¹ Yesu nu nɔ́ yí nukplanviwo be: «Mí ŋgbe caka le míwo ɖekiwo mɛ go. Mí xɔ Mawu ji se yí a gbe xɔ enyɛ can ji se hɛnnɛ. ² Le Edanyɛ 'xwe mɛ ɔ, nɔxu sugbɔwo li. Nɔ́ d'é le nɛnɛ ɔ, kpɔ́ ŋ d'a nú nɔ́ mí be ŋ yigɔ a yi dra texwe dó ɖɛ́ nɔ́ mí go. ³ Eyí nɔ ŋ vayi dra nɔxu dó ɖɛ́ nɔ mí ɖegbɔ ɔ, na trɔgbɔ a va kplɔ mí va enyɛɖeki gbɔ́. Be nɔ fini ci yí ŋ le ɔ, míwo can mí a nɔ ehɔn hɛnnɛ. ⁴ Mí jeshi emɔ ci yí kplɔ amɛ yi fini ci yí ŋ yigɔ» ⁵ Toma nu nii be : «Axwetɔ, mi de nya fini ci yí è yigɔ go. Le i mí a wɛɛ do a jeshi emɔ lɔ ɔ?» ⁶ Yesu ɖoŋci nii be: «Enyɛ yi nyi emɔ lɔ, kodo agbe lɔ. Amɛɖekpokpoi d'a sɛn eŋ yi Eda gbɔ enyɛ ji mato go. ⁷ Nɔ́ mí jeshi ŋ ɖɛ ɔ, mí a va jeshi Edanyɛ ɖɛ hɛnnɛ. Eyi so eviɛ trololo ɔ, mí jeshi ɖɛ yi gbe kpɔɛ.» ⁸ Eyi Filipu nu nɔ Yesu be: «Axwetɔ, dansin Eda nɔ mì. Enu ci jiɛ mì le pleŋ nɛ. ⁹ Yesu ɖeŋci nii be: «Filipu ŋ le mí gbɔ viɛ ɔ, é jiji sugbɔ gankegan yí d'è jeshi ŋ ɖ̂ go a? Amɛ ci yí kpɔ ŋ ɔ, é kpɔ Eda. Le à wɛɛ yí a vá nunuɔ be enyɛ le dansin Eda nɔ yewo do ɔ? ¹⁰ D'è xɔɛ ji se be ŋ le Agbe le Ada mɛ yí Ada le agbe le ŋmɛ ba? Enyɔ ciwo pleŋ yí ŋ nunɔ nɔ mí de sonɔ enyɛŋtɔ gbɔ go. Ada ci yí le ŋ mɛ yí le yiŋtɔ 'dɔwo wagɔ. ¹¹ Ci yí ŋ nunuɔ be ŋ le agbe le Ada mɛ yí Ada le agbe le ŋ mɛ ɔ, mí a xɔ ŋ ji se. Nɔ mí d'a gbe xɔ enyɔ lɔ ji se can ɔ, mí a kpɔdo edɔ ciwo yí ŋ wawa nu yí a xɔ ŋ ji se. ¹² Le nyɔnɔnui mɛ ɔ, ŋ nunuɔ nɔ mí be : amɛ ci yí xɔ ŋ ji se awa edɔ ciwo yí ŋ wawa hɛnnɛ. Amɛ lɔ agbe wa kaka a wa ciwo gangan sɔwu hɔnwo. Ɖó ɔ, ŋ yigɔ Ada gbɔ. ¹³ Eyi enu ciwo pleŋ yí mí a biɔ le nyaŋ nyikɔ mɛ ɔ, na wa wo nɔ́ mí, nɔ́ Evi lɔ a ɖe Eda klɛnklɛn gangan lɔ dansinn. ¹⁴ Nɔ́ mí biɔ enuɖe le nyaŋ nyikɔ mɛ ɔ Nɔ wɛɛ nɔ mí.» ¹⁵ Yesu nu nɔ́ yi nukplanviwo be: « Nɔ́ mí lɔn ŋ ɔ, mí wa do nyaŋ 'sewo ji. ¹⁶ Eyi enyɛ ɔ, na biɔ so Ada gbɔ be yi lé ná kpedonutɔ bú mí nɔ a va dodoɔ alɔ mí yí a nɔ mí gbɔ tɛgbɛɛ. ¹⁷ É yí nyí nyɔnɔnui gbɔngbɔn lɔ. xexe lɔ mɛtɔwo d'a sɛn eŋ a xɔɛ go. Ɖo wo d'a sɛ́n eŋ kpɔɛ kaka yí a jeshii can go. vɔ míwo ɔ, míwo jeshii ɖɛ. Ɖo é li kodo mí yí a le mí mɛ tɛgbɛɛ. ¹⁸ Ŋ d'a gbe mí ɖɛ nɔ mí a ci míwo ɖekɛwo shigbe nyɔcviwo nɛnɛ go. Na trɔgbɔva mí gbɔ. ¹⁹ Sabaaɖe viɛ ɔ, xexe lɔ mɛtɔwo d'a gbe kpɔ ŋ go. Vɔ míwo ɔ, míwo a kpɔ́ ŋ. Ɖó ŋ le agbe yí míwo cán a va le agbe hɛnnɛ . ²⁰ Gbehɔngbe ɔ, mí a va nya be ŋ le Edanyɛ mɛ shigbe lehanci yí mí le enyɛ mɛ do yi enyɛ can ŋ le mí mɛ nɛnɛ. ²¹ Amɛ ci yí xɔ nyaŋ 'sewo yí wawa do wo ji ɔ amɛ lɔ yí lɔn ŋ nyao. Edanyɛ a lɔn amɛ ci yí lɔn ŋ; enyɛ can na lɔn amɛ lɔ yí a dansin enyɛɖeki nii.» ²² Eyi yuɖa, d'é nyí Ishikaliwɔti yɔ go, biɔ Yesu se be: «Axwetɔ lé é wɛɛ é nyi mìwo yí è ɖo a dansin eoɖeki nɔ yí d'à dansin eoɖeki nɔ xexe lɔ mɛtɔwo ɔ?» ²³ Yesu ɖoŋci nii be: «Nɔ́ amɛɖe lɔn ŋ ɔ, a& wa do nyeŋ 'nyɔwo ji yí Edanyɛ a va nɔ amɛ lɔ gbɔ́ yí mì a nɔ kodii. ²⁴ Amɛ ci yí de lɔn ŋ de wanɔ do nyaŋ 'nyɔwo ji go. Enyɔn ci yí ŋ nunuɔ nɔ mí cɛ de só enyɛŋtɔ gbɔ go. Edanyɛ ci yí dɔ ŋ ɖaɖa gbɔ yí é só. ²⁵ Ŋ nu enyɔ cɛwo nɔ mí gacimɛ yí ŋ gbe kpɔtɔ le kodo mí. ²⁶ Kpedonutɔ ci yí ɖó a vá a vá kpedo mí nu, gbɔngbɔn kɔkɔɛ ci yí Edanyɛ a vá dɔ́ aa mí le nyaŋ nyikɔ mɛ a va kplan enuwo pleŋ mí yí a ɖoɖoɔ eŋui enyɔ ciwo pleŋ yí ŋ nu nɔ́ mí nɔ mí.» ²⁷ «Fafa yí ŋ gbe ɖɛ nɔ mì. Nyaŋ fafa yí ŋ nanaa mí. ŋ de sɔ́ nanaa mí shigbe lehanci yí xexe lɔ mɛtɔwo nanɔ amɛ do nɛnɛ go. Mi ŋgbe caka le míwoɖekiwo mɛ go yí mí ŋgbe vɔn go. ²⁸ Mí se yí ŋ nu nɔ mí be: "ŋ sosoɔ vɔ ɔ, na gbe trɔva mí gbɔ" Nɔ é nyi be mí lɔn ŋ sasa ɔ, mí a kpɔkpɔɔ jijɔ be enyɛ ŋ yigɔ Ada gbɔ. Ɖó ɔ, Ada wu egan ŋ. ²⁹ ŋ nu enyɔ hɔnwo nɔ mí viɛ gbɔxwe nɔ enu lɔwo a va tɔ jɔjɔ. Gahɔnmɛ nɔ wo va tɔ jɔjɔ ɔ, mí a ɖo xɔse. ³⁰ ŋ d'á gbe xo nuxu sugbɔ kodo mí go. Ɖo nyigban cɛ ji 'cɛkpatɔ gbɔgbɔ. D'é ɖo acɛ ɖekpokpoi de ŋ ji go. ³¹ Vɔ ɔ, é le be xexe lɔ mɛtɔwo a nyá be ŋ lɔn Edanyɛ yí wawa enu shigbe lehanci yí é ɖe egbe nɔ ŋ do nɛnɛ. Mí shi ete, mí na nɔ mìa só le elɛ!»