¹ I nyisɔmɛ ɔ, wo jijiɛ a wa alɔlelekɔnu ɖeka le kana kɔxwimɛ le Galile 'kan mɛ. Yesu 'nɔlɔ vá alɔlelekɔnu lɔ tɔxu. ² Wo yɔ́ Yesu kodo yi nukplanviwo hɛnnɛ yí wo va alɔlelekɔnu lɔ tɔxu ³ E vá ɖó hweɖekanu ɔ vɛn ci yí wo mama lɔ vɔ. Eyí Yesu 'nɔlɔ vá nú nɔ́ Yesu be vɛn de le wo shí go. ⁴ Vɔ ɔ, Yesu ɖoŋci nii bé: «Mìwo 'nɔ, eo yí a dré enu ci yí ŋ ɖo a wa nɔ ŋ a? Nyaŋ 'ga de xo hɔɖe go.» ⁵ Eyí enɔlɔ vayi nu nɔ́ edɔwatɔ lɔwo bé: « Mí wa do enyɔ ci wo pleŋ yí á va nu nɔ́ mí ji.» ⁶ Eze gangan ci yí wo sɔ́ ekpe mɛ yí Yuɖatɔwo kunɔ eshi do mɛ yí sɔ́ wanɔ eɖyiklɔklɔ kɔnuwo amadrɛ le ehɔn lɔ. Eze lɔwo domɛtɔ ɖeka ɖeka xɔnɔ eshi lita ekave howi nɛnɛ. ⁷ Yesu nu bɔ́ enuɖuɖumatɔ lɔwo bé: «Mí ku eshi do eze hɔnwo mɛ nɔ́ wo a ɖɔ́» Eyí wo ku eshi do eze lɔwo mɛ kaka wo ɖɔ́ wéɖi wéɖi. ⁸ Gahɔnmɛ yiYesu va nú nɔ́ wo bé: « Eviɛ ɔ, mí ku le ezemɛ shi lɔ nú sɔ hɛnyi nɔ eɖɔwatɔ lɔwo 'ga.» Eyi wo kui yi nii. ⁹ Edɔwatɔwo 'gá lɔ ta eshi ci yí Yesu na yí é trɔ v€n lɔ kpɔ́. D'é nyá fini ci yí wo kpɔ vɛn cɛ lɔ só go. Vɔ ɔ, dɔwatɔn ciwo yí ku eshi lɔ nyá. É yí ná yí é yɔ nyɔnuɖetɔ lɔ. ¹⁰ Yí nú nii bé: «Amɛshamɛ manɔ vɛn adoduitɔ doŋkɔ. Eyí nɔ́ amɛ ciwo yí wo yɔ́ nu kaka é sun wo ɖegbɔ gbɔxwe yí wo vá ɖenɔ vɛn ci yí de nyɔ́ nyuiɖe go toi. Vɔ eɔ yɛ ɔ, eɔ gbe vɛn adoduitɔ lɔ ɖɛ́ kaka hwecɛnu ɖo!» ¹¹ Ehɔn yí nyí jeshidunu ŋkɔtɔ ci yí Yesu wa nɛ. E wɛɛ le kana kɔxwimɛ le galile 'kanmɛ. Sɔto enujiŋ lɔ wawa mɛ ɔ, Yesu ɖe yi kɔkɔ dansin yíyi nukplanviwo xɔɛ jí se ¹² Le i godu ɔ, Yesu kodo enɔlɔ kodo nɔviɛ ɓsuviwo kodo yi nukplanviwo zɔn vayi kafanawɔmu kɔxwemɛ yí nɔ ehɔn yí wa azan kankin. ¹³ Atadodoamɛxwe ci yí Yuɖatɔwo ɖunɔ gbɔgbɔ. Eyi Yesu fan eto yí yi Ʒeluzalɛmu. É kpɔ́ yí amɛwo le xwenyiwo, lɛngbɔwo kodo hwanliwi saa le Mawuxwe lɔ mɛ. ¹⁴ É gbe kpɔ ehoɖɔlitɔwo hɛnnɛ yí wo pleŋ nɔ anyinɔnɔ do wowo 'kplɔnwo nú. ¹⁵ Eyi Yesu sɔ ekawo lɔn esɔvobayɛyɛ yí nya wo kodo wowo lɛngbɔ xwenyi lɔwo pleŋ toi le Mawuxwe lɔ mɛ. É ɖɔ ehowo kɔ ăɖa nyigban nɔ́ ehoɖɔlitɔwo yí flí wowo kplɔnwo cɔ́n ¹⁶ yí nú nɔ́ hwanlisatɔwo bé: «Mí lɔ enu hɔnwo pleŋ so elɛ. Mí ŋgbe sɔ texwe cɛ ci yí nyí Edanyɛ 'xwe mɛ a sɔ́ wa ashimɛ go.» ¹⁷ Eyi yi nukplanviwo vá ɖó eŋuii be wo ŋwlɛ ɖɛ dó mawu 'nyɔ wemawo be: «Mawu, lehanci yí ŋ de lɔnnɔ enu le ekɔ nɔ ao 'xwe go do nyí enu yí bibiɛ le ŋ mɛ shigbe ezo nɛnɛ.» ¹⁸ Eyi Yuɖatɔwo 'gá vá biɔ́ Yesu se be: «Jeshi hin yí á ɖé dansin yí a sɔ́ dré nɔ́ mì bé è ɖo acɛ yí a wa enu nɛnɛ ɔ?» ¹⁹ Yesu ɖoŋci nɔ́ wó bé: «Miă gban Mawuxwe lɔ; na trɔ́ a cui le ŋkeke amɛtɔn mɛ.» ²⁰ Eyi Yuɖatɔwo lɔwo ɖe mɛ nɔ Yesu be: «Exwe eka hoadɛn yí wo sɔ́ ɖo ete yí cu Mawuxwe cɛ yí eɔ na va trɔ yí a cui le ŋkeke amɛtɔn mɛ a?» ²¹ Vɔ Mawuxwe ci nu yí Yesu yɛ xoxoɔ nuxu so yí nyí Yesu ŋtɔ ŋcilan. ²² Gacimɛ yí Mawu vá fɔ́n Yesu so ekuwodi ɔ, yí nukplanviwo vá ɖó eŋui be yí nu nɛnɛ sasa. Enu hɔn dɔ́ bé nukplanvi lɔwo xɔ enyɔ ci yí le Mawu 'nyɔ wemawo mɛ jise yí gbe xɔ enyɔ ciwo yí Yesu nu jí se. ²³ Le Atadodoamɛxwe lɔ hwenu ɔ, Yesu le Ʒeluzalɛmu. Ci yí amɛ sugbɔ kpɔ jeshidu'nú ciwo waa yí é le ɔ, wo xɔɛ ji se. ²⁴ Vɔ ɔ, Yesu ɖe eji do wo nú go. Ɖó é jeshi wo pleŋ nyuiɖe. ²⁵ D'é ʒian be amɛɖe a vá ɖe kunu so enu ci yí agbetɔ nyi nii go. Yiŋtɔ nyá enu ci yí le ejimɛ nɔ agbetɔ.