^{1 2} Tagajɔtɔ kodo enuvɔnwatɔ buwo tegogo Yesu keŋ yí a ɖo eto yi. Falisitɔwo kodo esedɔwatɔwo tɔ ɖyika dodoi be: «Ŋsu cɛ lɔn yí xɔxɔ enuvɔnwatɔwo nyuiɖe yí ɖuɖuɔ enu kodo wo.» ^{3 4} Eyi Yesu do labalu cɛ nɔ wo be: « nɔ́ amɛɖe le mí mɛ yí ɖo lɛngbɔ ekave howi yi ɖeka bú le wo mɛ ɖee, d'a tashi ekave howo hoashiɖekɛ kpɛtɛwo daɖɛ dó egbeɖuxu yí a vayi tɔ́ kuɖeka ci yí bú lɔ jiji kaka a vá sɔnanɔ hwecinu yí a kpɔɛ bá? ⁵ Eyi nɔ́ é kpɔ́ lɛngbɔ lɔ ɔ, a kɔ́ do abɔta kodo jijɔ ⁶ yí a tɔ trɔva axwɛ mɛ yí a yɔ yí 'xlɔwo kodo amɛcáciwo yí dó lixo kodoi be: " mí va kpɔ́ jijɔ kodo ŋ. Ɖó ŋ kpɔ nyaŋ lɛngbɔ ci yí bú nɔ́ ŋ vayisasa!"» ⁷ Eyi Yesu nu be na niu nɔ́ mí hɛnnɛ be nɛnɛke yi é le do nɛ be eji a jɔ Mawu sugbɔ le jiŋkushi mɛ dó enuvɔnwatɔ kuɖeka nú é trɔ yiɖeki yí ji sɔwu dó amɛjɔjɔɛ ekave howo hoashiɖekɛ ciwo yí de ʒián jimɛtrɔtrɔ do nu ɛ. ⁸ Yesu gbe nu ké be: «Nɔ nyɔnu ɖe li yí wa gajɔnho amɛwo ɖɛ yí ɖeka jɔn yí bú nii ɖee, d'á tɔ kaligban yí a kplɔ́ exɔ lɔ yí a jii kpɔ nyuie kaka a sɔna gacimɛ yí á kpɔɛ bá? ⁹ Eyi nɔ é kpɔɛ ɔ, a yɔ yi 'xlɔ́ nyɔnushiwo kodo amɛ ciwo yí dó lixo kodoi be "Mí va kpɔ jijɔ kodo ŋ. Ɖo , ŋ kpɔ gajɔnho ci yí bú nɔ ŋ vayisasa!"» ¹⁰ Yesu sɔ kpii be: «Ŋ nunuɔ nɔ́ mí be nɛnɛke yí éle do nɛ be Mawu dɔlawo kpɔnɔ jijɔ do enu vɔnwatɔ kuɖeka ci yí trɔ́ yiɖeki yi ji nu.» ¹¹ Yesu gbe nu ké be:«Ŋsu ɖeka ɖo evi ŋsuvi amɛve. ¹² Gbeɖeka gbe ɔ, ɖevihwɛtɔ vá nu nɔ edalɔ be " Edanyɛ, mà nyaŋ cinɔnu ciwo na v&́ xɔ le eo maligbe nɔ ŋ" Eyí edalɔ ma dɔkunu ciwo yí é wa ɖɛ lɔwo nɔ eviɛ ŋsuvi amɛve lɔwo. ¹³ Azan ɖewo godu ɔ, ɖevihwɛtɔ lɔ sa yi 'nuwo yí só kodo eho lɔ yí yi eju jiji ɖekamɛ. É vayi tɔ agbe nɔnɔ yaka yaka yí zan eho ci yí le shi lɔ pleŋ. ¹⁴ Ci yí e zan eho lɔ vɛ nɛnɛ vɔ, shive gangan ɖeka vá tó le eju lɔɔ mɛ. Eyi é va tɔ enu ci yí á ɖu jiji dó ekpo. ¹⁵ Gahɔnmɛ ɔ, é va yi tɔ edɔ wawa nɔ eju lɔ mɛtɔ ɖeka yí amɛ lɔ dɔ́ɛ ɖaɖa yi 'bomɛ nɔ a vayí kpɔkpɔ ehawo ji nii. ¹⁶ Enuɖuɖu ci yí eha lɔwo ɖunɔ droini. Vɔ ɔ, kpɔ́ amɛɖekpokpoi de sɔ́ nanii go. ¹⁷ Eyi é va tɔ tamɛ bubu so enu ci yí jɔjɔ doji nu yí nunuɔ le yiɖeki mɛ be: "Edɔwavi ciwo pleŋ yí le edanyɛ shí kpɔ́ enu yí ɖunɔ kaka kpɛtɛ kpɔnɔtɔ. T ge yí enyɛ viɛ ɔ, shive jijiɛ a sɔ ŋ wu do elɛ ge. ¹⁸ Na trɔ yi edanyɛ gbɔ yí anú nii be: Edanyɛ, ŋ wa enuvɔn dó Mawu yí gbe wa enuvɔn dó eo. ¹⁹ Ŋ de gbe je be á kpɩkpɔ ŋ do evio ŋsuvi jí go. Vɔ ɔ, kpɔkpɔ ŋ do ao 'dɔwaviwo domɛtɔ ɖeka jí kpoŋ." ²⁰ Eyi é so yí emɔ yí kpe eda lɔ gbɔ. gacimɛ yí ɖevi lɔ gbe kpɔtɔ le azɔge cán ɔ edalɔ kpɔɛ yí yi 'nu wa ŋshishi nii yí é xi eju yí vá kplá ashi ekɔ nii. ²¹ Eyi eviɛ ŋsuvi lɔ nu nii be: " Edanyɛ, ŋ je agɔ do Mawu yí ŋ gbe je agɔ do eo. Ŋ de gbe je be a yɔ ŋ be evio go." ²² Vɔ ɔ, edalɔ nu nɔ yi 'dɔwaviwo be: "Mí ɖe eblɛ a sɔ́ awu jiji ci yí nyɔ́ sɔwu kpɛtɛwo pleŋ vɛ́ yí a sɔ́ dó. Mí sɔ alɔgavi ɖeka dó nii yí a dó fɔkpawo nii. ²³ Mí kplɔ xwenyivi ci yí wa aɖaŋ do ami vɛ yí a wui nɔ́ mì a ɖu agɔ yí a kpɔ jijɔ. ²⁴ Ɖo ɔ, evinyɛ ŋsuvi cɛ ku sasa yí gbe fɔn. É bú nɔ́ ŋ sasa yí ecɛviɛ ɔ, ŋ va kpɔ́ɛ." Eyi wo tɔ agɔ lɔ ɖuɖu. ²⁵ Gacimɛ yí wo ɖuɖu exwe lɔ ɔ, ŋsu lɔ eviɛ xoxutɔ yɛ le edɔ wawa le bomɛ. Ci yí é trɔgbɔgbɔ yí gogogoɔ axwe lɔ mɛ ɔ, é se yíwo le enuwo xoɔ yí amɛwo le ewe ɖu yí eʒin nanaa. ²⁶ Eyi é yɔ edɔwavi lɔwo domɛtɔ ɖeka yí biɔ́ɛ se be nyi jɔjɔ mɛ. ²⁷ Edɔwavi lɔ ɖoŋci nii be: "Nɔviwo yí gbɔ yí ci míwo 'da kpɔɛ yí é le lanmɛsɛn mɛ ɔ, é dɔ yí wo wu xwenyivi doami doami lɔ". ²⁸ Vɔ ɔ, evi ŋsuvi xoxutɔ lɔ wa dɔmɛzi yí gbé be ye d'a ɖo axwe lɔ mɛ. Edalɔ tó vá xexenu yí vá blii nɔ á ɖo axwe mɛ. ²⁹ Eyi é xɔ nuxu yí nu nɔ edalɔ be: "Exwe sugbɔ wo ge yí ŋ wawa edɔwo nɔ eo yí ŋ de gbé eto nɔ eo kpɔ go. Gankegan kpɔ d'è lé egbɔvi kpetii yí sɔ́ ná ŋ kpɔ nɔ ma sɔ́ɖu exwe kodo nyaŋ 'xlɔwo go. ³⁰ Vɔ ci yí evio cɛ ci yí sɔ́ ao dɔkunuwo yí ma nɔsakabowo trɔgbɔva ɔ, é le xwenyivi ci yí do ami nyuiɖe lɔ yí sɔ wu nii". ³¹ Eyi edalɔ nu nii be: "Evinyɛ eo viɛ ɔ è le ŋ gbɔ tɛgbɛɛ yí enu ciwo pleŋ yí ŋ wa ɖɛ gbe nyi tɔo hɛnnɛ. ³² Vɔ ɔ, mì ɖo a ɖu exwe yí a kpɔ́ jijɔ; ɖó nɔvio cɛ ku sasa yí gbe gbɔva agbe. É bú sasa yí ŋ gbe va kpɔɛ!"