, na da eɖɔ lɔwo." 6 Eyi nyao ci yi wo da eɖɔ lɔwo vɔ, wo lé kpavi sigbɔ kaka wowo 'ɖɔwo tɔ́ drɛndrɛn gacimɛ yi wo dɔndɔn wo tii. 7 Eyi wo wa alɔ nɔ wowo kpena ciwo yi le etɔjihungangan eɖetɔ lɔ mɛ be wo le va kpedo yewo nú. Amɛ lɔwo va yi va bɔdo wo nú. Kpavi lɔwo ɖɔ́ etɔ jihun amɛve lɔwo kaka wo jijiɛ a nushi. 8 Ci yi Simɔ Piyɛ kpɔ enu lɔ nɛnɛ ɔ, e je ekloji do akɔnmɛ nɔ Yesu yí nú nii be: "Tèyi azoge nɔ ŋ, Axwetɔ. Ɖo ɔ, enuvɔnwatɔ yi ŋ nyi." 9 I gɔnmɛ nyi kpɔ be vɔnvɔn ɖo Simɔ kodo amɛ ciwo pleŋ yi le gbɔ do lehanci yi wowo 'ɖɔ lɔwo le kpavi sugbɔ do nu. 10 Ahanke yi é wa nɔ Simɔ kpenawo, Ʒaki kodo Ʒan, ciwo yi nyi Zebede eviɛwo nɛ. Vɔ ɔ, Yesu nu n̵ɔ Simɔ be: "Ŋgbè vɔn go. So egbɛ ji , agbetɔwo yi a tɔ kplɔkplɔ gbɛ." 11 Eyi wo ku etɔjihungangan lɔwo je agojí yi tashi enuwo pleŋ ɖɛ yi so kplɔ Yesu do. 12 Gacimɛ yi Yesu le ekan lɔ jugan ɖeka mɛ ɔ, ŋsu ɖeka ci yí ekpo 'dɔ xɔ gotu nɔ pleŋ va kɔ ɖɛ. Ci yí é kpɔ Yesu ɔ, e doŋdo do akɔmɛ nii yí ɖe kuku nii be: "Axwetɔ, nɔ e lɔn ɔ, a sɛn eŋ na yí gbazamɛ a kɔ nɔ ŋ." 13 Yesu do alɔ ɖaɖa yi sɔ tɔɛ keŋ yi nu nii be: "Ŋ lɔn, edɔ lɔ le mi nɔ eo." Eyi zeɖeka vɔ, ekpo 'ɖɔ lɔ mi nɔ ŋsu lɔ. 14 Le i godu mɛ ɔ, Yesu gbe nu nii be: " Ŋgbe vayi nu enu ci yí ŋ wa nɔ eo nɔ amɛɖe go. Vɔ ɔ, yí avɔsatɔ lɔ gbɔ keŋ a sɔ eoɖeki dansi nii yi a gbe wa enunana nɔ ao 'ɖyiklɔklɔ shigbe lehanci yí Mɔyizi nui daɖɛ. Eyi a nyi kunuɖede nɔ amɛwo be edɔ lɔ mi nɔ eo." 15 E le ahan kankegan ɔ, amɛwo gbe va xoxoɔ nuxu so Yesu nu dó ji le eju lɔmɛ. Amɛ sugbɔ lɔnɔ ahwa a va cɔin keŋ aɖoɖoɔ eto yi nɔ a dada wowo 'dɔwo nɔ́ wo. 16 Vɔ ɔ, Yesu tenɔyi azɔge fini ciwo yi amɛwo de sɔ go yi vayi donɔ egbe ɖaɖa. 17 Gbeɖeka ɔ, Yesu le enu klan amɛwo. Falisitɔwo kodo esedɔwatɔwo le amɛ lɔwo domɛ. Kɔxwi ciwo yi le Galile 'kan kodo Ʒude 'kan mɛ kodo Ʒeluzalɛmu jugan mɛ yi wo so yi va. Mawu ŋsɛn le kodo Yesu yi na yi e le edɔwo daa nɔ amɛwo. 18 Amɛɖekawo kɔ ŋsu xokplɛ ɖeka kodo yi 'ba hɛn gbɔgbɔ nii. Wo jibe yewo a sɔ dó axwe lɔ mɛ yi a sɔ yi dado akɔnme nɔ Yesu. 19 Vɔ ɔ kpɔ wo de nya fini ci yi wo a sɔ to go. Ɖo ɔ, amɛwo bɔdo Yesu gbɔ gbiŋ. Ci yi é le ahan ɔ, wɔ la exɔta yi ko aza nɔ exɔ do afi ɖeka yi kɔkɔ ŋsu xokplɛ lɔ kodo eba ci jí yí e mlɔ keŋ yi sɔɛ to edu ci yi wo ŋua lɔ m€ yi sɔ ɖaɖa akɔnmɛ nɔ yesu. 20 Ci yi Yesu kpɔ wowo xɔse ɔ, e nu nɔ ŋsu xokplɛ lɔ be: "Ɖajɛ, wo sɔ ao 'nuvɔnwo sɔ ke eo." 21 Eseɖɔwatɔwo kodo Falistɔwo tɔ bubui kpɔ le wowonɔnɔwo mɛ be: "Ŋsu ci yi cɛ yi le Mawu Zu ɔ? Mi yí a sɛn eŋ sɔ enuvɔwo ke amɛ to evo nɔ Mawu ɔ? 22 Yesu nya susu ciwo yi wo ɖeɖeɛ. Eyi e biɔ wo se be: "Nyí yí jɔ yi mi le susuwo ɖeɛ ɔ? 23 Nɔ́ wo a nú nɔ́ ŋsu xokplɛ lɔ be: "Wosɔ́ ao 'nuvɔwo sɔ́ ke eo" alo 'sɔ́ ao 'ba yi a shite keŋ a tɔ́ zɔnlin zɔnzɔn" ɖee ci yi bubɔ wugan ɔ? 24 Ɖee, ŋ ji beé mi a nyá bé Agbetɔvi lɔdo acɛ yí a sɔ́ enuvɔnwo ke amɛ le nyigban ji." Ci yí é nu nɛnɛ ɖegbɔ ɔ, e nu nɔ́ ŋsu xoklɛ lɔ bé: Ŋ nu nɔ eo, shite, a sɔ́ 'ba tɔwo keŋ a yí axwe mɛ!" 25 Zeɖrka vɔ ŋsu lɔ shite le amɛshamɛ ŋmɛ yí sɔ́ yi 'ba yi kpe axwe mɛ yí le Mawu kanfu ɔ. 26 É ji eŋ nɔ́ amɛ ciwo pleŋ yí kpɔ́ɛ . Eyí wo vɔ́n yí tɔ́ Mawu kanfukanfu yí nu bé: "Mì kpɔ́ enujiŋwo egbɛ!" 27 Le enyɔ hunwo godu ɔ, Yesu to yí kpɔ tagajɔtɔ ɖeka ci yí wo yɔnɔ bé Levi yí é nɔ enyinɔnɔ do yi 'dɔwaxu le tagajɔxu. Eyi Yesu nu nii bé: "kplɔ́ ŋ do!" 28 Nɛnɛ ɔ, Levi shite yí tashi enuwo pleŋ ɖɛ́ keŋ Yesu do. 29 Le i godu mɛ ɔ, Levi va ɖu azan gangan ɖeka nɔ́ Yesu le yi 'xwé mɛ. Tagajɔtɔ sugbɔ kodo amɛ sugbɔ buwo doashi agban mɛ kodo Yesu kodo yi nukplanviwo. 30 Ci yí Falisitɔwo kodo esedɔwatɔwo kpɔ́ yí wo le enu ɖu ɔ kodo amɛ hɔnwo ɔ, wo tɔ́ ɖyíka dodo sɔ só nɛnɛ 'nú ci yí wo wa hun. Eyi wo biɔ́ Yesu nukplanviwo se bé: "Nyi yí jɔ yí mí le enu ɖu ɔ le aha nuɔ kodo tagajɔtɔwo kodo enuwatɔwo buwo ɔ? 31 Yesu xɔ nuxu yí ɖoŋci nɔ wo bé: "D'é nyí am€ ciwo yí le nyuiɖe yi Ʒan doto go, vɔ ɔ, edɔnɔwo yɔ́. 32 D'é nyí amɛ ciwo yí bubuɔ bé yewo nyí amɛjɔjɔɛ wo ɖe yí ŋ va nɔ́ yíwo a trɔ́ wowoɖekiwo a ji go; vɔ ɔ, enuvɔnwatɔwo yɔ́." 33 Falisitɔ lɔ biɔ́ Yesu se be: "Nyi yí ná taɖo yí Ʒan nukplanviwo blanɔ enu wanɔ kuifanwo, mìwotɔwo cán wanɔ nɛnɛ vɔ yí ao nukplanviwo ɔ, wowo a le enu ɖu ɔ yí a le enu nu ɔ?" 34 Yesu ɖoŋci nɔ́ wo bé: "Nɔ́ wo jijiɛ a ɖe nyɔnu yí amɛwo vá ɖee, mi a sɛ́n eŋ ʒin amɛ ciwo yí vá lɔwo ji nɔ́ wo a bla enu le gacimɛ yí nyɔnuɖetɔ lɔ kpɔtɔ le wo gbɔ́ a? Gbeɖe, wo a sɛ́n eŋ wɛɛ nɛnɛ go. 35 Vɔ ɔ, gamɛ li gbɔgbɔ yí wo a vá klɔ nyɔnuɖetɔ lɔ kodo adan le wo mɛ; gbehɔngbe yí wo a vá tɔ́ enu blabla nɛ." 36 Yesu gbe yí jí ké yí dó labalu cɛ nɔ wo be: "Amɛɖe de sonɔ avɔ yoyu tanɔ xoxwi go; nɔ́ wo wɛɛ nɛnɛ ɔ, yoyutɔlɔ gbe nanɔ yí xoxwi lɔ gbe drɛnnɔ do jí sɔwu lehanci yí é le do sasa. 37 Nɛnɛke yí amɛɖe de ɖɔnɔ vɛn ci yí tɔ shinshin do gbaza godu xoxwi mɛ go nɛ; nɔ́ wo wɛ nɛnɛ ɔ, vɛn lɔ finɔ kaka yí a wo godu xoxwi lɔ poo. Eyí godu lɔ cán, vɛn lɔ cán wo a gú amɛ. 38 Vɔ ɔ, vɛn ci yí tɔ yí shinshin ɔ, gbaza godu yoyu mɛ wo kɔɛni do. 39 Amɛde de nunɔ vɛn xoxwi ɖegbɔ yí a gbe biɔ́ yoyutɔ lɔ 'ta se go; ɖo ɔ wo nunɔ bé: "Xoxwitɔ lɔ nyɔ́ sɔwu yoyutɔ lɔ"."