¹ Vɔ ɔ, Yesu yɛ yi Olivu 'ciwo 'kpó jí. ² Le i ŋkegbu fɔnfɔn mɛ ɔ, é trɔvayi Mawuxwe lɔ mɛ yí amɛwo pleŋ vá bɔdo gbɔ́. Eyí é nɔ anyinɔnɔ yí tɔ́ enu kplankplan wo. ³ Gahɔn mɛ ɔ, esedɔwatɔwo kodo Falisitɔwo kplɔ nyɔnu ɖeka ci yí wo suido yí e le asu wagɔ vɛ nii yí sɔ́ ɖó ete do aguntomɛ. ⁴ Wo nú nɔ Yesu bé: «Cicagan, wo vayi so nyɔnu cɛ do yí e le asu wagɔ. ⁵ Le esewema ci yí mawu sɔ́ to Mɔyizi ji nɔ́ mì mɛ ɔ, Mɔyizi na egbe mì bé mìwo lé xo ekpe nyɔnu hɔn hanwo nɔ́ wo a kú. Éo yɛ ɖe, lé eo kpɔɛ dó ɔ?» ⁶ Wo nunuɔ nɛnɛ yí sɔ jijiɛ enyɔ le enu nɔ Yesu keŋ a kpɔ́ emɔ a dó ehwɛ nii. Vɔ ɔ, Yesu bɔbɔ yí sɔ́ alɔvi tɔ́ enu ŋwlɛŋwlɛ do nyigban. ⁷ Ci yí wo kpɔtɔ biɔbiɔ enyɔ Yesu se ɔ, Yesu fɔn eta yí eji yí nú nɔ wo bé: «Amɛ ci yí le míwo domɛ yí de wa enuvɔn kpɔ́ go lé doŋkɔ a da ekpe nyɔnu lɔ.» ⁸ Eyi é gbe bɔbɔ yi gbe trɔ yí tɔ́ enu ŋwlɛŋwlɛ do nyigban. ⁹ Ci yí amɛ lɔwo se nyɔ hɔnwo nɛnɛ ɔ, wo tɔ́ soso ɖeka ɖeka, so mɛgan xoxuwo jí kaka va je ɖeviwo jí yí é va kpɔtɔ Yesu ɖekɛ kodo nyɔnu lɔ ci yí gbe kpɔtɔ le ŋkɔ nii. ¹⁰ Gahɔn mɛ yí Yesu va fɔn eta yí biɔ́ nyɔnu lɔ se bé: «Fini yi amɛ lɔwo le ɔ? Amɛɖe de dó ehwɛ nɔ eo ba?» ¹¹ Nyɔnu lɔ ɖoŋci nɔ́ yesu bé: «Axwetɔ, oo, Yesu nu nii bé «Enyɛ can ŋ de dó ehwɛ nɔ eo go. Só yi. Vɔ so egbɛ ji ɔ, ŋgbè gbe wa enuvɔn ké go»] ¹² Yesu gbe tɔ nuxu xoxo nɔ amɛ lɔwo bé:«Enyɛ yí nyí klɛnklɛn nɔ́ xexe lɔ. Amɛ ci yí kplɔ ŋ do a kpɔ́ klɛnklɛn yí d'á zɔn vivici mɛ kpɔ gbeɖe go.» ¹³ Eyi Falisitɔwo nú nii bé : «Eo ŋtɔ le kunu ɖeɛ nɔ eoɖeki a? Enyɔ ci nu yí è ɖeɖeɛ kunu so lɔ nyí nyɔnɔnui bá!» ¹⁴ Yesu ɖoŋci nɔ́ wo bé: «Nɔ́ enyɛŋtɔ gbe va ɖeɖeɛ kunu nɔ́ enyɛɖeki cán ɔ enyɔ ci nu yí ŋ ɖeɖeɛ kunu so lɔ nyí nyɔnɔnui. Ɖó ɔ,ŋ nya fini ci yí ŋ so kodo fini ci yí ŋ yigɔ. Vɔ míwo ɔ, míwo de nyá fini ci yí ŋ so go yí kpɔ́ mí de nya fini ci yí ŋ yigɔ go. ¹⁵ Mí ɖonɔ kojo kodo amɛ shigbe lehanci yí agbetɔwo ɖonɔ kojo dó nɛnɛ. Vɔ enyɛ yɛ ɔ, ŋ de ɖonɔ kojo amɛɖekpokpoi go. ¹⁶ Gankegan nɔ́ ŋ va bé na ɖó kojo ɔ, ŋ ɖonɔ kojo amɛ jɔjɔɛɖe. Ɖó d'é nyi enyɛ ɖekɛ yí li go. Eda ci yí dɔ́ ŋ ɖaɖa li kodo ŋ ¹⁷ Le míwo 'sé wema mɛ ɔ, wo ŋwlɛ ɖɛ bé nɔ́ amɛ amɛve ɖe kunu ŋmɛɖekɛ so enyɔ ɖe nú ɔ, á nyi enyɔ lɔ nyí nyɔnɔnui. ¹⁸ Enyɛŋtɔ ŋ ɖeɖeɛ kunu so enyɛɖeki nú yi Eda ci yí dɔ́ ŋ ɖaɖa cán gbe ɖeɖeɛ kunu nɔ ŋ hɛnnɛ.» ¹⁹ Eyi wo vá biɔ́ɛ se bé: «Fini yí Edao lɔ le ɔ?» Yesu ɖoŋci nɔ́ wo bé: «Mí de jeshi ŋ ɖɛ go yí mí de jeshi Edanyɛ can ɖɛ́ go. nɔ́ mí jeshi ŋ ɖɛ sa ɔ, mí a jeshi Edanyɛ ɖɛ hɛnnɛ yɛ́ sasa.» ²⁰ Yesu xo nuxu hɔnwo gacimɛ yi é kplankplan enu amɛwo le mawuxwe lɔ mɛ yí wo jɔnɔ enu dó nɔnɔ. Amɛɖekpokpoi lɔ de je nu go. Ɖó yi 'ga de kpɔ xo hɔɖe go. ²¹ Yesu gbe nu nɔ́ wo ké bé: «ŋ sosoɔgɔ. Mí a vá ji ŋ kpɔ. Vɔ ɔ, mí a vá kú dó míwo 'nuvɔnmɛ. Mí d'a sɛ́n eŋ a yí fini ci yí ŋ yigɔ go.» ²² Eyi yuɖatɔwo tɔ́nunu le wowonɔnɔwo mɛ bé: «Vɔ ɖee, é jijiɛ a wu yiɖeki y&ɔ a? Ɖó é nunuɔ bé: "Mí d'a sɛn eŋ a yí fini ci yí ŋ yigɔ go."» ²³ Yesu nu nɔ́ wo be: «Nyigban jí le gɔnmɛ elɛ tɔwo yí mí nyí. Vɔ enyɛ yɛ ɔ, jiŋkushimɛtɔwo yí ŋ nyí. Míwo ɖe, xexe cɛ mɛtɔwo yí mí nyí. Vɔ enyɛ yɛ ɔ, ŋ de nyí xexe cɛ mɛtɔ go. ²⁴ Eyi na taɖo yí ŋ nu nɔ́ mí bé mí a vá kú do míwo 'nuvɔnwo mɛ. Ɖó nɔ mí de xɔɛ ji se bé ŋ nyí amɛ ci yí ŋ nyí go ɔ, mí a kú dó míwo 'nuvɔnwo mɛ.» ²⁵ Wo biɔ́ɛ se bé: «Mi è nyi ɔ?» Yesu ɖoŋci nɔ wo bé: «Amɛ ci yí ŋ nu nɔ́ mí so gɔnmɛjeje bé ŋ nyi lɔ yɔ́ ²⁶ ŋ ɖo enyɔ sugbɔ a nú so mí nú yí gbe ɖo kojo sugbɔ a ɖó hennɛ. Vɔ ɔ, amɛ ci yí dɔ́ ŋ ɖaɖa nyí nyɔnɔnuinutɔ. nɛnɛ ɔ, enyɔ ci yí ŋ se le enu nii ɖekɛ yí ŋ nunuɔ nɔ xexe lɔ.» ²⁷ Amɛ lɔwo de mɔŋje mɛ bé Edalɔ nú yí é xoxoɔ nuxu so nɔ́ wo go. ²⁸ Eyi Yesu va nú nɔ́ wo bé: Hwecinu yí mí a kɔ́ Agbetɔvi lɔ dó nyá bé "ŋ nyi amɛ ci yí ŋ nyí" nɛ. Mí a vá nyá bé ŋ de wanɔ enuɖekpokpoi le enyɛɖeki shinu go. Vɔ ɔ, enuci yí Edanyɛ kplan ŋ ɖekɛ nú yí ŋ Edanyɛ kplan ŋ ɖekɛ nú yí ŋ xonɔ nuxu so. ²⁹ Amɛ ci yí dɔ́ ŋ ɖaɖa li kodo ŋ. D'é gbé ŋ do akogo go. Ɖó enu ci yí jɔnɔ eji nii yí ŋ wanɔ tɛgbɛɛ.» ³⁰ Ci yí Yesu le enyɔ lɔwo nuɔgɔ nɛnɛ ɔ, amɛ sugbɔ xɔɛ ji se. ³¹ Eyi Yesu va nú nɔ́ yuɖatɔ ciwo yí xɔɛ ji se bé: «Nɔ́ mí seseɛ anyi 'nyɔwo yí wawa do wo jí ɔ, á nyi mí nyí anyi nukplanviwo nyao. ³² Nɛnɛ ɔ mí a jeshi nyɔnɔnui lɔ ɖɛ́ yí nyɔnɔnui lɔ a ná yí mí a vo.» ³³ Wo ɖoŋci ni bé: «Ablahamu jijimɛviwo yí mì nyí yí mí de nyí hwashiwo nɔ́ amɛɖe kpɔ́ go. Lé yí á wɛɛ a va nunuɔ nɔ mì bé "Mí a vá vo" do ɔ?» ³⁴ Yesu ɖoŋci nɔ́ wo bé: «Le nyɔnɔnui mɛ ɔ, ŋ nunuɔ nɔ mí bé amɛɖekpokpoi ci yí wawa enuvɔn nyí hwashi nɔ enuvɔn. ³⁵ Amɛ ci yí nyí hwashi le xomu ɖe mɛ de nɔnɔ xomu lɔ mɛ kaka a sɔyi go. Vɔ amɛ ci yí nyí evi le xomu lɔ mɛ yɛ ɔ, yɛ nɔnɔ xomu lɔ mɛ tɛgbɛɛ. ³⁶ Ci yí é le nɛnɛ ɔ, nɔ́ Evi lɔ ná yí mí to so hwashinyinyi mɛ ɔ, a nyi mí je vovo mɛ nyao. ³⁷ Ŋ nya bé Ablahamu jijimɛviwo mí nyí, vɔ ɔ, mí jijiɛ a wu ŋ. Ɖó anyi 'nyɔwo de kpɔkpɔ texwe ɖé le míwo 'jiwo mɛ go. ³⁸ Enyɛ yɛ ɔ, ŋ xoxoɔ nuxu so enu ci yí Edanyɛ dansin nɔ́ ŋ nu. Vɔ míwo ɔ, mí wawa do enyɔ ci yí míwo 'da nu nɔ mí jí» ³⁹ Wo ɖoŋci nɔ́ Yesu bé: « Ablahamu yí nyí míwo 'da.» ⁴⁰ Vɔ Yesu nu nɔ wo bé: «Nɔ́ mí nyi ablahamu 'viwo nyao sa ɔ, mí a wanɔ enu shigbe Ablahamu nɛnɛ. Vɔ ecɛyɛ ɔ, mí jijiɛ a wu ŋ do nyɔnɔnui ci yí ŋ se so mawu gbɔ́ yí va nunuɔ nɔ mí ŋci. Ablahamu de wa nɛnɛ go. ⁴¹ Míwo ɖe, mí wawa enu shigbe lehanci yí míwo 'da wanɔ do nɛnɛ.» Wo ɖoŋci nii bé: «Mì de nyí ahunmɛ 'viwo go. Eda kuɖeka yí le mì shi. É yí nyí Mawu.» ⁴² Yesu nu nɔ́ wo bé: «Nɔ́ é nyí bé Mawu yí nyí míwo 'da nyao sa ɔ, mí a lɔn ŋ. Ɖó Mawu lɔ gbɔ́ yí ŋ so yí va. ŋ de vá dó enyɛŋtɔ ɖeki shinu gó. Vɔ ɔ, é yi dɔ́ ŋ ɖaɖa. ⁴³ Nyi yí ná taɖo yí mí de mɔmɔ eŋ je enyɔ ci yí ŋ nunuɔ nɔ mí mɛ ɔ? É le nɛnɛ nɔ́ mí. Ɖó mí de sun anyi 'nyɔwo jí yí a xɔ go. ⁴⁴ Míwo ɖe Legba yí nyí míwo 'da yí mí jijiɛ bé yewo a wa do enu ci yí míwo 'da dro ji. Eyɛ lɔ, amɛwutɔ é nyi so gnɔnmɛjeje. Ɖó nyɔnɔnui toto ɖekɛ de le lanmɛ nii go. Nɔ́ é le ŋsu kangɔ ɔ, jɔjɔmɛ mɛ 'nu yí e nyí nii. Ɖó é nyí ŋsukantɔ yí gbe nyi eda nɔ ŋsukankan. ⁴⁵ Vɔ enyɛ yɛ ɔ, ŋ tonɔ nyɔnɔnui. Enu ci yí na taɖo yí mí de xɔ ŋ ji se go nɛ. ⁴⁶ Mí yí le míwo domɛ yí a sɛn eŋ dansin bé enyɛ ŋ wa enuvɔn kpɔ́ ɔ? Nɔ́ ŋ le nyɔnɔnui toɔ ɖee, nyí yí ná taɖo yí mí de xɔ ŋ ji se go ɔ? ⁴⁷ Amɛ ci yí nyí mawu tɔ ɔ, é ɖonɔ eto Mawu 'nyɔwo. Vɔ ɔ, míwo de nyí Mawu tɔ go. Eyí ná taɖo yí mí de ɖoɖoɔ eto Mawu 'nyɔwo. Vɔ ɔ, míwo de nyi Mawu tɔ go. Eyí ná taɖo yí mí de ɖoɖoɔ eto yi go.» ⁴⁸ Yuɖatɔ lɔwo ɖoŋci nɔ́ Yesu bé: «D'é kpɔ́ bé ci mì nú nɔ́ eo be Samalitɔ yí è nyi yí gbɔngbɔnvɔn ɖeka le eo mɛ ɔ, enyɔ jɔ nɔ mì ba?» ⁴⁹ Yesu ɖoŋci nɔ́ wo bé: «Gbɔngbɔnvɔn ɖé le ŋ mɛ go. Vɔ ɔ, Edanyɛ nu yí ŋ dodoɔ bubu yí míwo gbé bé yewo d' bu ŋ go. ⁵⁰ Ŋ de jijiɛ kanfukanfu nɔ́ enyɛɖeki go. Amɛɖeka li yí nanɔ kanfu ŋ yí gbe ɖonɔ kojo. ⁵¹ Le nyɔnɔnui mɛ ɔ, ŋ nunuɔ nɔ mí bé amɛ ci yí wawa do anyi 'nyɔnwo jí d'a kú kpɔ́ gbeɖe go.» ⁵² Yuɖatɔ lɔwo nú nii bé: «Mì ná nyá yɛ́ bé gbɔngbɔnvɔn ɖeka le eo mɛ nyao. Ablahamu ku. Mawu 'ŋɛdotɔwo cán kú yí eo va nunuɔ be: "Nɔ́ amɛɖe wawa do anyi 'nyɔwo jí ɔ, d'a kú kpɔ́ gbeɖe go a?" ⁵³ É shin wu míwo tɔgbui Ablahamu yɔ a? Eyɛ kú yí Mawu 'ŋɛdotɔwo cán kú. Mi yí è bubuɔ bé ye nyi ɔ?» ⁵⁴ Yesu ɖoŋci baŋ: «Nɔ́ enyɛŋtɔ ŋ kankanfuɔ enyɛɖeki ɔ, á anyi bubu ci yí ŋ dodoɔ enyɛɖeki nú kannɔfu ŋ. Míwo nunɔ so nu bé: "Míwo Mawu yí yí è nyi." ⁵⁵ Gankegan kpɔ́ mí de jeshi ɖɛ go. Enyɛ ɔ, enyɛ ŋ jeshii ɖɛ. Nɔ́ ŋ nu yɛ́ bé ŋ de jeshi ɖɛ go ɔ, a nyi ke ŋ nyi ŋsukantɔ shigbe míwo nɛnɛ. Vɔ ɔ, ŋ jeshi ɖɛ yí wanɔ do yi 'nyɔwo ji. ⁵⁶ Ablahamu ci yí nyí míwo tɔgbui kpɔ́ jijɔ sugbɔ sɔ le emɔ kpɔɔ nɔ ŋkeke ci ji yí na vádó lɔ. É kpɔ́ ŋkeke lɔ yí eji jɔɛ.» ⁵⁷ Eyi Yuɖatɔ lɔwo biɔ́ɛ se bé: «D'e kpɔ́ ɖó exwe eka howo hɔɖe go, gankegan yí kpɔ́ Ablahamu kɔ a?» ⁵⁸ Yesu nu nɔ wo bé: «Le nyɔnɔnui mɛ ɔ, ŋ nunuɔ nɔ mí bé gbɔxwe yí wo a vá ji Ablahamu ɔ, ŋ li.» ⁵⁹ Eyi wo sɔ ekpewo yí a sɔ́ tɔ́ Yesu xoxo. Vɔ ɔ, Yesu be yí tó so Mawuxwe lɔ mɛ.