¹ Ci yí Atadodoamɛxwe lɔ kpɔkpɔtɔ ŋkeke amadɛn ɔ, Yesu vayi Betani kɔxwimɛ, fini ci yí Laza ci yí é fɔn so ekuwodi vayí nɔnɔ. ² Wo ɖa enu nɔ Yesu le ehɔn. Mata sɔ enuɖuɖu nɔ wo. Laza le amɛ ciwo yí ɖuɖuɔ enu kodo Yesu mɛ. ³ Eyí Mali sɔ amihwɛnte ehovevitɔ lita mamamɛ ɖeka sɔ kɔdo afɔwo ji nɔ́ Yesu. Le i godu ɔ, é sɔ yí 'ɖawo sɔ cucu afɔwo nii yí amihwɛnte lɔ hwɛnhwɛn gbando exɔ lɔ mɛ. ⁴ Yesu nukplanvi domɛtɔ ɖeka yuɖa Ishikaliwɔti ci yí a vá sa Yesu nu be: ⁵ «Nyi dɔ taɖo wo de sa amihwɛnte ɔ do gajɔnho sanŋditɔ (300) keŋ a sɔ eho lɔ ma nɔ wamɛnɔwo go ɔ?» ⁶ D'è nyi be Yuɖa ɖoɖoɔ eŋui wamɛnɔwo taɖo yí è nunuɔ nɛnɛ go. vɔ ɔ, yí é nyí flanfinɔ yí é nyi taɖo yí é nunuɔ nɛnɛ . É yí hɛnnɔ ehogba yí nɔ wo sɔ eho ɖe ɖo gbɔ́ ɔ, é finɔ le nu. ⁷ Vɔ ɔ, Yesu nu dó nú nii be: «Tashi nyɔnu lɔ! É doŋkɔ yí shi amihwɛnte nɔ́ ŋ sɔ daɖɛ nɔ́ nyaŋ ɖyiɖyigbe. ⁸ Wamɛnɔwo a kpɔtɔ a le mí gbɔ tɛgbɛɛ. Vɔ enyɛ yɛ ɔ, ŋ d'a le mí gbɔ tɛgbɛɛ go.» ⁹ Yuɖatɔwo sugbɔ se be Yesu le Betani kɔxwimɛ. Eyi wo vayi ehɔn. D'é nyi be Yesu ɖɛkɛ ŋci wo vá ehɔn dó go. Vɔ ɔ, wo va a gbe va sɔ kpɔ Laza ci yí Yesu fɔn so ekuwodi lɔ. ¹⁰ Gahɔnmɛ ɔ, avɔsatɔwo 'gawo vá sɔ́ egbeta be yewo a wu Laza hɛnnɛ. ¹¹ Ɖo ɔ, yuɖatɔ sugbɔ sosoɔ gbe wo ɖɛ dó Laza ŋci yí vá xɔxɔ Yesu ji se. ¹² Le i ŋkegbu ɔ, amɛ ciwo yí lɔ ahwa va Ʒeluzalɛmu nɔ Atadodoamɛxwe lɔ ɖuɖu se be Yesu gbɔgbɔ jugan lɔ mɛ. ¹³ Eyi wo ji bayawo yí to so jugan lɔ mɛ a va yí do ego yi yí dodoɔ axwa be: «Kanfukanfu nɔ́ Mawu! Shicu nɔ amɛ cìi yí gbɔgbɔ le Mawu nyikɔ mɛ. Shicu nɔ́ Israyɛli 'fiɔ lɔ.»godu ¹⁴ Yesu kpɔ esɔ kɛtɛ hwɛvi ɖeka yí la ji shigbe lehanci yí wo ŋwliin do Mawu 'nyɔ wema mɛ daɖɛ dó nɛnɛ be: ¹⁵ «Siyɔn jugan, ŋgbè vɔn go! kpɔ̀ ɖá, ao 'fiɔ gbɔgbɔ, é nɔ anyinɔnɔ do esɔkɛtɛ ashitɔ hwɛvi ɖeka jí.» ¹⁶ Doŋkɔ ɔ, Yesu nukplanviwo de se enu ci yí jɔjɔ gɔnmɛ go. Vɔ gacimɛ yí Mawu và ɖe Yesu klɛnklɛn gangan lɔ dansin ɔ, wo vá ɖo eŋui Mawu 'nyɔ wemawo doŋkɔ yí nú enyɔ hɔwo so nú yí enyɔ lɔwo jí yí ahwakɔn lɔ wa do. ¹⁷ Amɛ ciwo pleŋ yí bɔdo Yesu gbɔ gbecigbe yí é yɔ Laza le yɔdu mɛ yí fɔin so ekuwodi ɖeɖeɛ kunu nii nɔ amɛwo. ¹⁸ Enu ci yí dɔ taɖo yí amɛwo lɔ́ ahwa va dó ego Yesu nɛ. Ɖo wo se be yí wa enujiŋ hɔn. ¹⁹ Eyi Falisitɔwo va tɔ nunu le wowonɔnɔwo mɛ: «Mí de kpɔ́ be mí d'a sɛn eŋ wa enuɖe go ba? Amɛshamɛ nɛ kplɔɛ do nɛ!» ²⁰ Glɛkitɔ ɖekawo can le amɛ ciwo yi va Ʒeluzalɛmu a vá sɛn Mawu le exwe lɔ ji mɛ. ²¹ Wo tegogo Filipu ci yí so Bɛtisayido jugan mɛ le Galile 'kan mɛ yí nu nii be: «Mɛgan, mì jijiɛ a kpɔ́ Yesu.» ²² Filipu vayi nui nɔ Anŋdre yí wo amɛve lɔ zɔn va sɔ́ yí nu nɔ Yesu. ²³ Yesu ɖoŋci nɔ́ wo be: «Ega lɔ xo hɔnnɔ be Mawu a dansin Agbetɔvi klɛnklɛn gangan. ²⁴ Le nyɔnɔnui mɛ ɔ, ŋ nunuɔ nɔ mí be eliku ekui kuɖeka a gbe kpɔtɔ a nyinyiɛ ekui kuɖeka nɔ́ de je ekɔ mɛ yí nyinyɔ go. Vɔ nɔ e nyinyɔ ɔ, á vá sɛ́n eku sugbɔ. ²⁵ Amɛ ci yí lɔnnɔ yí 'gbe ɖoɖuɖoɖu a vá bui. Vɔ amɛ ci yí de lenɔ ebe nɔ yí 'gbe ɖoɖu le xexe cɛ mɛ go liliɛ do ete ɖɛ nɔ agbemavɔ. ²⁶ Nɔ́ amɛɖe ji be ye a nyi nyaŋ 'dɔwavi ɔ, é ɖo a kplɔ ŋ do. Nɛnɛ nɔ ŋ le afiɖɛ ɔ, nyaŋ 'dɔwavi lɔ a le ehɔn hɛnnɛ. Edanyɛ yí a vá dó bubu edɔwavi lɔ nú.» ²⁷ Yesu nu be : «Ecɛviɛ ɔ, nyaŋ susu caka. Enyɔ hin yí na nú viɛ ɔ? Nu na tɔ nunu be: Edanyɛ, xɔ nɔ ŋ le veve sese 'gaxoxo cɛ mɛ a? Oo enu ci yí taɖo tèŋ yi ŋ va xexe lɔ mɛ do nɛ. ²⁸ Edanyɛ dansin ao klɛnklɛn gangan nɔ́ agbetɔwo a kpɔ a kanfu ao nyikɔ.» Eyi egbe ɖeka ɖyi so jiŋkushi mɛ be: «ŋ dansin vɔ. yí na gbe trɔ a dansin ke.» ²⁹ Amɛ ciwo yí lɔ ahwa yi bɔdo ehɔn yí se egbe lɔ ɖyiɖyi nu be: «Ejiɖezo yí dó egbe!» Amɛ buwo nu be: «Mawu dɔla ɖe yí xo nuxu nii!» ³⁰ Vɔ ɔ, Yesu xɔ nuxu yí nu be: «Enyɛ ŋci yí egbe lɔ ɖyi do go. Míwo ŋci yí é ɖyi do. ³¹ Ega lɔ xo ɖɛɛviɛ be Mawu a ɖo kojo nɔ xexe lɔ mɛtɔwo yí ɖɛɛviɛ ɔ, ega lɔ xo be Mawu a nya nyigan ji 'cɛkpatɔ lɔ soí. ³² Eyi gacimɛ yi Mawu a vá kɔ́ ŋ so nyigban a sɔyi ɔ, na dɔn agbetɔwo pleŋ va enyɛ ɖeki gbɔ́» ³³ Sɔ́ to enyɔ hɔnwo mɛ ɔ, Yesu dredreɛ eku alɔkpa ci yí á ku mɛ. ³⁴ Ahwa ci yí bɔdo ehɔn lɔ nu nɔ Yesu be: «Mì se yí Mawu 'nyɔ wemawo nú be Klisolɔ anɔ agbe tɛgbɛɛ. Lé yí á wɛɛ a va nunuɔ be wo a kɔ Agbetɔvi lɔ do eji ɔ? Mí yi nyi Agbetɔvi cɛ lɔ ɔ?» ³⁵ Yesu nu nɔ wo be: « Klenklɛn lɔ gbe kpɔtɔ le mí gbɔ sɔna egaxoxo kleŋ ɖé. Mí zɔn zɔnlin gacimɛ yí klɛnklɛn lɔ gbe kpɔtɔ kpɔkpɔ enu nɔ mí nɔ vinvin ŋgbe va do do mí kpata go. Ɖo amɛ ci yí zɔnzɔn zɔnlin le vinvin mɛ de jenɔshi fini ci yí é yigɔ go. ³⁶ Kaka a va sɔsɛndo gacimɛ yi klɛnklɛn a kpɔtɔ a le mí gbɔ ɔ, mí xɔɛ ji se. Nɛnɛ ɔ, mí a vá trɔ klɛnklɛn eviɛ wo.» Ci yí Yesu nu enyɔ hɔnwo ɖegbɔ ɔ, é so yí vayi be do ahwakɔn lɔwo le afi jiji ɖeka. ³⁷ Ci yí Yesu wa jeshido 'nú sugbɔ le ŋmɛ nɔ wo cán ɔ, wo de xɔɛ ji se go. ³⁸ Nɛnɛhan yí enyɔ ɖeka ci yí Mawu 'ŋɛdotɔ Ezayi nu ɖaɖɛ vá mɛ do nɛ. É nu be: «Mawu, mi yi xɔ eŋɛ ci yí mì do yí Mawu dansin ŋsɛn nɔ ɔ? ³⁹ Mawu 'ŋɛdotɔ gbe nu enu ci ŋci yí amɛ hɔn lɔwo de sɛn eŋ xɔɛ ji se go hɛnnɛ be: ⁴⁰ «Mawo na be wowo ŋkuviwo de kpɔkpɔ enu go, è na yí wowo susu cú nɔ wowo ŋkuviwo ŋgbe kpɔ enu go, yí nɔ wowo susu ŋgbe mɔŋje enu mɛ go. É yí ná taɖo yí Mawu nunuɔ be wo de trɔ ɖaɖa eyɛ gbɔ nɔ ye a da edɔ nɔ wo go.» ⁴¹ Ezayi nu nɛnɛ han ɖó é kpɔ́ Yesu klɛnklɛn gangan lɔ yí xo nuxu do nú. ⁴² Gankegan le yuɖatɔwo 'gawo ŋtɔwo mɛ can ɔ, amɛ sugbɔ xɔ Yesu ji se. Vɔ dó Falisitɔwo 'ta ɔ, wo de ɖe mɛ agbaŋgba go. Ɖo wo vɔnvɔn be falisitɔwo a va nya yewo tii le Mawusɛnxu ⁴³ lɔ.Wo lɔn agbetɔwo le kanfu yewo sɔwu yí Mawu a kanfu wo. ⁴⁴ Yesu do axwa yi nu be: «Nɔ́ amɛɖe xɔ ŋ ji se ɔ, d'é nyi enyɛ ji yí é xɔse go. Vɔ ɔ, amɛ ci yí dɔ ŋ ɖaaɖ ji yí é xɔse. ⁴⁵ Amɛ ci yí kpɔ ŋ, kpɔ amɛ ci yí dɔ ŋ ɖaaɖ. ⁴⁶ Enyɛ ci yí nyi klɛnklɛn lɔ ɔ, ŋ va xexe lɔ mɛ nɔ́ amɛɖekpokpoi ci yí a xɔ ŋ ji se ŋgbe ci vinvin mɛ go. ⁴⁷ Nɔ́ amɛɖe seseɛ nyaŋ 'nyɔwo yí de sɔ wawa edɔ go ɔ, de nyi kpɔ be e nyɛ yí ɖoɖoɔ kojo kodoi. Ɖó ŋ de va kojo ɖogbe nɔ xexe lɔ go. Vɔ ɔ, va ŋ va yí a va xɔ nii yɔ́. ⁴⁸ Amɛ ci yí gbe ŋ yí de lɔn yí xɔxɔ nyaŋ 'nyɔwo go ɔ, é kpɔ enu ci yí a vá ɖo kojo kodii le ŋkeke vɔvɔ kpɛtɛkpɛtɛ lɔ ji. ⁴⁹ Ɖo le nyɔnɔnui mɛ ɔ, ŋ de xo nuxu le enyɛɖekishinu go. Vɔ ɔ, Ada ci yí dɔ ŋ ɖaɖa yí ɖe egbe nɔ ŋ so enyɔ ciwo pleŋ yi ɖo a nu kodo ciwo yí ŋ ɖo a kplan amɛwo doashi nɔ ŋ. ⁵⁰ Eyi ŋ nya be: enu ci yí é dɔ be wo le wa nanɔ agbewvɔ amɛ. Nɛnɛ ɔ, enyɔ ciwo yi ŋ nunuɔ ɔ, ŋ nunuɔ wo shigbe lehanci yi Adz dɔ ŋ do nɛnɛ.»