¹ Hwɛxɔnu 'ga ciwo yí bɔ lɔwo ple shi ete zeɖeka yí kplɔ kplɔ Yesu yi nɔ Pilati. ² Wo vá tɔ ehwɛwo dodo nii le ehɔntɔxu yí nunuɔ nɔ Pilati be: « Mì kpɔ ́ɖajɛ cɛ yí é le mìwo jukɔn dɔɔ be wo le fɔn egu do acɛ kpakpa lɔ ji. É dɔdɔ wo be wo ŋgbe na taga Hlɔmu 'fiɔgangan o yí nunu yiŋtɔ be ye nyi Klisolɔ, efiɔ.» ³ Eyi Pilati biɔ Yesu se be: « Eo yí nyí Yuɖatɔwo 'fiɔ a?» Yesu ɖoŋci ni be: Eo yí nu nɛnɛ! » ⁴ Pilati nu nɔ́ avɔsatɔ gangantɔ lɔwo kodo ahwa ci yí va bɔ do ehɔn lɔ be: « Ŋ de kpɔ enuɖe yí a sɔ́ dó ehwɛ nɔ ŋsu cɛ go. ⁵ Vɔ ɔ, ega lɔwo gbe tɛtɛɛ egbe do ji sɛnŋsɛnŋɖe be: « É kplankplan enu jukɔn lɔ be yí le fɔn egu. do acɛkpakpa lɔ jí le Ʒude 'kan lɔ pleŋ mɛ. É tɔ jí ecɛviɛ ɔ, é va kɔdo elɛ.» ⁶ Ci yí Pilati se enyɔ hɔnwo ɔ, é biɔ se be: « Galiletɔ yí ŋsu lɔ nyí a?» ⁷ Gacimɛ yí é va se be ekan ci ji yí Elodi Ancipacisi akpa acɛ do mɛ yí Yesu so ɔ, é ɖoi ɖaɖa Elodi gbɔ. Ɖo elodi lɔ can ɖyi esa va Ʒeluzalɛmu jugan mɛ le ŋkeke hɔn lɔwo ji. ⁸ Ci Elodi kpɔ Yesu ɔ eji jɔɛ sugbɔ. Ɖó ɔ, wo kan Yesu sɛŋ nii vayi yí é tɔ jiji xoxoxoxo be ye a do ego kodoi. ⁹ É kpɔkpɔ enɔ be ye a vá kpɔ́ɛ yí yi a wa enujiŋ ɖeka. É biɔ enyɔ sugbɔ Yesu se Vɔ ɔ Yesu de ɖó eɖe ŋci nii go. ¹⁰ Avɔsawatɔxu hɛnnɛ. Wo dó ehwɛwo nɔ́ Yesu sɛnŋsɛnɖe. ¹¹ Eyi Elodi kodo Yi sɔjawo cán ko Yesu yí gbalii. Le i godu mɛ ɔ, wo sɔ ehovevi 'wu ci yí nyá kpɔkpɔ ɖeka sɔ́ dó nii keŋ yí trɔ́ɛ ɖaɖa Pilati. ¹² Gbehɔngbe ɔ Elodi kodo Pilati ciwo yí nyí ketɔnɔwo sasa vá trɔ́ exlɔwo. ¹³ Eyi Pilati bɔ avɔsatɔ gangantɔ lɔwo, ŋkɔnɔtɔ lɔwo kodo jukɔn lɔ ¹⁴ yí nu nɔ́ wo be: « Mí kplɔ ɖajɛ cɛ vɛ nɔ́ ŋ yí nú nɔ́ ŋ be yi dɔdɔɔ jugan lɔ be yí lé fɔ́n egu do acɛkpakpa lɔjí. Enyɛ yɛ ɔ, ŋ biɔ enyɔwo yi se le míwo ŋmɛ. Vɔ ɔ, ŋ de kpɔ́ ehwɛ ciwo yí mí dodoɔ nii ɖé le mɛ go. ¹⁵ Elodi can de kpɔ́ afɛn ɖé nii go. É yi dɔ taɖo yí é trɔɛ ɖaɖa mì. Ci yí é le nɛnɛ ɔ, ɖajɛ cɛ de wa enuɖe yí wo a so ekuhwɛ nii go. ¹⁶ Na dɔ nɔ wo a do eba nii kodo sovobayɛ nɔ ma joi.» ¹⁷ [ Exwekpekpe ɖeka dúú, nɔ́ wo ɖuɖuɔ Atadodoamɛxwe ɔ, Pilati jona Gakpamɛnɔtɔ ɖeka]. ¹⁸ Ci yí Pilati nu nɛnɛ vayi vɔ, wo bɔ tɔ axwa dodo be: « Wù ɖajɛ cɛ yí a jó Balabasi nɔ mì!» ¹⁹ Balabasi lɔ ɔ egu yí é fɔn dó Hlɔmutɔwo jí le jugan lɔ mɛ yí wu amɛ. Eyi wo lii dó gakpamɛ. ²⁰ Ci yí é drodroɔ Pilati be ye a jo Yesu ɔ, é gbe trɔ yí xo nuxu nɔ̀ jukɔn lɔ ke. ²¹ Vɔ ɔ, wo dó axwa yí sɔ ɖoŋci nii be: «Kíin, kíin do acisoga nu.» ²² Pilati xɔ nuxu zetɔntɔ lɔ yí biɔ wo se be: « Ehwɛ hinde yí ŋsu lɔ wu do mí nɛnɛ ɔ Ŋ de kpɔ be yí wa afɛn ɖé yí é nyi eku yí je nii go. É yí dɔ taɖo ɔ, na dɔ́ nɔ wo a dó eba nii kodo sɔvobayɛ nɔ ma joi.» ²³ Vɔ ɔ, hɔnnɔnxwe yí wo gbe va dó axwa dó jí sɛnŋsɛnŋɖe ge be yí le kíin do acisoga nu. Wowo 'xwa lɔ tɔ egan wuwu. ²⁴ Eyi Pilati sɔ gbeta be ye a wa do enu ci yí ahwakɔn lɔ dró jí. ²⁵ É jó amɛ ci yí wo jijiɛ, Balabasi, ɖajɛ ci yí fɔn egu do Hlɔmutɔwo jí le jugan lɔ mɛ yí wu amɛ lɔ nɔ́ wo yí sɔ Yesu doashi nɔ́ wo be nɔ wo kpɔ enu wo le sɔ yi wa. ²⁶ Gacimɛ yí sɔjawo kplɔ Yesu yigɔ ɔ, wo do ego Silɛnutɔ ɖeka ci yí wo yɔnɔ be Simɔ yí é gbɔgbɔɔ so ebo mɛ. Sɔja lɔwo dró acisoga ci ji yí wo jijiɛ a kan Yesu do lɔ nii nɔ a hiin yí a kplɔ Yesu do. ²⁷ Amɛ sugbɔ ɖekawo lɔ ahwa le jukɔn lɔ mɛ yí kplɔ Yesu do. nyɔnu ciwo yí le ahwakɔn lɔ mɛ fanfan avin yí gbe fanfan ekui hɛnnɛ nɔ Yesu. ²⁸ Yesu trɔ yí kpɔ wo yí nu nɔ wo be: « Ʒeluzalɛmu nyɔnuwo, mí ŋgbe fanfan avin do nyaŋ 'ta go. vɔ ɔ, mí fan avin do míwoŋtɔ kodo míwo 'viwo 'ta. ²⁹ Ɖó ɔ, gamɛ li gbɔgbɔ yí wo a va nunuɔ be: " Etanyuitɔ yí nyí nyɔnu konɔwo. Etanyuitɔwo yí nyí nyɔnu ciwo yí de ji evi kpɔ yí wo de do anɔ nɔ evi kpɔ go!" ³⁰ Gahɔnmɛ yí amɛwo a va nunuɔ nɔ etowo be: "mí mu je mì jí!" ³¹ Ɖó nɔ aci mumuwo le ezo biɛ ahan ɖee, lé á va nyi dó nɔ aci xuxuwo ɔ?» ³² Wo kplɔ edanuwatɔ amɛve buwo yí a vayi wu wo kodo Yesu. ³³ Ci yí wo va ɖó fini ci yí wo yɔnɔ be: « Agbetɔ 'taxu» tɔxu ɔ, sɔja lɔwo kán Yesu do acisoga ji dó ehɔntɔxu yí gbe kan edanuwatɔ amɛve lɔwo dó axajiwo nii. Edanuwatɔ ɖeka le yi ɖushimɛ yí amɛvetɔ lɔ le yi 'miɔmɛ. ³⁴ Eyi Yesu nu be: «Edanyɛ, sɔɛ ke wo. Ɖó ɔ, wo de nyá enu ci yí wo wawa go.» Sɔja lɔwo trɔ́ enu kpɔ so Yesu 'wuwo nú keŋ a kpɔ ci yí amɛɖeka , amɛɖeka a xɔ. Eyi wo sɔ awu lɔwo má. ³⁵ Jukɔn lɔ ci yí va bɔ do ehɔn lɔ le enu kpɔɔ. Yuɖatɔwo 'gawo kokoɔ Yesu yí nunuɔ be: É hwlɛn amɛwo gán. Nɔ́ é yí nyí Klisolɔ, amɛ ci yí mawu cán dododo ɔ, lé hwlɛn yiɖeki gan!» ³⁶ Sɔja lɔwo cán kokɔ Yesu. Wo gogoi yí sɔ́ vɛn shila ɖeka kpé nii. ³⁷ Yi nú nii be: «Nɔ́ è nyi Yuɖayɔwo 'fiɔ nyao ɔ, hwlɛn eoɖeki gán!» ³⁸ Wo ŋwlɛ enu do tamɛ nii be: «Amɛ cɛ nyi Yuɖatɔwo 'fiɔ.» ³⁹ Edanuwatɔ ciwo yí wo kán do aciwoga ji le exajiwo nɔ́ Yesu domɛtɔ ɖeka zui yí nú nii be: «D'é nyí eo yí nyí Kliso bá? Hwlɛ́n eoɖeki gán yí a hwlɛn mìwo cán gán hɛnnɛ.» ⁴⁰ Vɔ ɔ, edanuwatɔ amɛvetɔ lɔ gbè nɔ́ yi kpena yí nú nii be: «D'á ɖo shishi nɔ́ Mawu go! wo dɔndɔn eto ŋmɛɖeka nɔ eo kodo eyɛ! ⁴¹ Mìwo ɖe eto dɔndɔn cɛ lɔ je kodo mì. Ɖó ɔ, é sɔ egbe kodo enu ciwo yí mìwo wa. Vɔ amɛ cɛ yɛ ɔ, yɛ wa enu baɖa ɖe go!» ⁴³ Ci yí e nu nɛnɛ ɖegbɔ ɔ, é va sɔ kpii yí nú be: «Yesu, nɔ́ è va tɔ́ efiɔ ɖuɖu ɔ, nà ɖo eŋui ŋ.» ⁴² Yesu ɖoŋci nii be le nyɔnɔnui mɛ ɔ, ŋ nunuɔ nɔ eo be egbɛ cɛ ahan viɛ ɔ, á nɔ vovonyigban lɔ ji kodo ŋ.» ^{44 45} Dó gawive han nɛnɛ ɔ, ewe lɔ ci. Eyi vinvin dó le eju lɔ pleŋ mɛ kaka sɔ́ je gatɔn mɛ. Nɛnɛ ɔ, avɔ ci yí wo sɔ so Mawuxwe lɔ mɛ drɛn do amɛve so eji kaka vá kɔdo gɔnmɛ. ⁴⁶ Yesu do axwa cícící yí nú be: «Edanyɛ, ŋ sɔ nyaŋ gbɔngbɔn do ao 'lɔ mɛ.» Ci yí é nu nɛnɛ ɖegbɔ ɔ, é fa. ⁴⁷ Ci yí sɔja kavehowiga lɔ kpɔ́ enu ci yí jɔ ɔ, é kanfu mawu yí nu be: «Amɛjɔjɔɛ yí ŋsu cɛ nyi sa nyao!» ⁴⁸ Amɛ ciwo pleŋ yí lɔ ahwa yí vá enu kpɔ́ gbe kpɔ́ enu ci yí jɔ lɔ. Eyi wo sɔ́ alɔ kpla eta yí trɔ́ jeŋkɔ axwe ŋshishitɔ. ⁴⁹ Yesu 'xlɔwo pleŋ kodo nyɔnu ciwo yí kplɔɛ do so Galile 'kan mɛ ɖii vayi ci azɔgz yí kpɔ́ enu ci yí jɔjɔɔ lɔ ɖaɖa. ⁵⁰ Ŋsu ɖeka li, yí nyi bubu 'mɛ ɖeka le sɛnsɛn 'hwɛxɔnu. Wo yɔɛni be Ʒozɛfu. Amɛnyui kodo amɛjɔjɔɛ ɖeka yí é nyi. ⁵¹ D'é xɔ egbe do gbeta ci yí ehwɛxɔnu 'ga kpɛtɛwo sɔ́ yí wa do jí go. Yuɖatɔwo Alimate yí é so. Eyɛ can nɔnɔ ete kpɔ mawu 'fiɔɖuxu lɔ. ⁵² É vayi kpɔ Pilati yí bi&ɔ so gbɔ be: Yí le tashi Yesu 'cu nɔ eye nɔ́ ye a vayi ɖyii. ⁵³ Le i godu mɛ ɔ, Ʒozɛfu ɖe Yesu 'cu lɔ só acisoga lɔ nú yí sɔ́ gaga ɖeka doi yí vá sɔyi ɖyi do yɔdu yoyu ɖeka ci yi wo ku do ekpe mɛ, ci mɛ yi wo de ɖyi amɛɖe dó kpɔ vayi go, ɖe mɛ. ⁵⁴ Yuɖatɔwo gbɔngbɔngbe 'zadrɔgbe yí wo wawa enu lɔ yí zaanɖe ɔ, gbɔngbɔngbe lɔ wanawo a je gɔnmɛ. ⁵⁵ Nyɔnu ciwo yí kplɔ Yesu do so Galile 'kan mɛ ɖíi va ko Ʒozɛfu. Wo kpɔ́ yɔdu lɔ yí lé ŋkuvi dó lehanci yí wo sɔ́ Yesu 'cu lɔ mlɛ mɛ do. ⁵⁶ Le i godu ɔ, wo trɔyí axwe yí vá ɖa amihwɛnte ciwo yí wo a vá wú do ecɔ lɔ jí. Vɔ le Gbɔngbɔngbe ɔ, wo gbɔndomɛ shigbe lehanci yí ese nui dó nɛnɛ.