¹ Ŋsu ɖeka li, wo yɔɛni bé Nikodɛmu. Yuɖatɔwo 'gawo domɛtɔ ɖeka yí é nyi. É le Falisitɔwo 'gbɛbɔbɔ mɛ. ² É vá Yesu gbɔ ezanmɛ gbeɖeka yí nú nii be: «Cicagan, mì nyá be Mawu dɔ eo ɖaɖa nɔ́ ná va kplan enu mì. Ɖo amɛɖe d'a sɛ́n eŋ wawa jeshidu 'nú ciwo yí è wawa hɔnwo nɔ́ Mawu de le kodi go.» ³ Yesu ɖoŋci nii bé: «Le nyɔnɔnui mɛ ɔ, ŋ nunuɔ nɔ eo be nɔ́ amɛɖe de trɔ yiɖeki yí ji o ɔ, d'á kpɔ́ Mawu 'fiɔɖuɖu lɔ go. ⁴ Nikodɛmu xɔ nuxu yí biɔ́ Yesu se be: «Lehan yi amɛ ci yí shin vɔ a sɛ́n eŋ a gbe trɔ yiɖeki a ji do ɔ? Sɛn á sɛn eŋ trɔyi enɔlɔ dɔmɛ yí enɔlɔ a gbe jii zevegɔn a? ⁵ Yesu ɖoŋci nii bé : «Le nyɔnɔnui mɛ ɔ, ŋ nunuɔ nɔ eo be nɔ́ amɛɖe de trɔ́ yí ji yiɖeki sɔto eshi kodo Gbɔngbɔn kɔkɔɛ mɛ go ɔ, amɛ lɔ d'a sɛ́n eŋ yi Mawu 'fiɔɖuxu lɔ mɛ go. ⁶ Amɛ ci yí agbetɔwo ji nyi agbetɔ. Vɔ amɛ ci yí wo ji so Mawu Gbɔngbɔn mɛ yɛ nyi gbɔngbɔn. ⁷ Ŋgbé kpaca eo be ŋ nu nɔ́ eo be: "É le be mí ɖo a trɔ́ míwoɖeki a ji" go. ⁸ Jihɔn xonɔ ɖaɖa fini ci yí é dro. É senɔ lehanci yí é ɖyinɔ egbe do. Vɔ kpɔ́ dè nyá fini ci yi é sonɔ alo fini ci yí é yinɔ go. Nɛnɛ yí é nyinɔ nɔ́ amɛ ɖekpokpoi ci yí wo ji sɔto Mawu Gbɔngbɔn mɛ nɛ. ⁹ Eyi Nikodɛmu trɔxɔ nuxu yi biɔ́ Yesu se be : «Lehan yí enu a sɛ́n eŋ nyi nɛnɛ do ɔ? » ¹⁰ Yesu ɖoŋci mi bé : « Eɔ yí nyi enukplanmɛtɔ gangan ɖeka le Israyɛli jukɔn mɛ gankegan yí d'è nyá enyɔ hɔnwo a? » ¹¹ Le nyɔnɔnui mɛ ɔ, ŋ nunuɔ nɔ eo be; mì xoxoɔ nuxu so enu ci yí mì nyá nú yí gbe ɖeɖeɛ kunu so ci yí mì kpɔ́ nú nɔ́ mí. Vɔ yí mí de xɔ kunu ci yí mì ɖedeɛ nɔ mí lɔ go. ¹² Ci yí ŋ xoxoɔ nuxu so nyigban ji 'nuwo nú yi mí de xɔxɔ ŋ ji se go ɖee, lé yi mí a wɛɛ do a va xɔ ŋ ji se nɔ ŋ va tɔ́ nuxu xoxo nɔ mí so jiŋkushi 'nuwo nú ɔ? ¹³ Amɛɖekpokpoi de yi jiŋkushi kpɔ sɔ́ zeto Agbetɔvi lɔ ci yí ɖyi so jiŋkushi nu go. ¹⁴ Shigbe lehanci yí Mɔyizi kɔ egamu dan lɔ dó eji le zogbe lɔ mɛ do nɛnɛ ɔ, nɛnɛke yí wo a gbe va kɔ́ Agbetɔvi lɔ dó eji do nɛ ¹⁵ nɔ́ amɛɖekpokpoi ci yí a xɔɛ ji se a kpɔ́ agbemav̵ɔ. ¹⁶ Ɖo Mawu lɔn agbetɔwo le xexe lɔ mɛ sugbɔ kaka sɔ́ Eviɛ akogu lɔ sɔ ná nɔ́ amɛɖekpokpoi ci yí a xɔ Eviɛ akogu lɔ ji se ŋgbe trɔn go. Vɔ ɔ, amɛ lɔ a kpɔ́ agbemavɔ. ¹⁷ Mawu de ɖó Eviɛ ɖaɖa xexe lɔ mɛ nɔ́ á va ɖo kojo kodo xexe lɔ go. Vɔ ɔ, é ɖoi ɖada keŋ a hwlɛn xexe lɔ gan sɔto eyɛ jí. ¹⁸ Amɛ ci yí xɔ Evi lɔ jí se ɔ, Mawu d'a ɖo kojo kodi go. Vɔ amɛ ci yí de xɔɛ ji se o ɔ, Mawu ɖó kojo eyɛ vɔ. Ɖó d'é xɔ Mawu Eviɛ akogu lɔ ji se go. ¹⁹ Enu ci ji yí Mawu nɔ anyinɔnɔ do yí sosoɔ ekuhwɛ nɔ amɛ yí nyi bé: ci yí agbetɔwo kpɔ́ klɛnklɛn ci yí so Mawu gbɔ́ yí vá lɔ can ɔ, wo lɔn vivici 'nyɔ gbɔ sɔwu klɛnklɛn lɔ. Ɖó ɔ, wowo nuwana wo baɖa. ²⁰ Amɛɖekpokpoi ci yí wanɔ enubaɖawo de lɔnnɔ klɛnklɛn lɔ nyɔ gbɔ go. Ɖo é vɔnnɔ bé nɔ ye sɔ klɛnklɛn lɔ gbɔ́ ɔ, yi a vá kɔdo eye ji yí amɛwo a vá kpɔ́ enubaɖa ciwo yí ye wawa. ²¹ Vɔ ɔ, amɛ ci yí kplɔnɔ nyɔnɔnui dó le yi nuwanawo mɛ, tenɔ va klɛnklen lɔ gbɔ. Nɛnɛ ɔ, á sen eŋ zé be yi nuwanawo sɔsɔ egbe kodo Mawu 'dró́. » ²² Le enyɔ hɔnwo godu ɔ, Yesu kodo yi nukplanviwo vayi Ʒude kan mɛ. É wa azan hwɛɖeka le ehɔn kodo wo yí wawa ʒinʒindotɔmɛ Mawu tɔ nɔ amɛwo. ²³ Le Ayinɔnu le Salimu kɔxwi 'xa ji. Ɖo ɔ, eshi sugbɔ le ehɔn. Eyi amɛwo vava gbɔ yí é wawa ʒinʒindotɔmɛ Mawu tɔ nɔ wo. ²⁴ Hwehɔnnu ɔ, wo de lé Ʒan do ega hɔɖe go. ²⁵ Ʒan nukplanviwo kodo Yuɖatɔ ɖeka vá tɔ́ enyɔ dɔndɔn so eɖyiklɔklɔ kɔnuwo nú. ²⁶ Nukplanvi lɔwo vayi Ʒan gbɔ yí nu nii be : «Cicagan, è ɖo eŋui ŋsu ci yí nɔ eo gbɔ le ago eɖetɔ lɔ ji nɔ́ Ʒuluɖɛn tɔsasa lɔ a? Amɛ ci nu yí è ɖe kunu so nɔ mì, le ʒinʒindotɔmɛ Mawu tɔ waa nɔ amɛwo ɖaa viɛ yí amɛshamɛ vayigɔ gbɔ! » ²⁷ Ʒan ɖoŋci nɔ́ wo bé : « Enu ci yí Mawu ná amɛ ɔ, é yi amɛ xɔnɔ ²⁸ Míwoŋtɔwo a ɖe kunu nɔ ŋ be ŋ nu vayi be : " D'é enyɛ yí nyi Klisolɔ go. Vɔ ɔ, dɔ Mawu dɔ́ ŋ ɖaɖa nɔ́ ma vá dra emɔ do ɖɛ́ nii". ²⁹ Amɛ ci yí ɖe nyɔnu yí nyinɔ nyɔnuɖetɔ. Vɔ ɔ, nɔ́ nyɔnuɖetɔ lɔ 'xlɔ́ ci yí le axa ji nii seseɛ enyɔ ciwo nuɔ yí é le ɔ, eji jɔɛni sugbɔ. Jijɔ gangan hɔn han kpɔɔ yí ŋ le viɛ nɛ. ŋ kpɔ jijɔ lɔ bleblu. ³⁰ É le be Yesu a xɔxɔ eto yi enyɛ yɛ ma bɔbɔbɔ. ³¹ « Amɛ ci yí só jinŋkushi yí vá wú egan amɛshamɛ yí amɛ ci yí só nyigban ji nyigbanjitɔ yí xonɔ nuxu so nyigban jí 'nuwo nu. Vɔ amɛ ci yí só jiŋkushi yɛ le ŋkɔ nɔ amɛshamɛ. ³² É ɖenɔ kunu so enu ci yí é kpɔ kodo enu ci yí é se nu nɔ amɛwo. Vɔ kpɔ́ amɛɖekpokpoi de xɔnɔ yi kunuɖeɖe ji se go. ³³ Amɛ ci yi xɔ yi kunuɖeɖe ɖoɖo ekpe i ji nɛnɛhan bé Mawu nunɔ nyɔnɔnui. ³⁴ Amɛ ci yí Mawu dɔ ɖaɖa ɔ, Mawu 'nyɔwo yí é nunɔ. Ɖó Mawu ná yí Gbɔngbɔn lɔ yi sugbɔ haan. ³⁵ Eda lɔn Eviɛ lɔ yí ná acɛ yí do enuwo pleŋ ji. Amɛ ci yí xɔ Evi lɔ ji se kpɔ agbemavɔ. ³⁶ Amɛ ci yí gbé be ye d'a xɔɛ ji se go d'a kpɔ́ agbemavɔ lɔ go. Vɔ ɔ, Mawu dɔmɛzi a kpɔtɔ a le ji.»