¹ Gbeɖeka ɔ, Yesu wawa gbedoɖa le afiɖeka. Gacimɛ yí é wa ɖegbɔ ɔ, yi nukplanviwo domɛtɔ ɖeka biɔ́ɛ se be: «Mɛgan, Ʒan amɛ ci yí wanɔ ʒinʒin dotɔmɛ Mawutɔ kplan mì lehanci yí yi nukplanviwo ɖo a wanɔ gbedoɖa dó wo. Eo can, kplan mì lehaci yí mì a wanɔ gbedoɖa dó.» ² Yesu ɖe mɛ nɔ wo be: «Nɔ mí jijiɛ a do egbe ɖaɖa ɔ, mí nu be: "Eda, na& nɔ amɛshiamɛ a jeshii be ao nyikɔ kɔ, nà nɔ ao 'fiɔɖuɖu a va. ³ Nà egbɛ enuɖuɖu mì gbeshiagbe ⁴ sɔ̀ mìwo 'nuvɔnwo ke mì, ɖo ɔ, mìwo can mì sɔ kenɔ amɛ ciwo pleŋ yi je agɔ do mì. Ŋgbe lɔn nɔ mì a je tetekpɔ mɛ go.» ⁵ Yesu yi ji yí gbe nu nɔ wo be: «Nɔ nyi be amɛɖe le míwo domɛ yí ɖo exlɔ ci gbɔ yí é vayi do ezan domɛ ŋ yí nu nii be "Nyaŋ 'xlɔ do kpɔnnɔ amɛtɔn nɔ ŋ. ⁶ Ɖo ɔ nyaŋ 'xlɔwo domɛtɔ ɖeka zɔn emɔ kaka va ɖo nyanŋ 'xwe yɛ. Kpɔ enuɖé de le ŋshi yí na nii nɔ a ɖu go." ⁷ Nɔ enyi be yí exlɔ lɔ nɔ exɔ lɔ mɛ ɖaa yí ɖoŋci ɖaɖɛɛ be: "Tashi ŋ nɔ ma vo. Ŋ gla ehɔn vɔ. Enye kodo evinyɛwo mlɔn anyi. Ŋ d'a sɛn eŋ shi ete yí a sɔ kpɔnɔ ɖe nɔ eo go." ⁸ Na nu nɔ mì be nɔ ŋsu lɔ wa nɛnɛ yí gbe be ye d'a shite yí a sɔ enuɖuɖu ɖewo nii go nɔ ci yí wo nyi ŋci can ɔ, a va kpɔ do aya ci yí yi 'xlɔ lɔ dodoɔ nii mamimami nu keŋ yí a fɔn yí a sɔ wo nii. ⁹ Ci yí é le nɛnɛ ɔ, enyɛ yɛ, ŋ nunuɔ nɔ mí be mí biɔ enu nɔ wo a na mí. Mí ji enu yí a kpɔ. Mí xo ehɔn nɔ wo a huin. ¹⁰ Ɖo amɛ ci yí biɔ enu ɔ, é yí wo na nɔ yí amɛ ci yí ji enu ɔ, é yí wo huinninɔ. ¹¹ Evida ɖe le míwo domɛ yí nɔ eviɛ biɔ kpavi yí ɔ, a sɔ edan jo nii do kpavi 'dumɛ a? ¹² Alo evida ɖe le mímɛ yí nɔ eviɛ biɔ klokoʒin yí ɔ, á so kleki yí á sɔ jo nii do klokloʒin 'dumɛ? ¹³ Nɔ míwo ciwo yí nyi amɛ Vɔnwo nya enu nyuiwo nana míwo viwo ɖɛ ɖee, le yí Eda ci yí le jiŋkushi mɛ yɛ a wɛ gbe yi gbɔngbnɔn kɔkɔɛ nana amɛ ciwo yí biɔɛ nii do ɔ?» ¹⁴ Gbeɖeka ɔ, Yesu le gbɔngbɔnvɔn ɖeka ci yí na yí ŋsu ɖeka d'e gbe xoxoɔ nuxu go nyao tii le ŋsu lɔ mɛ. Hwecinu yí gbɔngbɔnvɔn lɔ to le ŋsu lɔ mɛ ɔ, ŋsu lɔ tɔ nuxu xoxo. Eyi é kpaca amɛ ciwo yí lɔ ahwa yí bɔ do ehɔntɔxwu lɔ. ¹⁵ Vɔ ɔ amɛ ɖewo le ahwakɔn lɔ mɛ yí nu be : «Bɛlizebuli, gbɔngbɔnvɔnwo 'ga yí na ŋsɛn yí é sɔ nyanya gbɔngbɔnwo.» ¹⁶ Nɛnɛke ɔ, amɛ buwo le ahwakon yí jijiɛ a te Yesu kpɔ. Wo ji so gbɔ be yí le wa jishidu ɖeka yi a sɔ dansin nɔ yewo be Mawu gbɔ yí ye so le jiŋkushi mɛ yí va. ¹⁷ Vɔ ɔ, Yesu jeshi susu ciwo yí wo ɖeɖeɛ. Eyi é nu nɔ wo be: «Efiɔɖuxu ɖekpokpoi ci yí le ahwa waa kodo yi ɖeki a gban yí exɔ ciwo yí wo cu domɛ nunɔ do wowo nɔnɔwo ji. ¹⁸ É yi na taɖo nɔ legba ma do eve ɖee, lé yí yi 'fiɔɖuxu lɔ a wɛɛ a lí eke do ɔ? Ɖo ɔ, mí ge nunuɔ Belizebuli yí na ŋsɛn yí ŋ sɔ nyanya gbɔngbɔnvɔnwo. ¹⁹ Nɔ enyi be Bɛzebuli, gbɔngbɔnwo 'ga yí na ŋsɛn ŋ yí sɔ le gbɔngbɔnvɔn nyaa ɖee, mi ŋsɛn yí míwo 'mɛwo sɔ nyanya gbɔngbɔnvɔn lɔwo ɔ? Míwo viwo ŋtɔwo yi dansin be míwo 'nyɔ de jɔ gà. ²⁰ Vɔ enyɛ yɛ ɔ, Mawu ŋsɛn yí ŋ sɔ nyanyan gbɔngbɔnvonwo. Ci yí é le nɛnɛ ɔ, mawu "fiɔɖuxu lɔ le mí gbɔ vɔ. ²¹ Nɔ ŋsu agbo ɖe ci yí gbe bla akpa nyuiɖe le yí 'xwe jí kpɔgɔ ɔ, yí dɔkunuwo nɔnɔ alɔ nii nɛnɛ kkeɖii. ²² Vɔ nɔ amɛ ci yí ɖo nsen sɔwui ɖé va do ego kodoi yí ɖu ji ɔ, é nɔnɔ ahwawanu ciwo yí é ɖoɖo eŋ do sasa le shi yí a sɔ yi dokunu lɔwo má nɔ yi 'mɛwo. ²³ Nɔ amɛ ɖe de li kodo ŋ go ɔ, anyi amɛ lɔ fɔn egu do ŋ nu. Nɔ amɛɖe de kplokplɔ amɛwo va ŋ gbɔ go ɔ, á nyí amɛwo yí é nyanya do egb nɔ ŋ.» ²⁴ Yesu nu be: «Nɔ gbɔngbɔnvɔn to le amɛɖe mɛ ɔ, é vayi dannɔ to zogbeji yí a jijiɛ fini ci yí a gbɔn do kpɔ. Nɔ d'é kpɔkpɔ eɖe goɔ, é va nunɔ le yiɖeki mɛ be ye a gbe trɔyí ye 'xwe xoxwi mɛ. ²⁵ Eyi nɔ é trɔgbɔ ɔ, é va kpɔnɔ exɔ lɔ yí a le mɛmiɖe yí enuwo a gbe le ɖoɖo le mɛ. ²⁶ Gbɔngbɔnvɔn lɔ vayi kpɔnɔ gbɔngbɔnvɔn amadrɛ bu ciwo yí baɖa sɔwui bɔdo yi ɖeki nu hɛngbɛ yí wo a va so axwe do mɛ. Hwehɔnnu ɔ, amɛ ci mɛ yí é to le sasa lɔ nɔnɔmɛ a gbe va baɖa do jí sɔwu lehanci yí é le do sasa.» ²⁷ Ci yí Yesu nu enyɔ hɔnwo ɖe gbɔ ɔ, nyɔnu ɖeka do axwa yí nu nii le ahwakɔn lo mɛ be : «Enu yí nyɔnɔ nyɔnu ci yí fɔ ao 'fú yí gbe do anɔ nɔ eo!» ²⁸ Yesu nu nii be: « Oo, nɔ wo a nui ɔ, amɛ ciwo yí seseɛ Mawu 'nyɔ lɔ yí wawaa do jí ɔ, wowo yí enu nyɔ nɔ.» ²⁹ Gacimɛ yí amɛwo lɔ ahwa yí va tɔ bɔbɔ do Yesu gbɔ ɔ, é tɔ nunu be: «Egbɛvi amɛvɔnwo le jeshidu ɖeka jiɛ. Vɔ kpɔ wo d'a gbe wa jeshidu buɖe nɔ wo sɔ zeto Mawu 'ŋɛdotɔ Ʒonasi tɔ nu go. ³⁰ Ɖo lehanci Ʒonasi nyi jeshidu nɔ Ninivutɔwo dó ɔ, nɛnɛ lɔ ke yí Agbetɔvi lɔ a va nyi jeshidu nɔ egbɛviwo do hɛnnɛ nɛ. ³¹ Le kojoɖogbe ɔ, efiɔ nyɔnu Fɔdetɔ a ci ete do ŋkɔ egbɛviwo yí a do ehwɛ nɔ wo. Ɖo nyɔnu lɔ só ekan jijiwo mɛ le nyigban lɔ jí yi a va se ŋnunyanya 'nyɔwo le Salomɔ gbɔ. Vɔ yí amɛ trɔ le elɛ viɛ yí wú egan Salomɔ. ³² Ci yí Ʒonasi do eŋɛnyui lɔ ɔ, Ninivu juganmɛtɔwo sii yí trɔ wowo ɖekiwo yí ji blebu. Vɔ yí amɛ trɔ le elɛ viɛ yí kpɛn sowu Ʒonasi. É yí na taɖo le kojoɖogbe ɔ, Ninivu juganmɛ tɔwo a va ci ete do ŋkɔnɔ egbɛviwo yí a do ehwɛ nɔ wo!» ³³ Yesu yi ji yí gbe nu nɔ ahwakɔn lɔ be: «Aɛɖe de tɔ kaligban yí sɔ wlanɔ alo yí sɔ tɔka cɔinni go. Vɔ ɔ, sɔ wo sɔ€ni dado kaligban hɛnnu jí nɔ a kpɔ enu nɔ amɛ ciwo yí a ɖo axwe lɔ mɛ. ³⁴ Ao ŋkuvi yí nyi kaligban nɔ ao ŋcilan. Nɔ ŋkuvi le nyuiɖe nɔ eo ɔ, ao lankpu pleŋ a le klɛnklɛn mɛ. Vɔ nɔ ŋkuvi de la nyuiɖe nɔ eo ɔ ao lankpu pleŋ a le vivi mɛ. ³⁵ É yi na taɖo ɔ kpɔ eoɖeki jí nɔ vivi ŋgbe va cɔn klɛnklɛn ci yí le eo mɛ ji. ³⁶ Nɔ é nyi kpɔ be ao ŋcilan pleŋ le klɛnklɛn mɛ yí a fiɖe de ci vivi mɛ nɔ eo go ɔ à le klɛnklɛn mɛ blebu shigbe lehanci yí kaligban enu nɔ amɛ petii do nɛnɛ» ³⁷ Ci yí Yesu nu enyɔ hɔnwo ɖgbɔ ɔ, Falisitɔ ɖeka yɔɛ be yí le va ɖu enu le ye 'xwe mɛ. Eyi yesu yi ŋsu lɔ 'xwe mɛ yí nɔ anyinɔnɔ yí a ɖu enu. ³⁸ É kpaca Falisitɔ lɔ be Yesu de klɔ ashi gbɔxwe yí tɔ enu ɖuɖu go. ³⁹ Eyi Axwetɔ nu nɔ Falisito lɔ be: « Nɛnɛ yí míwo Falisitɔwo le do nɛ. Mí klɔnɔ kpota nu kɔkpu lɔ kodo agbanɖunu lɔ. Vɔ le míwo 'jiwo mɛ ɔ amɛwo 'nuwo finfin drodro mí yí mí ɖɔ kodo xomɛveve. ⁴⁰ Exlunɔwo gbali! D'é Mawu ci yí wa kpota nɔ enuwo lɔ ke yí wa xomɛ nɔ wo bá? ⁴¹ Mí na wamɛnɔwo enu ciwo yí le míwo kɔkpu kodo míwo 'gbanɖunuwo mɛ. Gahɔnmɛ ɔ, enushanu a le mɛmiɖe nɔ mí. ⁴² Babɛɛ nɔ mí, Falisitɔwo; ɖo mí nanɔ madowo nɔ amahwɛnhwinwo, nyaɖoɖuwo, xɔkpagble mɛ 'gbewo kodo ɖafiɔn vovovowo mawu. Vɔ ɔ, mí tanɔshi enujɔjɔɛ wawa yí mí de lɔnlɔn Mawu go. keŋ ɔ é trɔ nyí enu ciwo yí wo ɖo a wawa nɛ yí a gbe leleɛ ebu nɔ kpɛtɛwo wawa hɛnnɛ.» ⁴³ Babɛɛ nɔ mí Falisitɔwo! Ɖo ɔ, mí lɔnnɔ tɔxuwo yí a nɔ le Mawusenxuwo yí gbe jinɔ be amɛwo lé dó egbe nɔ yewo kodo bubu le egodoxuwo. ⁴⁴ Babɛɛ nɔ mí! Ɖo ɔ, mí le shigbe yɔdu ciwo yí wo de do jeshi nya be wo le ehɔntɔxu o keŋ yí zɔnzɔn zɔnli to wo jí fɛɛ nɛnɛ.» ⁴⁵ Esedɔwatɔ ɖeka xɔ nuxu yí nu nɔ Yesu be: «Cicagan nɔ è nunuɔ nɛnɛ ɔ, á nyi è zuzuɔ míwo can.» ⁴⁶ Yesu ɖoŋci nii be: «Babɛɛ nɔ míwo, esedɔwatɔwo hɛnnɛ; ɖoɔ mí dodoɔ agban kpɛnkpɛn ciwo yí wo d'a sɛn ŋ nɔ amɛ wo yí míwoŋtɔwo de dodoɔ alɔvi kuɖeka kpetii ɖaɖa yí yí a sɔ kpe do wo nu nɔ wo a hiin go. ⁴⁷ Babɛɛ nɔ mí! Ɖo ɔ, mí mɛmɛɛ. ekpe acɔtɔwo dó Mawu 'ŋɛdotɔ yɔduwo jí gangan ɔ, e nyi míwo tɔgbiwo yí wu wo vayi sasa. ⁴⁸ Sɔ to nɛnɛ wawa mɛ ɔ mí ɖeɖeɛ kunu nɔ míwo togbiwo yí gbe xɔ gbe do enu ciwo yí wo wa ji, míwo togbi lɔwo wu Mawu 'ŋɛdotɔwo yí míwo va mɛmɛɛ ekpewo do do wowo yɔduwo jí. ⁴⁹ Enu hɔnwo yí na taɖo yí Mawu xo nuxu so mí nu kodo ŋnunyanya be "Na dɔ nyaŋ 'ŋɛdotɔ kodo Amɛdɔdɔ ɖaɖa wo. Wo a wu amɛɖewo yí a ci yumɛ nɔ eɖewó. ⁵⁰ Vɔ ci yí le mɛ yí nyi be: Mawu a dɔn eto nɔ egbɛviwo dó Mawu 'ŋdotɔ ciwo yí wo tɔ wuwu so hwecinu yí wo ɖo xexe lɔ 'nyiɖuwo anyi ɖii tamɛ. ⁵¹ Wo tɔ amɛ wuwu so Abɛli ji kaka va kɔdo Zakali ci yí wo wu le avɔsakpe lɛ kodo Nɔxu kɔkɔɛ lɔ gblamɛ ji. ɛɛ, le nyɔnɔ nyui mɛ ɔ, ŋ nunuɔ nɔ mí be Mawu a dɔn eto nɔ egbɛviwo do amɛ hɔnwo ciwo yí kú tamɛ. ⁵² Babɛɛ nɔ míwo ciwo yí nyi esedɔwatɔwo, ɖo mí sɔ safli ci yí hunnɔ ŋnunyanya ci yí so Mawu gbɔ 'hɔn. Miwotɔwo de ɖoɖoɔ mɛ go yí gbe xexeɛ emɔ nɔ amɛ ciwo é dro be yewo a ɖo mɛ.» ⁵³ Gacimɛ yí Yesu toso axwe hɔn lɔ mɛ ɔ, esedɔwatɔwo kodo falisitɔwo fɔn do jí domɛzitɔ yí tɔ enyɔ biɔɛbiɔɛ se so enu vovovowo nu. ⁵⁴ Wo wɛwɛɛ nɛnɛ keŋ akpɔ be yi a wa afɛn a nu. ɖe nɔ yewo a kpɔ a sɔ do ehwɛ nii mɛ.