¹ kpɔnnɔ cikemado 'xwe ci yí wo yɔnɔ be Atadodoamɛxwe gogo. ² Eyi avɔsatɔwo 'gawo kodo esedɔwatɔwo tɔ́ lehanci yí wo a wɛɛ a wu Yesu jiji. Vɔ ɔ, wo vɔnnɔn nɔ jukɔn lɔ. ³ Gahɔmɛ ɔ, Legba ɖó ejimɛ nɔ Yuɖa Ishikaliwɔti, ci yí nyí yesu nukplanvi wive lɔwo domɛtɔ ɖeka. ⁴ Eyi Yuɖa vayi kpɔ avɔsatɔwo 'gawo kodo amɛ ciwo yí kpɔnɔ Mawuxwe lɔ jí 'gawo so lehanci yí á va sɔ Yesu ɖoashi nɔ́ wó dó nú. ⁵ É jɔ eji nɔ wo yí wo dó egbe nii be yewo a ná eho yi. ⁶ Gahɔnmɛ yí Yuɖa xɔ egbe yí tɔ́ fini ci yí á to yí a sa Yesu nɔ wo yí jukɔn lɔ d'a nyá go jiji. ⁷ Kpɔnnɔ cikemado 'xwe ŋkeke va dó. Ŋkeke lɔ jí yi wo wunɔ Atadodoamɛxwe lɛngbɔviwo le yí a sɔ́ ɖa enuɖuɖu daɖɛ. ⁸ Yesu dɔ Piyɛ kodo Ʒan ɖaɖa be: «Mí yi ɖa enuɖuɖu ci yí mì a va ɖu le Atadodoamɛxwe lɔ ji.» ⁹ Eyi wo biɔɛ se be: «Fini yí é ji be mì a ɖa enuɖuɖu lɔ le ɔ?» ¹⁰ Yesu ɖoŋci nɔ wo be: «Nɔ́ mí ɖoɖoɔ jugan lɔ mɛ ahan ɔ, mí a do ego ŋsu ɖeka ci yí dró eshi egu ɖɔɖɔ do eta. Mí kplɔɛ do yí a yi axwe ci mɛ yí á yi ¹¹ yí a nu nɔ axwe lɔ 'tɔ be: "Cicagangan biɔbiɔ eo se be: Exɔ hin mɛ yí na ɖu Atadodoamɛxwe le kodo nyaŋ nukplanviwo ɔ?" ¹² Axwe lɔ 'tɔ́ a dansin exɔ gangan ɖeka ci yí wo drado ɖɛ́ yí enuwo ^pleŋ sɔ egbe le mɛ le exɔlexɔji lɔ mɛ nɔ mí. Ehɔntɔxɔ yí mí a nɔ yí a ɖa enu nɔ mì nɛ.» ¹³ Nukplanvi amɛve lɔwo yi jugan lɔ mɛ yí vayi kpɔ enu lɔwo shigbe lehanci yí Yesu nu enyɔ lɔ nɔ́ wo do nɛnɛ yí ɖa enu ń Atadodoamɛxwe lɔ ɖuɖu. ¹⁴ Ci yí gamɛ sun ɔ, Yesu va yi nɔ anyinɔnɔ yí a ɖu enu. Yi 'mɛdɔdɔwo can va nɔ anyinɔnɔ kodoi. ¹⁵ Eyí é nu nɔ́ wo be: «Ŋ ji veviɖe be na ɖu Atadodoamɛxwe 'nuɖuɖu cɛ kodo mí gbɔxwe yí a tɔ́ efun kpekpe. ¹⁶ Ɖo ɔ, ŋ nunuɔ nɔ mí be ŋ d'a gbe va ɖui kpɔ buɖe kaka a sɔna gbecigbe yí é nyi a vá mɛ petii le mawu 'fiɔɖuxu lɔ mɛ go.» ¹⁷ Le i godu ɔ, Yesu sɔ kɔkpu ci mɛ yí vɛn le ɖeka yí dó akpe nɔ Mawu do ji yí nu nɔ́ wo be: «Mí xɔɛ yí a sɔ ma nu. ¹⁸ Ɖo ɔ, ŋ nunuɔ nɔ mí be ŋ d'a gbe va nu vɛn kpɔ gbɔxwe yí Mawu 'fiɔɖuxu lɔ a vá go.» ¹⁹ Le i godu mɛ ɔ, Yesu sɔ kpɔnɔ ɖeka yí dó akpe nɔ Mawu do ji yí mii mɛ yí sɔ́ ná yi nukplanviwo yí nu be: «Ecɛ yí nyi nyaŋ ŋcilan ci yí wo sɔ́ ná do míwo 'ta. Mí wɛɛni ahan yí a sɔ́ ɖonɔ eŋui ŋ.» ²⁰ Ci yí wo ɖu enu lɔ ɖegbɔ ɔ, Yesu gbe sɔ vɛn, kɔkpu ɖɔɖɔ ɖeka nɔ́ wo hɛnnɛ yí nú be: «kɔkpu cɛ yí nyi enublabla yoyu ci yí wo wa sɔ́ to nyaŋ 'hun ci yí kɔdo nyigban dó míwo 'ta. ²¹ Vɔ ɔ, mí kpɔ ɖá! Amɛ ci yí jijiɛ a sa ŋ le enu ɖuɔ kodo ŋ le elɛ viɛ. ²² Nyɔnɔnuitɔ ɔ, "Agbetɔvi lɔ a va ku shigbe lehanci yí Mawu to enu lɔwo daɖɛ dó nɛnɛ. Vɔ ɔ, babɛɛ nɔ amɛ ci yí a sa ŋ nɔ egawo.» ²³ Eyi nukplanvi lɔwo tɔ́ wowonɔnɔwo biɔbiɔ se be mi yí le yewo domɛ yí a wa nɛnɛ 'nu mɛ. ²⁴ Le i godu ɔ, nukplanvi lɔwo vá tɔ́ enɔ dɔndɔn kpɔ le wowoɖeɖewo mɛ sòso amɛ ci yí ɖó a nyi amɛ kpɛnkpɛn le wo mɛ nu. ²⁵ Eyi Yesu nu nɔ wo be: «Akɔtawo 'fiɔwo ʒinnɔ wo ji shigbe egawo nɛnɛ yí amɛ ciwo yí kpanɔ acɛ dɔnɔ yí wo yɔnɔ wo be enyuiwatɔwo. ²⁶ Ŋgbé nyí nɛnɛ nɔ míwo go. Vɔ tó evo nɔ hɔn nɔ́ míwo domɛtɔ ɖé ji be ye a nyi mɛgan ɔ, lé cí shigbe amɛ ci yí nyi ɖevixwe nɔ́ mí pleŋ nɛnɛ. Eyi nɔ amɛɖe ji be ye a nyi ŋkɔnɔtɔ le mí mɛ ɔ, é ɖo a cí shigbe hwashi nɛnɛ. nɔ amɛshamɛ. ²⁷ Ecɛ viɛ ɖee, mi yí nyí mɛgan le amɛ ci yí le enu ɖuɔ kodo amɛ ci yí mama enuɖuɖuwo mɛ ɔ? D'é nyí amɛ ci yí le enu ɖuɔ yɔ bá? Vɔ enyɛ yɛ ɔ, ŋ le míwo domɛ shigbe amɛ ci yí nyi edɔwavi nɛnɛ. ²⁸ Míwo ɔ, mí nyi amɛ ciwo yí nɔ godu nɔ ŋ le nyaŋ tetekpɔwo mɛ. ²⁹ É yi dɔ taɖo ɔ, ŋ na acɛ mí nɔ mí a ɖu efiɔ shigbe lehanci yí Edanyɛ na ŋ do nɛnɛ. ³⁰ Nɛnɛ ɔ mí a va ɖuɖuɔ enu yí a va yí a nunuɔ enu kodo ŋ. Le nyaŋ fiɔɖudxu mɛ yí mí a va nɔ anyinɔnɔ do efiɔinkpinwo ji yí a ɖó kojo kodo Israɛli 'kɔta wive lɔwo.» ³¹ Yesu nu nɔ Simɔ piyɛ be: «Simɔ, Simɔ! Legba biɔ be wo le ɖe emɔ nɔ́ eye nɔ ye a ta míwo pleŋ le le atɛ jí shigbe lehanci yí wo tanɔ eliku dó nɛnɛ. ³² Vɔ ɔ, ŋ do egbe ɖaɖa nɔ Mawu do ao 'ta nɔ ŋgbeè va sɔ́ ao xɔse bu o. Eyi nɔ́ é va trɔgbɔva emɔnyuitɔ lɔ ji ɔ, na do ŋsen nɔviowo.» ³³ Eyi Piyɛ xɔ nuxu yí nú nii be: «Axwetɔ, ŋ le egbesɔsɔ yí a yí gakpamɛ alo yí a kú kodo eo.» ³⁴ Eyi Yesu ɖoŋci nii be: «Piyɛ, ŋ nunuiɛ nɔ eo be egbɛ cɛ, gbɔxwe yí koklo a e atɔ ɔ, á gbè zetɔn be ye de jeshi ŋ go.» ³⁵ Le i godu ɔ Yesu va biɔ nukplanvi lɔwo se be: «Gacimɛ yí ŋ dɔ mí ɖaɖa edɔgbe yí mí de hɛn ehogodu alo godu yí mí hɛn fɔkpawo ɖee, enuɖe vayi ʒian mí a? Wo ɖoŋci nii be: «Enuɖe ʒian mí go?» ³⁶ Eyi Yesu va nú nɔ wo be: «Ecɛviɛ ɔ, nɔ amɛɖe ɖo ehogadu ɔ le sɔɛ. Nɔ́ godu ɖe le amɛɖe shi can le sɔɛ. Nɛnɛke nɔ dekpui de le amɛɖe shi ɔ é ɖó a sa yi 'wuvlaya yí a sɔ́ eho lɔ xwle dekpui. ³⁷ Ɖó ɔ, ŋ nunuiɛ nɔ mí be é le be enu ci yí wo ŋwlɛ do afiɖeka le Mawu 'nyɔ wemawo mɛ so ŋ nu be: "Wo sɔ do edanuwatɔwo 'gbɛ mɛ" ɖo a jɔ do ŋ ji. Le nyɔnɔnyui mɛ ɔ, enyɔ ci yí wo nu so a vɔ viɛ» ³⁸ Eyi nukplanvi lɔwo nu nɔ Yesu be: «Axwetɔ, dekpui amɛvege.» Yesu ɖŋci nɔ wo be: «É nyɔ́, lé nɔ nɛnɛ.» ³⁹ Yesu tó yí kpe Olivuciwo 'kpó ji shigbe lehanci yí é wɛɛni do nɛnɛ. Yi nukplanvi lɔwo kplɔɛ do. ⁴⁰ Gacimɛ é va ɖo ekpo lɔ ji ɔ é nu nɔ wo be: «Mí dodo egbe ɖaɖa nɔ mí ŋgbe va je tetekpɔ mɛ o.» ⁴¹ Le i godu ɔ Yesu teyi azɔge shigbe mɛta egban han nɛnɛ le wo nú yí je ekloji yí tɔ egbe dodo ɖaɖa ⁴² be: «Edanyɛ, nɔ́ é dro eo ɔ, ná nɔ́ efunkpekpe kɔkpu cɛ a to akpa nɔ́ ŋ. Ŋgbe nyi ci yí ŋ dro yí a jɔ go, vɔ ɔ, ci yí è dro.» ⁴³ [Gahɔnmɛ ɔ, mawudɔla ɖeka ɖyi so jiŋkushi mɛ yí va do ŋsen yi. ⁴⁴ Yesu de vo le yiɖeki mɛ eɖe eɖe go. Jika sosoiɛ yí é gbe le egbe lɔ doɔ ɖaɖa sɛnŋsɛnŋɖe. Eyi ade ci yí kɔkɔ nii vá le shigbe ehun 'kɔnwo nɛnɛ yí hlɛnhlɛn kɔdo nyigban kete kete.] ⁴⁵ Ci yí é va do egbe lɔ ɖaɖa ɖegbɔ ɔ, è trɔva nukplanvi lɔwo gbɔ yi kpɔ yi wo ci ŋshishi mɛ kaka yí dɔn alɔn jaaja. ⁴⁶ Yesu biɔ wo se be: « Nyi yi jɔ taɖo mì le alɔn dɔn ɔ? Mí shi ete yí a do egbe ɖaɖa nɔ mí ŋgbe va je tetekpɔ mɛ o.» ⁴⁷ Enyɔ lɔ nuɔ yí Yesu le yí amɛɖekawo lɔ́ ahwa yí va kɔɖɛ. Yuɖa ci yí nyí yi nukplanvi wive lɔwo domɛtɔ ɖeka le ŋkɔ nɔ wo. É tegoho ⁴⁸ Yesu kpla ashi ekɔ nii yí a sɔ dó egbe nii. Yesu nu nii be: «Yuɖa è kplakpla ashi ekɔ nɔ Agbetɔvi lɔ yí a sɔ sa!» ⁴⁹ Ci yí amɛ ciwo yí kplɔ Yesu do kpɔ enu ci yí jijiɛ a jɔ ɔ, wo biɔɛ se be: «Axwetɔ, mí a tɔ dekpui tɔtɔ amɛwo a?» ⁵⁰ Eyi wowo domɛtɔ ɖeka do dekpui ɖaɖa yí é vayi kpa ɖushimɛ 'to nɔ avɔsatɔ gangantɔ lɔ'dɔwavi ɖeka. ⁵¹ Vɔ ɔ, Yesu nu be: «É sun nɛnɛ. Mí mi.» Le i godu ɔ, é tɔ alɔ eto nɔ ŋsu lɔ yí sɔ́ eto ɖo eto tɔxu nii. ⁵² Eyi yesu xɔ nuxu yí nú nɔ́ avɔsatɔ gangantɔ lɔwo kodo amɛ ciwo yi kpɔkpɔ Mawuvwe lɔ ji 'ga lɔwo kodo wowo ciwo yí va leligbe be: «Dekpui kodo ekpowo yí mí sɔ yi va le ŋ shigbe flanfinɔ gangan ɖé yí ŋ nyi nɛnɛ a? ⁵³ Gashagamɛ ɔ ŋ nɔnɔ mí gbɔ le Mawuxwe mɛ. Vɔ ɔ, kpɔ́ mí de lé ŋ gho. Vɔ ecɛviɛ ɔ míwo 'ga yí xo; gacimɛ yí vivici mɛ ŋsɛnwo a wa edɔ yí é nyi.» ⁵⁴ Eyi wo lé Yesu yí dɔin keŋ yí kplɔɛ hɛnyi avɔsatɔ gangantɔ lɔ 'xwé mɛ. Piyɛ nɔ azɔge yí kpɔkpɔ wo ɖaɖa. ⁵⁵ Wo bɔ ezo do avɔsatɔ gangantɔ lɔ gbadonu yí amɛwo nɔ anyinɔnɔ trɔdo ezo lɔ. Piyɛ nɔ anyinɔnɔ do amɛ lɔwo domɛ. ⁵⁶ Avɔsatɔ gangantɔ lɔ 'dɔwavi nyɔnu ɖeka kpɔ́ Piyɛ yí è le anyinɔnɔ le zo lɔ gbɔ́. É gloi kpɔ júún yí nú be: «Eo can, d'é zɔnnɔ kodo Yesu sasa ba?» ⁵⁷ Vɔ ɔ, Piyɛ mɔ enyɔ lɔ yí nú be: «Nyɔnu, ŋ jeshi ɖɛ go.» ⁵⁸ Sabaaɖe ɔ, amɛ bu gbe kpɔ Piyɛ yí nú be: «Eo can, è le yi nukplanviwo mɛ.» Vɔ ɔ, Piyɛ ɖoŋci be: «Ŋ le wo mɛ go.» ⁵⁹ Ega xoxo eɖka han godu ɔ, amɛ bu gbe va tɛ́ egbe do ji be: « Le nyɔnɔnui mɛ ɔ, ŋsu cɛɖe can nɔnɔ kodo Yesu sa. Ɖo ɔ, Galile 'kanmɛtɔ yí yɛ can nyí.» ⁶⁰ Vɔ ɔ Piyɛ ɖoŋci nii be: «Ŋ de nya enyɔ co nuɔ yí è le ló.» Kaka Piyɛ a nú nɛnɛ vɔ koklo ɖeka ɖe atɔ. ⁶¹ Axwetɔ trɔ́ yí glo Piyɛ kpɔ júun. Eyi Piyɛ ɖó eŋui enyɔ ci yí Axwetɔ nú nii sasa be: «Gbɔxwe yi koklo a ɖe atɔ egbɛ ɔ, à gbé ŋ zetɔn.» ⁶² Eyi é to je gbadonu yí fan avin sɛnŋsɛnŋɖe. ⁶³ Amɛ ciwo yí klɔ Yesu yigɔ, gbagbaliɛ yiɛ yí xoxoiɛ. ⁶⁴ Wo sɔ́ enu bla ŋmɛ nii keŋ yí biɔɛ se be: « Mi yí xo eo ɔ? Yɔ̀ɛ nɔ mì.» ⁶⁵ Eyi wo nu enɔ baɖa sugbɔ buwo nɔ́ Yesu yí sɔ zuzuiɛ. ⁶⁶ Ci yí eŋ ke ɔ, Yuɖatɔwo mɛganwo, avɔsatɔ gagantɔwo kodo esedɔwatɔwo vá bɔ yi dɔ́ yí wo kpɔ Yesu va wowo sɛnsɛn' hwɛxɔnu. ⁶⁷ Eyí wo biɔ́ɛ se be: « Núi nɔ́ mì, eo yí nyi Klisolɔ a?» Yesu ɖoŋci nɔ wo be: «Nɔ́ ŋ nui nɔ mì can ɔ, mí d'a xɔɛ ji se go ⁶⁸ yí nɔ ŋ biɔ enyɔ mí se ɔ, kpɔ mí d'a ɖoŋci nɔ ŋ kpɔ go. ⁶⁹ Vɔ so eviɛ, Agbetɔvi lɔ a nɔ anyinɔnɔ do ɖushimɛ nɔ Mawu ŋsɛnwopleŋtɔ lɔ.» ⁷⁰ Eyi wo pleŋ xɔ enyɔ lɔ yí biɔ́ɛ se be: « A nyi kpɔ be eo yí nyi mawu eviɛ lɔ a?» Yesu ɖoŋci nɔ wo be: « Yi n€ yí míwoŋtɔwo mí nunuɔ nɛ.» ⁷¹ Eyi wo sɔ kpii be: « Eviɛ ɔ, mì gbe hian kunuɖetɔ bá! Mìwoŋtɔwo mì se é sɔ yi 'glan nui!»