¹ Le hwehɔn nu ɔ, amɛɖekawo vá nú lehanci yí Pilati wu Galile 'kamɛtɔ ɖekawo dó gacimɛ yí éle avɔ ɖekawo sa nɔ Mawu. ² Yesu biɔ wo se be: «Bu mí bubuɔ be Galile 'kanmɛtɔ hɔn lɔwo nyí enuvɔwatɔ ganganwo sɔwu Galile 'kanmɛtɔ kpɛtɛwo pleŋ taɖo yí kú nɛnɛ a? ³ Ma nú nɔ mí be oo. Vɔ́ nɔ́ mí de trɔ́ míwoɖekiwo yí jí o ɔ, mí a kú pleŋ shigbe Galile 'kanmɛtɔ lɔwo nɛnɛ. ⁴ Bu mí bubuɔ be amɛ winyi ciwo jí yí Silowe 'jutakpɔtɔxɔ lɔ mu je yí wu vayí yí nyí enuvɔnwatɔ ganganwo sɔwu Ʒeluzaɛmu juganmɛtɔ kpɛtɛwo pleŋ a? ⁵ Ma nu nɔ́ mí be oo. Vɔ nɔ́ mí de trɔ míwoɖekiwo yí jí o ɔ, mí a kú pleŋ shigbe amɛ winyí lɔwo nɛnɛ. ⁶ Le i godu mɛ ɔ, Yesu do labalu cɛ nɔ wo yí nú be: «Ŋsu ɖeka do figici ɖeka dó yí vɛncikan nɛ. É vá vá vá gb̀ɖeka yí a vá gbɛn figici lɔ sɛnsɛnwo. Vɔ kpɔ́ dé kpɔ eɖe le ji go. ⁷ Eyi enu nɔ vɛngbledematɔ ci yí le ebo lɔ ji be: "kpɔ́ɖá! Exwe amɛtɔn yí nyí ecɛ yí ŋ va jinɔ sɛnsɛnwo le figici cɛ ji do ekpo. Ci yí é le nɛnɛ ɔ, soì so hɔn. Ɖó ɔ, nyi yí ná taɖo yí a xɔxɔ texwe le agble lɔ mɛ gbali gbali ɔ?" ⁸ Vɔ vɛngbledematɔ lɔ ɖoŋci nɔ́ yi 'botɔ be: "Mɛgan, gbe gbii ɖɛ́ exwe cɛ mɛ kpɔ. Na ku dodu trɔdoi nɔ́ eo yí a lɔ́ kɔlu dó mɛ. ⁹ 'Taanyɔ nɔ́ ŋ wɛɛ nɛnɛ nii ɔ, á vá sɛn eku exwemɛ. Nɔ́ dé va sɛ́n eku go ɔ, ná dɔ nɔ wo a soi."» ¹⁰ Gbɔngbɔngbe ɖeka ɔ Yesu le enu kplan amɛwo le Mawusɛnxu ɖeka. ¹¹ Nyɔnu ɖeka lédɔ yí le éhɔn lɔ so exwe winyi ge. Gbɔngbɔnvɔn ɖeka yí ɖeɖeɛ efun nii yí dɔ yí e xa yi ci gozomɛ yí d'é gbe sɛn eŋ yí fɔnnɔ yí a jɔ pleŋ le ete go. ¹² Ci yí Yesu kpɔ nyɔnu lɔ ɔ, é yɔɛ yí nú nii be: «Edɔ lɔ mí nɔ́ eo» ¹³ Yi sɔ́ alɔwo dado jí. Eyi zeɖeka vɔ, nyɔnu lɔ vlú je eté yí tɔ Mawu kanfukanu. ¹⁴ Vɔ ɔ, é vé Mawusɛnxu 'gá lɔ nu ́ sugbɔ be Yesu da edɔ nɔ nyɔnu lɔ le gbɔngbɔngbe. Eyi é nu nɔ́ ahwakɔn lɔ be: «Ŋkeke amadɛn ji yí wo ɖó a va edɔ le. É yi na taɖo ɔ, mí vá le azan hɔn wo ji nɔ́ wo a da edɔ mí. D'é nyi gbɔngbɔngbe yí wo a vá dada edɔ nɔ mí le go.» ^{15 16} Axwetɔ ɖoŋci nii be: « Ayemɛnuwatɔwo gbali! Miwo domɛtɔ ɖeka ɖeka de cunɔ eka nɔ yi xwenyi alo yi 'sɔkɛtɛ le yi 'nuɖugban mɛ yí a kplɔɛ nɔ́ á yí nu eshi gbɔngbɔngbe o ba? Vɔ nyɔnu cɛ nyi Ablahamu jijimɛvi. Ci yí legba blɛ́ɛ dó ete ɖɛ so exwe winyi ge ɖeé, d'é ɛian be wo a cú ekawo so nú le gbɔngbɔngbe o ba?» ¹⁷ Enyɔ hɔn ci yí Yesu sɔ ɖoŋci nɔ́ amɛ ciwo yí fɔ́n dó ji ná be eŋ kpɛn wo. Vɔ ahwa ci yí bɔ ɖɛ dó wo gbɔ́ yɛ le jijɔ kpɔgɔ so enu gangan nyui ciwo yí Yesu wawa nu. ¹⁸ Yesu va nu be: «Nyi han yí wo a sɔ́ Mawu 'fiɔɖuxu lɔ sɔ kodoɔ? Nyi nu yí na drii dó ɔ? ¹⁹ É le shigbe aciku wliwli ci yí ŋsu ɖeka sɔ́ yí vayí do dó yí xɔkpabo mɛ nɛnɛ. É mi yí shin yí trɔ́ aci gangan yí xeviwo vá ɖonɔ atɔwo dó yi 'lɔviwo mɛ.» ^{20 21} Yesu gbe nu ké be : «Nyi nu yí na dré Mawu 'fiɔɖuxu lɔ dó ɔ? E dyi kpɔnnɔcike ci yí nyɔnu ɖeka kɔdo kpɔnnɔ 'wɔ́ kilonu ewi vɔnatɔn mɛ kaka yí yi pleŋ vá ho jɛkɛɛ nɛnɛ. ²² Yesu le emɔ yi kpé Ʒeluzalɛmu jugan mɛ yí to toɔ juganwo kodo kɔxwiwo mɛ yí le enu kplan amɛwo. ²³ Eyi amɛɖeka vá biɔ́ɛ se be: «Cicagan, amɛ kankin ɖewo yí Mawu a vá hwlɛgan a? Yesu ɖoŋci nii be: ²⁴ «Mí tekpɔ a to agbo hwɛhwɛtɔ lɔ nú yí a ɖó Mawu 'fiɔɖuxu lɔ mɛ. Ɖó ɔ, amɛ sugbɔ a vá tekpɔ be yewo a ɖó mɛ vɔ yí wo d'a sɛn ɖó mɛ go. ²⁵ Gacimɛ yí Axwetɔ lɔ a vá fɔ́n yí a gblá agbo lɔ kodo safli ɔ, mí a cí agbo godu. Mí a vá tɔ́ agbo lɔ xoxo yí a nunuɔgɔ bé: 'Axwetɔ, hún agbo nɔ mí." Á vá ɖoŋci nɔ́ mí bé: "Miwo yɛ ɔ, ŋ de nyá fini ci yí mí so go." ²⁶ Gahɔnmɛ ɔ, mí a vá nu nii bé: "Mì ɖu enu yí nu aha kodo eo. É kplan enu amɛwo le mìwo jugan 'mɔwo jí." ²⁷ Á gbe nu nɔ mí ke bé: "Miwo yɛ ɔ, ŋ de nyá fini ci yí mí so go. Mí bu le ŋmɛ nɔ ŋ ɖaa, míwo esejimawadotɔwo!" ²⁸ Hwehɔnnu yí avin fanfan kodo aɖukliɖuɖu a vá nɔ nɔ́ mí va kpɔ́ Ablahamu, Izaki, Ʒakɔbu kodo Mawu 'ŋɛdotɔwo pleŋ le Mawu 'fiɔɖuxu lɔ mɛ yí wo nya míwo ɖaɖa ŋxenu nɛ. ²⁹ Amɛwo a só ewezexu kodo eweɖoxɔxɔ agé, amɛwo a só tagbe kodo fɔde agé yí a vá ɖu enu le Mawu 'fiɔɖuxu lɔ mɛ. ³⁰ Hwehɔnnnu ɔ amɛɖewo ciwo yí nyí goducitɔwo le egbɛ mɛ yɛ́ a vá nyí amɛ ŋkɔtɔwo yí amɛɖewo ciwo yí nyí amɛ ŋkɔtɔwo le egbɛ mɛ yɛ̀ a vá trɔ́ goducitɔwo.» ³¹ Hwecinu yí Yesu le enyɔ hɔnwo nuɔgɔ ɔ, Falisitɔ ɖekawo tegogoi yí nú nii bé: «Só le elɛ a yi afibu. Ɖó ɔ, Elodi Ancipasi jijiɛ a dɔ́ yí wo a wu eo.» ³² Yesu ɖoŋci nɔ́ wo bé: «Mí yi nu nɔ ŋsu hɔn ci yi blenɔ amɛ do mɛ shigbe wataklɛ nɛnɛ bé: "Ŋ nya nyà gbɔngbɔnvɔnwo yí le edɔwo dagɔ nɔ amɛwo le egbɛ kodo esɔ mɛ yí nyisɔ ge ɔ, na ɖe egbɔ edɔ ci yí ŋ xɔ́." ³³ Vɔ ɔ, é ʒián bé na gbe kpɔtɔ a zɔnzɔn emɔ egbɛ, esɔ kodo nyisɔ. Ɖó ɔ, d'é nyɔ́ bé wo a wu Mawu 'ŋɛ dotɔ ɖé dó afibu ɖé sɔ́ zeto Ʒeluzalɛmu nu go.» ³⁴ Eyi é nu bé :«Ʒelizalɛmutɔwo, Ʒeluzalɛmutɔwo, míwo ciwo yí wuwuɔ Mawu 'ŋɛdotɔwo yí xoxoɔ ekpe amɛ ciwo yi& Mawu dɔ́ ɖaɖa mí kaka wo a kú! Ŋ ji zenɛniɖe bé na bɔ mí do enyɛɖeki gbɔ́ shigbe lehanci yí kloklonɔ bɔnɔ eviɛwo dó yi 'wa gɔnmɛ do nɛnɛ gankegan yí mí gbe! ³⁵ Ecɛyɛ ɔ, Mawu a gbé míwo Mawuxwe ɖɛ́ yí á ci etu. Na nú nɔ́ mí bé: mí d'a gbe kpɔ ŋ o so eviɛ̀ kaka a sɔnanɔ hwecinu yí wo a nú bé: "Shicu nɔ́ amɛ ci yí gbɔgbɔ le Mawu nyikɔ mɛ!"»