¹ Ci yí Yesu vayigɔ ɔ, é kpɔ ŋsu ɖeka. Ŋsu lɔ nyí ŋkuvitɔntɔntɔnɔ so jijimɛ. ² Eyi nukplanviwo biɔ Yesu se be: «Cicagan, nyi yí ná taɖo yí wo ji ŋsu cɛ ŋkuvitɔntɔntɔnɔ ɔ? Yiŋtɔ 'nuvɔn ɖé yí ná a alo edalɔ kodo enɔlɔ 'nuvɔn yí ná?» ³ Yesu ɖoŋci nɔ wo be: « D'é nyi yi 'nuvɔn alo edalɔ alo enɔlɔ 'nuvɔn ɖé yí ná go. É nyi ŋkuvitɔntɔntɔnɔ nɔ Mawu a to ji a ɖé yi dɔwawa dansin nɔ amɛwo. ⁵ Gacimɛ yí kede gbe kpɔtɔ li ɔ, mì ɖó a wa amɛ ci yí dɔ́ ŋ ɖaɖa 'dɔwo. Ezan jijiɛ a dó yí amɛɖekpokpoi d'a gbe sɛn eŋ wa edɔ go. ⁴ Gacimɛ yí ŋ kpɔtɔ le xexe lɔ mɛ ɔ, ŋ nyi klɛnklɛn nɔ́ xexe lɔ.» ⁶ Ci yí Yesu nu nɛnɛ ɖegbɔ ɔ, é cu etan dó nyigban yí sɔ́ nya ekɔ yí sɔ́ shishi do ŋkuviwo nɔ ŋkuvitɔntɔntɔnɔ lɔ. ⁷ Le i godu ɔ, é nu nii be: «Seyi eshidu ci yí wo li ɖɛ́ yí yɔɛ ni be Silowe gbɔ yí a fún ŋmɛ.» « Silowe» lɔ gɔnmɛ yí nyi «Amɛdɔdɔ.» ŋkuvitɔnnɔ lɔ yi yí vayi fun ŋmɛ. Ci yí é trɔgbɔ ɔ, é kpɔkpɔ enu. ⁸ Yi kpenawo kodo amɛ ciwo yí kpɔɛni sa yí a nɔnɔ enu biɔɔ va nunuɔ be: «D'é nyi ŋsu ci yi nɔnɔ anyinɔnɔ ɖɛ le enu biɔɔ sa nɛ ba?» ⁹ Amɛɖekawo nunuɔ be: « É yí yɔ́.» Amɛ buwo nunuɔ be: «Oo, é yí yɔ go, amɛɖyiamɛ yɔ.» Eyi ŋsu lɔ ŋtɔ nunuɔ be: «Enyɛ yɔ nyuiɖe la.» ¹⁰ Eyi amɛ lɔwo biɔɛ se be: «Lé yí è wɛɛ do yí ŋkuvi tɔ́ enu kpɔkpɔ nɔ́ eo ɔ?» ¹¹ É ɖoŋci nɔ wo be: «Ŋsu ci yí wo yɔnɔ be Yesu yí nya ekɔ keŋ sɔ́ shishi do ŋkuviwo nɔ́ ŋ yí nu nɔ́ ŋ be enyɛ lé yí Silowe a yi fun ŋmɛ. Ŋ yi yí gacimɛyí ŋ fun ŋmɛ ɖegbɔ vɔ, ŋ tɔ enu kpɔkpɔ.» ¹² Eyi amɛ lɔwo biɔɛ se be: «Fini yí ŋsu hɔn lɔ le ɔ?» É ɖoŋci nɔ wo be: «Ŋ de nyá go.» ¹³ wo kplɔ ŋsu ci yi nyi ŋkuvitɔnnɔ sa lɔ vayi nɔ Falisitɔwo. ¹⁴ Ehɔntɔ ɔ, é nyi gbɔngbɔngbe yí Yesu nya ekɔ lɔ yí sɔ hun ŋkuvi nɔ ŋkuvitɔnnɔ lɔ. ¹⁵ Eyi ná taɖo yí Falisitɔwo cán gbe biɔ ŋsu lɔ se be: nyi yí jɔ kaka yí yi vá le enu kpɔ ɖɛviɛ mɛ. Ŋsu lɔ ɖoŋci nɔ wo be: « Amɛ lɔ sɔ́ baba shishi do ŋkuviwo nɔ ŋ. Eyi ŋ vayi fun ŋmɛ yí ecɛyɛ ɔ, le enu kpɔɔ.» ¹⁶ Falisitɔ ɖekawo nu be: «Amɛ ci yí wa nɛnɛ 'nu d'a sɛ́n eŋ so Mawu gbɔ́ go. Ɖó d'é nyinyiɛn ese ci yí kan gbɔngbɔngbe lɔ go.» Amɛ buwo nu be: « Amɛ ci nyi enuvɔnwatɔ d'a sɛ́n eŋ wa jeshidu 'nu hɔnwo go.» Eyi egbe de gbe le eju nɔ wo go. ¹⁷ Falisitɔ lɔwo gbe biɔ ŋkuvitɔnnɔ sasatɔ lɔ se be: «Eo ɖe, le yí è nunuɔ so amɛ ci yí hun ŋkuviwo nɔ eo nu?» É ɖoŋci nɔ wo be: «Mawu 'ŋɛdotɔ amɛ lɔ nyi.» ¹⁸ Ci yi é le nɛnɛ cán ɔ, Yuɖatɔwo 'gá lɔwo de kandoji be ŋsu lɔ nyí ŋkuvitɔnnɔ sa yí ecɛviɛ ɔ, yi va kpɔkpɔ enu go. Eyi ná taɖo yí wo dɔ yí wo yɔ́ amɛ ciwo yí ji ŋsu lɔ vá nɔ́ wo. ¹⁹ Wo biɔ wo se be: «Míwo 'vi téŋ yí nyi ŋsu cɛ a? Ji yí mí jii ŋkuvitɔnnɔ nyao a? Nyi yí jɔ kaka é va kpɔkpɔ enu viɛ ɔ?» ²⁰ Evida lɔwo ɖoŋci nɔ wo be: «Mí nyá be mìwo 'ví ŋsuvi yí é nyi yí ji mì jíi ŋkuvitɔnnɔ. ²¹ Vɔ ɔ, mì de nya enu ci yí jɔ kaka a va le enu kpɔɔ viɛ go yí mì de jeshi amɛ ci yí da edɔ nɔ ŋkuviwo nii hɛnnɛ go. Mí biɔɛ se? É shin a ɖó enyɔ nu nɔ́ mí yiŋtɔ drú.» ²² Ŋsu lɔ 'dalɔwo ne nɛnɛhan. Ɖó ɔ, wo vɔnvɔn nɔ yuɖatɔwo 'gawo. Nyaotɔ ɔ, Yuɖatɔwo dó ego yí toi le wowonɔnɔwo mɛ ɖɛ be, amɛɖekpokpoi ci yí a nú a be Yesu nyi Klisolɔ ɔ, yewo a nyii toi le Mawusɛnxu lɔ. ²³ Enu ci yí ná taɖo ŋsu lɔ 'dalɔwo nu be vayi be wo le biɔ́ ŋsu lɔ se, yi shin aɖó enyɔ nu nɔ wo yiŋtɔ dru nɛ. ²⁴ Falisitɔ lɔwo gbe trɔyɔ ŋsu ci yí nyí ŋkuvitɔnnɔ vayi lɔ yí nu nii be: « Sɔ̀ kafukafu nɔ Mawu be nyɔnɔnui toɔ yí ye le. Mìwo ɖe, mìwo nya be ŋsu ci yí da edɔ nɔ ŋkuviwo nɔ́ eo nyi enuvɔnwatɔ.» ²⁵ Ŋsu lɔ ɖoŋci nɔ́ wo be: «Ŋ de nyá nɔ́ enuvɔnwatɔ yí é nyi go. Vɔ ɔ, ŋ nya enu ɖeka. É yí nyi be sa ɔ, ŋ nyi ŋkuvitɔnnɔ yí eviɛ ɔ, ŋ le enu kpɔɔ:» ²⁶ Eyi wo biɔɛ se be : «Nyi yí amɛ lɔ wa nɔ eo ɔ? lé yí é da da edɔ nɔ ŋkuviwo nɔ́ eo do ɔ?» ²⁷ Ŋsu lɔ ɖoɓci nɔ́ wo be: «Ŋ drii nɔ mí vayi vɔ. Vɔ ɔ, mí do tokuitokui ŋ. Nyi yí ná taɖo yí mí jijiɛ be enyɛ le gbe trɔ a dre mɛ nɔ mí ke ɔ? Ɖóhin ɖee, míwo cán jijiɛ be yewo a nyi amɛ lɔ nukplanviwo yɔ a?» ²⁸ Eyi wo zu ŋsu lɔ be: «Eo yí nyí ŋsu hɔn nukplanvi. Mìwo ŋ, Mɔyizi nukplanviwo yí mìwo nyí. ²⁹ Mìwo nyá be Mawu xo nuxu nɔ́ Mɔyizi. Vɔ eyɛ ɔ, mì de nyà fini ci yí yɛ só kpetii go. ³⁰ Ŋsu lɔ ɖoŋci yí nú nɔ́ wo be: «Enu ci yí jí eŋ le enyɔ lɔ mɛ nɛ: mí de nyá fini ci yí amɛ lɔ so gankegan é da edɔ nɔ ŋkuviwo nɔ́ enyɛ! ³¹ Mì nyá be Mawu de ɖonɔ eto enuvɔnwa tɔwo go. Vɔ amɛɖekpokpoi ci yí donɔ bubu yi nu yí gbe wanɔ enu ciwo yí é dro ɔ, é ɖonɔ eto yi. ³² Wo de se kpɔ be amɛɖe da edɔ nɔ ŋkuvitɔnnɔ go. ³³ Nɔ́ ŋsu ci yí da edɔ nɔ ŋkuviwo nɔ́ ŋ lɔ de só Mawu gbɔ go ɔ, d'á sɛ́n eŋ a wa enuɖe go.» ³⁴ Wo ɖoŋci nii be: «Eo blebu lɔ le enuvɔnmɛ so gbecigbe yí wo ji eo yí è va jijiɛ be ye a ná ekplan mìwo a?» eyi wo nyi toi le Muwusɛnxu lɔ. ³⁵ Yesu va se be Falisitɔ lɔwo nya ŋsu ciyí ŋkuviwo hun nɔ lɔ toi le Mawusɛnxu. Eyi ci yí Yesu va kpɔɛ ɔ;é biɔɛ se be: «È xɔ Agbetɔvi lɔ ji se a?» ³⁶ Ŋsu lɔ ɖoŋci nii be: «Mɛgan drè amɛ ci yí nyi Agbetɔvi lɔ nɔ ŋ nɔ ma xɔɛ ji se.» ³⁷ Yesu nu nii be: «Amɛ lɔ ge yí è kpɔkpɔ ge. É yí nyi amɛ ci yí le nuxu xoɔ kodo eo viɛ.» ³⁸ Ŋsu lɔ nu nii be:«Axwetɔ ŋ xɔɛ ji se.» Eyi é je ekloji yí doŋdo nɔ Yesu. ³⁹ Yesu nu be: « ŋ va xexe lɔ mɛ a va ɖo kojo kodo agbetɔwo le enu ciwo yí wo wawa mɛ nɔ́ ŋkuvitɔnnɔwo a tɔ́ enu kpɔkpɔ yí amɛ ciwo yí kpɔkpɔ enu a trɔ́ ŋkuvitɔnnɔwo.» ⁴⁰ Falisitɔ ɖekawo le axa ji nɔ́ Yesu. Ci yí wo se enyɔ ci yí é nu ɔ, wo biɔ́ɛ se be: «Mìwo cán mì nyí ŋkuvitɔnnɔwo yɔ́ a?» ⁴¹ Yesu ɖoŋci nɔ́ wo be: «Nɔ́ ŋkuvitɔnnɔwo yí mí nyi sa ɔ, kpɔ́ enuvɔn ɖé d'a le ekɔ nɔ mí go. Vɔ ɔ, ci yí mí nunuɔ be yewo kpɔkpɔ enu yí ná yí enuvɔn le ekɔ nɔ mí.»