¹ Ci yí Yesu va nyá bé Falisitɔwo gbɛbɔbɔ 'mɛtɔwo se be amɛwo lɔlɔ ahwa kplɔ eye do yí ye wawa ʒinʒindotɔmɛ Mawu tɔ nɔ nukplanvi sugbɔ sɔwu Ʒan ɔ, ² hɛnnɛ cán ɔ, kpɔ́ d'é nyi Yesu ŋtɔ yí wawa ʒinʒindotɔmɛ Mawu tɔ nɔ amɛwo go. yi nukplanviwo yɔ́ ³ É só le Ʒude 'kan mɛ yí gbe trɔjeŋkɔ Galile 'kan mɛ. ⁴ Gbɔxwe yí á yi ɔ, é ɖó a tó Samali 'kan mɛ. ⁵ Ci yí é le emɔ lɔ ji yí yigɔ ɔ, é va gogogoɔ Samali 'kan lɔ jugan ɖeka ci yí wo yɔnɔ bé Sisha. Jugan lɔ sɔ agble ci yi Ʒakɔbu sɔ ná eviɛ Ʒozɛfu vayi gbɔ. ⁶ Ehɔn yí dotɔ ci yí Ʒakɔbu ɖe sasa lɔ le nɛ. Emɔzɔnzɔn lɔ dɔ́ yí enu ci ekɔ nii yí é nɔ anyinɔnɔ do axa nɔ dotɔ lɔ. Gawive han yí xoxoɔ. ^{7 8} Yesu nukplanviwo yi jugan lɔ mɛ a yí xwlɛ enuɖuɖu a ɖu. Gahɔnmɛ ɔ nyɔnu, Samalitɔ ɖeka vá eshi kugbe. Yesu nu nii bé : « Nà eshi ŋ ma nu.» ⁹ Nyɔnu Samalitɔ lɔ nú nɔ Yesu be :« Yuɖatɔ yí è nyi ŋ! Lé é wɛɛ yí eo Yuɖatɔ a vá biɔ́ eshi enyɛ Samalitɔ a nu do ɔ?» Nyɔnu lɔ nú nɛnɛ ɖó ɔ, Yuɖatɔwo de jinɔ a cá egbɛ kodo Samalitɔwo go. ¹⁰ Yesu ɖoŋci nii be : « Nɔ́ nya è nya enu ci yí Mawu nanɔ amɛ yí nɔ́ je è jeshi amɛ ci yí nunuɔ nɔ eo be : " Na eshi ŋ ma nu" ɔ, eo yí a doŋkɔ sasa yí a biɔ́ eshi yi yí á na eshi ci yí nanɔ agbe amɛ eo.» ¹¹ Nyɔnu lɔ xɔnuxu yi nú nɔ́ Yesu be : «Axwetɔ, è hɛn enuɖe yí a sɔ́ ku eshi lɔ ba. Dotɔ lɔ trɔ cito. Fini yí à kpɔ́ eshi ci yí nanɔ agbe amɛ lɔ le ɔ ? ¹² Mìwo tɔgbi Ʒakɔbu yí sɔ́ dotɔ cɛ na mì. Yiŋtɔ nu dotɔ cɛ shi. Eviɛwo kodo yi lankuwo cán nuii. Bu è bubuɔ be ye wu egan Ʒakɔbu a?» ¹³ Yesu ɖoŋci nɔ nyɔnu lɔ be :«Amɛɖekpokpoi ci yí a nu dotɔ cɛ mɛ shi ɔ, shikɔ a gbe cii. ¹⁴ Vɔ amɛ ci yí a nu eshi ci na nii ɔ, shikɔ d'a gbe cii gbeɖe go. Eshi ci na ná amɛ a trɔ eshijɔsoxu le amɛ lɔ mɛ yí a na yí amɛ lɔ a kpɔ agbemavɔ. » ¹⁵ Eyi nyɔnu lɔ nu nɔ Yesu be : «Axwetɔ, na eshi hɔn lɔ ŋ nɔ́ shikɔ ŋgbe gbe ci ŋ go yí nɔ enyɛ ŋgbe gbe va va dotɔ cɛ tu yí a va kukuɔ eshi go.» ¹⁶ Yesu nu nɔ nyɔnu lɔ be : «Yi yɔ asuo nɔ́ eo kodo eyɛ a trɔva elɛ.» ¹⁷ Nyɔnu lɔ ɖoŋci nii be : «Ŋ ɖo asu go.» Eyi Yesu nu nii be: «Nyɔnɔnui yí è nu yí be ye de ɖó asu go. ¹⁸ Ɖó ɔ, è ɖe asu amatɔn vayi yí ŋsu ci gbɔ yí è le viɛ can de nyi asuo go. Enyɔ hɔn ci yí è nu ɔ, è nu nyɔnɔnui.» ¹⁹ Eyi nyɔnu lɔ nú nɔ́ Yesu be : « Axwetɔ, ŋ kpɔ be Mawu 'ŋɛɖotɔ yí è nyi. ²⁰ Mìwo Samalitɔwo tɔgbiwo sɛn Mawu le eto cɛ ji. Vɔ míwo Yuɖatɔwo ɔ, míwo nunɔ bé fini ci yí wo ɖó a sɛn Mawu le le Ʒeluzalɛmu.» ²¹ Yesu ɖoŋci nii be : « Nyɔnu, kando ŋ ji. Hwenu li gbɔgbɔ yí mí dagbe sɛn Eda Mawu le eto cɛ ji alo Ʒeluzalɛmu go. ²² Míwo Samalitɔwo ɔ, mí sɛnsɛn Mawu vɔ kpɔ́ mí de jeshi go. Mìwo Yuɖatɔwo ɔ, mìwo sinsiɛn yi gbe jeshii. Ɖó ɔ, mìwo Yuɖatɔwo ji yí Mawu tó yí hwlɛn agbetɔwo gán. ²³ Vɔ ɔ, hwenu li gbɔgbɔ, i ge ɖo ge yí Mawusɛntɔ adoduitɔwo a sɛn Ada le Gbɔngbɔn kodo nyɔnɔnuitoto mɛ. Ɖó Mawusɛntɔ hɔn han jiɛ yí Ada le nɛ. ²⁴ Mawu nyi Gbɔngbɔn. É le be amɛ ciwo yi siinni a sinsiɛn le Gbɔngbɔn kodo nyɔnɔnuitoto mɛ ». ²⁵ Nyɔnu lɔ nú nɔ́ Yesu be : « Ŋ nya bé Mɛsiya, amɛ ci yí wo yɔnɔ bé Klisolɔ a va. Hwehɔnnu ɔ, á vá ɖe enuwo pleŋ mɛ nɔ mí». ²⁶ Yesu ɖoŋci nii bé: «Enyɛ, amɛ ci yí xoxoɔ nuxu kodo eo yi nyi Klisolɔ ». ²⁷ Enyɔ hɔnwo nuɔ yí wo le nɛ yí nukplanvi lɔwo gbɔ so jugan lɔ mɛ. Ci yí wo kpɔ yí Yesu le nuxu xoɔ kodo nyɔnu lɔ ɔ, é kpaca wo. Gankegan ɔ, eɖe de le wo mɛ yí gbé edɔn yí biɔɛ se be nyi yí yi jijiɛ so nyɔnu lɔ gbɔ́ alo nyi yí taɖo yí yi xoxoɔ nuxu kodo nyɔnulɔ mɛ go. ²⁸ Eyi nyɔnu lɔ gbé yi tɔmɛze ɖɛ dó etɔ lɔ nu yí trɔyi jugan lɔ mɛ yi vayi nu nɔ amɛwo bé : « ²⁹ Mí va kpɔ́ ŋsu ɖeka ɖá! É nú enu ciwo pleŋ yí ŋ wa kpɔ nɔ́ ŋ. D'é Klisolɔ á nyi ɖáa yɛ bá? ». ³⁰ Eyi amɛwo tó so jugan lɔ mɛ yí gbɔgbɔ Yesu kpɔgbe. ³¹ Hwehɔnnu ɔ, nukplanviwo vá ɖeɖeɛ kuku nɔ Yesu be: « Cicagan, và ɖu enu» ³² Vɔ é ɖoŋci nɔ wo bé : « Enuɖuɖu deka le ŋ shi yí ŋ jijiɛ a ɖu, ci míwo de jeshii go.» ³³ Eyi nukplanvi lɔwo vá tɔ wowonɔnɔwo biɔbiɔ se be: « Ɖee, amɛɖe hɛn enuɖuɖu ɖe vɛɛ nii yɔ́ a? » ³⁴ Yesu nu nɔ́ wo bé : «Nyaŋ 'nuɖuɖu yí nyi kpɔ bé ma wa ɖo amɛ ci yí dɔ́ ŋ ɖaɖa d'ró ji a ɖe egbɔ edɔ ci yí é dɔ ŋ. ³⁵ Mí nunɔ, míwoŋtɔwo bé yi kpɔtɔ wleci amɛnɛ yi wo a tɔ bomɛnukuwo cancan. Vɔ enyɛ ɔ, ŋ nunuɔ nɔ mi be míwo lé kɔ eta yi eji a kpɔ ebo lɔwo mɛ nyuiɖe ɖá. Jinuku lɔwo xú vɔ, yi é kpɔtɔ be wo a cán wo! ³⁶ Amɛ ci yí le bomɛnuku caan xɔ yi fɛncu vɔ yí le nuku lɔwo bɔɔ do eju ɖɛ nɔ agbemavɔ. Nɛnɛ ɔ, jinukuwutɔ lɔ kodo jinukucantɔ a bɔ a kpɔ́ jijɔ. ³⁷ Ecɛ mɛ yí é ze le be elo ci yí wo donɔ be: amɛɖe yí ciinni, nyi nyɔnɔnui le nɛ. ³⁸ Yesu gbe nu be : Ŋ ɖo mí ɖaɖa bomɛnuku cangbe le ebo ci mɛ yí mí de wa edɔ ɖe vayi go. Amɛbuwo wa edɔ le ebo lɔ mɛ yí mìwo và ɖuɖu agbe nɔ edɔ ci yi wo wa. ³⁹ Samalitɔ ciwo yí só jugan hɔn lɔ mɛ sugbɔ xɔ Yesu ji se. Ɖó nyɔnu lɔ ɖeɖeɛ kunu nɔ wo bé yi nú enu ciwo pleŋ yí ye wa kpɔ nɔ́ eye. ⁴⁰ Eyi ná taɖo ci yí Samalitɔ lɔwo vá ɖó Yesu gbɔ ɔ, wo ɖe kuku nii be yí lé nɔ yewo gbɔ́. Eyi Yesu nɔ wo gbɔ́ nanɔ ŋkeke amɛve. ⁴¹ Samalitɔ sugbɔ buwo gbe va xɔ Yesu ji se sɔ kudo enyɔ ci yí Yesu ŋtɔ nunuɔ nɔ wo ŋmɛ ŋmɛ ŋci. ⁴² Eyi wo nu nɔ nyɔnu lɔ bé : « Eviɛ ɔ, d'é gbe nyi enyɔ ci yí è va nú nɔ mì ŋci yi mì xɔ yesu ji se do go. Vɔ ci yí mìwoŋtɔwo se yí numɛgbe yí nyá be é yí nyi xexe lɔ Hwlɛngantɔ nyɔnɔnui, ŋci yí mi xɔɛ ji se do.» ⁴³ Ci yí Yesu wa ŋkeke amɛve le hɔn ɖegbɔ ɔ, é soyi Galile 'kan mɛ. ⁴⁴ Ɖo ɔ, Yesu ŋtɔ nu vayi be: «Axwe 'ŋɛdotɔ de nuini nɔ amɛ yí wo sɔɛni go. » ⁴⁵ Gankegan hxecinu yí é va ɖo Galile lɔ ɔ, ekan lɔ 'mɛtɔwo xɔɛ nyuiɖe. Ɖó ɔ, wowo cán yí Pakixwe lɔ ɖu gbe le Ʒeluzalɛmu vayi kpɔ́ enu ciwo pleŋ yí Yesu wa. ⁴⁶ Eviɛ ɔ, Yesu gbe trɔgbɔva Kana kɔxwimɛ le Galile fini ci yí é sɔ eshi trɔ vɛn le. Efiɔhadɔwatɔ gangan ɖeka le Kafanawɔmu kɔxwimɛ yí eviɛ ŋsuvi le edɔ̀. ⁴⁷ Ci yí efiɔhaɖɔwatɔ lɔ se be Yesu gbɔ so Ʒude 'kan mɛ yí va Galile 'kan mɛ ɔ, é vayi gbɔ yí ɖe kuku nii bé yi lé vá da edɔ nɔ yeviye ŋsuvi ci yi le baɖa xoɔ. ⁴⁸ Yesu nu nii be : «É nyi kpɔ́ bé nɔ́ mí de kpɔ́ jeshidu 'nuwo kodo enudanŋdowo go ɔ, mí d'a xɔ ŋ ji se go!» ⁴⁹ Efiɔhadɔwatɔ lɔ ɖoŋci nii be : « Axwetɔ va nya 'xwé mɛ gbɔxwe nɔ evinyɛ a kú» ⁵⁰ Yesu nu nii bé : « Trɔyi axwe, evio le agbe.» Ŋsu lɔ xɔ enyɔ ci yí Yesu nunii se yí trɔ yí ɖedo» ⁵¹ Axwe mɔ́ lɔ ji yí é le yí yigɔ yí yi 'dɔwaviwo vá do ego yi yí nu nii bé : « Evio fɔn yí le agbe.» ⁵² Efiɔhadɔwatɔ lɔ biɔ́ wo se be ega nɛni mɛ yí yeviye lɔ vá kpó yiɖeki mɛ mɛɛ. Wo ɖóŋci nii bé : «Esɔ nyidɔnmɛ vayi do gaɖeka mɛ nu yí vuvɔfu lɔ mi nii.» ⁵³ Evida lɔ vá mɔŋjemɛ be hwehɔnnu yí Yesu nunuɔ nɔ eye be : « Evio fɔn yí le agbe» do nɛ. Eyi yi kodo yi xomu pleŋ xɔ Yesu ji se. ⁵⁴ Ci yí Yesu gbɔ so Ʒude ́kan mɛ va Galile kan mɛ godu ɔ, ehɔ́n yí nyi enujiŋ amɛvetɔ ci yí é wa nɛ.