¹ Le i godu ɔ, Yesu ɖyiɖyiɛ esa to Galile 'kan mɛ. D'é ji be ye a yi ɖyiɖyiɛ esa to Ʒude 'kan mɛ go. Ɖó ɔ, Yuɖatɔwo 'gawo jijiɛ le ehɔn be yewo a wui. ² Zavawo 'xwe ci yí Yuɖatɔwo ɖunɔ gogo. ³ Eyi Yesu 'nɔviɛwo nú nii be: « Só le Galile 'kan mɛ a yi Ʒude 'kan mɛ nɔ́ ao nukplanviwo cán a kpɔ́ edɔ ciwo yí è wawa. ⁴ Ɖó amɛɖekpokpoi ci yí ji be amɛwo a jeshi eye de wanɔ enu le bebe mɛ go. Ci yí è wawa enu gangan hɔnwo ɖee, nà nɔ́ amɛwo a jeshi eo.» ⁵ Ɖó ɔ, Yesu nɔviɛwo ŋtɔwo cán de xɔɛ ji se go. ⁶ Yesu ɖoŋci nɔ́ wo be: « Ega de xo nɔ ŋ hɔɖe go. Vɔ ɔ, egaxoxowo plɛŋ mɛ yí nyi gamɛ nyui nɔ́ míwo. ⁷ Xexe lɔ mɛtɔwo a sɛ́n eŋ a xa míwo bá! Vɔ ɔ, wo xaxa enyɛ. Ɖó ŋ ɖeɖeɛ kunu so wo nu be enu ciwo waa yí wo le de nyɔ́ go. ⁸ Míwo lé yi exwe lɔ ɖugbe. Enyɛ yɛ ɔ, ŋ de yiyiɛ exwe hɔn ɖu gbé go.» ⁹ Ci yí Yesu nu nɛnɛ ɔ, é ci Galile 'kan lɔ mɛ. ¹⁰ Ci yí Yesu nɔviɛ vayi exwe lɔ ɖugbe godu ɔ, Yesu va be yí vayi hɛnnɛ. Amɛɖe de nyá go. ¹¹ Yuɖatɔwo 'gawo vá jijiɛ kpɔ le exwe lɔ ɖuxu yí biɔbiɔ amɛwo se be : « Fini yí a le ɔ?» ¹² Amɛ sugbɔ le ahxakɔ lɔwo mɛ yí le enyɔ dɔɔn kpɔ so Yesu nu. Amɛɖewo nunuɔ be : « Amɛnyui yí é nyi.» Amɛ buwo gbegbeɛ be: « Oo, é bleble jukɔn lɔ do mɛ yɔ.» ¹³ Vɔ ɔ, amɛɖekpokpoi de le wo mɛ yí gbé edɔn yí xoxoɔ nuxu so nú agbaŋgba go. Ɖó wo pleŋ vɔnvɔɔn nɔ Yuɖatɔwo 'gawo. ¹⁴ Ci yí exwe lɔ ɖuɔ kaka má evemɛ nɔ azan nɛni ci yí wo a ɖu exwe lɔ sɔnanɔ ɔ, Yesu vayi Mawuxwe lɔ mɛ yí tɔ́ enu Kplankplaan amɛwo. ¹⁵ Lehanci yí é kplankplaan enu lɔ amɛwo dó jí eŋ nɔ́ Yuɖatɔwo 'gawo yí wo tɔ́ biɔbiɔ se be: « Le yí ŋsu cɛ wɛɛ yí nyá Mawu 'nyɔ lɔ sugbɔ ahan, eyɛ ci yí d'é yi sukulu kpɔ go ɔ?» ¹⁶ Yesu ɖoŋci nɔ wo be enu ci yí ŋ kplankplan amɛwo d'é so enyɛŋtyɔ gbɔ́ go. Vɔ ɔ, Mawu ci yí dɔ́ ŋ ɖaɖa gbɔ́ yí é so. ¹⁷ Nɔ́ amɛɖe le egbesɔsɔ a wa do Mawu 'dró jí ɔ, á vá nya nɔ́ Mawu gbɔ́ yí enu ci yí ŋ klankplaan amɛwo so alo nɔ enyɛŋtɔ gbɔ́ yí é so. ¹⁸ Nɔ́ amɛɖe le nuxu xoɔ yí nuxu lɔ so yiŋtɔ gbɔ ɔ, amɛ lɔ jijiɛ be wo le kakafu eye. Vɔ ɔ, amɛ ci yí jinɔ be ye a wa edɔ nɔ wo a kafu amɛ ci yí dɔ́ eye ɖaɖa ɔ, yɛ tonɔ nyɔnɔnui yí ŋsukankan ɖeɖe de nɔnɔ yi 'nyɔwo mɛ go. ¹⁹ D'é nyi Mɔyizi yí ná esewo mí ba? Gankegan ɔ, míwo domɛtɔ ɖekpokpoi de sɔ́ wo dodoɔ edɔwawa mɛ go ci yí é le nɛnɛ ɖee, nyi yí jɔ taɖo yí mí jijiɛ enyɛ a wu ɔ?» ²⁰ Ahwa ci yí bɔdo ehɔn lɔ ɖoŋci nii be: « Gbɔngbɔnvɔn yí le eo mɛ! mi yí jijiɛ eo a wu ɔ?» ²¹ Yesu ɖoŋci nɔ́ wo be: «Edɔ kuɖeka yí ŋ wa yí é kpaca mí pleŋ nɛnɛ a! ²² D'é nyi Mɔyizi ji yí evososo nɔ eviwo tɔ́ so go. Míwo tɔgbiwo jí yí evososo 'nyɔ tɔ so. Gankegan ci yí Mɔyizi va ɖe egbe nɔ mí be míwo le sonɔ evo nɔ míwo 'viwo ɔ, mí soini kaka soini gbɔngbɔngbewo cán. ²³ Nɔ́ é nyi be mí sonɔ evo nɔ eviwo gbɔngbɔngbewo cán yí a gbé mada le ese ci yí Mɔyizi do nɔ́ mí jí ɖee, nyi yí ná taɖo mí wa dɔmɛzi do ŋ nɔ́ agbetɔ blebu ɖeka ci yí ŋ da edɔ nɔ le gbɔngbɔngbe ŋci ɔ? ²⁴ Mí ŋgbe kpɔnɔ enu ci yí le agogbe a sɔ́ sonɔ kojo go. Vɔ ɔ, mí soini jɔjɔɛɖe.» ²⁵ Ʒeluzalɛmu juganmɛtɔ ɖekawo biɔbiɔ se be: « D'é nyi ŋsu ci yí wo jijiɛ yí a wu nɛ ba? ²⁶ Mí kpɔ ɖá! É xoxoɔ nuxu le ahwa domɛ yí amɛɖekɛ de nunuɔ enyɔ ɖe nii go. Mìwo 'gawo va nyá nyao be é yí nyi Kliso lɔ a? ²⁷ Ŋsu cɛ yɛ ɔ, mì nya fini ci yí é so. Vɔ nɔ́ Kliso lɔ vá vá ɔ, amɛɖekpokpoi d'a nya fini ci yí é so go.» ²⁸ Gahɔnmɛ ɔ, Yesu le enu le enu kplaan amɛwo le Mawuxwe lɔ mɛ yí dó axwa yí biɔbiɔ ahwakɔn lɔ se be: Mí nya amɛ ci yí ŋ nyi kodo fini ci yí ŋ so a? D'é nyi enyɛŋtɔ yí dró yí vá go. Vɔ amɛ ci yí dɔ ŋ ɖaɖa nyi amɛ ci ji wo a kando. Míwo de jeshi ɖɛ go. ²⁹ Enyɛ ɔ, ŋ jeshii ɖɛ. Ɖó eyɛ gbɔ yí ŋ so yí vá yíé yí dɔ́ ŋ ɖaɖa.» ³⁰ Gahɔnmɛ ɔ, wo ji be yewo a lii. Vɔ ɔ, amɛɖekpokpoi 'lɔ de sɛ́n eŋ je nu go. Ɖó yi 'ga de kpɔ xo hɔɖe go. ³¹ Gankegan le ahwakɔn lɔ mɛ ɔ, amɛ sugbɔ xɔ Yesu ji se yí biɔbiɔ se be: « Nɔ́ Kliso lɔ vá vá ɖe a bge va wa jeshidu 'nuwo sɔwu ciwo waa yí ɖajɛ cɛ le a?» ³² Falisitɔwo se enyɔ ciwo amɛwo ɖeɖeɛ ekpa yí nunuɔ le ahwakɔn lɔ mɛ so Yesu nu. Eyi avɔsatɔwo 'gawo kodo Falisitɔwo dɔ́ Mawuxwe dɔkpɛgawo ɖaɖa nɔ́ wo a vayi lii. ³³ Yesu nu nɔ wo be: « Azan hwɛɖeka yí kpɔtɔ yí na wa le mí gbɔ. Le i godu ɔ, na trɔyi amɛ ci yí dɔ́ ŋ ɖaɖa gbɔ́. ³⁴ Mí a va ji ŋ vɔ mí d'a kpɔ́ ŋ go. Ɖó mí d'a sɛ́n eŋ a vá fini ci yí ŋ yiyiɛ a vayi nɔ go.» ³⁵ Eyi Yuɖatɔwo tɔ́ biɔbiɔ se le wowoɖeɖewo mɛ be: « Fini yí nyi ehɔn lɔ yí a yi míwo d'a sɛn eŋ a kpɔɛ go ɔ?» É jijiɛ a yi Yuɖatɔ ciwo yí kankan do Glɛkitɔwo mɛ gbɔ yí a kplan enu Glɛkitɔwo cán yɔ a? ³⁶ Gɔnmɛsese hin yí le enyɔ ciwo yí é nu shí ɔ? É nu be: "mí a vá jí ŋ, vɔ mí d'a kpɔ ŋ go. Ɖo mí d'a sɛ́n eŋ a yi fini ci yí na yi nɔ go."» ³⁷ Gbecigbe wo a vɔ exwe lɔ yí nyi ŋkeke vevitɔ le exwe lɔ ɖuɖu ŋkekewo mɛ. Gbehɔngbe ɔ, Yesu le ete yí dó axwa yí nú nɔ́ ahwakɔn lɔ be: «Nɔ́ shikɔ ci amɛɖe ɔ, le va ŋ gbɔ a vá nu eshi. ³⁸ "Amɛ ci yí xɔ ŋ ji se a trɔ etɔjɔxu ci mɛ yí eshi ci yí nanɔ amɛ agbe a totoɔ so hwahwahwa" shigbe lehanci yí Mawu 'nyɔ wema ɖeka nui dó nɛnɛ.» ³⁹ Sɔ to enyɔ hɔnwo mɛ ɔ, Yesu xoxoɔ nuxu so Gbɔngbɔn kɔkɔɛ ci yí amɛ ciwo yí xɔɛ ji se a vá xɔ nu. Gacimɛ yí é xoxoɔ nuxu lɔ ɔ, Mawu de na Gbɔngbɔn kɔkɔɛ lɔ amɛɖe hɔɖe go. Ɖó ɔ, Mawu de na klɛnklɛn gangan lɔ Yesu hɔɖe go. ⁴⁰ Ci yí ahwa ci yí bɔdo ehɔn lɔ se enyɔ ciwo yí Yesu nu ɔ, amɛɖekawo nunuɔ le wo mɛ be; «Mawu 'ŋɛdotɔ lɔ yí ŋsu cɛ nyí nyao.» ⁴¹ Amɛ buwo nunuɔ be: «Kliso lɔ yí é nyí!» Amɛ buwo cán gbe nunuɔ be: « Eɖe Klisolɔ a sɛn eŋ a so Galile 'kan mɛ a? ⁴² Wo ŋwlɛ do Mawu 'nyɔ wemawo mɛ ɖɛ be Kliso lɔ a va nyi Davidi jijimɛvi yí yi a só Bɛtɛlɛhɛmu Kɔxwimɛ, le fini ci ý Davidi nɔ sasa. ⁴³ Eyi ahwa ci yí bɔdo ehɔn lɔ má dó Yesu ŋci. ⁴⁴ Le ahwakɔn lɔ mɛ ɔ, amɛɖewo ji be yewo a le Yesu. Vɔ ɔ, kpɔ́ eɖe 'lɔ de je nu go. ⁴⁵ Mawuxwe lɔ dɔkpɛga lɔwo trɔyi avɔsatɔ gangantɔwo kodo Falisitɔwo gbɔ́ yí wo biɔ wo se be: «Nyi yí jɔ taɖo yí mí de kplɔ Yesu vɛ ɔ?» ⁴⁶ Dɔkpɛga lɔwo ɖoŋci be: «Mì de kpɔ́ amɛɖe yí é xo nuxu nɛnɛ shigbe ŋsu hɔn lɔ nɛnɛ kpɔ́ go.» ⁴⁷ Eyi Falisitɔwo biɔ wo se be: «Míwo cán mí tashi míwoɖekiwo ɖɛ é ble yɔ́ a? ⁴⁸ Amɛɖe le míwo 'gawo alo le Falisitɔwo mɛ yí xɔ ŋsu hɔn lɔ ji se a? ⁴⁹ Vɔ amɛ ciwo yí lɔ́ ahwa kplɔɛ do yí xɔ yi 'nyɔwo ji se de jeshi ese ciwo yí Mɔyizi do nɔ mí go. Finxodo le wo jí.» ⁵⁰ Nikodɛmu, ŋsu ɖeka ci yí va Yesu gbɔ vayi le Falisitɔ ciwo yí le ehɔn lɔ domɛ. É nú nɔ amɛ kpɛtɛwo be: ⁵¹ «Le mìwo 'seci lɔ nu ɔ, mì de ɖó a do ehwɛ nɔ amɛɖe amɛ lɔ 'numɛgbe mase yí a gbé enu ci yí é wa manya doŋkɔ go.» ⁵² Amɛ lɔwo ɖoŋci nii be: «Eo can, é so Galile 'kan mɛ hɛnnɛ yɔ́ a? Gbejè Mawu 'nyɔ wema lɔwo mɛ kpɔ. A kpɔ́ be Mawu 'ŋɛdotɔ ɖekpokpoi de só Galile 'kan mɛ kpɔ go.» ⁵³ Le i godu ɔ, amɛɖekaamɛɖeka trɔyi yi 'xwé mɛ.