¹ Kuɛshilagbe nyidin kucukucu gacimɛ yí eŋu de ke hɔɖe ɔ, Mali ci yí so Magidala jugan mɛ vayi yɔdu lɔ 'tu. É kpɔ́ be wo ɖe ekpe ci yí wo sɔ cu enu nɔ yɔdu lɔ sii, ² Eyí é xi eju vayi Simɔ Piyɛ kodo nukplanvi eɖetɔ lɔ ci yí Yesu lɔnnɔ gbɔ yí nu nɔ wo be: «wo sɔ Axwetɔ lɔ sii le yɔdu lɔ mɛ. Yí mì de nyá fini ci yí wo sɔ dado go.» ³ Nɛnɛ ɔ, Piyɛ kodo nukplanvi eɖetɔ lɔ tó yí kpe yɔdu lɔ gbɔ́. ⁴ Wo kodo eve lɔ do afɔ ejumɛ. Vɔ ɔ, nukplanvi eɖetɔ lɔ xi eju sɔwo Piyɛ yí vayi ɖo yɔdu lɔ gbɔ doŋkɔ. ⁵ É bɔbɔ yí kpɔ yɔdu lɔ mɛ ɖaɖa yí kpɔ gaga eɣi lɔwo le é hɔn. Vɔ ɔ, d'é ɖo yɔdu lɔ mɛ go. ^{6 7} Simɔ Piyɛ ci yí ci godu can va kɔɖɛ; é ɖo yɔdu lɔ mɛ yí kpɔ gaga eɣi lɔwo le é hɔn sɔkpenɔ klalɛ ci yí wo sɔ bla ŋmɛ nɔ yesu hɛnnɛ. Klalɛ lɔ de le eju kodo gaga eɣi lɔ go. Vɔ ɔ, wo ŋwlá eyɛ do akpo yí sɔ dado afibu. ⁸ Gahɔnmɛ yí nukplanvi eɖetɔ lɔ ci yí va ɖo yɔdu lɔ gbɔ́ doŋkɔ va ɖó mɛ hɛnnɛ. É kpɔ enu lɔwo yí xɔse be Yesu fɔn nyao ⁹ kaka va sɔna gahɔnwo mɛ ɔ, nukplanvi lɔwo de mɔŋje enyɔ ciwo yí wo doŋkɔ yí nú dó Mawu 'nyɔ wema mɛ be Yesu ɖo a fɔ́n so ekuwo di mɛ go. ¹⁰ Eyí nukplanvi amɛve lɔwo trɔ vayi axwe. ¹¹ Mali le ete le yɔdu lɔ gbɔ́ le ŋxenu yí le avun faan. Gacimɛ yí é le avin lɔ fangɔ ɔ, è bɔbɔ yí a kpɔ́ yɔdu lɔ mɛ ɖaɖa. ¹² É kpɔ Mawudɔla amɛve yí wo le enu eɣiwo mɛ. Wo nɔ anyinɔnɔ do fini ci yí wo sɔ Yesu 'cɔ lɔ dado sa. Amɛɖeka le tagbe agé yí evetɔ lɔ le fɔde agé. ¹³ Mawu 'dɔla lɔwo biɔ Mali se be: «Nyɔnu, nyi 'vin faan yí è le ɔ?» É ɖoŋci nɔ wo be: «Wo sɔ nyaŋ 'xwetɔ sii yí ŋ de nya fini ci yí wo sɔ dado go.» ¹⁴ Kaka a nu nɛnɛ egbɔ yí trɔ ekɔ vɔ, é kpɔ Yesu le é hɔn. Vɔ ɔ, d'é nya be é yí le é hɔn go. ¹⁵ Yesu biɔɛ se be: «Nyí yí 'vin faan yí è le ɔ? Mi yí e jijiɛ ɔ?» ¹⁶ Nyɔnu lɔ bubuɔ be xɔkpagble lɔ jikpɔtɔ yɔ́. É yí dɔ taɖo yí é nu nii be: Mɛgan, nɔ é nyi kpɔ be eo yí sɔɛ sii ɔ, na nu fini ci yí é sɔɛ dado nɔ ŋ nɔ́ ma yi a yi kɔɛ.» ¹⁷ Yesu nu nii be: «Eyi é trɔ kpanŋkɔ yi yí nú nii dó Eblegbe mɛ be: «Hlabuni!», ci gɔnmɛ yí nyi be: «Cicagan!» ¹⁸ Yesu nu nii be: gbè le ŋ ɖɛ go. Ɖó ɔ, ŋ de yí eji le Edanyɛ gbɔ hɔɖe go. Vɔ ɔ, yi nu nɔ nɔvinyɛwo be ŋ yigɔ Edanyɛ ci yí gbe nyi míwo 'da, nyaŋ Mawu ci yí gbe nyi míwo Mawu hɛnnɛ gbɔ́.» ¹⁹ Eyi Mali ci yí so magidala jugan mɛ vayi nukplanvi lɔwo gbɔ́ yí nunɔ wo be ye kpɔ Axwetɔ lɔ yí gbe do eŋɛ ci yí do nii lɔ nɔ wo. ²⁰ Kɔɛshilagbe hɔn lɔ ke fiɛshi ɔ, nukplanvi lɔwo bɔ do exɔ ɖeka mɛ. Wo gla ehɔ́n lɔwo kodo safli. Ɖo ɔ, wo vɔnvɔn nɔ yuɖatɔwo 'gawo. Gahɔnmɛ, yesu va wo gbɔ́. É le ete le dodomɛ nɔ wo yí nu nɔ wo be: «Fafa mí a kpɔ» ²¹ Ci yí e nu nɛnɛ nɔ wo ɔ, è dansin yi 'lɔwo kado yi 'xamɛ nɔ́ wo. Ci yí nukplanvi lɔwo kpɔ Axwetɔ lɔ lɔ ɔ, eji jɔ wo sugbɔ. ²² Yesu gbe nu nɔ wo ke be: «Fafa mí a kpɔ. Shigbe lehanci yí Edanyɛ dɔ ŋ ɖaɖa dó nɛnɛ ɔ, enyɛ can ŋ dɔdɔ mí ɖada.» ²³ Le i godu ɔ, è do fufu dó wo yí nú nɔ́ wo be: «Mí xɔ Gbɔngbɔn kɔkɔɛ! ²⁴ Amɛ ciwo yí mí a sɔ enuvɔnwo ke ɔ, Mawu a sɔ enuvɔn lɔwo ke wo. Amɛ ciwo yí mí a gbe be yewo d'a sɔ enuvɔnwo ke ɔ, Mawu can d'a sɔ wo ke wo hɛnnɛ go. ²⁵ Keŋ ɔ, nukplanvi wive lɔwo domɛtɔ ɖeka ci yí wo yɔ nɔ be Toma (ci yí wo gbe yɔnɔ be Togbo) de le yi kpenawo mɛ gacimɛ Yesu va go. ²⁶ Eyí nukplanvi kpɛtɛwo va nu nii be: «Mì kpɔ Axwetɔ lɔ la!» Vɔ ɔ, Toma ɖoŋci nɔ wo be: «Nɔ́ ŋ de kpɔ flɛnŋgo 'kpa lɔwo le yi 'lɔwo mɛ ɔ yí nɔ́ de sɔ́ alɔvi dó flɛnŋgo 'kpa lɔwo mɛ ɔ yí nɔ ŋ de sɔ́ alɔ dó yi 'xamɛ 'kpa mɛ go ɔ, ŋ d'a xɔɛ ji se go.» ²⁷ Kuɛshila ɖeka godu ɔ, nukplanvi lɔwo gbe bɔdo axwe lɔ mɛ ke. Toma can le wo mɛ. wo gla ehɔ́n lɔwo kodo safli vɔ ɔ Yesu va wo gbɔ́. É nɔ ete do dodomɛ nɔ wo yí nu ń wo be: «Fafa mí a kpɔ́.» Keŋ yí nu nɔ Toma be «Dò ao 'lɔviwo ɖaɖa elɛ yí a kpɔ nyaŋ 'lɔwo ɖá. Dò ao 'lɔ ɖaɖa a sɔ́ dó nyaŋ 'xamɛ. Mì enu xoxo kpɔ keŋ a xɔɛ ji se!» ²⁸ Toma ɖoŋci nii be: «Nyaŋ 'xwetɔ, nyaŋ Mawu!» ²⁹ Yesu biɔɛ se be: «D'é ci yí è kpɔ ŋ taɖo è xɔɛ ji se ba? Enu yi nyɔ́ nɔ́ amɛ ciwo yí d'a kpɔ gankegan a xɔɛ ji se!» ³⁰ Yesu gbe jeshidu 'nú sugbɔ buwo le yi nukplanviwo ŋmɛ. keŋ ɔ, wo de ŋwlɛ wowo do wema cɛɖe mɛ go. ³¹ Vɔ ɔ, wo ŋwlɛ enu ci wo yí le wema cɛɖe mɛ nɔ́ ḿ a xɔɛ ji se be Yesu yí nyí Kliso, Mawu Eviɛ lɔ. Nɛnɛ nɔ́ mí xɔɛ ji se ɔ, mawu a na agbe mí to ji.