¹ Yesu nu nɔ́ yi nukplanviwo be: «Enyɛ yí nyí v€nci adodui lɔ yí Edanyɛ yí nyí vɛnci kanjikpɔtɔ lɔ. ² Alɔvi ɖekpokpoi ci yí le ŋ nu yí de sɛnṣɛɛn eku go ɔ, é soini sii. Vɔ ɔ, alɔvi ci yí le ŋ nu yí sɛsɛɛn eku ɔ é drɛɛni do be nɔ a gbe sɛn do jí. ³ Míwo ɔ, enyɔ ciwo yí ŋ nunuɔ nɔ mí klɔ eɖyiwo le mí nu ɖɛ̀ vɔ, yí mí mɛ. ⁴ Mí kpɔtɔ a wawa ɖeka kodo ŋ shigbe lehanci yí ŋ wa ɖeka kodo mí do nɛnɛ. Acilɩvi ɖe d'a sɛ́n eŋ sɛ́n eku yí ɖekɛ nɔ d'é cá dó aci lɔ nu go. Nɛnɛ ke yí é le do nɛ be mí d'a sɛ́n eŋ sɛ́n eku nɔ́ mí de cá do ŋ nu go. ⁵ Enyɛ yí nyi vɛnci lɔ . Míwo nyi alɔvi lɔwo. Amɛ ci yí le ŋ mɛ shigbe lehanci yí ŋ le eyɛ mɛ do nɛnɛ a sɛn eku sugbɔ. Enyɛ nmanɔ mɛ ɔ mí d'a sɛn eŋ a wa enuɖe go. ⁶ Amɛ ci yí de le ŋ mɛ go ɔ wo a soi danŋkpɛn shigbe lehanci yí wo sonɔ acilɔviwo danŋkpɛn do yí wo a xú yí wa a lɔ kɔ ɖaɖa ezo mɛ yí wo a bi do nɛnɛ. ⁷ Nɔ é nyi be mí le ŋ mɛ yí nyaŋ 'nyɔwo ciciciɛ mí mɛ ɔ, mí biɔ enu ci yí dró mí. Nasɔ na mí. ⁸ Nɔ́ mí sɛn eku sugbɔ ɔ, á ɖe Edanyɛ klɛnklɛn gangan lɔ dansin. Nɛnɛ ɔ, amɛwo a nyá be mí wo nyi nyaŋ nukplanviwo nyao. ⁹ ŋ lɔn mí shigbe lehanci yí Edanyɔɛ lɔn ŋ do nɛnɛ. Mí nɔ anyinɔnɔ do lɔnlɔn lɔ mɛ. ¹⁰ Nɔ́ mí wa do nyaŋ 'sewo jí ɔ, mí a nɔ anyinɔnɔ do lɔnlɔn lɔ mɛ shigbe lehanci yí ŋ wa do Edanyɛ 'sewo ji yí le yi lɔnlɔn mɛ do nɛnɛ. ¹¹ ŋ nu nɛnɛ nɔ mí nɔ eji a jɔ mí shigbe enyɛ nɛnɛ yí nɔ jijɔ ci yí mí kpɔkpɔ lɔ, a nyi blebu. ¹² Nyaŋ 'sé nɔ mí gé: mí lɔn míwonɔnɔwo shigbe lehanci yí ŋ lɔn mí do nɛnɛ. ¹³ Lɔnlɔn 'fɔ gangan bú ɖè de gbe li yí amɛɖe a sɛ́n eŋ a ɖe ɖaɖa yi 'xlɔwo gbɔ́ sɔwu be ci yí a sɔ yiɖeki jí yi wo a wui do yi 'xlɔwo 'ta go. ¹⁴ Nɔ́ mí wawa do nyaŋ 'gbeɖeɖewo ji ɔ, mí a nyi nyaŋ 'xlɔwo. ¹⁵ ŋ de gbe yɔyɔɔ mí be edɔwaviwo go. Ɖó ɔ, edawavi de nyanɔ enu ciwo yí yi xwetɔ wanɔ go. ŋ yɔyɔ mí be nyaŋ 'xlɔwo. Ɖó enu ciwo pleŋ yi ŋ kplan le Edanyɛ gbɔ ɔ, ŋ dansin wo nɔ mí. ¹⁶ D'é nyi be míwo yí cán ŋ go. Enyɛ yí cán mí yi dɔ mí ɖaɖa nɔ mí a sɛn eku nɔ́ míwo'kusɛnsɛn a li ɖɛ. nɛnɛ ɔ Ada a sɔ enu ciwo pleŋ yi mí a biɔ́ɛ le nyaŋ nyikɔ mɛ na mí. ¹⁷ Egbe ci yí ŋ ɖeɖeɛ nɔ mí yí nyi mí a lɔn míwonɔnɔwo.» ¹⁸ Yesu nu nɔ́ yi nukplanviwo be: «Nɔ́ xexe lɔ mɛtɔwo gbe eŋwa nɔ mí can ɔ, mí nya be wo gbé eŋwa nɔ enyɛ ɖoŋkɔ nɔ mí. ¹⁹ Nɔ́ é kpɔ be xexe lɔ mɛtɔwo yí mí nyí sasa ɔ, xexe lɔ mɛtɔwo a lɔnlɔn mí. Ɖó wowotɔ yí mí a nyí. Vɔ ɔ, ŋ can mí yí ɖe mí do akpo nɔ xexe lɔ mɛtɔwo yí mí de gbe nyi xexe lɔ mɛtɔwo go. É yí dɔ taɖo xexe lɔ mɛtɔwo gbe eŋwa nɔ mí. ²⁰ Mí ɖo eŋui enyɔ ci yí ŋ nu nɔ mí ji be: "Edɔwavi de wunɔ egan yi xwetɔ go." Nɔ́ é nyí kpɔ be xexe lɔ mɛtɔ lɔwo ci yu mɛ nɔ ŋ ɔ, wo a ci yumɛ nɔ mí hɛnnɛ. Nɔ́ wo wa do nyaŋ 'nukplanmɛnyɔwo ji ɔ, wo a wa do míwo 'nukplanmɛnyɔwo ji hɛnnɛ. ²¹ Vɔ ɔ, wo a wa enu hɔnwo pleŋ kodo mí do nyaŋ'ta. Ɖo wo de jeshi amɛ ci yí dɔn ɖaɖa ɖɛ́ go. ²² Nɔ é nyi be ŋ de vá yí vá xo nuxu nɔ wo sa go ɔ, kpɔ́ enuvɔn ɖekɛ d'a le ekɔ nɔ wo go . Vɔ ecɛviɛ ɔ, kuku ɖe de li yí wo a vá ɖe do eta nɔ wowo 'nuvɔn go. ²³ Amɛ ci yí gbe eŋua nɔ ŋ ɔ, é gbe eŋua nɔ Edanyɛ hɛnnɛ. ²⁴ Nɔ́ ŋ de va wa edɔ ci yí amɛ bu ɖekpokpoi do de wa kpɔ gbeɖe le wo gbɔ sasa go ɔ, kpɔ enuvɔ ɖe d'a le ekɔ nɔ wo ga. Vɔ ecɛviɛ ɔ, wo kpɔ́ edɔ ciwo yí ŋ wa keŋ yí gbe eŋwa nɔ enyɛ kodo Edanyɛ. ²⁵ Vɔ ɔ, enu lɔ jɔjɔ nɛnɛhan nɔ́ enyɔ ci yí wo nú dó wowo 'se wemawo mɛ a sɛn eŋ jɔ. wo nú be: "Wo gbè eŋua nɔ ŋ sansan"» ²⁶ «Na dɔ́ kpedonutɔ lɔ ɖaɖa mí. É yí nyi nyɔnɔnui Gbɔngbɔn ci yí sonɔ Edanyɛ gbɔ. Nɔ́ é vá ɔ, á vá ɖe nyaŋ kunu nɔ mí. ²⁷ Eyí míwo can ɔ, mí a va ɖe nyaŋ kunu nɔ amɛwo. Ɖo ɔ, so Gɔnmɛjeje ɖii yí mí tɔ zɔnzɔn kodo ŋ.»