¹ Yesu nu bé : « Le nyɔnɔnui mɛ ɔ, ŋ nunuɔ nɔ mí be nɔ́ amɛɖe de to lɛngbɔwo kpu lɔ xɔmɔnu go yi é nyi ekpa tá yí é to yí ɖo mɛ ɔ, flanfinɔ alo flanfinɔ gangan yí é nyi. ² Vɔ ɔ, amɛ ci yí tó lɛngbɔwo 'kpú lɔ xɔmɔnu yí ɖó ekpu lɔ mɛ ɔ, lɛngbɔ lɔwo kplɔtɔ yi é nyi. » ³ Ezancɔtɔ hunnɔ ekpu lɔ nii. Lɛngbɔ lɔwo senɔ yi gbemɛ. É yɔnɔ yi lɛngbɔ lɔwo nyikɔwo ɖeka ɖeja yí kplɔnɔ wo toi. ⁴ Nɔ é kplɔ wo pleŋ toi ɖegbɔ ɔ, e jenɔ ŋkɔ nɔ wo yi lɛngbɔ lɔwo kplɔɛni do. Ɖo ɔ, wo jeshi yi gbemɛ ɖɛ. ⁵ Vɔ ɔ, lɛngbɔ lɔwo d'a kplɔ mɛdru ɖé dó go. Shi wo a shi le gbɔ kpanŋkpanŋ. Ɖó wo de jeshi yi gbemɛ ɖɛ go.» ⁶ Yesu do labalu hɔn yí sɔ xo nuxu nɔ wo. Vɔ amɛ lɔwo de mɔŋje enyɔ ci yi é nunuɔ nɔ wo lɔ mɛ go. ⁷ Yesu gbe nu ké bé : « Le nyɔnɔnui mɛ ɔ, ŋ nunuɔ nɔ mi be : enyɛ yí nyi lɛngbɔwo kpú lɔ xɔmɔnu. ⁸ Amɛ ciwo pley yí vá doŋkɔ nɔ ŋ nyi flanfinɔ wo alo flanfinɔ ganganwo. Vɔ ɔ, kpɔ́ lɛngbɔ lɔwo de se wowo gbe go. » ⁹ Enyɛ yí nyi xɔmɔnu lɔ. Nɔ́ amɛɖe tó ŋ ji yi ɖo ekpu lɔ mɛ ɔ, á kpɔ́ hwlɛgan. A yiyiɛ yí a gbɔgbɔ yi a kpɔkpɔ enu ci yí á ɖu. ¹⁰ Flanfinɔ vanɔ kpoŋ a vá fin efin, yi a wu lɛngbɔwo yi a yi a gble enuwo. Enyɛ yɛ ɔ, ŋ va nɔ́ agbetɔwo a kpɔ́ agbe yi nɔ́ agbe lɔ a sun wo shi blebu. ¹¹ Enyɛ yí nyi lɛngbɔkplɔtɔ nyuitɔ. Lɛngbɔkplɔtɔ nyuitɔ nɔnɔ egbesɔsɔ a sɔ yi gbe ke eku do eta nɔ yi lɛngbɔwo. ¹² Lɛblɛdɔwatɔ ci yí wo xɔ nɔ́ a kplɔ lɛngbɔwo yi wo a ná eho yi kpoŋ de nyi lɛngbɔ kplɔtɔ go. Lɛngbɔ lɔwo de nyi yitɔ go. Nɔ́ é kpɔ́ yí elanwadan ɖe gbɔgbɔ ɔ, é shinɔ gbe lɛngbɔ lɔwo dɛ́. Eyi elanwadan lɔ zonɔ je lɛngbɔ lɔwo mɛ yi wo kannɔ gbɛɛn. ¹³ Nɛnɛhan yí é nyinɔ nɛ. Ɖó ehodɔwatɔ yí é nyi yí nɔ á ci dó eɖe nɔ lɛngbɔ lɔwo ɔ, d ' é kiin go. ¹⁴ Enyɛ yí nyi lɛngbɔkplɔtɔ nyuitɔ. Ŋ jeshi nyaŋ lɛngbɔwo ɖɛ, yí lɛngbɔ lɔwo jeshi ŋ dɛ́ ¹⁵ shigbe lehanci yi Eda jeshi ŋ ɖɛ yi enyɛ can ŋ jeshi Eda ɖɛ dó nɛnɛ. Ŋ sɔ nyaŋ gbe ke eku dó nyaŋ lɛngbɔwo 'ta. ¹⁶ Lɛngbɔ buwo gbe le ŋ shi. Wowo de le ekpu hɔn lɔ mɛ go. Ŋ ɖo a kplɔ wo vá́ hɛnnɛ. Wo a ɖó eto nyaŋ 'gbe. Nɛnɛ ɔ, wo a nyi lɛngbɔwo le ekpu kuɖeka mɛ yí lɛngbɔkplɔtɔ kuɖeka a kplɔkplɔ wo. ¹⁷ Eda lɔn ŋ. Ɖó ŋ sɔ nyaŋ 'gbe ke eku nɔ le i godu mɛ ɔ, ma gbe va trɔ a xɔɛ. ¹⁸ Amɛɖekpokpoi de xɔxɔ agbe lɔ le ŋ shi go. Vɔ enyɛŋtɔ dró mɛ yi ŋ sɔ kekeɛ eku le. Ŋ ɖo acɛ yí a sɔ́ ke eku yi gbe ɖo acɛ yí a gbe trɔ a xɔɛ. Egbeɖeɖe ci yí ŋ xɔ so Edanyɛ gbɔ nɛ.» ¹⁹ Mama gbe ɖo Yuɖatɔ lɔwo mɛ do enyɔ hɔn ci yí Yesu nu ŋci. ²⁰ Eyi amɛ sugbɔ tɔ nunu le wo mɛ be : « Gbɔngbɔnvɔn ɖeka le mɛ! É je suku! Nyi yí ná taɖo yí mí ɖoɖoɔ eto yi ɔ? » ²¹ Amɛ buwo nunuɔ be « Amɛ ci mɛ yí gbɔngbɔnvɔn le d'a sɛ́n eŋ a xoxoɔ nuxu nɛnɛ go. Gbɔngbɔnvɔn ɖé a sɛ́n eŋ a ná yí ŋkuvitɔntɔntɔnnɔwo a tɔ́ enu kpɔkpɔ a? » ²² Balowi hwenu yɔ. Hwehɔnnu ɔ, Yuɖatɔwo le azan ci ji yí wo ɖe Mawuxwe lɔ tii dó 'xwe ɖuɔ le Ʒeluzalɛmu. ²³ Yesu ɖyiɖyiɛ esa to fini ci yí wo yɔnɔ bé Salomɔ gbadenu le Mawuxwe lɔ mɛ. ²⁴ Eyi Yuɖatɔwo vá bɔdo gbɔ́ yi nu nii bé: «Vasɛndo gahinmɛ yi á gbé mì dó manyasaka mɛ ɔ? Nɔ́ eo yí nyi Klisolɔ ɔ, ná nui nɔ́ mì agbaŋgba» ²⁵ Yesu ɖoŋci nɔ́ wo bé : « ŋ nui nɔ́ mí vayi vɔ. Vɔ ɔ, mí de xɔ ŋ ji se go. Edɔ ciwo yi ŋ wawa le Edanyɛ nyikɔ mɛ ɖeɖeɛ kunu nɔ ŋ. ²⁶ Vɔ ɔ, míwo de xɔɛ ji se go. Ɖó mí de le nyaŋ lɛngbɔwo mɛ go. ²⁷ Nyaŋ lɛngbɔwo ɖonɔ eto nyaŋ gbemɛ. Ŋ jeshi wo yí wo kplɔnɔ ŋ do. ²⁸ Ŋ nanɔ agbemavɔ wo. Wo d'a bú gbeɖe go yí amɛɖekɛ d'a sɛ́n eŋ guiwo le alɔmɛ nɔ ŋ go. ²⁹ Edanyɛ ci yí sɔ́ wo dó alɔmɛ nɔ ŋ wu egan enushanu. Amɛɖekpokpoi d'a sɛn eŋ gui enude le alɔmɛ nɔ Edanyɛ go. ³⁰ Enyɛ kodo Edanyɛ ɔ, ɖeka yí mì le. » ³¹ Yuɖatɔwo gbe fɔ ekpewo le nyigban ké yi a sɔ́ xo Yesu nɔ á ku. ³² Hwehɔnnu yí Yesu va nú nɔ́ wo le nɛ be: «Edanyɛ dɔ edɔnyuiwo ŋ yi ŋ va wa le míwo ŋmɛ. Hinyi le edɔ lɔwo mɛ yí é nyi yí taɖo yí mí jijiɛ a xo ekpe ŋ do nɔ ma ku ɔ? » ³³ Yuɖatɔ lɔwo ɖoŋci nii bé: « D'é nyi edɔ nyui ɖé ci yi è wa ŋci yi mi jijiɛ a xo ekpe eo do nɔ́ na ku go. Vɔ ɔ, mi jijiɛ a xo ekpe eo ɖó, é zuzuɔ Mawu. Ɖó agbetɔ gbali yí è nyi keŋ yí vá sɔ́ eoɖeki wawa Mawu! » ³⁴ Yesu ɖoŋci nɔ́ wo bé: Mawu nú yí wo ŋwlii ɖɛ dó Mawu 'se wemmawo mɛ bé: " Mawu hwɛhwɛwo yi mí nyi" ³⁵ Mí nya be wo d'a sɛn eŋ a cúcú eɖe le enyɔ ci yí le Mawu 'nyɔ wemawo mɛ go. Keŋ ɔ, Mawu trɔ yɔ́ amɛ ciwo yí é xoxoɔ nuxu nɔ bé Mawu hwɛhwɛwo. ³⁶ Enyɛ yɛ ɔ, Ada can ŋ yí dɔ́ ŋ ɖaɖa xexe lɔ mɛ. Lé yí mí a wɛɛ a nunuɔ be zu enyɛ ŋ zuzuɔ Mawu nɔ́ ci yí ŋ nunuɔ be ŋ nyi Mawu Eviɛ ɔ ? ³⁷ Nɔ́ ŋ de wawa edɔ ciwo Eɖanyɛ dɔ ŋ go ɔ, mí ŋgbe xɔ ŋ ji se go. ³⁸ Vɔ nɔ́ ŋ wawa wo ɔ, mi d'a xɔ ŋ ji se go. Nɔ mi d'a gbe xɔ ŋ ji se can go ɔ, mi xɔ edɔ ciwo yí ŋ wawa lɔwo ji se. Nɛnɛhan ɔ, mí a va mɔŋje mɛ koŋ bé Mawu Eda le ŋ mɛ yí ŋ le Eda mɛ.» ³⁹ Ci yí Yesu nu nɛnɛ nɔ wo ɔ, wo gbe ji ké be yewo a lii. Vɔ ɔ, é tó le wo mɛ. ⁴⁰ Yesu gbe trɔyi ago eɖetɔ lɔ ji nɔ́ Ʒuludɛn 'tɔsasa lɔ, le fini ci yi Ʒan le Mawushi nɔ amɛwo le vayi yí ci ehɔn. ⁴¹ Amɛ sugbɔ lɔ ahwa yí vá gbɔ. Amɛ lɔwo nunuɔ be : «Ʒan de wa enujiŋ ɖe go. Vɔ ɔ, enyɔ ciwo pleŋ yí é nu so ŋsu hɔn nú nyi nyɔnɔnui.» ⁴² Eyi amɛ sugbɔ xɔ Yesu ji se le ehɔn.