¹ Le gbɔngbɔngbe ɖeka ɔ, Yesu vayi Falisitɔwo 'ga ɖeka gbɔ́ yí a ɖu enu. Amɛ ciwo yí le ehɔntɔxu leleɛ ŋkuvi dó Yesu nu veviɖe. ² Ŋsu ɖeka ci yí le tɛntɛn 'dɔ wuɔ va je ete do ŋmɛ nii. ³ Eyi Yesu xɔ nuxu yí biɔ́ esedɔwatɔwo kodo Falisitɔwo se be :«Mìwo 'se ɖe emɔ be wo le da edɔ nɔ amɛ gbɔngbɔngbe a alo é gbé.» ⁴ Vɔ ɔ, wo de jí yí a ɖoŋci nii go.» Eyi Yesu tɔ alɔ edɔ nii yí tashii be lé soyi. ⁵ Le i godu ɔ, é va biɔ wo se be: «Mi yí le mí mɛ yí nɔ eviɛ alo yi xwenyi je dotɔ mɛ ɖee, d'à sɔɛ toi trololo nɔ́ & gbe nyi gbɔngbɔngbe yɔ cán ɔ?» ⁶ É wú enu nɔ wo yí wo de sɛ̀n eŋ ɖoŋci nii go. ⁷ Yesu le ŋkuvi dó lehanci yí amɛ ciwo yí wo yɔ́ le mɛganwo texwewo cancan yí nɔnɔ anyinɔnɔ do nú. Eyi é kplan enu amɛshiamɛ to labalu mɛ be: ⁸ «Nɔ́ amɛɖe yɔ́ wo be eo le va nɔ ye nyɔnuɖeɖe alo ye 'suɖeɖe 'kɔnu tɔxu ɔ, ŋgb" vayi nɔ anyinɔnɔ de amɛ ŋkuvilejiwo ʒinkpinji go. Ɖo ɖowohin ɔ, wo sɛn eŋ gbe yɔ amɛ bu ci yí a nyi mɛgan nɔ eo ⁹ yí ci yí é le nɛnɛ ɔ, amɛ ci yí bɔ yɔ míwo kodo eve lɔ a vá nú nɔ eo be: "shi ete a tashi ʒinhpin lɔ nɔ́ amɛ cɛ." Eyi gahɔnmɛ ɔ, é ɖo a shi ete kodo ŋkpɛn yí a vayi nɔ ʒinkpin ciwo yí le godu jí. ¹⁰ Vɔ nɔ́ ŋgbé va nyi nɛnɛ taɖo o ɔ,nɔ́ wo yɔ́ eo va azanɖuxu ehɔn hanwo ɔ, nà nɔnɔ anyinɔnɔ do ɛinkpin ciwo yí le godu jí nɔ́ gacimɛ yí amɛ ci yí yɔ́ eo vá ɖó ɔ, á nu nɔ eo be: "Nyaŋ 'xlɔ và yi ŋkɔ age a nɔ anyinɔnɔ do mɛganwo ʒinkpin jí" Gahɔnmɛ ɔ, á vá nyí bubu yí wo dó eo nu le amɛ ciwo pleŋ yí le enu ɖuɔ ŋmɛ. ¹¹ Ɖo aùɛ ci yí kɔkɔ yiɖeki dó eji ɔ wo a ɖyiɖyíi va gɔmɛ yí amɛ ci yí ɖyiɖyi ɖyiɛ yiɖeki vá gɔmɛ ɔ, wo a kɔkɔɛ do eji.» ¹² Le i godu ɔ, Yesu va nú nɔ́ amɛ ci yí yɔɛ be: «Nɔ è ɖa nyidɔmɛ 'nu alo fiɛfiɛ 'nu yi a yɔ́ amɛwo be wo a vá ɖu ɔ, ŋgbè yɔ ao 'xlɔwo, nɔnvi ŋsu, ao xomumɛtɔwo alo ehotɔnɔ ciwo yí do lixo kodo eo go. Ɖo ɔ, wo a sɛ́n eŋ gbe va ɖa enu yí a yɔ́ eo can be eo lé vá ɖu. A nyi enu ci yí é na wo ɔ, wowo cán gbe cu efɛn nɔ eo do nú. ¹³ Vɔ́ nɔ è jijiɛ a ɖu azan ɔ, yɔ́ wamɛnɔwo; ekplɛxotɔwo, ebutɔntɔwo kodo ŋkuvitɔntɔnnɔwo. ¹⁴ É nu anyɔ nɔ eo. Ɖo ɔ, wowo d'à sɛ́n eŋ vá ɖó tɔxu nɔ́ eo gacimɛ yí amɛjɔjɔɛwo a vá fun so ekuwodi;» ¹⁵ Ci yí Yesu nu enyɔ hɔnwo yí wo se ɖegbɔ ɔ, amɛ ciwo yí le enu nuɔ domɛtɔ ɖeka nu nɔ́ Yesu be: «Enu yí nyɔ́ nɔ́ amɛ ci yí a va ɖu enu le Mawu 'fiɔɖuxu lɔ mɛ.» ¹⁶ Yesu nu nii be: «Gbeɖeka ɔ, ŋsu ɖeka ɖó azanɖuɖu ŋkeke gangan ɖeka yí yɔ amɛ sugbɔ be wo le vá ¹⁷ ci yí enuɖuɖu lɔ gamɛ vá ɖo ɔ, é dɔ yi 'dɔwavi ɖaɖa amɛ ciwo yí é yɔ gbɔ́ be:"Mí va. Enuɖuɖu lɔ sɔ egbe vɔ." ¹⁸ Vɔ ɔ, wo pleŋ lɔwo eɖe kplɔ eɖe do tɔ egbe biɔbiɔ be yewo sɛn eŋ vá go. Amɛ ŋkɔtɔ nu nɔ edɔwavi lɔ be " Ŋxwle agble nyigban ɖeka yí é le be ŋ ɖo yí a yi kpɔɛ. É yí dɔ taɖo ɔ ŋ ɖe kuku be ŋ d'a sɛn eŋ vá go." ¹⁹ Amɛ bu nú ɖaɖɛɛ be: " ŋwle xwenyi ciwo yí wo sɔ́ denɔ agble eve donu amatɔn yí ŋ ji be na kplɔ wo yi ebomɛ a kpɔ be wo a wa edɔ nyuiɖe mɛ. É yí dɔ́ taɖo ɔ, ŋ ɖe kuku be ŋ d'a sɛn eŋ va go." ²⁰ Amɛ bu gbe nu ke be : "I nɛ yí ŋ ɖe nyɔnu viɛ̀ nɛ́. É yi dɔ taɖo ɔ ŋ d'a sɛn eŋ vá go." ²¹ Eyí edɔwavi lɔ trɔgbɔva yí 'ga gbɔ́ yí vayi ɖo egbe lɔwo pleŋ nii nɛnɛ. Ega lɔ wa domɛzi yí nú nɔ yí 'dɔwavi lɔ be: "Ɖè eblɛ a yi jugan lɔ 'godoxuwo kodo yí 'mɔwo ji keŋ yí akplɔ wamɛnɔwo kodo ekplɛ xotɔwo kodo ŋkuvitɔntɔntɔnɔwo kodo ebutɔntɔwo vɛɛ."

²² Siinɖe ɔ, edɔwavi lɔ yi yí gbɔ yí va nu nɔ yí 'gá be: "Ega, ŋ wa edɔ ci yí è dɔ ŋ. Vɔ ɔn ʒinkpin ɖekawo gbe kpɔtɔ le tootu." ²³ Eyi e ga lɔ vá nú nɔ́ yi 'dɔwavi be: "Yi ebomɛ 'mɔwo jí ko ekpa ciwo yí trɔdo ebowo nu keŋ yí a ʒin amɛ ciwo yí è kpɔ jí nɔ wo a vá nyaŋ 'xwé mɛ nɔ́ á ɖɔ. ²⁴ Ɖo na nu nɔ mí be amɛ ciwo yí ŋ yɔ sasa domɛtɔ ɖekpokpoi tɔ enu enuɖuɖu ci yí ɖa lɔ go!"» ²⁵ Amɛ sugbɔ ɖekawo lɔ́ ahwa yí zonzon kodo Yesu. Eyí é trɔ kpanŋkɔ wo yí nú nɔ́ amɛshamɛ be: ²⁶ «Nɔ́ amɛɖe ji be ye a kplɔ ŋ do ɔ, é ɖo a lɔn ŋ sɔwu edalɔ enɔlɔ, ashiɛ, eviɛwo, fofoɔwo kodo nɔviɛwo kaka sɔ́ je yiŋtɔ lɔ cán jí. Nɔ́ d'é nyi nɛnɛ ɔ, d'á sɛ́n eŋ nyi nyaŋ nukplanvi go. ²⁷ Nɔ amɛɖe de sɔ yi cisoga yí kplɔ ŋ do ɔ, amɛ lɔ d'á sɛ́n eŋ nyí nyaŋ nukplanvi go. ²⁸ Ɖo nɔ amɛɖe le mí mɛ yí jijiɛ a cu exɔlixɔji nɔnui ɔ, é nɔnɔ anyinɔnɔ yi a drɔ eho nɛni ci yí á zan kpɔ́ keŋ a kpɔ́ be eho ci yi le eye shi a sun edɔ lɔ wawa kaka a yi vɔvɔnu mɛ. ²⁹ Nɔ d'é wɛɛ nɛnɛ go yí ɖo anyiɖuwo anyi yi d'é va sɛn eŋ ɖe egbɔ exɔlixɔji lɔ ɔ, amɛ ciwo pleŋ yí a vá kpɔ́ yi glikpu lɔwo á va tɔ kokoi. ³⁰ Yi a nunuɔ be: "ŋsu cɛ tɔ exɔ cucu vɔ kpɔ d'é dɛn eŋ ɖe egbɔ edɔ lowo go." ³¹ Nɛnɛke nɔ sɔja kotokun amɛwo yí le efiɔ ɖe shi yí é jijiɛ yí a tɔ ahwa wawa kodo efiɔ bu ci shi yí sɔja kotokun ewi le ɔ; é nɔnɔ anyinɔnɔ yí a lé ŋkuvi dó nú kpɔ be ye a sɛ́n eŋ kpé eta kodo efiɔ ɖitɔ lɔ kodo eye sɔja kotokun amɛwo lɔ lɔwo drú mɛ. ³² Nɔ́ d'á sɛn eŋ w€€ , é dɔnɔ amɛwo ɖaɖa efiɔ ɖitɔ lɔ gbɔ́ gacimɛ yí yi kodo yi sɔjawo gbe kpɔtɔ le jijitɔxu wo a vayi biɔɛ se be lé ye a wɛɛ do nɔ́ fafa a nɔ yewo domɛ mɛ.» ³³ Yesu va ɖe mɛ be: «Nɛnɛkɛ yí é le nɛ be nɔ amɛɖe de tashi enu ciwo yí le shi gbijigbiji ɔ, yi d'a sɛ́n eŋ ye nukplanvi go nɛ.» ³⁴ Yesu gbe yi ji nu be: « Eje ɔ, enunyui yí é nyi vɔ nɔ́ enu ci yí ná yí wo yɔnɔ eje be eje to le mɛ ɖee, enuɖe gbe li yí wo a doi yí a gbe trɔ eje a? ³⁵ D'é gbe nyɔ yí wo a sɔ́ yi kɔdo ebomɛ nɔ́ a ho nyigban lɔ go alo nɔ́ wo a sɔ́ o kɔlu daɖɛ kpetii go. Sɔ wo a sɔ́ɛ kɔŋgbe ɖaɖa xexenu.» Eyi Yesu va nú nɔ wo be: «Nɔ́ etosenu li nɔ amɛɖe ɔ lé se.»