1
Le gahɔnwo mɛ ɔ, agbetɔ kotokun nɛniɖewo lɔ ahwa va xɔn Yesu kaka kpɔ́ wo de gbe kpɔ afɔɖoxu kpetiigo. Eyi doŋkɔ ɔ, é tɔ nunu nɔ yí nukplanviwo be : «Mí kpɔ nyuiɖe le Falisitɔwo kpɔnnɔcike ci yí nyí wowo 'yemɛnuwawa nu.
2
Enu ciwo pleŋ yí wo sɔ́ enu cɔ́n ɔ, wo a ɖe wo toi.
3
E yí na taɖo ɔ, enyɔ ciwo pleŋ mí a nu ezanmɛ ɔ, amɛwo a va se wo le kedemɛ yí enyɔ ci mí a cú ehɔn do eta yí a ɖe ekpa a nu ɔ, wo a do axwa yí a núi le exɔwo tamɛ nɔ́ amɛshamɛ a sii.»
4
Yesu Yi ji nu be: «Ŋ nunuɔ nɔ míwo ci yí nyi nyaŋ 'xlɔwo be mí ŋgbe vɔn nɔ amɛ ciwo yí wunɔ lankpu vɔ yí le i godu ɔ wo d'a gbr sɛn eŋ wa enu buɖe sɔwu hɔn go.
5
Ma dansin amɛ ci yí mí ɖo a vɔn nɔ, nɔ mí: mí vɔn Mawu ci yí nɔ é na yí amɛ ku ɖegbɔ ɔ, é gbe ɖo acɛ yí a sɔ amɛ lɔ danŋkpɛn do ezomavɔ mɛ. Ɛɛ, ŋ nunuɔ nɔ mí be amɛ ci yí mí ɖo a vɔn nɔ nɛ.
6
Wo de sanɔ hwiʒihwiʒi amatɔn do eju gankegan yí eho lɔ d'a nyi enuɖe go ba? É le nɛnɛ gankegan eɖe de le wo mɛ yí Mawu ŋlɔbe go.
7
Nɛnɛ ɔ, kaka je míwo 'ɖakuiwo ji cán ɔ Mawu nya nɛni ci yí wo nyí yí le eta nɔ mí. É yí na taɖo ɔ, mí ŋgbe vɔn go. Ɖo ɔ, mí xɔ ashi nɔ Mawu sɔwu hwiʒihwiʒi sugbɔ!»
8
Yesu gbe nu nɔ wo k& be: «Nɔ amɛɖe hunmɛ le amɛshiamɛ ŋmɛ be ye nyi nyaŋ nnukplanvi ɔ, Agbetɔvi lɔ can a va hunmɛ le Mawu dɔlawo ŋmɛ be yi nyiă ye 'mɛ.
9
Vɔ nɔ́ amɛɖe gbé le amɛshamɛ ŋmɛ be ye de jeshi enyɛ ɖɛ go ɔ, Agbetɔvi lɔ cán a gbe va gbé le Mawudɔlawo ŋmɛ be ye de jeshi ɖɛ go.
10
Amɛ ɖekpokpoi ci yí a xo nuxu yí a sɔ gbali Agbetɔvi lɔ ɔ, Mawu a sɔ́ kii. Vɔ nɔ amɛɖe zu gbɔngbɔn kɔkɔɛ ɔ, Mawu d'a sɔ kii go.
11
Nɔ wo va dɔn mí kpe Mawusɛnxu 'gawo, efiɔwo alo acɛkpatɔwo gbɔ́ ɔ, mí ŋgbe vɔn nɔ lehanci mí a hwlɛn etanɔ míwoɖekiwo dó alo nɔ́ enyɔ cí ý mí a nyi nu go.
12
Ɖo le gahɔn lɔ mɛ cucucu ɔ, Gbɔngbɔn kɔkɔɛ a vá ɖe enyɔ ci yí mí ɖo a yi nu nɔ́ lɔ mí.»
13
Amɛɖeka le ahwa ci yí bɔdo Yesu gbɔ mɛ yí nu nɔ Yesu be: « Cicagan, ɖè enu mɛ nɔ fofonyɛ nɔ a ma cinɔnu ciwo yí míwo 'da gbeɖɛ nɔ mì nɔ ma xɔ kinyɛ.»
14
Yesu nú nii be : « Ɖajɛ! Mi yí sɔ́ ŋ ɖo kojoɖotɔ alo amɛ ci yí ɖo a nú lehanci yí mì a má míwo cinɔnuwo dó ɔ?»
15
Le i godu ɔ, é va nu nɔ amɛ shamɛ be: « Mí kpɔ nyuie! Mí ŋgbe jinɔ be yewo a ɖó dɔkunu sugbɔ dandandan go; ɖó d'é nyi kpɔ nɔ́ dɔkunu sugbɔ sun amɛɖe shi hannyaa á nyí amɛ a nɔ agbe jiji go.»
16
Eyi Yesu va do labalu cɛ nɔ wo be: « Ŋsu hotɔnɔ ɖeka ɖo agble nyigban ciwo yí nyɔnɔ jinukuwo ɖɛ́.
17
Ŋsu lɔ vá bu tamɛ kpɔ yi biɔ́ yiɖeki se be: "Lé yi na wɛɛ do viɛ̀ ɔ? Ɖo ɔ, fini ciwo yí na nyaŋ jinukuwo dó de gangan sugbɔ go".
18
Eyi é nu be: "É nu ci yí ŋ ɖo a wa ge. Na kankan nyyaŋ 'vawo yí a trɔcu gangan buwo keŋ a xoca nyaŋ 'likuwo pleŋ kodo nyaŋ 'nunyui kpɛtɛwo dó wo mɛ.
19
Nɔ́ ŋ wɛɛ nɛnɛ ɖegbɔ ɔ, ma va nu nɔ enyɛɖeki be: Nyaŋ 'sé dɔkunuwo su egbɔ le wo shi yí a ɖuɖuɔ kaka a wa exwe sugbɔwo. Gbɔ́ndomɛ hwɛɖeka, ɖù enu , nù enu yí a ɖu agbé.
20
21
Vɔ ɔ, Mawu nú nɔ́ ŋsu hɔn lɔ be: "ŋunumanyatɔ! Ezan cɛ mɛ ahan viɛ ɔ, na xɔ gbɔngbɔn le eo shi. Gahɔnmɛ ɖee, mi tɔ yí a va nyi enu ciwo è xoca daɖɛ ɔ?"» Yesu gbe sɔ kpii yí nu be: « Ahan yi a nyi nɔ amɛ ci yí xoxoɔ ca dɔkunuwo daɖɛ nɔ yiɖeki gankegan yi d'é nyi dɔkɔnɔ le Mawu 'nukpɔkpɔ mɛ go nɛ.»
22
Le i godu ɔ, Yesu nu nɔ yi nukplanviwo be: « È yí na taɖo ŋ nunuɔ nɔmí be mí ŋgbe sonɔ jika dó enu ci yí mí a ɖu alo a nu yí a nɔ agbe nu go. Nɛnɛke mí ŋgbe sonɔ jika dó enu ci yí mí a dó dó gotunu go.
23
Ɖo agbe xɔ ashi sɔwu enuɖuɖu yí gotu xɔ ashi sɔwu enudodowo.
24
Mí kpɔ kpafiawo ɖá! Wo de donɔ jinuku ɖé go yí wo de cannɔ jinuku ɖé go. Wo de gba awa alo enuɖoxu ɖe ɖɛ yí a vá xonɔ ca euɖuɖuwo ɖɛ dó mɛ go. Vɔ ɔ, Mawu nanɔ enuɖuɖu wo. Míwo xɔ ashi sugbɔ nɔ Mawu sɔwu xeviwo.
25
Nɔ amɛɖe le mí mɛ yí shishiɛ eju do yiɖekinu kakaka ca ɖee á sɛn eŋ da egaxoxo kakin kpetii do yi 'gbezan jí a?
26
Ci yí é le ahan yí mí d'a sɛ́n eŋ wa enu hwɛvi kunyi ɖe kpetii go ɖee, nyi yí jɔ ta ɖo yí mi a bubuɔ tamɛ sugbɔ kpɔ so enu kpɛtɛwo nú nɔ ɔ?
27
Mí kpɔ lehanci yí egbewo donɔ sese le ave mɛ do ɖá. Wo de wanɔ edɔ ɖe go. Kpɔ́ wo de lɔnnɔ avɔ go. Gankegan ɔ, ŋ nunuɔ nɔ mí be efiɔ Salomɔ le yi dɔkunjeje mɛ can de ɖo enudodo ci yí nyá kpɔkpɔ sɔ kodo sese hɔnwo ɖe ɖɛ go.
28
Nɔ é nyi be Mawu le awu doɔ nɔ egbe ciwo yí le ete egbɛ yí esɔ wo a sɔ́ wo danŋkpɛn do ezo mɛ nɛnɛ ɖee, d'a ná enudodo míwo taŋ sugbɔ sɔwu go ba? Xɔse cɛ yí hwe nɔ mí ahan a!
29
É yí ná taɖo ɔ, mí ŋgbe ci eji yí a caka le susu mɛ le enu ci yí mí a ɖu kodo ci yí mí a nu jiji mɛ go.
30
Maxɔsetɔ ciwo pleŋ yí le xexemɛ yí jinɔ enu hɔnwo pleŋ mamimami. Vɔ ɔ míwo 'da nya be enu hɔnwo ʒiańn mí.
31
32
Nɔ mí a wɛɛ eɖe ɔ, míwo susu le nɔ Mawu 'fiɔɖuxu lɔ jí. Gahɔnmɛ ɔ, Mawu a sɔ́ enu hɔn na mí kpii.» Yesu yi jí nu nɔ nukplanvi lɔwo be : «Lɛngbɔ sugbɔ kankinwo mí ŋgbe vɔn go. Ɖo ɔ, Míwo 'da Mawu sɔ́ gbeta be ye a ná yí mí a ɖu efiɔ kodo eye.
33
Mí sa míwo dɔkunuwo yí a sɔ́ eho lɔ ma nɔ wamɛnɔwo. Mí tɔn ehogodu ciwo yí de vunɔ go nɔ míwoɖekiwo. Mí xoca dɔkunu ɖumavɔwo ɖɛ nɔ́ míwoɖekiwo dó jiŋkushimɛ, fini ci yí flanfinɔwo d'a fin wo le go yí ekɔsubabawo d'a sɛ́n eŋ ɖu wo le go.
34
Ɖo fini ci yí míwo dɔkunuwo le ɔ, hɔntɔxu ké yí míwo 'ji a le nɛ.»
35
Yesu gbe nu nɔ nukplanvi lɔwo be: «Mí nɔ egbesɔsɔ yí a blá alinwo ji gguiɖe. Mí na nɔ míwo kaligbanwo a kpɔtɔ a jejeɛ.
36
Mí nɔ shigbe edɔwavi ciwo yí kpɔkpɔ emɔ nɔ wowo 'wetɔ nɛnɛ. Gacimɛ yí a gbɔ so nyɔnuɖeɖe 'kɔnu gbe yí a xo agbo ɔ, mí a sii trololo yí a huin nii.
37
Enu ci yí nyɔ nɔ edɔwavi ciwo yí nɔ́ wowo 'xwetɔ gbɔ ɔ, á va kpɔ wo le zanŋte. Le nyɔnnɔnui mɛ ɔ, ŋ nunuɔ nɔ́ mí be axwetɔ lɔ a ɖó edɔwawa 'wuwo mɛ yí a ná yí wo a nɔ anyinɔnɔ yí yiŋtɔ a má enuɖuɖu nɔ wo.
38
Nɔ enyi kpe be axwetɔ lɔ vá gbɔ do zangawive mɛ nu alo nɔ́ ezan gbe shin suwu nɛnɛ cán yí é va kpɔ yí edɔwavi lɔwo le zanŋte ɔ, enu gbe nyɔ nɔ́ wo.
39
Mí mɔŋje enyɔ cɛ mɛ nyuiɖe, nɔ axwetɔ ɖé nya hwecinu yi flanfinɔ a vá gban axwe nii dó ɔ, á nɔ ŋzɔn yi d'á lɔn kaka yí a gbiin go.
40
É yí nɔ taɖo ɔ míwo cán mí nɔ glagla ji ɖɛ́. Ɖo ɔ, Agbetɔvi lɔ a vá vá do gacimɛnu yí mí de ɖó eŋ do go.»
41
Eyí Piyɛ va biɔ́ Yesu se be: cicagan, mìwo ɖekɛ yí è do labalu hɔn lɔ nɔ́ a alo è doi nɔ́ amɛshiamɛ a?»
42
Axwetɔ ɖoŋci nɔ́ Piyɛ be: «Mí yí nyí enuwojikpɔtɔ egbejinɔtɔ ci yí nyá ŋnu ɖɛ́ ɔ? É ɖyi edɔwavi cɛ ci yí yi 'gá sɔ́ ɖo enu nɔ amɛ kpɛtɛwo. Yí é nanɔ enuɖuɖu wo dó gamɛ ji.
43
Enu yí nyɔ nɔ edɔwavi hɔn nɔ́ yi 'ga trɔgbɔ yí vá kpɔɛ le edɔ hɔn 'kɔ.
44
Le nyɔnɔnui mɛ ɔ, ŋ nunuɔ nɔ mí be ega lɔ a vá sɔ́ yi dɔkunɔwo pleŋ doashi nii be yí le kpɔ wo jí.
45
Vɔ nɔ edɔwavi lɔ va nunuɔ le yiɖeki mɛ be: "Nyaŋ 'ga d'a gbɔ trololoviɛ go" yí tɔ yi kpenawo, ŋsu fin, nyɔnu fin xoxo yí a le enuwo ɖuɔ yí a nunu aha mu ɔ,
46
ega lɔ a va trɔgbɔ le ŋkeke kodo egaxoxo ciwo nú yí d'é ɖo eŋ do go jí. Yí eto ci yí wo a dɔn nɔ egbejimanɔtɔwo ɔ, é yí wo dɔn nii.
47
Wo a dɔn eto sugbɔ nɔ edɔwavi
goɖekpokpoi ci yí jeshi enu ci yí yi 'ga jinɔ gankegan yí d'é nɔnɔ egbesɔsɔ a wɛɛni nii go.