¹ Ci yí Yesu va ɖó Ʒliko jugan lɔ mɛ ɔ, é zɔn mɛ tiin yí vayiyiɛ. ² Ŋsu ɖka le jugan lɔ mɛ. Wo yɔɛnii be Zashe. Tagajɔtɔwo 'ga yi é nyi hwehɔnnu yí eho le shi haan. ³ é jijiɛ be ye a kpɔ amɛ ci yí wo yɔnɔ be Yesu lɔ. Vɔ ci yí amɛwo su egbɔ yí cɔ́n Yesu Yi& eyɛ Zashe lɔ gbe kpokpo ɔ, d'é sɛn eŋ a kpɔɛ go. ⁴ Eyi é shi eju yi ŋkɔ agé yí vayi la aci ɖeka ci yí wo yɔnɔ be sikomɔ ji keŋ a kpɔ Yesu, ɖó ɔ yɛ ɖo a to ehɔn a vayi. ⁵ Ci yí Yesu va ɖo ehɔn lɔ ɔ,é kɔ eta yi eji yí nú nii be «Zashe, ɖè eblɛ a ɖyi. Dó ɔ, ŋ do a nɔ ao 'xwe egbɛ.» ⁶ Eyi Zashe ɖe eblɛ yí ɖyi yí vayi xɔ Yesu kodo jijɔ. ⁷ Ci yí amɛ lɔwo pleŋ kpɔ enu lɔ nenɛ ɔ, wa tɔ́ hɔnmɛ sasa dó Yesu yí nu be: «Enuvɔwatɔ 'xwé é kpɔ a vayi nɔ viɛ!» ⁸ Vɔ ɔ, Zashe va nɔ ete do ŋmɛ nɔ Axwetɔ lɔ yí nu nii be: « Axwetɔ, sè ɖa! Na ma nyaŋ dɔkunuwo dó amɛve dó amɛve yí a sɔ akpa ɖeka ma nɔ wamɛnɔwo. Eyi nɔ́ ŋtafu amɛɖe dó ɔ, na cu nɛni ci yí ŋ xɔ le shi lɔ han donu amɛnɛ nii.» ⁹ Eyi Yesu nu dó nú nɔ zashe be: «Egbɛ ɔ, Mawu xɔ eo kodo amɛ ciwo yí le ao 'xwe mɛ. ¹⁰ Ɖo eo cán ɔ è nyí Ablahamu jijimɛvi hɛnnɛ. Ɖó Agbetɔvi lɔ va xexe lɔ mɛ yí a va ji amɛ ciwo yí bú kpɔ́ yí a xɔ nɔ wo.» ¹¹ Yesu gbe do labalu nɔ amɛ ciwo yí se enyɔ ciwo yí é nu vayi. Ɖó ɔ, Yesu gogogoɔ Ʒeluzalɛmu yí amɛwo bubuɔ be Mawu 'fiɔɖuxu lɔ a tɔ zeze trololo. ¹² Eyi é nu nɔ wo be: «Ŋsu ɖeka ci yí so amɛ ŋkuvilejiwo xomu mɛ sɔ enu gbeɖeka yí yi eju jiji ɖeka mɛ nɔ́ wo a sɔɛ ɖó efiɔ. Le i godu mɛ ɔ, á gbe trɔgbɔva yi 'ji lɔ mɛ. ¹³ Gbɔxwe yí a so lɔ ɔ, é yɔ́ ame amɛwo le yi 'dɔvaviwo mɛ yí sɔ ṣhika gajɔho ci yí xɔ ashi haan ɖeka ɖeka sɔ na wowo ɖomɛtɔ ɖeka ɖeka yí nu nɔ wo be: "Mí sɔ trɔtrɔ alɔ kaka a sɔna gbecigbe yí na trɔgbɔ." ¹⁴ Vɔ ɔ, yí 'ju mɛtɔwo de lɔn yi 'nyɔ gbɔ go. Wo ɖó amɛwo ɖaɖa fini ci yí wo a ɖó amɛ lɔ efiɔ le be: "Mì de ji be eyɛ a ɖu efiɔ nɔ mì go." ¹⁵ Gankegan, wo sɔ ɖo efiɔ lɔ nyao. Yí é trɔgbɔva yi 'ju mɛ. Eyi é dɔ yí wo yɔ́ yi dɔwavi ciwo yí é ma eho nɔ vayi vɛ nii nɔ a kpɔ ele ci yí amɛɖeka amɛɖeka kpɔ́ dojí. ¹⁶ Amɛ ŋkɔtɔ va ɖó yi nú nii be "Mɛgan, ŋ trɔ alɔ kodo shika gajɔnho ci yí e sɔ jo nɔ ŋ lɔ yí kpɔ́ yi han amɛve do jíi." ¹⁷ Efiɔ lɔ nu nii be: "É nyɔ́. Edɔwavi adodui yí é nyi. Ci yí é nɔ egbeji le enu hwɛvi mɛ taɖo ɔ, na sɔ́ eo ɖo jugan amɛve jikpɔtɔ." ¹⁸ Edɔwavi amɛtɔ vá ɖó yí nú nii be: "Mɛgan, ŋ kpɔ shika kajɔnho ci yí é sɔ jó nɔ́ ŋ han amatɔn dó jíi." ¹⁹ Eyi efiɔ lɔ nú nii be: " Eo can ɔ, na sɔ eo do jugan amatɔ jikpɔtɔ." ²⁰ Edɔwavi bú gbe va yí nu nii be: "Mɛgan, ao shika gajɔnho ci yí è sɔ jó nɔ́ ŋ ge. Ŋ sɔ blá do jukuvi ɖeka 'tú yí sɔ̀ wlá ɖɛ. ²¹ Ŋ vɔnvɔn nɔ eo sasa. Ɖ ɔ, è shinnɔ ŋta. É sɔnɔ enu le fini ci yí d'é sɔ́ enuɖe dado go. Yí jinuku ci d'è do go ɔ,é yí è vayi ɖenɔ." ²² Eyi efiɔ lɔ vá nú nii be:" "Edɔwavi vɔin yí è nyi. Nuxu ci yí eo ŋtɔ xo yi na sɔ do ehwɛ nɔ eo. É nya sas be ŋta shintɔ yí enyɛ nyi yí ŋ sɔnɔ enu le fini ci yí ŋ de sɔ́ enuɖe dado go yí va ɖenɔ jinuku ci yí ŋ de dó go. ²³ Ci yí é le nɛnɛ ɖeen nyi yí jɔ taɖo yí d'è sɔ nyaŋ 'ho yí dado ehodadoxu nɔ́ ŋ go ɔ? Gahɔnmɛ ci yí ŋ gbɔ nɛnɛ viɛ sa ɔ, ma xɔ eho lɔ yí ele kankin ɖewo a je ji nɔ ŋ!" ²⁴ Le i godu mɛ ɔ, efiɔ lɔ nù nɔ́ amɛ ciwo le hɔn lɔ be: "Mí gui shika gajɔnho lɔ le shi yí a sɔ́ jó nɔ́ amɛ ci shi yí amɛwo le." ²⁵ Amɛ lɔwo nu nɔ efiɔ lɔ be: "Mɛgan, shika gajɔnho amɛwo bú le amɛ lɔ yɛ shi vɔ aŋ." ²⁶ Efiɔ lɔ ɖoŋci yi ɖe mɛ nɔ wo be: "Ŋ nunuɔ nɔ mí baŋ amɛ ci shi yí enu le ɔ, wo a gbe nii sugbɔ do ji. Gankegan yí amɛ ci shi eɖe se le go ɔ, wo a gbe xɔ kankin ci yí à ɖo ɖɛ le shi. ²⁷ Vɔ nyaŋ ketɔ ciwo yí de jí bé enyɛ lé ɖu efiɔ nɔ yewo go ɔ, mí kplɔ wo vá elɛ yí a so ehlo nɔ wo le ŋmɛ nɔ ŋ."» ²⁸ Ci yí Yesu nu enyɔ hɔnwo ɖegbɔ ɔ, é jeŋkɔ nɔ ahwakɔn lɔ yí sɔ emo kpé Ʒelusalɛmu. ²⁹ Ci yí wo gogogoɔ Bɛtifaʒe kodo Betani Kɔxwiwo le Olivuci'kpó 'xa jiɔ, Yesu dɔ yi nukplanvi amɛve ɖaɖa ³⁰ be: «Mí yi kɔxwi ci yí le ŋkɔ nɔ mì hunɖaa mɛ. Nɔ mí vayi ɖo ɔ, mì a kpɔ esɔkɛtɛ hwɛvi ɖeka ci ji yí amɛɖe de la hɔɖe go yí wo a do eka i dó enu nú ɖɛ́. Mí cui yí a kplɔɛ va elɛ nɔ́ ŋ. ³¹ Nɔ́ amɛɖe niɔ́ mí se be: "Nyi yi jɔ yí mí cucuɔ esɔkɛtɛ lɔ mɛ ɔ," mì a ɖoŋci nɔ amɛ lɔ be: "Axwetɔ yí ʒíin."» ³² Eyi nukplanvi amɛvi lɔwo yi kɔxwui lɔ mɛ yí vayi kpɔ enu lɔwo pleŋ shigbe lehanci yí Yesu nui nɔ wo dó vayi jí nɛnɛ. ³³ Gacimɛ yí wo le esɔkɛtɛ hwɛvi lɔ cuɔ ɔ, amɛ ciwo tɔ é nyi biɔ́ wo se be: "Nyi yí jɔ mì cucuɔ esɔkɛtɛvi lɔ ɔ?" ³⁴ Nukplanvi lɔwo ɖoŋci nɔ́ wo be: "Axwetɔ lɔ yí ʒíin." ³⁵ Eyi wo kplɔ esɔkɛtɛ hwɛvi lɔ vá nɔ́ Yesu. Wo sɔ wowo vuvɔwuwo ɖó dó jí kɔ Yesu do jí. ³⁶ Nɔ́ wo yi yíɛ yí yiyíɛ ɔ, amɛwo sɔnɔ wowo vuvɔwu ɖonɔ do emɔ ji nɔ Yesu. ³⁷ Eyi ci yí Yesu ɖyi ɖyiɛ le olivuci 'kpó lɔ ji yí sɔ gogogoɔ Ʒeluzalɛmu ɔ, nukplanvi sugbɔ ciwo yí lɔ ahwa kplɔɛ do tɔ jijɔ kpɔkpɔ yí le Mawu kanfuɔ kpdp axwa nɔ enujiŋ ciwo pleŋ yí wo kpɔ́ yí wo wa. ³⁸ Wo nunuɔ be: «Mawu le yila efiɔ ci yí gbɔgbɔgɔ le mawu nyikɔ mɛ! Fafa lè va jiŋkushimɛ yi kanfukanfu nɔ mawu le eji bóo!» ³⁹ Le ehɔn ɔ, Falisitɔ ɖeka ciwo yí le ahwa lɔ mɛ nu nɔ Yesu be: «Cicagan, kà aɖyi do ao nukplanviwo nɔ wo a bɔ enu.» ⁴⁰ Yesu ɖoŋci nɔ wo be: «Ŋ nunuiɛ nɔ mí be nɔ́ nukplanvi lɔwo bɔ enu can ɔ, ekpewo a tɔ́ axwa dodo!» ⁴¹ Gacimɛ yí Yesu gogo Ʒeluzalɛmu jugan lɔ yí lé ŋkuvi do nú ɔ, e fan avin do enu nii ⁴² yí nú be: «Nɔ́ nya yí Ʒeluzalɛmu nyá enu ciwo yí a hen 'fafa vá nɔ́ wo le egbɛ ŋkeke cɛ ji ɖee, á nyɔ́! Vɔ jɔgbevintɔ le eviɛ́ mɛ viɛ ɔ, wowo ŋkuviwo de sɛn eŋ kpɔ enu lɔwo go. ⁴³ Ɖó ɔ, ŋkekrwo gbɔgbɔ nɔ eo yí ao ketɔwo a va sɔ enuwo trɔdo eo kaka kpɔ d'à sɛn eŋ shi go. Wo a bɔbɔ ego nɔ eo to afishafi. ⁴⁴ Wo a va gban eo kodo ao 'viwo yí wo d'a gbe ekpe ɖé ɖɛ do eɖe ji yí á nyi exɔ yí le ete go. Ɖó ɔ, wo de jeshi egaxoxo ci mɛ yí mawu vá yí a vá kpedo wo nú go. ⁴⁵ Le i godu mɛ ɔ, Yesu yi Mawuxwe lɔ mɛ yí vayi tɔ enusatɔwo nyanya tii ⁴⁶ yí nunuɔ nɔ wo be: «Mí de nyá be Mawu núi yí wo ŋwlii do afiɖeka le yi 'nyɔ wemawo mɛ daɖɛ go be: "wo a yɔ nyaŋ 'xwemɛ be gbedoɖatɔxu." «Vɔ ɔ, míwo vá sɔ́ trɔ́ flanfinɔ ganganwo 'gu ji!" ⁴⁷ Yesu kplankplan enu tɛgbɛɛ le Mawuxwe lɔ mɛ. Avɔsatɔwo 'gawo kodo esedɔwatɔwo sɔkpenɔ jukɔn lɔ mɛganwo jijiɛ fini ci yí wo a tó yí a wui. ⁴⁸ Vɔ ɔ, wo de nyá lehanci yí wo a wɛɛ do yí a wui go. Ɖó ɔ, jukɔn lɔ pleŋ ɖoɖoɔ eto Yesu veviɖe.