¹ Le i godu ɔ, Yesu kpé ago ɖetɔ lɔ ji nɔ Galile 'tɔ ciwo gbe yɔnɔ be Tibeliyadi tɔ lɔ. ² Amɛ sugbɔ lɔ ahwa kpɔɛ do. Ɖo ɔ, wo kpɔ́ jeshidu 'nu ciwo yi e wawa yi sɔ le edɔwo daa nɔ amɛwo. ³ Yesu de ekpo ɖeka ji, yi nukplanviwo do yí wo vayi nɔ anyinɔnɔ do e hɔn. ⁴ Yuɖatɔwo 'xwe ci yí wo yɔnɔ be Atadodoamɛxwe gogo hwehɔnnu. ⁵ Yesu kɔ eta yi eji yi kpɔ yi ahwakɔ gangan ɖeka gbɔgbɔ gbɔ. Eyi e biɔ Filipu se be: «Fini yí mí a sɛn eŋ kpɔ enuɖuɖu le a xwle yia na wo pleŋ nɔ wo a ɖu ɔ?» ⁶ E nu nɛnɛ nɔ Filipu yi a sɔ doi kpɔ. Ɖo ɔ, yesu ŋtɔ nya enu ci yi a wa xoxoxo. ⁷ Filipu ɖoŋci nii be: «Nɔ mì sɔ gajunho sanŋdive (200) xwle enu nɔ ahwakɔn lɔ a ɖu can ɔ, wowo domɛtɔ deka ɖeka a kpɔ kankin kpetii a ɖu go.» ⁸ Yesu nukplavi lɔwo domɛtɔ bu ci yí wo yɔnɔ bé Anŋdre yí ényi Simɔ Piyɛ nɔviɛ nu nɔ Yesu be: ⁹ «Ɖojɛvihwɛ ɖeka lemigbɔ le elɛ yi ɔʒi kpɔnnɔ amatɔ kodo kpavi amɛve le shi. Vɔ nyi kpɔnnɔ amatɔn kodo kpavi hɔnwo a sɛn eŋ wa nɔ amɛ gbogbogbu cɛwo ɔ?» ¹⁰ Eyi Yesu nu be: «Mi nu nɔ amɛ lɔwo nɔ wo a nɔ anyinɔnɔ.» Egbe.» Egbewo su egbɔ le é hɔntexu lɔ. Amɛ lɔwo nɔ anyinɔnɔ do wo ji. ŋsu ciwo yí le wo mɛ a sun agbetɔ kotokun amatɔn (5000) han. ¹¹ Yesu sɔ kpɔnnɔ lɔwo yí ci yí e do akpe nɔ Mawu dó wo ji ɖegbɔ ɔ, é ma wo nɔ amɛ ciwo yi le é hɔn lɔ. Nɛnɛke yi é gbe ma kpavi lɔwo nɔ wo nɛ yi amɛɖeka amɖeka xɔ nɛ ni ci é dro. ¹² Ci yí wo pleŋ lɔ ɖu enu yi xodu ɖɔ wo ɖegbɔ ɔ, Yesu va nu nɔ yí nukplanviwo be: «Mí bɔ enuɖuɖu ciwo yí kpɔtɔ nɔ ede ŋgbe cuin yí a agblé go.» ¹³ Eyí wo bɔ ciwo yí kpɔtɔ nɔ ɔʒi kpɔnnɔ amatɔn ciwo yí amɛwo ɖu kpɔtɔ yí wo ɖɔ́ kishi wive. ¹⁴ Ci yí amɛwo kpɔ enujiŋ lɔ ci yí Yesu wa ɔ, wo nu be: «Mawu 'ŋɛdotɔ ci yí ɖo a va xexe lɔ mɛ yi ŋsu cɛ nyi nyao!» ¹⁵ Susu gbe kpɔɛ nɔ Yesu kaaka be am amɛ lɔwo a va kɔ eye kodo akpasɛnsɛn a sɔ ɖo efiɔ. Eyi e gbe to le wo mɛ xwlɛɛ yi gbe vayi ci azɔge nɔwo yiɖekɛ le ekpo lɔ ji. ¹⁶ Ci yí fiɛshimɛ ɖoɔ, yesu nukplanviwo zɔn vayi Galile 'tɔ lɔ nú. ¹⁷ Wo ɖo etɔjihungangan ɖeka mɛ yi kpé kafanawɔmu le ago ɖetɔ lɔ ji nɔ étɔ lɔ. Vivi tɔ dodod. Vɔ Yesu de kpɔ va gbɔ hɔɖe go. ¹⁸ Axu lɔ le adan wagɔ. Ɖo aya xoxoɔ kodo ŋsɛn. ¹⁹ Nukplanvi lɔwo ku etɔjihun lɔ so egoji kaka yi dodo kpeci amatɔn sɔyi amadɛn bonu nɛnɛ gbɔxwe yi kpɔ yí Yesu zɔnzɔn zɔnlin to axu 'shi lɔ ji yi gbɔgbɔ etɔjihungangan lɔ gbɔ. Eyi vɔnvɔn ɖo wo. ²⁰ Vɔ ɔ, Yesu nu nɔ wo be: «Enyɛ yɔ, mí ŋgbe vɔn go!» ²¹ Nukplanvi lɔwo ji be yewo a kɔɛ do etɔjihun lɔ mɛ. Vɔ kaaka ahan vɔ, etɔ jihungangan lɔ gbe tɔ nyigban gbali do fini ci yí wo yigɔ. ²² Le i ŋkegbu ɔ, ahwa ci yí ci ago ci ji nukplanviwo so le nɔ axu lɔ va mɔŋje nu be etɔjihungangan kuɖeka yí le axu lɔ ji sa. Amɛwo nya be Yesu de ɖo etɔjihon lɔ mɛ kodo yí nukplanviwo go. nukplanvi lɔwo yí yi. ²³ Vɔ ɔ etɔjihungangan buwo so Tibeliyadi juganmɛ yí gbɔgbɔ. wo gogo fini ci yí Axwetɔ do akpe nɔ mawu do kpɔnnɔwo ji le sɔ ma nɔ amɛwo yi wo ɖu. ²⁴ Ci yí amɛwo kpɔ nya be Yesu kodo yi nukplanviwo de gbe le é hɔn goɔ, wo ɖo etɔjihungangan ciwo yi va mɛ yi jeŋkɔ kafanawɔmu keŋ a vayi ji Yesu kpɔ. ²⁵ Amɛ lɔwo vayi kpɔ Yesu lé ago eɖetɔ lɔ ji nɔ axu lɔ yi e va ɖo ete ɔ?» ²⁶ Yesu ɖoŋci nɔ wo be: «Le nyɔnɔnui mɛ ɔ, ŋ nunu nɔ mí be: D'é nyi jeshidu 'nu ciwo yi ŋ wa gɔmɛ mí se taɖo yí jijiɛ ŋ go. Vɔ ɔ, kpɔnnɔ ci yí ŋ na mí yí mí ɖu xodu ɖɔ mí ŋci mí jijiɛ ŋ do. ²⁷ Mí ŋgbe donɔ eŋ sɛn nɔ enuɖuɖu cɛ ci yi gblenɔ go. Vɔ ɔ mí do eŋ sɛn nɔ enuɖuɖu ci yí nɔnɔ anyinɔnɔ dɛ tɛgbɛɛ nɔ agbemavɔ Agbetɔvi lɔ a na enuɖuɖu hɔn mí. Ɖo Eda Mawu sɔ yi 'nutrenu ɖo wo nu.» ²⁸ Eyi amɛ lɔwo va biɔ Yesu se be: «Le yi mì a wɛɛ do yi a wa edɔ ciwo yí Mawu dro ɔ?» ²⁹ Yesu ɖoŋci nɔ́ wo be: «Edɔ ci yí Mawu jiji be míwo le wa yi nyí kpɔ be mia xɔ amɛ ci yi e dɔ ɖaɖa ji se.» ³⁰ Wo gbe biɔ Yesu se be «Enujiŋ ci yí á sɛn eŋ wa nɔ mí a kpɔ yi a xɔ eo ji se ɔ? Edɔ ci wagbe yi eto ɔ? ³¹ Mìwo togbiwo ɖu mana nuɖuɖu le zogbeji. Mí hlin le Mawu 'nyɔ wemawo mɛ be: "E na enuɖuɖu ci yí so jiŋkushimɛ wo."» ³² Yesu ɖoŋci nɔ wo be: «le nyɔnɔnui mɛ ɔ, ŋ nunuɔ mi be: d'é nyi Mɔyizi yí na mí enuɖuɖu ci yi so jiŋkushimɛ go. Vɔ ɔ, Edabyɛ yi na enuɖuɖu adoduilɔ ci yi so jiŋkushimɛ mí. ³³ Ɖo enuɖuɖu ci yi Mawu ne lɔ ɔ, e yi nyi amɛ ci yí ɖyi so jiŋkushimɛ va yi nanɔ agbe xexe lɔ» ³⁴ Eyi amɛ lɔwo nu nɔ Yesu be: «Axwetɔ nanɔ enuɖuɖu hɔn lɔ mí tɛgbɛɛ.» ³⁵ Yesu xɔ nuxu yi nu nɔ wo be: «Enyɛ yi nyi enuɖuɖu ci yí nanɔ agbe amɛ. Nɔ amɛɖe vaŋ gbɔ ɔ, shive daci gbeɖe go. yi nɔ amɛɖe xɔ ŋ ji se ɔ, kpɔ shikɔ da ci gbeɖe go. ³⁶ Vɔ ŋ nui nɔ mí. Mí kpɔ ŋ keŋgan yi mí de xɔ ŋ ji se go. ³⁷ Amɛ ciwo pleŋ yi Edanyɛ na ŋ a va ŋ gbɔ yí ŋ d'a gbe amɛɖe ci yi a va ŋ gbɔ maxɔ gbeɖɛ go. ³⁸ Ɖ ɔ d'é ɖyi ŋ ɖyi so jiŋkushimɛ yi a va wa enu ci yí ŋ dro go. Vɔ ɔ, va ŋ va tí a va wa enu ci amɛ ci yídɔ́ ŋ ɖaɖa dro. ³⁹ Amɛ ci yí dɔ ŋ ɖaɖa lɔ 'dro yí nyí kpɔ be enyɛ ŋgbe sɔ amɛɖekɛ bu le amɛ ciwo yí e sɔ na ŋ mɛ go. Vɔ ɔ, ŋ ɖo a fɔn wo so ekuwodi le ŋkeke vɔvɔ kpɛtɛkpɛtɛ lɔ ji. ⁴⁰ Edanyɛ 'dro yí nyí kpɔ be: Amɛ ciwo pleŋ yí kpɔ eyi lɔ yí xɔɛ ji se a kpɔ agbemavɔ yi ma fɔn wo so ekuwodi le ŋkeke vɔvɔ kpɛtɛkpɛtɛ lɔ ji.» ⁴¹ Yuɖatɔwo tɔ ɖyika dodo Yesu nɔ ci yí enu be ye nyi enuɖuɖu ci yí ɖyi so jiŋkushimɛ va lɔ. ⁴² Wo nunu be: «D'é nyí Yesu, Ʒozefu eviɛ ŋsuvi lɔ yí nyi ehɔn ba? Mì jeshi edalɔ kodo enɔlɔ ɖɛ nyuiɖe. lé yi a wɛɛ a va nunu yɛ be ye ɖyí so jiŋkushi va do ɔ?» ⁴³ Yesu ɖoŋci nɔ wo be: «Mí mi ɖyika dodo le míwonɔnɔwo mɛ. ⁴⁴ Amɛɖekpokpoi d'a sɛn eŋ va ŋ gbɔ nɔ Edanyɛ ci yi ɖo ŋ ɖaɖa de kplɔɛ vɛɛ go. Eyi enyɛ ɔ, na va fɔn amɛ ci yi va ŋ gbɔ lɔ so ekuwodi le ŋkeke vɔvɔ kpɛtɛkpɛtɛ lɔ ji. ⁴⁵ Wo ŋwlɛ ɖɛ do Mawu 'ŋɛdotɔwo wema mɛ be: "Mawu a kplan enu agbetɔwo pleŋ." Nɛnɛ ɔ, amɛshamɛ ci yí a do eto Eda yi a xɔ yi nukplamɛyɔwo a va ŋ gbɔ. ⁴⁶ Dé nyi be nu ŋ nunu be amɛɖe kpɔ Eda Mawu kpɔ yɔ go. Amɛ ci yí ɖyi so jiŋkushimɛ yi va lɔ ɖekɛ yi kpɔɛ. ⁴⁷ Le nyɔnɔnui mɛ ɔ, ŋ nunuɔ nɔ mí be: nɔ amɛɖe xɔ ŋ ji se ɔ, e kpɔ agbemavɔ. ⁴⁸ Enyɛ yí nyí enuɖuɖu ci yi nanɔ agbe amɛ. ⁴⁹ Míwo tɔgbuiwo ɖu mana nuɖuɖu le zogbeji gankegan ɔ, wo ku. ⁵⁰ Vɔ enuɖuɖu ci yi ɖyi so jiŋkushimɛ va lɔ yɛ nyí enuɖuɖu ɖeka ci yí nɔ amɛɖe ɖui ɔ, amɛ lɔ yɛ d'a ku go. ⁵¹ Eyɛ yi nyí enuɖuɖu agbe agbe cí yí ɖyi so jiŋkushi va. Nɔ amɛɖe ɖu enuɖuɖu cɛ lɔ ɔ, a nɔ agbe tɛgbɛɛ. Enuɖuɖu ci yí na ná lɔ yi nyi anyi lankpu. ŋ sɔ jojo nɔ xexe lɔ a kpɔ agbe.» ⁵² Trololo ɔ, Yuɖatɔwo gbe tɔ enyɔ dɔndɔn kpɔ sɛnŋsɛnŋɖe le wowoɖeɖewo mɛ be: «Lehanci yi ŋsu hɔn a wɛɛ a va na yi lankpu mì nɔ mì a ɖu do ɔ?» ⁵³ Yesu nu nɔ wo be: «Le nyɔnɔnui mɛ ɔ, ŋ nunuɔ nɔ mí be: nɔ mi de ɖu agbetɔvi lɔ labkpu yi nu yi 'hun go ɔ, agbe d'a le mí mɛ go. ⁵⁴ Amɛ ci yí ɖu nyaŋ lankpu yi nu nyaŋ 'hun ɔ, amɛ lɔ kpɔ agbemavɔ yí na va fɔin so ekuwodi le ŋkeke kpɛtɛkpɛtɛ lɔ ji. ⁵⁵ Ɖo ɔ nyaŋ lankpu nyi enuɖuɖu adodui yi nyaŋ 'hun nyí enu nunu adodui. ⁵⁶ Amɛ ci yí ɖu nyaŋ lankpu yi nu nyaŋ 'hun ɔ, amɛ lɔ a wa ɖeka kodo ŋ yí enyɛ can na wa ɖeka kodii. ⁵⁷ Edanyɛ ci yí dɔ ŋ ɖaɖa le agbe yí ŋ le agbe to Edanyɛ ji. Nɛnɛke amɛ ci yí ɖu nyaŋ lankpu a nɔ agbe to ŋ ji nɛ. ⁵⁸ Enuɖuɖu ci yí ɖyi so jiŋkushimɛ va lɔ ge. D'é le shigbe ci yí míwo tɔgbuiwo du keŋgan yi ku nɛnɛ go. Vɔ amɛ ci yí a ɖu enuɖuɖu ce yɛ ɔ, a nɔ agbe tɛgbɛɛ.» ⁵⁹ Yesu xo nuxu hɔnwo gacimɛ yí e le enukplan amɛwo le mawusɛnxu le kafanawɔmu. ⁶⁰ Ci yí Yesu nukplanviwo se enyɔ lɔwo ci yí Yesu nu ɔ, amɛ sugbɔ tɔ nunu ble wo mɛ be: «Enyɔ lɔwo tɔ ŋsɛnsɛn glo. Mí yi a sɛn eŋ a xɔ enyɔ hɔnwo ɔ? ⁶¹ Yesu kpɔ enu je mɛ nyuɖe nya be ye nukplanviwo dodo ɖyika enyɔ lɔ ci yí ye nu. Eyi na taɖo yí é biɔ wo se be: «Enyɔ lɔ jiji a nyi afɔklɛnnu nɔ mí yɔ a? ⁶² Nɔ mí va kpɔ yí Agbetɔvi lɔ trɔyigɔ jiŋkushi fini ci yí e le sasa ɖee, lé a va nɔ do nɔ mí ɔ? ⁶³ Mawu gbɔngbɔn yí nanɔ agbe amɛ. Agbetɔ ŋtɔ d'a sɛn eŋ a va enuɖe go. Enyɔ ciwo yí ŋ nu nɔ mí nyí Gbɔngbɔn kɔkɔɛ mɛ 'nyɔ ciwo yí nanɔ agbe amɛ. ⁶⁴ Vɔ ɔ, míwo domɛtɔ ɖekawo de ɖó xɔse go.» Nyaotɔ, Yesu jeshi amɛ ciwo yí de xɔɛ ji se go kodo amɛ ci yí a sɔ sa so gɔnmɛjeje lɔ mɛ ɖii. ⁶⁵ Yesu gbe sɔ kpii nɔ wo be: «Enyɔ ci ŋci yí ŋ nu nɔ́ mí be amɛɖe d'a sɛn eŋ a va ŋ gbɔ nɔ d'e nyi Edabyɛ yí na egbe yi go nɛ.» ⁶⁶ Sɔso hwehɔnnuɔ, Yesu nukplanvi sugbɔ trɔgbi ɖɛ yí mi kplɔkplɔɛ do. ⁶⁷ Eyi Yesu va va biɔ amɛ wive lɔwo se be: «Míwo can mí de jiji a yi go ba?» ⁶⁸ Simɔ Piyɛ ɖoŋci ni be: «Axwetɔ, mí gbɔ yí mí a yi ɔ? Eo gbɔ wo senɔ enyɔ ciwo nanɔ agbemavɔ amɛ le.» ⁶⁹ Vɔ mìwo yɛ ɔ, mì xɔɛ ji se yí nya be: eo nyí amɛ kɔkɔɛ ci yí Mawu dɔ ɖaɖa lɔ.» ^{70 71} Yesu nu nɔ wo be: «ŋ de can mí wive lɔwo ba?: Gankegan ɔ, Miwo domɛtɔ ɖeka va nyí Legba 'mɛ le ete!» Yuda ci yí nyi Simɔ Ishikaliwɔti eviɛ ŋsuvi nu yí Yesu xoxoɔ nuxu so nɛnɛ han.. Ɖo ci yí e nyí nukplanvi wive lɔwo domɛ tɔ ɖeka can ɔ, e yi va sɔ Yesu doashi nɔ ketɔwo.