¹ Eyi kuɛskila gbe nyidin kucukucu ɔ, nyɔnu lɔwo vayi yɔdu lɔ gbɔ́ yi hen amihwɛnte ciwo yí wo drado daɖɛ. ² Wo kpɔ́ be wo bli ekpe ci yí wo sɔ́ cú yɔdu lɔ nú ɖaɖa akpa ɖeka . ³ Eyí wo ɖo yɔdu lɔ mɛ. Vɔ ɔ, wo de kpɔ́ Axwetɔ Yesu 'cɔ lɔ go. ⁴ Wo dán eta nɔ enyɔ lɔ. Eyi zeɖeka vɔ, ŋsu amɛve ɖekawo le awu dazodazowo mɛ yí tó dó wo jí. ⁵ Vɔnvvɔn ɖó nyɔnu lɔwo yí wo do eta egu. Eyi su lwo nú nɔ́ wo be: «Nyí yí jɔ yí mí va jijiɛ amɛleagbu kpɔ le amɛkukuwo domɛ ɔ? ⁶ É le elɛ go. É fɔ́n so ekuwodi. Mí ɖo eŋui enyɔ ci yí é nú nɔ́ mí gacimɛ yí é le Galile 'kan mɛ kpɔ. ⁷ É nu nɔ mí sa be: "É le be wo ɖo a sɔ Agbetɔvilɔ do ashi nɔ enuvɔn watɔwo. Wo a kíin do acisoga ji yí le yi nyisɔmɛ ɔ, á fɔ́n so ekuwodi"». ⁸ Gahɔnmɛ yí wo va ɖo eŋui enyɔ ciwo Yesu nu nɔ́ wo vayi nɛ. ⁹ Eyi nyɔnu lɔwo to le yɔdu lɔ mɛ yi vayi nu enyɔ hɔn lɔwo pleŋ nɔ& nukplanvi wiɖeka lɔwo kodo amɛ kpɛtɛwo. ¹⁰ Nyɔnu ciwo vayi yɔdu lɔ mɛ ge: Mali ci yí só Mgidala jugan mɛ kodo Ʒani sɔkpenɔ Malici yí nyi Ʒaki 'nɔlɔ. Wowo kodo nyɔnu buwo yí va nu enyɔ hɔn lɔwo nɔ amɛdɔdɔ lɔwo. ¹¹ Enyɔ lɔwo ɖyi enyɔ maɖoa do enu nɔ amɛdɔdɔ lɔwo. Eyí wo de xɔ wo ji se go. ¹² Ci yí é le nɛnɛ cán ɔ, Piyɛ shi ete yí shi eju vayi yɔdu lɔ gbɔ́. É bɔbɔ yí kpɔ́ mɛ ɖaɖa yí é nyi gaga eɣi ciwo yí wo sɔ́ dó ecɔ lɔ ɖekɛwo yí é kpɔ. Enu lɔ kpaca Piyɛ sugbɔ yí è trɔvayi axwe mɛ. ¹³ Le azan hɔn lɔ ké jí ɔ, nukplanvi amɛve zɔn yigɔ kɔxwi ɖeka, ci yí wo yɔnɔ be Emayusi mɛ. Egaxoxo amɛve han yí wo a sɔ́ zɔn zɔnlin nɔ́ wo so le Ʒeluzalɛmu yí a yí kɔxwi lɔ mɛ. ¹⁴ Nukplanvi amɛve lɔwo xoxoɔ nuxu so enu ciwo yí jɔ hɔn lɔwo pleŋ nú ¹⁵ Gacimɛ wo xoxoɔ nuxu lɔwo yí le enyɔ dɔɔn ɔ, Yesu ŋtɔ tegogo wo yí tɔ zɔnzɔn kodo wo. ¹⁶ Ŋsu lɔwo kpɔkpɔɛ. Vɔ ɔ enu ɖeka xɔ aye le wo shí yí wo de jeshii go. ¹⁷ Yesu biɔ wo se be: «Eyɔ hin yí mí dɔndɔɔn le le emɔ lɔ jí ɔ?» Eyi wo ci ete ŋshishitɔ. ¹⁸ Amɛ ɖeka tɔnɔ be Klewopasi le ŋsu lɔwo kodo eve mɛ. Eyɛ yí xɔ nuxu yí nu nii be: «Ʒeluzalɛmu juganmɛtɔ wo pleŋ nyá enu ciwo pleŋ yí jɔ le azan cɛwo ji. Á nyi eoɖekɛ yí kpɔtɔ yí de nya enyɔ lɔwo go a?» ¹⁹ É biɔ wo se be: «Nyi yí nyí enu lɔ yí jɔ ɔ? » ŋsu lɔwo ɖoŋci nii be: «Enu ci yí jɔ do Yesu, nazalɛtitɔ lɔ ji yɔ. Mawu 'ŋɛdotɔ ŋsɛntɔ ɖeka yí è nyi. É dansi ŋsɛn sɔ́ to enu ciwo yí é wa kodo enyɔ ciwo yí é nu mɛ le Mawu kodo agbetɔwo pleŋ ŋmɛ. ²⁰ Mìwo vɔsatɔwo 'gawo kodo mìwo mɛganwo sɔ jí yí wo, só eku kojo nii yí kiin do acisoga nu. ²¹ Mìwotɔ yɛ ɔ, mìwo kpɔkpɔ emɔ nii sa be é yí vá yi a vá xɔ nɔ Israyɛli jukɔn lɔ. Vɔ ci yí gbe wu egan hɔn ɔ, egbɛ yí nyí nyisɔ yí enu hɔn lɔwo jɔ viɛ. ²² Nyaotɔ ɔ, míwo gbɛta mɛ nyɔnu ɖekawo vá nu enu kpaca amɛ 'nyɔ ɖeka nɔ mì. Egbɛ nyidin kucukucu ɔ, wo vayi yɔdu lɔ gbɔ́. ²³ Vɔ ɔ, wo de kpɔ Yesu 'cɔ lɔ go. Eyi wo trɔgbɔ yí va nu nɔ mì be Mawudɔlawo va tó dó yewo jí yí nu nɔ yewo be Yesu lɔ le agbe. ²⁴ Mìwo kpena ɖekawo yí yɔdu lɔ gbɔ yí vayi kpɔ enu lɔwo shigbe lehanci yí nyɔnu lɔwo nui nɔ mì do nɛnɛ. Vɔ ɔ, wo de kpɔ́ Yesu yɛ go. ²⁵ Gahɔnmɛ yí Yesu va xɔ nuxu yí nú nɔ́ wo be: «Lé yí é wɛɛ yí enu gɔnmɛsese hwedo mí nɛnɛ ɔ? É gbɔnnɔ enu nɔ mí gbɔxwe yí mí a va xɔ enyɔ ciwo pleŋ yí Mawu 'ŋɛdotɔwo doŋkɔ yí nú ɖɛ́ ji se! ²⁶ Klisolɔ de ɖó a kpe efún nɛnɛ gbɔxwe yí a ɖó yí klɛknlɛn mɛ ba?» ²⁷ Le i godu ɔ, Yesu ɖe enyɔ ciwo yí Mawu 'nyɔ wemawo nu so nú mɛ nɔ wo. É ɖe mɛ so enyɔ ciwo wo wo ŋwlɛ kaka vá sɔ́ kɔdo ciwo yí le Mawu 'ŋɛdotɔwo wemawo mɛ ji. ²⁸ gacimɛ yí nukplanvi lɔwo vá ɖó koxwi ci mɛ yiɛ yí wo lé ɔ, Yesu wa enu shigbe amɛ ci yí gbe yigɔ ŋkɔ doji nɛnɛ. ²⁹ Vɔ ɔ, nukplanvi lɔwo ʒiin ji be: «Nɔ́ mì gbɔ́. Ɖó fiɛshi ɖo vɔ yí ezan jijiɛ a tɔ dodo.» Eyí Yesu ɖo axwe lɔ mɛ yí a ci wo gbɔ́. ³⁰ É vá nɔ anyinɔnɔ yí a ɖu enu kodo wo. É sɔ́ kpɔnɔ yi do akpe nɔ Mawu so jí. Le i goduɔ, é fiinmɛ yí sɔ́ jó nɔ́ wo. ³¹ Gahɔnmɛ yí wowo ŋkuviwo vá hun yí wo kpɔ Yesu yí jeshii nɛ. Vɔ Yesu bu le wo gbɔ́ zeɖeka. ³² Eyí nukplanvi lɔwo nu nɔ wowonɔnɔwo be: « gacimɛ yí é le nuxu xoɔkodo mì gbɛsasa le emɔ lɔ jí yí dredreɛ enu ciwo yi wo ŋmlɛ do Mawu 'nyɔ wemawo mɛ nɔ mì ɔ, lanmɛ de haya nɔ́ mí bá? ³³ Trololo ɔ, wo shi ete yi trɔvayi Ʒeluzalɛmu. Wo kpɔ́ nukplanvi wiɖeka lɔwo kodo wowo kpenawo le ehɔntɔxu ³⁴ yí wo be: «Axwetɔ lɔ fɔ́n so ekuwodi nyao kaka Simɔ kpɔɛ!» ³⁵ Eyi wowo can gbe to enu ci yí jɔ do wo jí le emɔ lɔ jí nɔ́ wo kodo lehanci yí wo vá dó jeshi Yesu hwecinu Yí é va ŋɛ kpɔnnɔ mɛ nɔ wo dó . ³⁶ Enɔ lɔwo nuɔ yí wo le yí gbe kpɔ yí Yesu ŋtɔ tó dó dodomɛ nɔ wo yí nú nɔ́ wo be: «Fafa mí a kpɔ́.» ³⁷ Vɔnvɔn ɖó wo kaka wowo susuwo kankan. Ɖó ɔ, wo bunbuɔ be ŋɔlin ɖeka yí yewo kpɔkpɔɔ. ³⁸ Vɔ ɔ, Yesu biɔ wo se be: yi yí jɔ yí mí caka le míwoɖekiwo mɛ ɔ? Nyi yi jɔ yí mí xoxoɔ enu kƥ́ ɔ? ³⁹ Mi glo nyaŋ 'lɔwo kodo nyaŋ 'fɔwo kpɔ́. Enyɛŋtɔ yɔ́. Mi tɔ alɔ ŋ yí a kpɔ́ ɖà! Ɖó ɔ, ŋɔlin de wanɔ exu kodo ŋcilan ɖɛ shigbe lehanci yí mí kpɔkpɔ be enyɛ, ŋ ɖó wo do nɛnɛ go.» ⁴⁰ Ci yí é nu nɛnɛ vɔ, é dansin yi 'lɔwo kodo yi 'fɔwo nɔ wo. ⁴¹ Eji jɔ nukplanvi lɔwo. Gankegan enu lɔ gbe kpɔtɔ kpakpaca wo. Wo de sɛn eŋ xɔɛ ji se hɔɖe go. Eyi Yesu biɔ wo se be: «Enu ɖe le mì gbɔ yí wo a ɖu a?» ⁴² Wo sɔ kpavi wiwi kankan ɖeka nii. ⁴³ Yesu xɔɛ yí ɖui le ŋmɛ nɔ wo. ⁴⁴ Le i godu ɔ è nu nɔ wo be: «Gacimɛ yí ŋ kpɔtɔ le mí gbɔ́ ɔ, ŋ nu nɔ mí be enu ciwo pleŋ wo yí ŋwlɛ so ŋ nu dó ese ciwo yí Mawu ná to Moyizi ji wemawo mɛ kodo tó Mawu 'ŋɛdotɔwo wemawo mɛ kodo to Ehajijiwo wema mɛ ɖo a jɔ.» ⁴⁵ Gahɔnmɛ ɔ, è hun susu nɔ́ wo wo a a mɔŋje Mawu 'nyɔ ciwo yí le wemă hɔnwo mɛ mɛ. ⁴⁶ Yí nú nɔ́ wo be: «Wo ŋwlɛ daɖɛ be Klisolɔ ɖo a kpe efun yí le ŋkeke amɛtɔ lɔ gbe ɔ, yi a fɔ́n so ekuwodi. ⁴⁷ Eyi le yi nyikɔ mɛ ɔ, wo a do xwa yí a nunuɔ nɔ jukɔnwo yí a je gɔnmɛ so Ʒeluzalɛmu hugan mɛ be wo le tɔ wowoɖekiwo yí a jí blebu nɔ́ Mawu a sɔ́ wowo 'nuvɔnwo ke wo. ⁴⁸ Mìwo kpɔ enu hɔnwo tɔxu. ⁴⁹ Enyɛ yɛ ɔ, na dɔ́ enu ci yí Edanyɛ sɔ́ ɖó egbe nɔ mí ɖaɖa mí. Vɔ míwo ɔ, mí ɖo a kpɔtɔ le Ʒeluzalɛmu jugan lɔ mɛ kaka sɔna hwecinu yí mí a xɔ ŋsɛn ci yí a só ejexomɛ yí a vá. ⁵⁰ Ci yí Yesu nu enyɔ hɔnwo nɔ wo ɖegbɔ ɔ, é kplɔ wo tii so Ʒeluzalɛmu jugan lɔ mɛ hɛnyi Betani agé. Eyi é kɔ alɔwo yí eji yí cú eshi nɔ wo. ⁵¹ Ehɔ́n gacimɛ yí é yiyira yí nukplanvi lɔwo ɔ, é teteɛ le wo nu yí Mawu kɔɛ hɛnyi jiŋkushimɛ. ⁵² Eyi nukplanvi lɔwo wowo doŋdo nii. Le i godu ɔ, Wo trɔgbɔva Ʒeluzalɛmu le jijɔgangan ɖeka mɛ. ⁵³ Wo vayi nɔnɔ Mawuxwe lɔ mɛ gashagamɛ yí nɔnɔ eha jioɛ yí a kankanfu mawu.