¹ Le i godu ɔ, Yesu gbe do labalu cɛ nɔ wo yi a dansin nɔ́ wo b wo ɖo a wanɔ egbedoɖa tɛgbɛɛ. Yi d'a ci ekɔ nɔ amɛ go. ² É nú nɔ́ wo be: «Kojoɖotɔ ɖeka nɔ́ jugan ɖeka mɛ vayi. D'" vɔnnɔ nɔ́ Mawu go yí d'é ɖonɔ shishi nɔ́ amɛɖekpokpo go. ³ Kposhi ɖɛka can le jugan hɔn lɔ ké mɛ hɛnnɛ yí vanɔ kojoɖotɔ lɔ gbɔ́ kabakaba yí va nunuɔ nii be: "só kojo jɔjɔɛ nɔ ŋ yí a xɔ nɔ ŋ le alɔmɛ nɔ amɛ ci yí kpé eta kodo ŋ." ⁴ Kojoɖotɔ lɔ gbegbeɛ kposhi lɔ 'nyɔ nɛnɛ kaka azan jiji. Vɔ ɔ, é va bu tamɛ kpɔ yí nú le yiɖeki mɛ be: " Ci yí ŋ de vɔnn nɔ Mawu go yí ŋ de ɖonɔ shishi nɔ́ amɛɖekpokpoi go can ɔ, ⁵ na so kojo jɔjɔɛ nɔ́ nyɔnu lɔ yí a só enyɔ nii nɔ́ ci yí é kpɔtɔ yí va dodoɔ aya nɔ ŋ taɖo. nɔ́ d'é nyi nɛnɛ ɔ, á dodoɔ aya nɔ kaka na dán eta nɔ enyɛ ɖki."» ⁶ Axwetɔ vá nú be: « Mí se enyɔ ci yí kojoɖotɔ majɔmajɔ hɔn nunuɔ ɖa! ⁷ Ɖee Mawu yɛ d'a so kojo jɔjɔɛ nɔ yí 'mɛcancan ciwo yí donɔ axwa yɔɛ ezan kodo kede yí a xɔ nɔ wo bá? Á bɔ enu yí gamɛ a yi gbɔxwe yí á va ke enu do wowo 'nyɔ nu a? ⁸ Ŋ nunuiɛ nɔ mi be Mawu a so kojo jɔjɔɛ nɔ wo yí a xɔ nɔ́ wo kaba. Vɔ nɔ́ Agbetɔvi lɔ va trɔgbɔ ɖee, à gbe va kpɔ amɛɖe le nyigban ji yí á ɖo xɔse a?» ⁹ Yesu do labalu nɔ́ amɛ ciwo yi nunuɔ be yewo nyí amɛ jɔjɔɛ le Mawu ŋkuvimɛ yí gbalinɔ amɛ kpɛtɛwo be: ¹⁰ Gbeɖeka ɔ, ŋsu amɛve zɔn vayi mawuxwe yi a do egbe ɖaɖa. Amɛɖeka nyi Falisitɔ yí yi kpena nyí tagajɔtɔ. ¹¹ Falisitɔ le ete yí dodoɔ egbe ɖaɖa le yiɖekimɛ nɔ Mawu be: "Mawu ŋ do akpe nɔ eo. Ɖo ŋ de le shigbe agbetɔ kpɛtɛ ciwo yí nyí Flanfinɔ amɛmajɔ majɔwo kodo amɛ bushixɔtɔwo nɛnɛ go. Ŋ do akpe nɔ́ eo be ŋ de le shigbe tagajɔtɔ hɔn han nɛnɛ go. ¹² Ŋ blanɔ enu zeve le kuɛshila ɖeka mɛ yí ŋ nanɔ nuwoli nɔ́ ele ciwo yí ŋ kpɔnɔ dó enu ciwo pleŋ yí ŋ wanɔ ji". ¹³ Vɔ tagajɔtɔ lɔ yɛ le azɔge. D'é gbé edɔn yí a kɔ eta yi ejí yí a kpɔ́ Mawu gbɔ́ ɖaɖa kpetii. go. Vɔ ɔ, é sɔ́ alɔ tɔ akɔn yí nunuɔ bé: " Mawu, kpɔ ŋshishi nɔ́ enyɛ, enuvɔnwatɔ cɛ́. ¹⁴ Ŋ ɖeɖeɛ mɛ nɔ mí be nɔ́ wo amɛve lɔwo tó yí kpé axwe ɔ, tagajɔtɔ cɛ yí Mawu a yɔ́ be amɛjɔjɔɛ. Ɖo amɛ ci yí kɔkɔ yiɖeki dó ejí ɔ, wo a ɖyiɖyii va gɔnmɛ yí amɛ ci yí dyiɖyiɛ yíɖeki va gɔnmɛ, wo akɔkɔɛ do ejí.» ¹⁵ Amɛ ɖekawo hɛn ɖeviwɛwo vá nɔ́ Yesu nɔ́ asɔ alɔ dado wo ji. ci yí nukplanvi lɔwo kpɔ enu lɔwo nɛnɛ ɔ, wo gbe nɔ amɛ lɔwo. ¹⁶ Vɔ ɔ, Yesu dɔ yí wo hɛn ɖevi lɔwo vɛ nii yí é nunuɔ nukplanviwo be: « Mí tashi ɖeviwo nɔ wo a vá ŋ gbɔ. Mí ŋgbe xe emɔ nɔ wo go. Ɖo Mawu 'fiɔɖuxu lɔ nyi amɛ ciwo nyi ɖeviwo nɛnɛ tɔ́. ¹⁷ Le nyɔnɔnui mɛ ɔ, ŋ nunuɔ nɔ mí be nɔ́ amɛɖe de xɔ Mawu 'fiɔɖuxu lɔ shigbe ɖevixwe nɛnɛ ɔ, d'a sɛ́n eŋ yí mɛ gbeɖe go.» ¹⁸ Yuɖatɔ wo 'ga ɖeka biɔ́ Yesu de be: « Cica nyui, nyi yí ŋ ɖo a wa yí Mawu a ná agbemavɔ ŋ ɔ?» ¹⁹ Eyi Yesu nu nii be: «Nyi yí dɔ taɖo yí è yɔyɔ ŋ be amɛ nyui ɔ? amɛɖe de nyui amɛ nyui tó evo nɔ Mawu go. ²⁰ È nya be Mawu do ese be: 'ŋgbè dɔn nyɔnnu ci yí de nyí ashio gbɔ go, ŋgbè wu amɛ go, ŋgbe fin efin go, ŋgbe ɖe kunu agɔ go, bu edao kodo enɔo"» ²¹ Ŋsu lɔ nu nɔ Yesu be: « Ŋ wa do ese hɔnwo pleŋ ji so ɖevixwɛmɛ ɖii.» ²² Ci yí Yesu se yí 'nyɔ hɔnwo ɔ, é nu nii be: «Enu ɖeka kpɔtɔ nɔ eo yí à wa. Yì sa ao dɔkunuwo pleŋ yí a sɔ́ eho lɔ má nɔ́ wamɛnɔwo. Gahɔnmɛ ɔ, dɔkunuwo a le jiŋkushi mɛ nɔ eo. nɔ é wɛɛ nɛnɛ ɖegbɔ ɔ, na va yí a kplɔ ŋ do.» ²³ Vɔ ci yí ŋsu lɔ se enyɔ lɔ ɔ, é ci ŋshishi mɛ. Ɖó ɔ, dɔkunuwo sugbɔ le shi. ²⁴ Ci yí Yesu kpɔ be yí ci ŋshishi mɛ ɔ, é nu be: «Á sɛn eŋ nɔ amɛ ci shí dɔkunnuwo le be woa yí Mawu 'fiɔɖuxu lɔ mɛ. ²⁵ Enyɛ́ 'tu mɛ toto a le bɔbɔɛɖe nɔ esɔkpotɔnɔ sɔwu be nɔ ehotɔnɔ a yí Mawu 'fiɔɖuxu lɔ mɛ.» ²⁶ Gahɔnmɛ yí amɛ ciwo yí ɖoɖoɔ eto Yesu va biɔɛ se be: «Ci yí é le nɛnɛ ɖee, mi yí a sɛ́n eŋ kpɔ hwlɛngan ɔ?» ²⁷ Eyi Yesu ɖoŋci nɔ́ wo be: «Enu ci yí a gló wawa nɔ agbetɔwo ɔ, Mawu a wɛɛ.» ²⁸ Gahɔnmɛ yí Piyɛ nú nɔ́ Yesu be: « kpɔ̀ ɖaa; mìwo ɔ, mìwo tashi mìwo 'nuwo keŋkeŋ ɖɛ yí kplɔ eo do.» ²⁹ Yesu ɖoŋci nii be: «Le nyɔnɔnui mɛ ɔ, ŋ nunuɔ nɔ́ mí be nɔ amɛɖe sogbe axwe; ashi, fofowo alo nɔnviwo, enɔ alo eda kodo ɖeviwo ɖɛ́do mawu 'fiɔɖuxu lɔ 'ta ɔ, ³⁰ Mawu a va sɔ enu sugbɔ buwo ɖó tɔxu nii le xexe cɛ mɛ. Eyi le xexe ci yígbɔgbɔ mɛ ɔ, gbɔgbɔ mɛ ɔ, Mawu a va nii agbemavɔ.» ³¹ Yesu kplɔ nukplanvi wive lɔwo vá yiɖeki gbɔ́ yí nú nɔ́ wo be: «Mí kpɔ ɖá, mì yigɔ Ʒeluzalɛmu fini ci yí enu ciwo pleŋ yí mawu 'ŋɛdotɔvi lɔ nú a jɔ le. ³² Ɖo ɔ, wo a vá sɔ daashi nɔ amɛ ciwo yí de sɛ́nnɔ Mawu yí wo a ko Agbetɔvi lɔ, a zuzuiɛ yí a cu etan do ŋmɛ nii. ³³ Wo a do sovobayɛyɛ nii yí a wui. Eyi le ŋkeke amɛtɔntɔ lɔ gbe ɔ, á fɔn so ekuwodi.» ³⁴ Vɔ ɔ, nukplanvi lɔwo de mɔŋje enyɔ hɔn ci yí Yesi nu lɔ mɛ go. Wo sɔ enyɔ hɔn lɔwo gɔnmɛsese wla do wo yí de nyá enu ci nu yesu xoxoɔ nuxu so go. ³⁵ Yesu gogogoɔ Ʒeliko jugan mɛ. Ŋkuvitɔntɔntɔnɔ ɖeka nɔ anyuinɔnɔ do emɔtu yí le enu biɔgɔ. ³⁶ É se eʒin ci yí ahwa ci yí kplɔ Yesu do lɔ nanaa yí biɔ́ se be nyi yí jɔjɔgɔ mɛ. ³⁷ wo ɖoŋci nii be: «Yesu Nazalɛtitɔ yí vayigɔ!» ³⁸ Eyi é tɔ axwa dodo yɔɛ be: «Yesu, Davidi eviɛ, kpɔ ŋshishi nɔ́ ŋ!» ³⁹ Amɛ ciwo yí le ŋkɔ age nɔ Yesu tɔ adan wawa doi nɔ a bɔ enu. Gankegan ɔ, ŋkuvitɔntɔntɔnɔ lɔ gbé kpɔtɔ le axwa doɔ do ji be:«Davidi eviɛ kpɔ ŋshishi nɔ ŋ.» ⁴⁰ Yesu ci ete yí nú be wo le kplɔ ŋkuvitɔntɔntɔnɔ lɔ vɛ́ɛ nɔ eye. Eyí ci yí ŋkuvitɔntɔntɔnɔ lɔ gogo Yesu ɔ, Yesu biɔɛ se be: ⁴¹ «Nyi é jí be na wa nɔ eo ɔ?» Ŋkuvitɔntontɔnɔ lɔ ɖoŋci nii be: «Axwetɔ wɛ́ɛ nɔ ma gbe tɔ enu kpɔkpɔ!» ⁴² Gahɔnmɛ yí Yesu nú nii be: « Ao ŋkuviwo le hun no eo. Ao xɔse hwlɛn eo gan.» ⁴³ Zeɖeka vɔ, ŋkuvitɔntɔntonɔ lɔ gbe tɔ enu kpɔkpɔ yí kplɔ Yesu do yí le Mawu kanfuɔ. Ci yí amɛ ciwo yí lɔ ahwa klpɔ Yesu do kpɔ enu ci yí jɔ lɔ ɔ, wowo can tɔ́ Mawu kanfukanfu.