¹ Yesu gbe nu nɔ nukplanvi lɔwo be: «ŋ nu enyɔ hɔnwo nɔ mí nɔ́ enuɖe ŋgbe va jɔ nɔ́ míwo xɔṣe a klɛn afɔ go. ² Wo a va nya mí tii le mawusɛnxuwo. Sɔwu nɛnɛ ɔ gamɛ lɔ gbɔgbɔ yí amɛ ciwo yí a wuwuɔ mí a nunuɔ nɔ wowoɖekiwo bé Mawu sɛnsɛn lɔ jí yí yewo le nɛnɛ han. ³ Amɛ lɔwo a va wawa nɛnɛ ɖo be wo de jeshi Edanyɛ alo enyɛ ɖɛ go. ⁴ Vɔ ɔ, ŋ doŋkɔ yí núi ɖɛ́ nɔ́ mí be nɔ́ hwe lɔ nu va sun yí enu lɔ vá tɔ́ jɔjɔ ɔ, mí a ɖó eŋui be ŋ nui nɔ́ mí ɖɛ sasa .» «ŋ de núi nɛnɛhan nɔ́ mí so gɔnmɛjeje lɔ go. Ɖó ŋ le mí gbɔ gahɔnmɛ. ⁵ Ecɛviɛ ɔ, ŋ kpe amɛ ci yí dɔ ŋ ɖaɖa gbɔ́. kpɔ́ míwo domɛtɔ ɖekɛ de biɔbɔ ŋ se be: " Fini yí é yigɔ ɔ mɛ go?" ⁶ Vɔ ɔ, ci yí ŋ nu nɛnɛhan nɔ mí ɔ, mí ci ŋshishi mɛ. ⁷ É le nɛnɛ gakagan na nu nyɔnɔnui nɔ mí. Nɔ́ ŋ so le mí gbɔ ɔ, á dó mí ji sɔwu. I gɔnmɛ yí nyí be nɔ ŋ de só go ɔ, kpedonutɔ lɔ ci yí ɖó a vá a vá dó alɔ mí d'a va mí gbɔ go. Vɔ nɔ ŋ so ɔ, na dɔ́ɛ ɖaɖa mí. ⁸ Nɔ́ é va ɔ, a va dansin nɔ́ agbetɔwo petii susu ci yí wo ɖó dó enu ci yí nyí enuvɔn wawa jɔjɔɛnyinyi kodo kojo ci yí Mawu a ɖó nɔ xexe lɔ mɛtɔwo nú de nyɔ́ go. ⁹ Enu ci yi wo wa yí é nyi enuvɔn yí nyi be wo de xɔ ŋ ji se go. ¹⁰ Enu ci yí nyí jɔjɔɛnyinyi yí nyí be ŋ yigɔ Edanyɛ gbɔ yí mí d'a gbe va kpɔ ŋ go. ¹¹ Enu ci yí nyí kojo ci yí Mawu a vá ɖó nɔ xexe lɔ mɛtɔwo yí nyí be mawu ɖó kojo nyigban jí "cɛkpatɔ lɔ vɔ.» ¹² Yesu gbe yi ji nɔ́ nukplanvi lɔwo be: «Enyɔ sugbɔ kpɔtɔ yí na nu nɔ mí. Vɔ ɔ, mí d'a sɛn eŋ hɛn wo eviɛ trololo cɛ go. ¹³ Nɔ gbɔngbɔn ci yí dannɔsin nyɔnɔnui ci yí ku so Mawu nú lɔ vá vá ɔ, à ná yí mí a jeshi nyɔnɔnui lɔ ɖɛ blebu kito kito. Enyɔ ciwo yi a va nu d'a só yiŋtɔ gbɔ́. vɔ ɔ, a va nu enyɔ ciwo pleŋ yí é se so mawu gbɔ́ nɔ́ mí yí a ɖoŋkɔ anunuɔ enɔ ci yí a va jɔ esɔ godumɛ nɔ mí ɖɛ. ¹⁴ Á vá ɖe nyaŋ klɛnklɛn gangan dansin. Ɖó á vá xɔxɔ enyɔ so ŋ gbɔ yí a nunuɔ nɔ mí . ¹⁵ Enu ciwo pleŋ yí Edanyɛ wa ɖɛ nyí kinyɛ hɛnnɛ. É yi ná taɖo yí ŋ nu nɔ mí be yí a xɔ nɔ enyɔ so ŋ gbɔ yí a nunɔ nɔ́ mí.» ¹⁶ Yesu nu nɔ yi nukplanviwo be: «Sabaaɖe viɛ ɔ,mí a gbe va kpɔ́ ŋ.» ¹⁷ Eyi nukplanvi ɖekawo tɔ nunu nɔ wowonɔnɔwo be: «Enyɔ hinde yí é jijiɛ a na nɔ mì. yí nunuɔ be sabaaɖe viɛ ɔ, mìwo d'a gbe kɔ eye go yí sabaaɖe ɔ, mìwo a gbe va kpɔ́ eye ɔ? Enyɔ ci yí é jijiɛ a nú nɔ́ mí yí nunuɔ be yedaye gbɔ yí ye yigɔ ɔ? ¹⁸ "Sabaaɖe" lɔ ci yí é nunuɔ lɔ gɔnmɛ ɖe? mì de se enyɔ lɔ ci yí é nunuɔ gɔnmɛ go.» ¹⁹ Yesu le ŋkyvi dó nú be wo jijiɛ a biɔ enyɔ eye se. Eyí é nu nɔ́ wo be: «Ŋ ɖemɛ nɔ mí be sabaaɖe viɛ ɔ, mí d'a gbe kpɔ ŋ go yí sabaaɖe ɔ mí a gbe va kpɔ́ ŋ. Enyɔ hɔn taɖo mí biɔbiɔ enyɔ míwonɔnɔwo se do nɛ a? ²⁰ Le nyɔnɔnui mɍ ɔ, ŋ nunuɔ nɔ mí be: mí a va le avin ji yí a le ekui faan. Gahɔnmɛ ɔ, xexe lɔ mɛtɔwo a le jijɔ kpɔgɔ. Mí a le vevi seɛ vɔ ɔ, míwo vevi sese a va trɔ jijɔ nɔ mí. ²¹ Nɔ nyɔnu efunɔ jijiɛ a ji evi ɔ, é senɔ gbazavi. Ɖó gbazavi sese gamɛ yí sun nii. Vɔ nɔ é va ji evi lɔ ɖegbɔ ɔ, é ŋlɔnɔbevevisese hɔn. Ɖo é va kpɔnɔ jijɔ be ye ji evi ɖeka dó xexe lɔ mɛ. ²² Nɛnɛke, egbɛ viɛ ɔ, míwo can mí le vevi seɛ nɛ. Vɔ ɔ, na gbe va kpɔ mí ke. Gahɔnmɛ eji a jɔjɔ mí yí amɛɖekpokpoi d'a sɛ́n eŋ a sɔ jijɔ lɔ le mí shi go. ²³ Eyí le azan hɔn lɔ jiɔ, mí d'a gbe va biɔbiɔ enyɔ ɖekpokpoi ŋ se go. Le nyɔnɔnui mɛ ɔ, ŋ nunuɔ nɔ mí be enu ciwo pleŋ yí mí a biɔ́ edanyɛ le nyaŋ nyikɔ mɛ ɔ, á sɔ wo ná mí. ²⁴ Kaka va sɔna egbɛ viɛ ɔ, mí de biɔ́ enuɖekpokpoi Mawu le nyaŋ nyikɔ mɛ kpɔ go. Mí biɔ enu wo a ná mí. Gahɔnmɛ ɔ, míwo jijɔkpɔkpɔ lɔ a le blebu.» ²⁵ Yesu nu nɔ yi nukplanvi lɔwo be: «ŋ do labalu yí sɔ nu enyɔ hɔnwo pleŋ nɔ mí. Gamɛ li gbɔgbɔ yí ŋ d"a gbe do labalu a s&ɔ xo nuxu nɔ mí go. Vɔ ɔ, na va dredre enyɔ ci yí ku so Mawu Eda nu mɛ nɔ mí agbaŋgba. ²⁶ Gbenuhɔngbe ɔ, mí a biɔ́ enuwo Edanyɛ le nyaŋ nyikɔ mɛ yí ŋ de nunuɔ be na ɖe kuku nɔ Edanyɛ do míwo 'ta go. ²⁷ Ci gɔnmɛ yí nyi kpɔ be Edanyɛ ŋtɔ lɔn mí. Ɖo mí lɔ ŋ yí xɔɛ jise be Mawu gbɔ yí ŋ so yí vá. ²⁸ Edanyɛ gbɔ yí ŋ so yí va xexe lɔ mɛ. Ecɛviɛ ɔ, ŋ sosoɔ le xexe lɔ mɛ yí troyigɔ Edanyɛ gbɔ.» ²⁹ Yí nukplanvi lɔwo nu nii be «Ehɛɛn! Ecɛviɛ ɔ va xoxoɔ nuxu nɔ mì agbaŋgba yi d'è gbe dodoɔ labaluwo go. ³⁰ Ecɛviviɛ ɔ, mí nya be è jeshi enuwo pleŋ yí d'é ʒian be amɛde a biɔ́ eo se gbɔxwe go. E i na taɖo yí mí xɔɛ ji se be Mawu gbɔ́ yí è so yí vá.» ³¹ Yesu nu nɔ wo be: «Mí va xɔ ŋ ji se eviɛ hɔnnɔ a? ³² Gamɛ li gbɔgbɔ yí é va ɖó vɔ yí wo a nya mí pleŋ do egbe. Míwo domɛtɔ ɖeka ɖeka a trɔyi yi 'xwe yí mí a gbe enyɛ ɖɛkɛ ɖɛ. Vɔ ŋ de nyi enyɛ ɖekɛ go. Ɖo Edanyɛ li kodo ŋ. ³³ ŋ nu enyɔ hɔnwo pleŋ nɔ́ mí nɔ́ mí a kpɔ́ fafa le ŋ mɛ. Mí a kpé efun le xexe lɔ mɛ. Vɔ ɔ, mí gbe edɔn. ŋ ɖu xexe lɔ jí.»