¹ Yesu nu nɔ́ yi nukplanviwo be: «Afɔklɛnnuwo d'a dɛ́n buɖe go. Vɔ ɔ, babɛɛ nɔ amɛ ci ji yí nɛnɛ 'nú a tó yí ² Nɔ́ wo sa ekpe gangan ɖeka dó ekɔnɔ amɛ ci yí wa nɛnɛ yí sɔ́ danŋkpɛn dó awu mɛ ɔ, á nyɔ́ nii sɔwu be ci yi á cucu amɛma nyinuɖe hɔnwo domɛtɔ ɖé xú enuvɔn mɛ. ³ Mí kpɔ míwoɖekiwo jí nyuiɖe! Nɔ́ nɔvio je agɔ do eo ɔ, yɔɛ̀ yí a ka aɖyi doi. Nɔ́ é sii yí trɔ́ ɔ, na sɔ kii. ⁴ Nɔ é gbe je agɔ do eo zeadrɛ le ŋkeke kuɖeka mɛ can yí gbe trɔtrɔ va eo gbɔ kodo zeadrɛ lɔ yí vá nunuɔ nɔ eo be: "Na trɔ enyɛɖeki a ji" ɔ, na sɔ wo kii.» ⁵ Amɛdɔdɔ lɔwo nú nɔ́ Axwetɔ be : «Dó xɔse xɔse ji nɔ mí.» ⁶ Eyi Axwetɔ ɖoŋci yí nu nɔ wo be : «Nɔ́ é nyi be mí ɖo xɔse yí xɔse lɔ klo shigbe aci gangan ci yi 'ku yí wli (lewaku) sɔwu kpɛtɛwo pleŋ nɛnɛ ɔ, mí a nú nɔ́ aci cɛ be: "Hò yí a vayi 'cu eoɖeki dó axu mɛ́ yí a gbe wa do jí. ⁷ Yesu gbe nu be: «Mi yí le mí mɛ nɔ́ yi 'dɔwavi yí de agble alo yi kplɔ elanwo yí enuɖugbe yí gbɔ ɔ, á nu nii zeɖeka be yi le va ɖu enu ɔ? ⁸ Oo, nu yí á nu nii baŋ: "vá yí ɖa enuɖuɖu nɔ ŋ yí a ɖɔ elo enudodowo keŋ a vá ɖó ekplɔn nɔ ŋ nɔ́ ma ɖu enu. Nɔ́ è wɛɛ nɛnɛ nɔ ŋ ɖegbɔ ɔ, nà va sɔ enu eoŋtɔ yí a ɖu. ⁹ Ega lɔ d'a dó akpe ɖé nɔ edɔwavi lɔ nɔ́ ci é wawa edɔ ci yí é dɔɛ go. ¹⁰ Nɛnɛke yí é le do nɔ́ míwo cán nɛ. Nɔ́ mí wa edɔ ciwo pleŋ yí Mawu dɔ mí ɔ, mí a nú baŋ: "Edɔwavi kpoŋwo yí mí yí edɔ ciwo yí mí ɖó awa yí mì wa kpoŋ".» ¹¹ Gacimɛ yí Yesu zɔn yí yiyiɛ Ʒeluzalɛmu ɔ, é totoɔ samali kodo Galile lixo mɛ. ¹² Eyi ci yí é ɖo kɔxwi ɖeka mɛ vɔ, ekponɔ amɛwo ɖekawo gbɔgbɔ a va do ego yi. Wo ci ete do azɔgbe ¹³ yí tɔ́ axwa dodo ɖaɖa yí nunuɔ nii be: «Yesu, cicagan, kpɔ́ ŋshishi nɔ́ mì.» ¹⁴ Ci yiă Yesu kpɔ wo ɔ, é nu nɔ́ wo be: «Mí yi dansin míwoɖekiwo nɔ́ avɔsatɔwo. » Ehɔntɔ ci yí wo sɔ emɔ lɔ yí ɖedo ɔ, ekpo 'dɔ lɔ mi nɔ wo. ¹⁵ Gacimɛ yí wowo domɛtɔ ɖeka vá kpɔ be edɔ mi nɔ́ eye ɔ é trɔgbɔ zeɖeka yí tɔ́ axwa dodo yí tɔ Mawu kanfukanfu. ¹⁶ É vá je ekloji dó akɔnmɛ nɔ Yesu yí doŋdo nii yí do akpe nii.Samalitɔ yí ŋsu lɔ nyí . ¹⁷ Eyi yesu xɔ nuxu yi biɔ́ se be : «Ɖee, d'é amɛ amɛwo lɔwo yí edɔ mi nɔ bá? Fini yí amashiɖekɛ kpɛtɛwo le? ¹⁸ Wo domɛtɔ ɖe de bu kpɔ be ye a trɔgbɔ a vá dó akpe nɔ Mawu go. Yí é nyi mɛdru cɛ ɖekɛ yí trɔgbɔ a?» ¹⁹ Le i godu ɔ, é va nu be: «Shi ete a yi. ao xɔse xɔ nɔ eo.» ²⁰ Falisitɔ ɖewo biɔ́ Yesu se be gahimɛ yí mawu a hɛn yí 'fiɔɖuxu vá nyigban jí mɛ. Yesu ɖoŋci nɔ́ wo be: «Mawu d'a va hɛn yí 'fiɔɖuxu va yí agbetɔwo a kpɔ ganna ganna nɛnɛ go. ²¹ Wo d'a vá nú be: "Mí kpɔ ɖá! Efiɔɖuxu lɔ ge le elɛ" alo "yí nɛ le hunɖaa" go. Ɖo ɔ Mawu 'fiɔɖuxu lɔ le míwo domɛ vɔ.» ²² Le i godu mɛ ɔ, Yesu nu nɔ́ yi nukplanviwo be : « Gamɛ li yí mí a va ji be yewoa kpɔ Agbetɔvi lɔ ŋkekewo domɛtɔ ɖeka kpetii, vɔ ɔ, mí d'a gbe va kpɔ́ɛ go. ²³ Wo a va nunuɔ n&ɔ mí be: "È le hunɖaa" alo "É le elɛtɔxu" Vɔ ɔ, mí ŋgbe yi go yí mí ngbe shi eju a kplɔ wo dó go. ²⁴ Shigbe lehanci yí eji ɖenɔ ezo le akpa ɖé nɔ jeŋkushi kaka yí a yi akpa eɖetɔ ji nii dó nɛnɛ ɔ, nɛnɛ yí Agbetɔvi lɔ ŋkeke a vá va dó nɛ. ²⁵ Vɔ gbɔxwe á va nyi nɛnɛ ɔ, é ɖo a kpe efun sugbɔ yí egbɛviwo a gbii doŋkɔ ²⁶ Eyí enu ci yí jɔ le Nɔwé hwenu han a gbe jɔ le Agbetɔvi lɔ ŋkekewo ji ²⁷ Le Nɔwe hwenu lɔ ɔ, amɛwo ɖuɖuɔ enuwo, le enuwonuɔ yí le nyɔnu ɖéɛ yí le asu ɖeɛ kaka va sɔna gbecigbe yí Nɔwe ɖo ɖakahun lɔ mɛ. Gahɔnmɛ yí jamakeshi ɖeka ja yí gbanble enuwo pleŋ yí amɛshiamɛ ku. ²⁸ Á gbe va le shigbe lɔti gamɛ ŋkekewo ji nɛnɛ. Amɛwo le enu ɖu ɔ, le enuwo nuɔ yí le enuwo xwleɛ yí le enuwo saa yí le aciwo cuɔ yi le exɔwo gbaa. ²⁹ Vɔ gbecigbe Lɔti to so sodomu jugan mɛ ɔ, Mawu na yi ezo kodo wemi ja yí fiɔ́n wo pleŋ. ³⁰ Nɛnɛke yí a gbe va jɔ do gbecigbe yi Agbetɔvi lɔ a ɖe yiɖeki dansin nɛ. ³¹ Le azan hɔn lɔ jiɔ, amɛ ci yí a le exɔ ci yí wo sɔ ekɔ cu aza nɔ tamɛ yí yi 'nuwo a le exɔ lɔ mɛ ŋgbe ɖyi a vá sɔ́ yí 'nuwo le exɔ mɛ go. Nɛnɛke yi amɛ ci yí a le ebomɛ ŋgbe trɔgbɔva axwe mɛ go nɛ. ³² Mí ɖo eŋui enu ci yí jɔ do Lɔti ashiɛ ji kpɔ́. ³³ Amɛ ci yí a ji be ye a hwlɛn ye 'gbe gan ɔ, á búi. Vɔ amɛ ci yí a bú yi 'gbe ɔ, á lii do ete. ³⁴ Ŋ ɖe ɖeɛ mɛ nɔ mí be, ezan hɔn lɔ mɛ, amɛ amɛve a mlɔ anyi dó eba ɖeka jí. Vɔ ɔ, wo a cán eka yí a gbe ɖeka. ³⁵ Nyɔnu amɛve a bɔ a le jinuku cuɔ le ětě ji. Wo a can ɖeka yí a gbé ɖeka.» [ ³⁶ Ŋsu amɛve a le ebomɛ. Wo a can ɖeka yí a gbe ɖeka ɖɛ́.] ³⁷ Eyí nukplanvi lɔwo va biɔ Yesu se be: «Axwetɔ, fini yí enu lɔ a jɔ le nɛnɛ ɔ?» Yesu ɖoŋco nɔ wo be: «Fini ci yí elankuku le ɔ ehɔntɔxu yí klansuwo bɔnɔ do nɛ.»