¹ Gbeɖeka ɔ, Yesu le enu kplan amɛwo le Mawuxwe lɔ mɛ yí le eŋɛnyui lɔ doɔgɔ nɔ wo. Eyí avɔsatɔwo 'gawo kodo esedɔwatɔwo kodo mɛgan ciwo yí le jukɔn lɔ mɛ va ɖó ² yí biɔ́ɛ se be: «Nù acɛ ci yí è sɔ le enu cɛwo waagɔ nɔ mì. Mi yí na acɛ lɔ eo ɔ?» ³ Eyí Yesu ɖoŋci nɔ wo be: «Enyɛ can na biɔ enyɔ ɖeka mí se nɔ mí a ɖoŋci nɔ ŋ. ⁴ Agbetɔwo nɛ, Mawu nɛ, mi yí dɔ Ʒan ɖaɖa be yí le va wa ʒinʒindotɔmɛ Mawutɔ nɔ amɛwo?» ⁵ Vɔ ci yí Yesu biɔ enyɔ hɔn wo se ɔ, wo tɔ drɔdrɔɛ kpɔ́ le wowonɔnɔwo mɛ be: «Nɔ́ mì ɖoŋci nii be Mawu yí dɔ Ʒan ɖaɖa viɛ ɔ, á vá biɔ́ mì se be nyi yí jɔ yí mìwo de xɔ Ʒan 'nyɔwo jì se mɛ. ⁶ Vɔ nɔ mì ɖoŋci nii be agbetɔwo yí dɔ́ Ʒan ɖaɖa viɛ ɔ, jukɔn lɔ pleŋ a va xo ekpe mí yí a sɔ mì wu. Ɖo ɔ, amɛshamɛ kandoji be Ʒan nyi Mawu 'ŋɛdotɔ. ⁷ Ci yí é le nɛnɛ ɔ, wo doŋci nɔ Yesu be: «Mì de nya amɛ ci yí dɔ Ʒan ɖaɖa be yí le va wa ʒinʒindotɔmɛ Mawutɔ nɔ amɛwo go.» ⁸ Eyi Yesu nu be: «Enyɛ can ŋ d'a nú acɛ ci yí ŋ sɔ le enu lɔwo waagɔ nɔ mí go.» ⁹ Le i godu mɛ ɔ, Yesu tɔ nuxu xoxo nɔ jukɔn lɔ to labalu mɛ be: «Ŋsu ɖeka ɖó vɛncikan yí sɔ́ɛ xaya nɔ́ vɛngbledetɔwo yí xɔ emɔ sɔna azan sugbɔ. ¹⁰ Ci yí nuku cancan gamɛ va ɖó ɔ, ebotɔ lɔ dɔ́ yi 'dɔwavi ɖeka ɖaɖa vengble dematɔ lɔwo gbɔ́ nɔ́ á vayí xɔ nuku ci yí wo ma nii gbɛ. Vɔ ɔ, vɛngbledematɔ lɔwo xo edɔwavi lɔ yi& nyi ashigba alɔgba. ¹¹ gahɔmɛ ɔ, ebotɔ lɔ gbe dɔ edɔwavi bú ɖaɖa yí vengbledematɔ lɔwo xoi yi zui yí gbe nyii ashigba alɔgba. ¹² Eyi ebotɔ lɔ gbe dɔ edɔwavi bú ɖaɖa wo gbɔ́ zetɔntɔ lɔ ké. Dematɔ lɔwo dó akpa yɛ nu hɛnnɛ yí nyii tii le vɛncikan lɔ mɛ. ¹³ Ci yí é le nɛnɛ ɔ, ebotɔ lɔ va biɔbiɔ yiɖeki se be! "Lé yí na wɛɛ do ɔ. Na dɔ evinyɛ vevi ɖaɖa wo. Taŋnyɔ ɔ, vɛngbledematɔ lɔwo a do bubu yɛ nú" ¹⁴ Vɔ ci yí vɛngbledematɔ lɔwo kpɔ́ eyɛ ɔ, wo nú nɔ́ wowonɔnɔwo be: "Amɛ ci yí a va ɖu cinɔ nɔ agble lɔ esɔgodumɛ ge. Mì na nɔ mì a wui nɔ agble lɔ a rɔ́ mìwotɔ:" ¹⁵ Eyi wo dɔin tii le vɛncikan lɔ mɛ yí sɔɛ wu.» Eyi Yesu va biɔ se be: «Nyi yí vɛncikan 'gbledetɔ lɔ a wa kodo wo ɔ? ¹⁶ Va a va wu wo keŋkeŋ keŋ a sɔ́ vɛnci kan lɔ jó nɔ́ vɛngbledematɔ buwo.» Ci yí amɛ lɔwo se enyɔ lɔwo ɔ, wo nú dó nu be: «Gbeɖe, a jɔ kpɔ go!» ^{17 18} Gahɔmɛ ɔ, Yesu glo wo kpɔ júún yí biɔ wo se be: «Eynɔ ci yí wo ŋwlɛ do Mawu 'nyɔ wemawo mɛ be: Ekpe ci yí exɔcutɔwo gbé ɔ, é yí va trɔ ekpe vevi le exɔ lɔ cucu mɛ" gɔnmɛ ɖe? amɛɖekpokpoi ci yí a je ekpe cɛ ji a kankan yí amɛ ci ji ekpe cɛ a je a cuku.» ¹⁹ Esedɔwatɔwo kodo avɔsatɔwo 'gawo mɔŋje mɛ be yewo nú yí Yesu do labalu hɔn lɔ dó. Eyi wo tɔ fini ciwo yí wa a tó yí a lii jiji le egaxoxo hɔn lɔ mɛ zeɖeka. Vɔ ɔ, wo vɔnvon nɔ jukon lɔ. ²⁰ Eyí wo tɔ Yesu cɔcɔ. Wo ɖo amɛɖewo nii nɔ́ wo a kplɔplɔɛ do shigbe amɛ ciwo yí nyi amɛjɔjɔɛwo nɔ́ mawu nɛnɛ keŋ yí a biɔ enyɔ ɖe Yesu se a sɔ ɖo feca nii nɔ á je mɛ. Gahɔnmɛ ɔ, wo a kpɔ emɔ a lii yí a sɔ dashi nɔ́ ekanjikpɔtɔ lɔ. ²¹ Nɛnɛ 'mɛwo biɔ Yesu se be: «Cicagan, mì nyá be nyɔnɔnui ci yí è nunɔ yí gbe kplannɔ amɛwo le mɛ. d'é kpɔnɔ ŋmɛ nɔ amɛ yí sɔ xonɔ nuxu go. Vɔ ɔ, è nanɔ ekplen nyui amɛ so lehanci yí Mawu dró be wo lé nɔ agbe do nú. ²² Ɖee, mìwo 'se ná egbe be wo lé na taga Hlɔmutɔwo 'fiɔgangan a ?» ²³ Vɔ ɔ, Yesu mɔŋje mɛ be aye wo wawa yí nú nɔ́ wo be: ²⁴ «Mí sɔ gajɔnho ɖeka va nɔ ŋ ma kpɔ́. Mi takpu yí nyi ecɛ yí wo ta do gajɔn lɔ jí ɔ? Mí nyikɔ yí nyí ecɛ yí wo ŋwlɛn do gɔmɛ nii ɔ?» Wo doŋci nii be Hlɔmutɔwo 'fiɔgangan takpu kodo yi nyikɔ yɔ́.» ²⁵ Eyi Yesu vá nú nɔ wo be: «Mí sɔ enu ci yí nyi Hlɔmutɔwo 'fiɔgangan yí a sɔ́ enu ci yí nyi mawu tɔ na Mawu.» ²⁶ Amɛ lɔwo de sɛn eŋ lé Yesu yí yí á nyi enyɔ baɖa yí á nunuɔ nɔ jukɔn lɔ taɖo yí wo sɔ lé go. Sɔwu nɛnɛ ɔ, lehanci yí é ɖo enyɔbiɔse lɔ ŋci dó kpaca wo sugbɔ yí wo bɔ enu kplii. ²⁷ Zadukitɔ ƒekzwo vá Yesu gbɔ. Wowo yí nunɔ be amɛɖe d'a sɛ́n eŋ fɔ́n so ekuwodi kpɔ. Wo biɔ́ enyɔ Yesu se be: ²⁸ «Cicagangan, Mɔyizi nu do ese wemawo mɛ be: "Nɔ amɛɖe nyɔnu yí ku evi maji ɔ, nɔviɛ ɖo a sɔ ekpo nyɔnu lɔ. Eyi evi ŋsuvi ci yí a ji do ŋkɔ a nyí fofoɔ ci yí ku tɔ." ²⁹ Sasa lɔ ɔ, nɔvi amɛdrɛ ɖekawo trɔ́ ni vayi? Ŋkɔtɔ ɖe nyɔnu, kpɔ́ d'é ji evi gbɔxwe yí ku go. ³⁰ Evetɔ lɔ sɔ ekpo nyɔnu lɔ vɔ d'" ji evi go. ³¹ Etɔntɔ lɔ cán, nɛnɛ yɔ́ nɛ kaka é va je amadrɛtɔ lo ji yí wo pleŋ lɔ kú evi maji. ³² Kpɛtɛkpɛtɛ lɔ ɔ, nyɔnu lɔ cán va ku hɛnnɛ. ³³ Le ŋkeke ci ji& yí amɛkukuwo a fɔ́n so ekuwodi ɖee, mitɔ yí a va nyi nyɔnu lo le wo mɛ ɔ? Ɖó ɔ nɔvinɔ amadrɛ lɔwo ge ɖii kpɔ ge.» ³⁴ Yesu doŋci nɔ wo be: «Ŋsuwo kodo nyɔnuwo ɖenɔ nɔnɔ le nyigban cɛ jí. ³⁵ Vɔ amɛ ciwo Mawua vá kpɔ be wowo je yí a fɔ́n wo so ekuwodi dru yí wo a va yí nɔ xexe ci yí gbɔgbɔ lɔ mɛ ɔ, asu kod ashi 'nyɔ ɖe d'& gbe le ekɔ nɔ wowo go. ³⁶ Wo d'a gbe va ku ké go. Wo a vá le shigbe Mawudɔlawo nɛnɛ. Mawu eviɛwo yi wo nyí. Ɖó ɔ, wo fɔ́n so ekuwodi yí gbɔva agbe mɛ. ³⁷ Mɔyizi ɖe mɛ nyuiɖe be amɛkukuwo a vá fɔn so ekuwodi. é nui do afiɖeka le wema me gacimɛ yí é xo nuxu so ave cui ci yí le ezo biɛ nu. É yɔ́ mawu yí nú bee: "Mawu, Ablahamu, Izaki, kodo Ʒakɔbu mawu"» ³⁸ Yesu va nú do jí nɔ́ wo be: «Mawu de nyi amɛ kukuwo Mawu go. Amɛleagbuwo Mawu yí é nyi. Ɖo le Mawu gbɔ ɔ, amɛkuku lɔwo fin amɛleqgbu lɔwo fin ɔ wo pleŋ le agbe?» ³⁹ Gahɔnmɛ yí esedɔwatɔ ɖekawo vá xɔ nuxu yí nú nɔ́ Yesu be: «Cicagangan, é wa adaŋ xo nuxu.» ⁴⁰ Ɖo wo de gbe gbe edɔn yi a biɔ́ enyɔ bu ɖé yi se go. ⁴¹ Eyi Yesu va nú nɔ́ wo be: «Lé wo a wɛɛ yí a nunuɔ be Davidi eviɛ yí nyi Kliso dó ɔ? ⁴² Davidi ŋtɔ nú dó Ehajijiwo wema mɛ be: "Mawu nu nɔ́ nyaŋ 'xwetɔ be: vá nɔ anyinɔnɔ do ɖushimɛ nɔ ŋ ⁴³ Kaka nɔ masɔ́ ao ketɔwo wa afɔɖojinuwo nɔ́ eo." ⁴⁴ Nɔ́ é nyi be Davidi yɔ Kliso lɔ be Axwetɔ ɖee lé é wɛɛ yí Kliso a gbe nyi Davidi eviɛ do ɔ?» ⁴⁵ Yesu nunuɔ nɔ yi nukplanviwo gacimɛ yí ahwakɔ lɔ seseɛ yi nukplanmɛnyɔwo be: ⁴⁶ «Mí kpɔ nyuiɖe le esedɔwatɔwo nú. Ɖó ɔ, wo lɔnnɔ awu jiji lɛgbɛɛwo do yí gbe jinɔ be amɛwo le do egbe nɔ Yeso kodo bubu le egodoxuwo. Wo jinɔ bubu tɔxuwo a nɔ le Mawusɛnxuwo yí gbe jinɔ mɛganwo tɔxuwo a nɔ le azanduxuwo. ⁴⁷ Wo xɔnɔ kposhiwo 'nuwo pleŋ le wo shí gankegan yí a gbe le egbedodoɖa jiji gblɛlɛwo waa nɔ́ a nyi be wowo yí nyi amɛ nyuiwo. Enu hɔnwo yí dɔ mawu a va dɔn eto nɔ́ wo veveɖe dó sɔwu amɛkpɛtɛwo nɛ.»