¹ É kpɔtɔ esɔ yí wo a ɖu atadodoamɛxwe lɔ. Yesu nya be ega xo nɔ eye be ye a só le xexe cɛ mɛ a yí yedaye gbɔ. É lɔn yi 'mɛ ciwo yí le xexe lɔ mɛ yí kpɔtɔ yí lɔnlɔn wo kaka sɔyi vɔvɔnu. ² Yesu kodo yi nukplanviwo ɖuɖuɔ fiɛshi 'nú. Kaka hɔnwocu ɔ, Legba sɔ́ do susu mɛ nɔ Yuɖa, Simɔ Ishikaliwɔti eviɛ be yí lé vayi sa Yesu. ³ Yesu nya be Eda ná acɛ eye do enuwo pleŋ jí. É gbe nya be Mawu gbɔ yí eye so yí vá yí Mawu gbɔ yí ye gbe trɔ yigɔ. ⁴ Eyi ci yí wo le enu lɔ ɖuɔ ɔ, é shi ete yí ɖe awuvlaya ci yí é do dó awu ji daɖɛ keŋ yí sɔ avɔ ɖeka sɔ sa do alinji. ⁵ Le i godu ɔ, é ku eshi do yawavi ɖeka mɛ yí tɔ́ afɔwo klɔklɔ nɔ́ nukplanvi lɔwo kéŋ yí sɔ avɔ ci yí é sɔ sa do alinji lɔ cucuɔ afɔ lɔwo. ⁶ Ci yí é va ɖo Simɔ Piyɛ ji ɔ, yɛ nú be: «Axwetɔ, eo yí a klɔ́ afɔwo nɔ́ ŋ a?» ⁷ Yesu ɖoŋci nii be : «D'é se enu ci yi ŋ wawa lɔ gɔnmɛ haɖe go. vɔ ɔ, á vá se mɛ.» ⁸ Piyɛ nu nii be: « Gbeɖe, à klɔ́ afɔwo nɔ́ ŋ go.» Yesu ɖoŋci nii be: «Nɔ́ ŋ de klɔ afɔwo nɔ́ eo go ɔ, á nyi enyɛ kodo eo de gbe ɖo enyɔ ɖe go.» ⁹ Eyi Simɔ Piyɛ va nú nii be: «Ci yí é le nɛnɛ ɖe, Axwetɔ, ŋgbè klɔ afɔwo ɖekɛ nɔ ŋ go . Vɔ ɔ, klɔ̀ alɔwo kodo eta nɔ ŋ hɛnnɛ!» ¹⁰ Yesu ɖoŋci nii be: «Amɛ ci yí le eshi vɔ ɔ, afɔwo ɖekɛ é ʒan be a klɔ́. Ɖó é mɛ so eji vayi gɔnmɛ. Míwo ɔ, mí mɛ. Gankegand'é nyi amɛ pleŋ yí mɛ́ go.» ¹¹ Yesu jeshi amɛ ci yí a vá sɛɛ dɛ nyuiɖe. É yí ná taɖo yí é nu be: «Mí pleŋ de mɛ́ go.» ¹² Gacimɛ yí Yesu klɔ afɔwo nɔ́ wo ɖegbɔ ɔ, é trɔ sɔ yi 'wuvlaya do yí trɔvayi fni ci yí wo a ɖu enu le kéŋ yí biɔ wo se be; «Mí mɔŋje enu ci yí ŋ wa nɔ mí mɛ a? ¹³ Mí yɔyɔ ŋ be Cicigan kodo Axwetɔ. Míwo 'nyɔ jɔ. Ŋ nyi cicagan kodo Axwetɔ nyao. ¹⁴ Ci yí é le nɛnɛ ɔ, nɔ enyɛ ci yí nyi Cicagan kodo Axwetɔ klɔ afɔwo nɔ mí ɔ, míwo cán ɖó a klɔ afɔwo nɔ míwonɔnɔwo hɛnnɛ. ¹⁵ Kpɔwɛ yí é nyi yí ŋ na mí nɔ́ mí a kpɔdo nu a wawa shigbe lehanci yí ŋ wɛɛ nɔ mí do nɛnɛ. ¹⁶ Le nyɔnɔnui mɛ ɔ, ŋ nunuɔ nɔ mí be: edɔwavi ɖé de wunɔ egan yi 'xwetɔ go yí amɛdɔdɔ ɖé de wunɔ egan amɛ ci yí dɔ́ɛ ɖaɖa edɔgbe go. ¹⁷ Ecɛviɛ ɔ, mí va jeshi enu hɔnwo pleŋ. Enu yí nyɔ́ nɔ́ mí nɔ́ mí wa do wo jí. ¹⁸ D'é nyi mí pleŋ nu yí ŋ xoxoɔ nuxu so nɛnɛhan go. Ŋ jeshi amɛ ciwo yí ŋ can ɖɛ. Vɔ ɔ, é le be enyɔ ci yí wo ŋwlɛ ɖɛ do Mawu 'nyɔ wemawo mɛ a jɔ. Wo ŋwlɛ ɖɛ be: "Amɛ ci yí ɖunɔ enu le agban kuɖeka mɛ kodo ŋ can, fɔ́n egu do ŋ ji." ¹⁹ Ŋ doŋkɔ yí nuniɛ nɔ mí viɛ gbɔxwe nɔ enu lɔ a vá jɔ. Gahɔnmɛ nɔ é vá jɔ ɔ, mí a xɔɛ ji se be "ŋ nyi amɛ ci yí ŋ nyi." ²⁰ Le nyɔnɔnui mɛ ɔ, ŋ nunuɔ nɔ mí be amɛɖekpokpoi ci yí a xɔ amɛ ci yí ŋ dɔ ɖaɖa, xɔ enye can. Eyi amɛɖekpokpoi ci yí xɔ ŋ ɔ, é xɔ amɛ ci yí dɔ ŋ ɖaɖa hɛnnɛ.» ²¹ Gacimɛ yí Yesu nu enyɔ hɔnwo ɖegbɔ ɔ, susu mɛ caka nii yí é ɖe mɛ nɔ yi nukplanviwo be: «Lenyɔnɔnui ɔ, ŋ nunuɔ nɔ mí be míwo domɛtɔ ɖeka a va sa ŋ.» ²² Eyi nukplanvi lɔwo tɔ wowonɔnɔwo gloglo kpɔ klan klan klan yí sɔ́ biɔbiɔ wowoɖekiwo se be mi nu yí yi xoxoɔ nuxu so mɛ. ²³ Nukplanvi lɔwo domɛtɔ ɖeka, amɛ ci yí Yesu lɔnnɔ le wo mɛ nɔ anyinɔnɔ do axa nɔ Yesu. ²⁴ Simɔ Piyɛ wa ŋkuvi nɔ́ nukplanvi hɔn lɔ be yi le biɔ Yesu se be mi nu yí yi xoxoɔ nuxu so mɛ. ²⁵ Eyi nukplanvi hɔn lɔ go ɖaɖa Yesu gbɔ yí biɔɛ se be:«Axwetɔ, mi yí nyi amɛ lɔ ɔ?» ²⁶ Yesu ɖoŋci nii be: «Na kan kpɔnnɔ viɛ a sɔ́ tɔ enutɔnu. Amɛ ci yí na sɔ́ jó nɔ́ ɔ, é yí yɔ́.» Eyi é kan kpɔnnɔ yí sɔ́ jó nɔ Yuɖa, Simɔ Ishikaliwɔti eviɛ. ²⁷ Yuɖa xɔ kpɔnnɔ lɔ. Le i godu ɔ, Legba Dó eji mɛ nii. Eyi Yesu nu nii be: «Enu ci yí é ɖo a wa ɔ, wɛ́ɛ kaba!» ²⁸ Amɛ ciwo yí le enu lɔ nuɔ kodoi ɖekpokpoi de se enu ci taɖo yí é nunuɔ nɛnɛ nii dó gɔnmɛ go. ²⁹ Ci é nyi Yuɖa yí nyi ehojikpɔtɔ nɔ́ wo ɔ amɛ sugbɔ bu be dɔ yí Yesu dɔdɔɛ be yí lé yi xwle enu ciwo yí yewo a vá sɔ ɖu exwe lɔ yɔ́ alo yi le ná enuɖe wamɛnɔwo yɔ́ . ³⁰ Ci yí Yuɖa xɔ kpɔnnɔ lɔ nɛnɛhan vɔ, é to zeɖeka. ezan do/ ³¹ Ci yí Yuɖa to ɖegbɔ ɔ, Yesu nu be: «Ecɛviɛ ɔ, Mawu ɖe Agbetɔvi lɔ klɛnklɛn gangan dansin yí sɔ to eyɛ mɛ ɔ, é ɖe yiŋtɔtɔ can dansi. ³² Eyi na wo ɖe Mawu klɛnklɛn gangan dansin to ji nɛnɛhan ɔ Mawu cán a gbe ɖe yí klɛnklɛn dansin sɔ to jí. Sabaɖe ŋtɔkpuyí a dansin. ³³ Evinyɛwo, gaxoxo kleŋ ɖé mɛ yí na gbe nɔ mí gbɔ sɛ́n/ Mí a vá jí ŋ. Vɔ ɔ, ŋ nuinuiɛ nɔ́ ecɛviɛ hɛnnɛ shigbe lehanci yí ŋ nui nɔ́ Yuɖatɔ kpɛtɛwo do nɛnɛ be mí d'a sɛ́n e a vá fini ci yí ŋyiyiɛ go . ³⁴ Ŋ le gbeta yoyu naa mí be: mí lɔn míwonɔnɔwo Mí ɖo a lɔn míwonɔnɔwo shigbe lehanci yí ŋ lɔn mí do nɛnɛ. ³⁵ Nɔ́ mí lɔn míwonɔnɔwo ɔ, amɛshamɛ a nya be nyaŋ nukplanviwo yí mí nyi.» ³⁶ Simɔ Piyɛ biɔ Yesu se be: «Axwetɔ, fini yí é yiyiɛ ɔ?» Yesu ɖoŋci nii be: D'á sɛ́n eŋ a kplɔ ŋ do viɛ yi a yi fini ci yí ŋ yiyiɛgo. Vɔ ɔ, é jiji bóó ɔ, à vá kplɔ ŋ do.» ³⁷ Piyɛ ɖoŋci yí biɔɛ se be: «Axwetɔ, nyi ná taɖo ŋ d'a sɛ́n eŋ kplɔ eo do viɛ ɔ? Ŋ le egbesɔsɔ a sɔ nyaŋ 'gbe gbe ke eku dó ao 'ta! ³⁸ Yesu ɖoŋci nii be: «É le egbesɔsɔ a sɔ ao 'gbe ke eku do eta nɔ ŋ nyao a? le nyɔnɔnui mɛ ɔ, ŋ nunuɔ nɔ eo be gbɔxwe yí kloklo a ɖe atɔ ɔ, à nú zetɔn be ye de jeshi enyɛ ɖɛ go.»