¹ Yesu gbe nu nɔ yi nukplanviwo ke be: «Ŋsu ehotɔnɔ ɖeka wa dɔkunuwojikpɔtɔ ɖeka ɖɛ. Gbeɖeka ɔ, wo vá nú nɔ́ ehotɔnɔ lɔ be dɔkunuwojikpɔtɔ lɔ zanzan enu lɔwo yaka yaka. ² Eyi ehotɔnɔ lɔ yɔ́ɛ yí nu nii be: "Enyɔ hinwo nyi hɔnwo yí ŋ seseɛ so eo nu ɔ? Wà kɔnŋta nɔ ŋ so lehanci yí è kpɔ nyaŋ dɔkunu lɔwo jí dó nú. Ɖó ɔ, d'à gbe kpɔ wo ji nɔ ŋ go." ³ Dɔkunuwokpɔtɔ bu tamɛ kpɔ yí nu le yiɖeki mɛ be: " Nyaŋ 'xwetɔ jijiɛ a xɔ edɔ le ŋ shii. Lé yí na wɛɛ do ɔ? Ŋ de ɖo ŋsɛn yí a de agble go yí kpɔ ŋ da dɛn eŋ va dán yí a tɔ enu biɔbiɔ o. Ŋkpɛn a wa ŋ. ⁴ Ecɛviɛ ɔ, ŋ kpɔ enu ci yí na wa yí nɔ nyaŋ 'xwetɔ vá xɔ edɔ le ŋ shi cán ɔ, ma kpɔ amɛ yí a xɔ do yi 'xwé." ⁵ Eyi é tɔ amɛ ciwo pleŋ yí ɖu efɛn do yi 'xwetɔ yɔyɔ ɖeka ɖeka. É biɔ amɛ ŋkɔtɔ se be: "Nɛni yí è ɖu do nyaŋ 'xwetɔ ɔ?" ⁶ Amɛ lɔ ɖoŋci nii be: "Wolivu 'mi kplikpan ekave howi yí ŋ ɖo a cu nii." Dokunuwojikpɔtɔ lɔ nu nii be: "wema ci yí dansin efɛn hɔn ci yí è ɖu gé. Xɔ́ɛ yí a ɖe eblɛ yí a ŋwlɛ kplikpan eka howi do jí." ⁷ Le i godu ɔ, dɔkunuwojikpɔtɔ lɔ gbe biɔ amɛ amɛvetɔ lɔ se be: "Nɛni yí è ɖu do nyaŋ 'xwetɔ ɔ?" Yɛ ɖoŋci nii be: "Eliku dɔkpo ekave howi yí ŋ ɖu doi." Dɔkunuwojikpɔtɔ lɔ nú nii be: "Wema ci yí dansinefɛn hɔn ci yí è ɖu ge. Xɔɛ yí a ɖe eblɛ a ŋwlɛ ekave do jí" ⁸ Axwetɔ lɔ kanfu yi dɔkunuwojikpɔtɔ, enuficificiwatɔ lɔ nɔ́ lehanci yí è bi le enu lɔwo hiʒihiʒi mɛ do ŋu. Ɖo le nyɔnɔnui mɛ ɔ, xexe lɔ mɛtɔwo bí le wana ciwo yí wo zannɔ ɖaɖa wowonɔnɔwo gbɔ dradrado mɛ sɔwu amɛ ciwo yí nyi klɛnklɛnmɛ 'viwo.» ⁹ Yesu sɔ kpi nɔ yi nukplanvi lɔwo be: «Mi zan xexemɛ dɔkunu fluamɛ, fluamɛwo, enumajɔmajɔ lɔwo a sɔ do exlɔwo. Gahɔnmɛ nɔ wo dɛn mí, wo a va xɔ mí do nɔxu mavɔmavɔ lɔwo mɛ. ¹⁰ Amɛ ci yí wanɔ enu do tɔxu le enu kankinwo mɛ ɔ, á gbe wa enu dó tɔxu le ganganwo mɛ hɛnnɛ. Eyi amɛ ci yí de wanɔ enu dó tɔxu le enu kankinwo mɛ ɔ, d'é wanɔ enu do tɔxu le enu ganganwo mɛ hɛnnɛ go. ¹¹ É yí dɔ taɖo nɔ́ mí de sɛ́n eŋ nɔ egbe ji le lehanci yí mí zanzan xexemɛ dɔkunu fluamɛ fluamɛwo mɛ do go ɔ, mi yí a sɛ́n eŋ sɔ dɔkunu adodui ná mí be míwo lé kpɔ jí ɔ? ¹² Eyi nɔ́ mí de le egbeji le amɛ buwo dɔkunuwo jikpɔkpɔ mɛ go ɖee, mi yí a vá sɔ́ ciwo yí nyí míwotɔ na mí ɔ? ¹³ Edɔwavi ɖé de li yí a sɛ́n eŋ yí a sɛn axwetɔ amɛve go. Á lɔn ɖeka yi a gbé ɖeka alo á se etonu nɔ́ ɖeka yí a gbali ɖeka. Mí d'a sɛ́n eŋ s€n Mawu kodo eho do eju go.» ¹⁴ Ci yí Falisitɔ ciwo yí eho jɔnɔ eji nɔ se enyɔ ciwo yí Yesu nu hɔnwo ɔ, wo tɔ́ Yesu koko. ¹⁵ Yesu nu nɔ́ wo be: «Míwo ɔ mí dannɔ asin míwoɖekiwo nɔ́ amɛwo shigbe amɛjɔjɔɛwo nɛnɛ. Vɔ ɔ, Mawu kpɔkpɔ míwo 'jiwo mɛ; ɖó enu ci yí gbetɔwo kpɔkpɔ be yi nyí enu gangan ɔ, nyinɔ enugblegble le Mawu ŋkuvi mɛ. ¹⁶ Gbɔxwe yi Ʒan amɛ ci yí wanɔ ʒinʒindotɔmɛ Mawutɔ a va ɔ, wo xɔ ese ciwo yí Mawu dó dó to Mɔyizi ji yí se eŋɛ ciwo yí Mawu'ŋɛdotɔwo do. So gahɔnmɛ ɔ wo dodoɔ eŋɛnyui ci yí kudo Mawu 'fiɔɖuxu nu nɔ́ agbetɔwo yí amɛɖeka amɛɖeka le akpasɛnsɛn nú waa yi a ɖó mɛ. ¹⁷ Vɔ ɔ, é le fafɛɖe nɔ jiŋkushi kodo nyigban be wo d'a gbe va li go ga,kegan yí efin kuɖyi kuɖeka kpetii d'a cucu le Mawu 'sé wema lɔ mɛ go. ¹⁸ Ŋsu ɖekpokpoi ci yí a nya ashiɛ yí a ɖe ebu ɔ, é xɔ amɛ bu 'shi yí ŋsu ci yí ɖe nyɔnu ɖe ci yí asuɔ nya ɔ, amɛ lɔ xɔ amɛ bu 'shi hɛnnɛ.» ¹⁹ Yesu gbe nu ke be: «Ŋsu ehotɔnɔ ɖeka li sasa yí donɔ cigan 'nú hovevitɔwo kodo cigan 'vɔ wlɔɖyu ci yí wo yɔnɔ be lɛn. Gbeɖeka duu ɔ, é ɖunɔ agɔ yí ɖunɔ agbe ²⁰ ŋsu wamɛno ɖeka can nii vayi yí wo yɔɛnii be Laza Gotu sun abi nii pleŋ yí é mlɛnɔ anyi dó ŋsu ehotɔnɔ lɔ 'gbo ji. ²¹ É droni nyuiɖe be nɔ ehotɔnɔ lɔ ɖuɖuɔ enu ɔ, ye a cancan kankin ciwo yi hlɛnhlɛn kɔ nyigban yí a sɔ́ ɖuɖuɔ. Vɔ sɔwu nenɛ ɔ, avuwo yí vá ɖyiɖɔnɔ abiwo mɛ nii. ²² Eyi gbeɖeka vɔ, wamɛnɔ lɔ vá kú yí Mawu dɔ lawo vá kɔɛ hɛnyi Ablahamu gbɔ. Ŋsu ehotɔnɔ lɔ cán vá kú yí wo sɔ́ ɖyi. ²³ É vá le efun kpeɛ sugbɔ le ekuwadi. Eyi é fɔn eta yí kpɔ́ Ablahamu le jijitɔxu ɖaɖa yí Laza le axa ji nii. ²⁴ Eyi ehotɔnɔ lɔ do axwa be: "Edanyɛ Ablahamu, kpɔ́ ŋshishi nɔ ŋ yi a ɖó Laza ɖaɖa nɔ a va sɔ alɔvi do eshimɛ yí a vá sɔ́ ja do aɖe ji nɔ́ ŋ nɔ́ a fa nɔ ŋ. Ɖó ɔ ŋ kpekpeɛ efun sugbɔ le ezo cɛ mɛ." ²⁵ Vɔ ɔ, Ablahamu ɖoŋci nii be: "Evinyɛ ɖó eŋui be è xɔ nyɔna sugbɔ gacimɛ yí è le agbe yí Laza yɛ ɔ, yɛ xɔ jɔgbevɔin sugbɔ. Ecɛviɛ ɔ, wo va fafa akɔn nii keŋ yi eo va le efun kpeɛ. ²⁶ Gbe sɔwu nɛnɛ ɔ, zdu gangan ɖeka so mìwo kodo míwo gblamɛ nɔ amɛ ciwo yí ají be yewo a só le mì hnɔ́ elɛ yi mí gbɔ ŋgbe kpe ji go yí amɛ ciwo a ji be yewo a so le fini ci yí è le yí a va kaka mìwo gbɔ́ le elɛ agé ŋgbe kpé ji hɛnnɛ go." ²⁷ Eyi ehotɔnɔ lɔ nú nɔ́ Ablahamu bé " Edanyɛ, ŋ ɖɛ kuku nɔ eo be eo lé ɖó Laza ɖaɖa edanyɛ 'xwe mɛ. ²⁸ Ɖó ɔ nɔvinyɛ ŋsuvi amatɔn li. Laza lé vayi kanxlé wo nɔ wowo cán ŋgbe gbe va vá ayaɖuɖu tɔxu cɛ go. ²⁹ Ablahamu ɖoŋci nii be: "Mɔyizi kodo Mawu 'ŋɛdotɔwo 'nyɔ le nɔvio ŋsuvi lɔwo gbɔ́ yí le afɔta nɔ wo. Wo lé ó eto wowo 'nyɔ lɔwo a!" ³⁰ Hotɔnɔ lɔ trɔxɔ nuxu yí nú be: "Oo, Ablahamu, edanyɛ, ehɔn sun go. Vɔ nɔ́ amɛɖe só ekuwodi elɛtɔxu yí yi kpɔ wo ɔ, wo a lɔn a trɔ́ wowoɖekiwo a ji blebu." ³¹ Vɔ ɔ, Ablahamu nu nii be: "Nɔ́ wo de seseɛ Mɔyizi kodo mawu ŋɛdotɔwo 'nyɔ go ɔ, nɔ́ amɛɖe gbe va fɔ́n so amɛkukuwo domɛ yí vayi kpɔ wo cán ɔ, nɛnɛ lɔ ke ké yí wo d'a lɔn a xɔ yi 'nyɔ go nɛ.