¹ Yesu trɔgbƥ so Ʒuludɛn 'tɔsasa gbɔ. Gbɔngbɔn kɔkɔɛ ɖɔɛ yí kplɔɛ yi zogbeji. ² Legba tii kpɔ le ehɔn le ŋkeke eka domɛ. D'é tɔ́ enu enuɖe le azan hɔnwo ji go yi ci é ɖe egbɔ ɔ, shive ci. ³ Gahɔnmɛ ɔ, Legba va nu nii bé: "Nɔ́ è nyi Mawu eviɛ lɔ nyao ɔ, nú ekpe cɛ nɔ́ a trɔ enuɖuɖu." ⁴ Yesu ɖoŋci nii be: "Wo ŋwlii ɖɛ bé: "D'é nyi enu ɖekɛ yí agbetɔ a ɖu yi a nɔ agbe go." ⁵ Legba gbve kplɔɛ yí eji do ji yí dansi xexemɛ 'fiɔɖuxuwo pleŋ nii le ɖaba xoxo mɛ. ⁶ Legba nú nii bé: "Na sɔ efiɔɖuxu hɔn lɔwo pleŋ 'cɛkpakpa kodo kɔkɔkɔ efiɔɖuxu lɔwo tɔ na eo. Enyɛ yí wo sɔ wo pleŋ do alɔmɛ nɔ yí nɔ́ ŋ hɛn ɔ, na sɔ na amɛ ci yí ŋ dro. ⁷ Nɔ́ é doŋdo nɔ ŋ viɛ vɔ, enu hɔnwo pleŋ a trɔ tɔo." ⁸ Yesu ɖoŋci nii be: "Wo ŋwlii ɖɛ be: "Axwetɔ ao Mawu yí́ á doŋdo ŋɔ; eyɛ ɖekɛ yi á sɛn"" ⁹ Le i godu mɛ ɔ, Legba va kplɔ Yesu yi Ʒeluza lɛmu jugan mɛ yí ná yí é la Mawuxwe lɔ nyao ɔ, tè so elɛ a juin. ¹⁰ Ɖó ɔ, wo ŋlwlɛ do Mawu 'nyɔ wemawo mɛ daɖɛ be: éMawu a dɔ yi dɔla ɖaɖa eo yí wo a kpɔ́ eo ji" ¹¹ Sɔwu nɛnɛ ɔ, "Wo a vá xɔ eo do wowo 'lɔwo mɛ nɔ́ ŋgbè va sɔ afɔ gban do ekpe ɖé nu go." ¹² Yesu ɖoŋci nii bé: "Wo gbe ŋwlɛ do Mawu nyɔ wemawo mɛ daɖɛ hɛnnɛ bé: "Ŋgbè ma Axwetɔ, ao Mawu kpɔ́ go"" ¹³ Ci yí Legba te Yesu kpɔ ɖegbɔ ɔ, é só le gbɔ sabaa. ¹⁴ Yesu trɔyi Galile 'kan mɛ yí ɖɔ kodo Gbɔngbɔn kɔkɔɛ ŋsɛn. Amɛwo tɔ́ xoxo so nú le ekan lɔ pleŋ mɛ. ¹⁵ É kplankplan enu amɛwo le Mawusɛnxuwo yí amɛshamɛ kanfuikanfui. ¹⁶ Yesu yi Nazalɛti, kɔxwi ci mɛ yí é nɔ yi shin. Gbɔngbɔngbe ɔ, é yí Mawusɛnxu shigbe lehanci yí a hlɛn enu le Mawu 'nyɔ wemawo mɛ. ¹⁷ Yí wo sɔ́ Mawu 'ŋdotɔ Ezayi wema jó nii. É vlú wema lɔ yí kpɔ́ fini ci yí wo ŋwlɛ do bé: ¹⁸ "Mawu gbɔngbɔn le ŋ ji, é can ŋ yí shi ami nɔ ŋ nɔ́ ma yi kankan Eŋɛnyui lɔ nɔ́ wamɛnɔwo. É ɖó ŋ ɖaɖa nɔ́ ma vá dó axwa yí a dó jojo 'ŋɛ nɔ́ gakpamɛtɔwo, yí a nu nɔ́ ŋkuvitɔntɔntɔnɔwo bé woa hun ŋkuviwo nɔ wo. É ɖó ŋ ɖaɖa nɔ́ ma va xɔ nɔ amɛ ciwo yí tatafuɔ do. ¹⁹ Yí a dó axwa a nu nɔ́ amɛwo bé exwecixwe yí Mawu a wa xomɛvunu nɔ́ wo vadó. ²⁰ Le i godu mɛ ɔ, Yesu ŋwla wema lɔ yí sɔ jo nɔ edɔwavi ci yí sɔɛ nii keŋ yí nɔ anyinɔnɔ. Amɛ ciwo yí le Mawu sɛnxu lɔ pleŋ sɔ ŋkuvi do ji. ²¹ Eyi Yesu tɔ nunu nɔ́ wo be: "Enyɔ hɔn ci yí wo ŋwlɛ do Mawu 'nyɔ wemawo mɛ daɖɛ jɔ do nɛnɛ jí egbɛ nɔ́ míwo ciwo yí ɖoɖoɔ eto ŋ." ²² Amɛshamɛ ɖeɖeɛ kunu nyui so Yesu nu yí xomɛvunu nuxu ciwo yí totoɔ le enumɛ nii kpacakpaca wo. Eyi wo nunuɔ be: "D'é nyi Ʒazɛfu eviɛ yí nyí ecɛ ba? ²³ Yesu ɖe mɛ nɔ wo bé: "kokoko ɔ, mí a vá dó elo cɛ nɔ ŋ be: "Doto, dá edɔ nɔ eoɖeki". Mí a gbe va nú nɔ́ ŋ be: "Mì se enu ciwo pleŋ yí è wa le Kafanawɔmu kɔxwi mɛ. Gbè wa enu ŋmɛ ɖekɛ lɔwo le ao 'ju mɛ le elɛ"" ²⁴ Le i godu ɔ, é sɔ kpii nɔ́ wo bé "Le nyɔnɔnui mɛ ɔ, ŋ nunuɔ nɔ mí be axwe 'ŋɛdotɔ de nuini nɔ́ amɛ yí wo nyanɔ go. ²⁵ Gbe sɔwu nɛnɛhan ɔ, le Mawu 'ŋɛdotɔ Eli hwenu jiŋkushi cú yí eshi de gbe ja kaka é wa exwe amɛtɔn kodo efan go. Shive gangan ɖeka tó le eju lɔ pleŋ mɛ. Na nú nyɔnɔnui nɔ́ mí be le hwehɔnnu lɔ ɔ, kposhi sugbɔ le Israyɛli 'ju mɛ. ²⁶ Vɔ ɔ, kpɔ́ Mawu de ɖó Eli ɖaɖa kposhi sugbɔ lɔwo domɛtɔ ɖé gbɔ go. Kposhi ɖeka yí le Salɛta jugan mɛ le Shidɔn ju mɛ gbɔ yí é ɖoi ɖaɖa. ²⁷ Nɛnɛhanke ɔ, ekponɔwo cán su egbɔ le Israeyɛli 'ju mɛ sasa le Mawu 'ŋɛdotɔ Elize gamɛ Vɔ ɔ, kpɔ Elize de da edɔ nɔ eɖe go. Namanu ci yí só Sili 'ju mɛ lɔ dekɛ yí e da edɔ nɔ." ²⁸ Ci yí amɛ ciwo pleŋ yí le Mawusɛnxu lɔ se enyɔ hɔnwo ɔ, ɖɔ ve wo sugbɔ. ²⁹ Eyi wo shite yi kplɔ Yesu toi le jugan lɔ mɛ sɔhɛnyí eto ci ji yí wo cu jugan lɔ 'xɔwo dó tamɛ keŋ yí a cucui ɖaɖa bali mɛ . ³⁰ Vɔ ɔ, Yesu to wo mɛ xwlɛ́ɛ yí ɖe do. ³¹ Yesu vayi Kafanawɔmu kɔxwi mɛ le Galile 'kan mɛ. Gbɔngbɔngbe ɔ, é kplankplan enu amɛwo shigbe lehanci yí é wɛɛ ni do nɛnɛ. ³² Lehanci yí é kplankplan enu lɔ do ji eŋ nɔ amɛwo. Ɖo ɔ, acɛkpakpa le yi nuxuxoxo mɛ. ³³ Ŋsu ɖeka le Mawusɛnxu lɔ yí gbɔngbɔnvɔn ɖeka le mɛ. Ŋsu lɔ tɔ́ axwa dodo kodo ŋsɛn ³⁴ bé: "Ɔɔ! Nyi yí é jijiɛ a wa kodo mì ɔ, Yesu, Nazalɛtitɔ? Va è va mìwo gugu gbe a? Ŋ nya nyuɖe be eo yi nyí Amɛ kɔkɔɛ ci yí Mawu dɔ ɖaɖa" ³⁵ Yesu je adan do gbɔngbɔnvɔn lɔ bé: "kaba, bɔ́ enu yí a to le ŋsu lo mɛ." Gbɔngbɔnvɔn lɔ sɔ ɖevi lɔ ya egu do nyigban do amɛ lowo domɛ yí to le mɛ evɔn de mawa kodi. ³⁶ E ji eŋ nɔ amɛxhamɛ yi wo tɔ nunu nɔ́ wowonɔnowo be: "Vɔ ɖee, nuxu gue a! Ŋsu hɔn lɔ ɖeɖeɛ egbe do gbɔngbɔnvɔnwo ji kodo acɛ yí yi ŋsɛn ná bé gbɔngbɔnvɔn lɔwo totoɔ le amɛwomɛ! ³⁷ Eyí nyikɔ gbankpedo eto nii le Galile 'kan lɔ pleŋ mɛ. ³⁸ Yesu so le Mawusɛnxu lɔ yí yi Simɔ 'xmɛ. Vuvɔfu gangan ɖeka wawa Simɔ Ashiɛnɔ. Eyí wo nú yi 'nyɔ nɔ Yesu be yi l& kpedo nú. ³⁹ Yesu tegogoi yí go ɖaɖa gbɔ yí yí ɖe egbe do vuvɔfu lɔ jí kodo enuveamɛnu 'gbe ɖeka. Eyi vuvɔfu lɔmí nɔ́ nyɔnu lɔ yí é shite zeɖeka yí xɔ wo mɛdru. ⁴⁰ Fiɛshi, ci yí ewe yí exɔ ɖegbɔ ɔ, amɛwo kɔ́ amɛ ciwo pleŋ yi lé edɔ vovovowo nɔ́ wo va Yesu gbɔ. Yesu sɔ alɔ dado eta nɔ wo yí da edɔ nɔ wo. ⁴¹ Gbɔngbɔnvɔnwo cán tó le edɔ,ɔ sugbɔ mɛ yí le axwa ji nunuɔ nɔ be: Eo yí nyí Mawu Eviɛ!" Vɔ ɔ, Yesu ɖe egbe do wo ji yí de ná ŋmɛ wo be wo le xo nuxu so eye nu go. Ɖo ɔ, gbɔngbɔnvɔn lɔwo nyá bé é yi nyi "Klisolɔ." ⁴² Ci yi eŋ ke ɔ, Yesu fɔn yí to le jugan lɔ mɛ yi kpe afi jiji ɖeka ci yí amɛɖe de sɔ go. Amɛ sugbɔ ɖekawo lɔ ahwa vayi tɔ jijikpɔ. Ci yi wo vayí kpɔɛ ɔ, wo ji be yewo a lii ɖɛ nɔ yi ŋgbe so gbe yewo ɖɛ́ go. ⁴³ Vɔ ɔ Yesu nu nɔ́ wo bé: "Ŋ ɖo a yi nu Mawu fiɔɖuɖu 'ŋɛnyui lɔ. Le jugan kpɛtɛwo mɛ hɛnnɛ; ɖo ɔ, edɔ hɔn ŋci yí Mawu dɔ́ ŋ ɖaɖa do nɛ" ⁴⁴ Nɛnɛ ɔ Yesu vayi dodoɔ axwa yí le Eŋɛnyui lɔ doɔ nɔ Amɛwo le Mawusɛnxu ciwo yí le Ʒude 'kan lɔ mɛ mɛ.