ETA 5

1 Le enu hɔnwo godu ɔ, Yuɖatɔwo sɛnsɛn 'xwe ɖeka ɖuɖu ɖo yí Yesu yi Ʒeluzalɛmu jugan mɛ. 2 Le Ʒeluzalɛmu lɔ ɔ, wo lí eshidu gangan ɖeka ɖɛ́ dó axa nɔ agbo ci yí amɛwo vá lenɔ eshi le mɛ. Wo yɔnɔ eshidu lɔ dó Eblegbe mɛ bé Bɛtizata. Wo cu agba amatɔn trɔdo éshidu lɔ. 3 Edɔnɔ sugbɔ mlɔ anyi dó agba lɔwo mɛ. Wowo domɛtɔ ɖewo nyí ŋkuvitɔntɔntɔnɔwo, ebutɔntɔwo kodo ekplɛ xotɔwo. [Wo le hɔn lɔ yí sɔ́ nɔnɔ ete nɔ́ eshi lɔ a hwán. 4 Ɖó ɔ, Mawu dɔla ɖeka ɖyinɔ va eshidu lɔ mɛ hweɖewonu yí vá blunɔ eshi lɔ. Nɛnɛ nɔ́ edɔnɔ ɖe ɖó eshi lɔ ci yí wo blu mɛ doŋkɔ ɔ, edɔ minɔ nii. Edɔlele dekpokpoi ci yí a nyi ɔ, é ɖó a mi.] 5 Edɔnɔ ɖeka le hɔn yí ledɔ so exwe egban honyi ge. 6 Ci Yesu kpɔɛ le anyimlɔxwe yí gbe nya bé yi ledɔ yɛ yí dé sɔ go ɔ, é biɔ́ɛ se bé: «É ji bé edɔ lé mí nɔ́ eye a?» 7 Edɔnɔ lɔ ɖoŋci nii bé: «Axwetɔ, amɛɖe de le ŋ shi yí a kɔ́ ŋ yi ʒin dó eshidu lɔ mɛ gacimɛwo yí wo vá hwannɔ eshi lɔ go. Eyi nɔ́ ŋ teteɛ kpɔ bé na ɖó mɛ ɔ, amɛmu vayi ɖonɔ mɛ doŋkɔ nɔ ŋ.» 8 Yesu nu nii be: «Shi te, sɔ́ ao 'bá yí azɔn zɔnlin.» 9 Zeɖeka vɔ, edɔ lɔ mí nɔ ŋsu lɔ yi é sɔ yi 'bá yí tɔ́ zɔnlin zɔnzɔn. Gbɔngbɔngbe yí enu lɔ trɔ́ jɔ. 10 Eyi yuɖatɔwo 'gawo nú nɔ́ amɛ ci yí edɔ mi nɔ lɔ bé: «Gbɔngbɔngbe yɔ. D'é ɖó egbe a dró ao 'bá le azan cɛ ji go.» 11 ŋsu lɔ ɖoŋci nɔ wo bé: «Amɛ ci yí da edɔ nɔ ŋ yí nú nɔ́ ŋ bé: "sɔ́ ao bá yí a zɔn zɔnlin."» 12 Gahɔnmɛ yí yuɖatɔwo 'gá lɔwo vá biɔ́ɛ se le bé: «Mí bé: "sɔ́ ao 'ba yí a zɔn zɔnlin ɔ?"» 13 Vɔ ɔ, ŋsu ci edɔ mi nɔ́ lɔ de jeshi amɛ ci yí da edɔ nii go. Ɖó ɔ, Yesu bu dó ahwa ci yí vá cɔ́n wo le hɔn lɔ mɛ. 14 Le enu hɔnwo godu ɔ, Yesu va do ego ŋsu lɔ le Mawuxwe mɛ yí nú nii bé: «Ecɛyɛ ɔ, edɔ mi nɔ eo. ŋgbè gbe wa enuvɔn ké nɔ́ enu ci yí nyina sɔwu hɔn a vá jɔ do eo ji go.» 15 ŋsu lɔ vayi nu nɔ́ yuɖatɔwo 'ga lɔwo be Yesu yí da edɔ nɔ eye. 16 Eyi yuɖatɔwo tɔ́ Yesu jiji yí a wa enu kodii nɔ́ ci yí e da edɔ nɔ ŋsu lɔ gbɔngbɔngbe ŋci. 17 Vɔ ɔ, Yesu nu nɔ́ wo bé: «Edanyɛ kpɔtɔ le edɔ ji.» 18 Enyɔ hɔn ci yí Yesu nu dɔ́ bé yuɖatɔwo 'ga lɔwo gbe va tɔ́ jiji dó jí bé yewo a wuí. Ɖó wo nunuɔ bé d'é nyí gbɔngbɔngbe lɔ ɖekɛ yí Yesu gbe ekɔ manyi nɔ go. Vɔ ɔ, yi gbe nunuɔ bé mawu nyí yedaye teŋ yí nɛnɛ ɔ, yí sɔ́ yiɖeki dó mawu 'jú jí. 19 Yesu xɔ nuxu yí nú nɔ́ wo bé: «Le nyɔnɔnui mɛ ɔ, ŋ nunuɔ nɔ mí bé: Evi lɔ d'a sɛn eŋ wa enuɖe le yiɖeki shinu go. Yi kpɔnɔ enu ci yí Eda wanɔ yí gbe i han Enu ciwo pleŋ yí Eda wanɔ ɔ, Evi lɔ cán gbe wanɔ wo hɛnnɛ. 20 Ɖó ɔ, Eda lɔn Evi lɔ yí donɔ asɛ enu ciwo pleŋ yí yiŋtɔ wanɔ nii. A gbe dansin enu gangan buwo nii sɔwu ecɛwo yí á wa yí mí a kpɔ́ yí a kpaca mí. 21 Ɖó shigbe lehanci Eda fɔnnɔ amɛkukuwo yi nanɔ agbe wo dó nɛnɛ ɔ, Evi lɔ cán nanɔ agbe amɛ ci yí edro. 22 Eda de ɖonɔ kojo amɛɖe go. Vɔ ɔ, é sɔ kojo ɖoɖo cɛ lɔ pleŋ jonɔ Evi lɔ nɔ́ á ɖo kojo kodo amɛwo. 23 Nɛnɛ ɔ, amɛsahmɛ a dó bubu Evi lɔ nú shigbe lehanci yí wo donɔ bubu Eda nu dó nɛnɛ. Amɛ ci yí de dodoɔ bubu Evi lɔ nú go de dodoɔ bubu Eda ci yí dɔ́ɛ ɖaɖa nú go.» 24 Yesu gbe yi ji n&ɔ wo bé: «Le nyɔnɔnui mɛ ɔ, ŋ nunuɔ nɔ mí bé: amɛ ci yí seseɛ anyi 'nyɔwo yí xɔ mawu ci yí dɔ́ ŋ ɖaɖa jí se ɔ, amɛ lɔ kpɔ́ agbe mavɔ. Wo d'a gbe ɖo kojo yi go. Vɔ ɔ, é tó so ekumɛ yí vá agbemɛ vɔ. 25 Le nyɔnɔnui mɛ ɔ, ŋ nunuɔ nɔ mí bé: hwenu li gbɔgbɔ. I ge ɖo ge yí amɛkukuwo a se Mawu Eviɛ lɔ 'gbe. Eyi amɛ ciwo yí a se yi 'gbe a kpɔ́ agbe. 26 Ɖó shigbe lehanci yí Eda nyi agbe jɔxu dó nɛnɛ ɔ, é gbe na acɛ Evi lɔ bé eyɛ cán a nyi agbe jɔxu hɛnnɛ. 27 É sɔ́ kojo ɖoɖo 'cɛ jo nɔ́ Evi lɔ bé yí a ɖó kojo kodo agbetɔwo. Ɖó é yí nyí Agbetɔvi lɔ. 28 Enyɔ cɛwo ŋgbe kpaca mí go. Ɖó hwenu li gbɔgbɔ yí amɛ ciwo yí kú yí wo ɖyi a vá se agbetɔvi lɔ 'gbe 29 yí a tó so wowo yɔduwo mɛ. Eyi Mawu a fɔ́n amɛ ciwo yí wa enu nyui yí a na agbemavɔ wo. Vɔ á fɔ́n amɛ ciwo yí wa enuvɔn nɔ́ wo a ɖó kojo kodo wo yí a so ekuhwɛ nɔ wo.» 30 Yesu yi ji nu nɔ́ bé: «ŋ d'a sɛn eŋ wa enuɖe le enyɛɖeki shinu go. ŋ ɖonɔ kojo dó lehanci yí Mawu drii nɔ́ ŋ be enyɛ le ɖoi do nɛnɛ jí yí anyi kojo ɖoɖo nɔnɔ jɔjɔeɖe. Ɖó ŋ de jinɔ a wa enu ci yí ŋ dro go. Vɔ ɔ, ŋ jinɔ a wa enu ci yí amɛ ci yí dɔ́ ŋ ɖaɖa dró.» 31 «Nɔ́ enyɛŋtɔ gbe va ɖeɖeɛ kunu nɔ enyɛɖeki ɔ, wo a lɔn a xɔ anyi kunuɖeɖe ba. 32 Vɔ ɔ, amɛbu yí ɖeɖeɛ kunu nɔ ŋ yí ŋ nya baŋ enyɔ ci yí é nunuɔ so ŋ nu lɔ nyi nyɔnɔnui. 33 Mi dɔ, amɛwo ɖaɖa Ʒan gbɔ yí Ʒan ɖe kunu so nyɔnɔnui lɔ nu nɔ́ mí. 34 Vɔ enyɛ ɔ, ŋ de ʒián bé agbetɔ a ɖe kunu nɔ ŋ go. Vɔ ɔ, ŋ nunuɔ nɛnɛ han kpoŋ nɔ́ mawu a sɛ́n eŋ hwlɛn mí gan. 35 Ʒan le sasa shigbe kaligban ci yí wo tɔ́ á klɛn han nɛnɛ. Eyi le hwenu klɛŋ ɖe mɛ ɔ, mí lɔn yí kpɔ́ jijɔ le yi klɛnklɛn lɔ nu. 36 Vɔ enyɛ ɔ, ŋ ɖo kunuɖeɖenɔamɛ ɖeka ci yí wugan Ʒan kunuɖeɖe. É yí nyí kpɔ́ be edɔ ciwo yí Eda dɔ ŋ yí ŋ wawa ɖeɖeɛ kunu nɔ ŋ yí dandansin bé Eda yí dɔ́ ŋ ɖaɖa. 37 Eda ci yí dɔ́ ŋ ɖaɖa cán ɖeɖeɛ kunu nɔ ŋ. Vɔ ɔ, mí de se yi 'gbemɛ kpɔ go yí mí de kpɔ́ yi ŋmɛ gbeɖe go. 38 Mí de xɔxɔ yi 'nyɔwo ɖɛ́ dó míwo 'jiwo mɛ go. Ɖó mí de xɔ amɛ ci yí é dɔ ɖaɖa ji se go. 39 Mí gbejenɔ mawu 'nyɔ wemawo mɛ kito kito. Ɖó ɔ, mí bunɔ bé wowo mɛ yí mí a kpɔ́ agbemavɔ le. Mawu 'nyɔ wema hɔn lɔwo yí ɖeɖeɛ kunu nɔ ŋ nɛ. 40 Gankegan ɔ, mí de jí a va gbɔ nɔ́ na agbe adoduitɔ lɔ mí go. 41 Ŋ de jí baŋ agbetɔwo le kankanfu ŋ go. 42 Vɔ ɔ, ŋ jeshi mí ɖɛ nyuiɖe ŋ nya bé mí de ɖó lɔnlɔn nɔ mawu go. 43 Ŋ va le Edanyɛ nyikɔ mɛ yí mí gbe be yewo d'a xɔ ŋ go. Vɔ nɔ́ amɛbuɖe vá le yiŋtɔ nyikɔ mɛ ɔ, mí a vá xɔ eyɛ. 44 Jijɔ é nyinɔ nɔ́ mí bé mí a le míwonɔnɔwo kanfuɔ. Vɔ ɔ, kpɔ́ mí de jinɔ bé yewo awa enu nɔ mawu kuɖeka a kanfu mí go. Lé yí mí a sɛn eŋ a xɔ ŋ jise do ɔ? 45 Mí ŋgbe bubuɔ bé enyɛ na va dó ehwɛ nɔ mí le Edanyɛ gbɔ go. Mɔyizi ci ji yí mí sɔ míwo 'mɔkpɔkpɔ dado yí a vá dó ehwɛ nɔ mí. 46 Nɔ́ é nyí kpɔ́ bé mí xɔ Mɔyizi ji se nyao ɔ, mí a vɔ enyɛ can ji se hɛnnɛ. Ɖó enyɛ nu yí Mɔyizi ŋwlɛ enu so dó yí wemawo mɛ. 47 Vɔ ci yí mí de xɔ enu ci yí é ŋwlɛ lɔ ji se go ɔ, lehanci yí mí sɛn eŋ a xɔ anyi 'nyɔwo ji se do ɔ?»