¹ Ŋsu ɖeka ci yí wo yɔnɔ be Laza ledɔ. É nɔnɔ Betanu, kɔxwi ci mɛ yí mali kodo nɔviɛ Mata nɔnɔ. ² Mali yí nyí nyɔnu ɖeka ci yí sɔ amihwɛnte kɔdo afɔwo ji nɔ Axwetɔ yi sɔ i ɖawo cucui: mali lɔ nɔviɛ yi nyi Laza ci yí ledɔ. ³ Laza fofoɔ nyɔnu amɛve lɔwo dɔ amɛ ɖaɖa Yesu gbɔ yi amɛ lɔ va nu nii be: «Axwetɔ, ao 'xlɔ Laza ledɔ.» ⁴ Ci yí Yesu se nɛnɛ han ɔ, e nu bé «Laza d'a ku do edɔ cɛ mɛ go. vɔ ɔ, edɔ lɔ va, nɔ Mawu a to mɛ a dansin yi ŋsɛ́n yi aɖe Eviɛ lɔ klenklɛn gangan dansin.» ⁵ Yesu lɔnnɔ Mata kodo Mali kodo wowo nɔvi laza 'nyɔ gbɔ. ⁶ Keŋ hwecinu yi wo va eŋɛ nii be Laza ledɔ ɔ, e gbe ci fini ci yí e le lɔ yí wa nyisɔ. ⁷ Le i godu ɔ, e nu nɔ yí nukplanviwo be: «Mì a nɔ mì atrɔyi Ʒude 'kan mɛ.» ⁸ Yi nukplanvi lɔwo nu nii be: «Cicagan, yuɖatɔwo ji sabaaɖe yɛ be yewo a xo ekpe eo nɔ na ku. gankegan yí é gbe jiji be ye a gbe trɔyi ehɔn a?» ⁹ Yesu nu nɔ wo be: «D'é egaxoxo wive yi le kedemɛ ba? nɔ amɛɖe zɔnzɔn emɔ kedemɛ ɔ, d'a klɛn afɔ go. Ɖo xexemɛ klɛnklɛn kpɔnɔ enu nii petii. ¹⁰ Vɔ ɔ amɛɖe zɔnzɔn emɔ ezanmɛ ɔ, á klɛn afɔ. Ɖo klɛnklɛn de le ezanmɛ go.» ¹¹ Ci yí Yesu nu enyɔ hɔnwo ɖegbɔ ɔ, é sɔ kpii be: «Mìwo 'xlɔ Laza dɔnalɔn vɔ ɔ, na yi fɔin.» ¹² Nukplanvi lɔwo nu nii be: «Axwetɔ nɔ é nyi kpɔ be alɔn dɔn ɔ yí é le ɔ, a nyi edɔ lɔ a mí nii.» ¹³ Le mɛ ɔ, nu Yesu nunu be Laza ku. Vɔ nukplanvi lɔwo bubuɔ be alɔndɔndɔn kpoŋ 'yɔ nuɔ yí yi lé. ¹⁴ Eyi Yesu va ɖe mɛ nɔ wo be : «Laza ku. ¹⁵ Ɖó míwo ŋci ɔ, é jɔ eji nɔ ŋ be de le ehɔntexo. nɛnɛ ɔ, mí a sɛn eŋ a xɔ ŋ ji se. Mì na nɔ mì a yi Laza gbɔ.» ¹⁶ Gahɔnmɛ ɔ Toma ci yí wo gbe yɔ nɔ be togbo nú nɔ́ nukplanvi kpɛtɛwo be: «Mì na nɔ mì a yi Mìwo can mì a yi ku kodo Yesu!» ¹⁷ Hwecinu yí Yesu va ɖo Betani kɔxwi lɔ mɛ ɔ, é kpɔ be wo ɖyi Laza so ŋkeke amɛnɛ ɖii. ¹⁸ Keŋ ɔ, Beta,i kɔxwi lɔ sɔ Ʒeluzalɛmu jugan gbɔ. ¹⁹ Eyi yuɖatɔ sugbɔ so Ʒeluzalɛmu yí va mata kodo Mali gbɔ yí va fafa akɔn nɔ wo do wowo nɔvi ci yí ku ŋci. ²⁰ Ci yí mata se be Yesu gbɔgbɔgɔ ɔ, e vayi do ego yí. Vɔ ɔ, mali yɛ nɔ anyinɔnɔ do axwe mɛ. ²¹ Ci yí Mata kpɔ Yesu ɔ, é nu nii be: «Axwetɔ, nɔ e nyi kpɔ be le é le elɛ sa ɔ, nɔvinyɛ ŋsu a ku ba! ²² Gankegan ecɛyɛ can ɔ, ŋ nya be enuɖekpokpoi ci yí a biɔ Mawu ɔ, a sɔɛ na eo.» ²³ Yesu nu nii be : «Nɔvio a fɔn so ekuwodi.» ²⁴ Mata ɖoŋci nii be: «ŋnya be yi a va fɔn gbecigbe yí amɛkukuwo pleŋ a va fɔn so ekuwodi le ŋkeke kpɛtɛkpɛtɛ lɔ ji.» ²⁵ Yesu nu nii be: «Enyɛ yí nyi fɔnfɔnsokuwodi kodo agbe. Nɔ amɛɖe xɔ ŋ ji se ɔ, a kpɔtɔ a le agbe nɔ e ku can. ²⁶ Yi amɛ ci yí le agbe yi xɔ ŋ ji se d'a kugbeɖe go. E xɔɛ ji se a?7 ²⁷ Mata ɖoŋci nii be: «Ɛɛ, Axwetɔ, ŋ xɔɛ se be eo yí nyí Kliso lɔ, Mawu Eviɛ, amɛ ci yí ɖo a va xexe lɔ mɛ .» ²⁸ Ci yí mata ɖo enyɔ ŋci nɔ Yesu nɛnɛ han ɖegbɔ ɔ, e vayi yɔ nɔviɛ nyɔnu, Mali yi eɖ ekpa nii be : «Cicagan va yi yɔyɔ eo.» ²⁹ Kaka Mali a se nɛnɛ vɔ, e shi ete bleŋ yi kpé Yesu gbɔ. ³⁰ Gahɔnmɛ ɔ, Yesu de ɖo kɔxwi lɔ mɛ hɔɖe go. E kpɔtɔ le fini ci yi Mata va do ego yi do. ³¹ Ci yí yuɖatɔ ciwo yi va akɔn fagbe nɔ Mali le axwe lɔ mɛ kpɔ yi e shi ete yí ɖe eblɛ yi to ɔ, wo kplɔɛ do. Wo bubuɔ be yɔdu lɔgbɔ yí yi yigɔ avan avi. ³² Hwecinu yi Mali va ɖo finici yí Yesu lelɔ yi kpɔɛ ɔ, e je ekloji dó akɔnmɛ nii gbloo yí nu nii be: «Axwetɔ nɔ e nyi kpɔ be le è le lɛ sa ɔ, nɔvinyɛ ŋsu a ke ba!» ³³ Yesu kpɔ yi e le avi fan yi yuɖatɔ ciwo kplɔɛ do can fanfan avi. Eyi é wa ɖeka do lanmɛ nii yí e caka. ³⁴ Yi biɔ wo se be: «Fini yi mí ɖyi do ɔ?» Wo ɖoŋci nii be: «Axwetɔ, va kpɔ fini ci yí mí ɖyi do.» ³⁵ Eyí Yesu fan avi. ³⁶ Ci yí yuɖatɔ lɔwo kpɔɛ ɔ, wo nu be: « Mikpɔ lehanci yí é lɔn Laza sugbɔ do ɖắ!» ³⁷ Vɔ ɔ, wowo domɛtɔ nu be: «Eyɛ ci yi hun ŋkuvi nɔ ŋkuvitɔntɔntɔnɔ lɔ ɖee, d'a sɛn eŋ xe emɔ be Laza ŋgbe ku sa dru hɛnnɛ do ba?» ³⁸ Enu lɔ gbe wa ɖeka do lanmɛ nɔ Yesu doji ke yi e vayi yɔdu lɔ gbɔ. Ekpegbaja ɖeka 'tuimɛ yɔ yi wo sɔ ekpe gangan ɖeka cu enu nii. ³⁹ Yesu nu be : «Mi ɖe ekpe gangan lɔ so enu nii. » Mata ci yí nyi amɛtrɔdo lɔ dadalɔ nu nɔ Yesu be: Axwetɔ é ɖo a tɔ hwɛnhwɛn vɔ. Ɖo so ŋkeke amɛnɛ ge ɖii yi wo ɖyii.» ⁴⁰ Yesu ɖoŋci nii be: «ŋ dé nunɔ eo vayi be nɔ e xɔ ŋ ji se ɔ, a kpɔ Mawu ŋsɛn gangan lɔ ba?» ⁴¹ Eyi wo de ekpe lɔ so enu nɔ yɔdu lɔ. Yesu fɔn ete yi eji nu be: «Eda ŋ do akpe nɔ eo be é o eto ŋ. ⁴² ŋ nya be e ɖonɔ eto ŋ tɛgbɛɛ. Vɔ ɔ, ŋ le enyɔ cɛwo nuɔ do amɛ cɛwo ciwo yi lɔ ahwa va bɔdo ŋ gbɔ ŋci nɔ wo a xɔɛ ji se be eo yi dɔ ŋ dădă.» ⁴³ Ci yi Yesu nu nɛnɛ ɖegbɔ ɔ, édo axwa cicici be: «Laza, to so ehɔntex!» ⁴⁴ Eyi amɛ kuku lɔ to so yɔdu lɔ mɛ nyao yi gbankpan eɣici yi wo sɔ trodo alɔwo kodo afɔwo kodo klalɛ ci yi wo sɔ bla ŋmɛ nii gbe kpɔtɔ tenu. Hwehɔnnu ɔ Yesu va nu nɔ wo be: «mí cu enu lɔwo le nu yi a tashi nɔ a yi» ⁴⁵ Yuɖatɔ sugbɔ le amɛ ciwo yí va mali gbɔ mɛ yi ci yi wo kpɔ enu ci yi Yesu wa lɔ, wo sɔɛ ji se. ⁴⁶ Vɔ ɔ, amɛɖekawo le wo mɛ yí vayi kpɔ Falisitwo yi to ci yí yesu wa lɔ nɔ wo. ⁴⁷ Eyi avɔsatɔwo 'gawo kodo Falisitɔwo bɔ Yuɖatɔwo sɛnsɛn 'hwɛxɔnunɔtɔwo yi nu nɔ wo be: «Le yi mí a wɛɛ do ɔ? Ɖo ɖajɛ cɛ lɔ wawa jeshidú nu sugbɔ! ⁴⁸ Nɔ mì bɔ enu do mɛ nii yi é wawa enu nɛnɛ yi yigɔ ɔ, amɛshamɛ a va xɔɛ ji se. Le i godu mɛ ɔ, Hlɔmutɔwo a va yi a gban mìwo Mawuxwe lɔ kodo mìwo 'jukɔn!» ⁴⁹ Ŋsu ɖeka le yuɖatɔwo 'ga lɔwo domɛ. Wo yɔɛni be kayifu. Eyi nyi avɔsatɔ gangantɔ lɔ exwehɔnxwe. Enu nɔ wo be: «Mí de se enuɖekpokpoi gɔnmɛ go! ⁵⁰ Susu de kpɔɛ nɔ mì be! nɔ amɛ kuɖeka ku do jukɔn lɔ pleŋ a vɔ?» ⁵¹ D'é nyi kayifu ŋtɔ 'dro yi xo nuxu hɔnwo go. Vɔ ɔ, ci e nyi avɔsatɔ gangantɔ yi é nyí exwehɔnxwe ɔ , Mawu do eŋɛ to ji be Yesu ɖo a ku do yuatɔwo jukɔn lɔ 'ta. ⁵² D'é nyi do jukɔn hɔn lɔ ɖekɛ 'ta yɔ go. Vɔ a dɔn Mawu 'vi, ciwo pleŋ yi kankan do egbe bɔdo lankpu kuɖeka mɛ hɛnnɛ to eku ci yi a ku mɛ. ⁵³ Eyi so gbehɔngbe jiɔ, yuɖatɔwo 'gawo sɔ gbeta be yewo a wu Yesu. ⁵⁴ É yi na taɖo yi yesu de gbe totoɔ agbaŋgba ciwo yi yuɖatɔwo bɔdo go. Eyi Efla yimu jugan mɛ le ekan ɖeka ci yi do lixo kodo zogbeji lɔ mɛ yi ci hɔn kodo yi nykplanviwo. ⁵⁵ Yuɖatɔwo 'xwe ci yi nyi Atadodoamɛ xwe gogo. Eyi amɛ sugbɔ so afi vovovo yi vayi gɔ Ʒeluzalɛmu keŋ yia wa eɖyiklɔklɔ 'kɔnu gbɔxwe nɔ exwe lɔ a va ɖo. ⁵⁶ Wo jijiɛ Yesu kpɔ yi hwecinu wo va le Mawuxwe mɛ ɔ, wo va biɔbiɔ wowonɔnɔwo se be: «Le yí kpɔɛ do ɔ? D'é jijiɛ a va exwe lɔ ɖugbe ba?» ⁵⁷ Eyi avɔsatɔ gangantɔ lɔwo kodo falisitɔ lɔwo ɖe egbe nɔ amɛwo be nɔ amɛɖe nya finici yi Yesu le ɔ yi le va nui nɔ yewo nɔ yewo a yi lii.