¹ Gacɛmɛ ɔ, Pilati va na egbe be wo lé kplɔ Yesu hɛnyi a yi ya eba nii kodo sovoba. ² Eyi sɔjɔ lɔwo sɔ ŋja lɔn efiɔkuku yí sɔ́ cɔ́n nii. Wo gbe awuvlaya ejin ɖeka nii hɛnnɛ. ³ Wo tegogoi yí nú be : «Mí dó egbe nɔ eo, yuɖatɔwo 'fiɔ!» keŋ yí xoxoɔ tomɛ nii. ⁴ Pilati gbe to va xexenu ke yí nú nɔ ahwakɔn lɔ be: «Na kplɔɛ tii do xexenu elɛ nɔ mí nɔ mí a mɔŋje mɛ be ŋ de kpɔ enu ci yí dɔ yí na do ehw€ nɔ ŋsu cɛ do go.» ⁵ Eyi Yesu tova xexenu. ŋja 'fiɔkuku lɔ le eta nii yí é le awuvlaya ejin lɔ mɛ. Pilati nu nɔ wo be: «ŋsu lɔ ge!» ⁶ Vɔ ci yí avɔsatɔ gangantɔ kodo dɔkpɛga lɔwo kpɔɛ ɔ, wo tɔ axwa dodo be: «Kiin do acisoga nu! Kiin do acisaga nu!» Eyí Pilati nu nɔ wo be: «Mí kplɔɛ míwoŋtɔwo a yí kiin do acisoganu. Ɖo enyɛ yɛ, ŋ de kpɔ enu ci ŋci yí na do ehwɛ nɔ ŋsu cɛ do go.» ⁷ Yuɖatɔ lɔwo nu nii be: «Mì dó ese ɖeka yí le eseci lɔ nú ɔ, è ɖó a kú. Ɖɔ ɔ, é sɔsɔ yiɖeki do Mawu Eviɛ ji.» ⁸ Ci yí Pilati gbe se enyɔn hɔnwo ɔ, vɔvɔn gbe ɖoi dó jí. ⁹ Eyí é trɔ ɖo yi gbogbo lɔ mɛ keŋ yí biɔɛ se be: «Fini yí è so ɔ?» Vɔ ɔ, kpɔ Yesu de nu enyɔ ɖe dó nú nii go. ¹⁰ Gahɔnmɛ ɔ, Pilati vá nú nii be: «D'è jijiɛ a ɖo enyɔ lɔ ŋci nɔ ŋ loo? D'è nyà be ŋ ɖo acɛ yí a jió eo yí gbe ɖo acɛ a dɔ yí wo a kán eo do acisoga nu hɛnnɛ bá?» ¹¹ Yesu ɖoŋci nii be: «D'è ɖo acɛ ɖekpokpoi do ŋ ji sɔwu ci yí Mawu ná eo go. É yí ná taɖo ɔ, amɛ ci yí sɔ ŋ doashi nɔ eo wa enuvɔn gangan sɔwu eo.» ¹² Eyi so gahɔnmɛ ɔ, Pilati tɔ fini ci yí á to a a jó Yesu jijí. vɔ ɔ, yuɖatɔwo tɔ axwa dodo be : «Nɔ́ è jo ŋsu cɛ ɔ, a nyi de nyi Hlɔmu 'fiɔgangan 'xlɔ̀ go! Ɖo amɛɖekpokpoi ci yí sɔ yiɖeki ɖó efiɔ ɔ, Hlɔmu 'fiɔgangan lɔ 'ketɔ yi é nyi!» ¹³ Gacimɛ yí Pilati se enyɔ hɔnwo ɔ, é dɔ́ yí wo kplɔ Yesu tii to xexenu. Pilati nɔ anyinɔnɔ do ʒinkpin ji le kojoɖoxu fini ci yí wo tɛ́ ekpe nyuiwo do yí wo yɔnɔ le Eblegbe mɛ be: «Gabata.» ¹⁴ Atadodoamɛ 'zandrɔgbe yí wo wawa enu lɔ. Nyidɔn mɛ do gawive mɛ han ɔ, Pilati nu nɔ yuɖatɔwo be: «Míwo 'fiɔ ge nɔ mí!» ¹⁵ Vɔ ɔ, wo tɔ axwa dodo yi nunuɔ be: «Wuì! Wuì! kíin do acisoga nu! » Pilati biɔ wo se be: « Ma ka míwo 'fiɔ do acisoga nu a?» Avɔsatɔ gangantɔ lɔwo ɖoŋci nii be: «Mì ɖo efiɔ ɖe sɔzeto Hlɔmu 'fiɔgangan nu go.» ¹⁶ Eyi Pilati sɔ Yesu doashi nɔ́ wo nɔ́ wo a yi kiin do acisoga nu. Eyi wo kplɔ Yesu yí nyao. ¹⁷ Yesu ŋtɔ dro acisoga ci nu yí wo a kíin do yí to so jugan lɔ mɛ yí yi fini ci yí wo yɔnɔ be «Agbetɔ 'taxu tɔxu.» Wo yɔnɔ ehɔntɔxu lɔ le Eblegbe mɛ be «Gɔlugota.» ¹⁸ Ehɔntɔxu yí sɔja lɔwo hán Yesu do acisaga lɔ nu le nɛ yí gbe kan amɛ amɛve buwo hɛnnɛ dó axa nii. Wo kán ɖeka dó ɖushimɛ yí kán yi kpena do emiɔmɛ yí Yesu le dodomɛ nɔ wo. ¹⁹ Pilati gbe na egbe hɛnnɛ yí wo ŋwlɛ enu do kpakovi ɖeka jí yi sɔ kan do tamɛ nɔ acisaga lɔ. Enu ci yí wo ŋwlɛ lɔ yí nyi be: «Yesu Nazalɛtitɔ lɔ, yuɖatɔwo 'fiɔ.» ²⁰ Yuɖatɔ sugbɔ hlɛn enu lɔ ci yí wo ŋwlɛ kpɔ. Ɖo ɔ, fini ci yí wo kan Yesu do acisoga nu lɔ sɔ jugan lɔ gbɔ́ yí enuŋwlɛŋwlɛ lɔ gbe Eblegbe kodo Glɛkigbe kodo Latɛngbe mɛ. ²¹ Eyi yuɖatɔwo 'vɔsatɔwo 'gawo nú nɔ Pilati be: «D'é ɖo a ŋwlɛ do kpakovi lɔ ji be yuɖatɔwo 'fiɔ go. Vɔ ɔ, è ɖo a ŋwlɛ be: "ŋsu cɛ nú be: ɲ nyi yuɖatɔwo 'fiɔ".» ²² Pilati ɖoŋci nɔ́ wo be: «Enu ci yí ŋwlɛ ɔ, ŋwlɛ ŋ ŋwlii!» ²³ Gacimɛ yí sɔja lɔwo kan Yesu do acisoga nu ɖegbɔ́ ɔ, wo sɔ yi 'wuwo yí sɔja lɔwo xɔ ɖeka ɖeka. wo gbe sɔ yi 'wuvlaya hɛnnɛ. Wo de tɔn awuvlaya lɔ do afiɖe go. Lɔn wo lɔin so eji kaka kodo gɔnmɛ. ²⁴ Sɔja lɔwo nú nɔ́ wowonɔnɔwo be: «Mì d'a drɛn awuvlaya lɔ go. Mì atrɔ enu kpɔ yí a kpɔ be mi 'ta yí ɖui le mí mɛ nɛ.» Enu hɔn jɔjɔ nɛnɛhan nɔ enu ci yí wo ŋwlɛ ɖɛ do Mawu 'nyɔ wemawo mɛ a kpɔ́ emɔ a vá mɛ. wo ŋwlɛ daɖɛ be: «Wo ma nyaŋ 'wuwo le wowonɔnɔwo mɛ yí trɔ enu kpɔ so ŋyaŋ 'wuvlaya nu.» Enyɔ ci ji yí sɔja lɔwo wa do nɛ. ²⁵ Yesu 'nɔlɔ kodo Yesu nɔɖiɛ ci yí nyí Mali klopasi ashiɛ kodo Mali ci yí só magidala le ete le acisoga ci nu wo kán Yesu do lɔ gbɔ́. ²⁶ Yesu kpɔ enɔlɔ yí nukplanvi ci yí é lɔnnɔ le axa ji nii. Eyi é nu nɔ enɔlɔ be: «Ajinɔ, evio ge.» ²⁷ Le i godu ɔ, é nu nɔ nukplanvi lɔ be: «Enɔo ge.» Eyi so gahɔnmɛ ɔ, nukplanvi lɔ kplɔ Yesu 'nɔlɔ lɔ yi yí 'xwé mɛ yí é ci gbɔ́. ²⁸ Le i godu ci yí Yesu nya be wo ɖe egbɔ nɔ enushanu ɔ, é nu be: «Shikɔ ci ŋ.» É nu nɛnɛ nɔ enyɔ ci yí wo ŋwlɛ ɖɛ dó Mawu 'nyɔ wemawo mɛ a vá mɛ. ²⁹ Egu ƒeka le ehɔntɔxu yí vɛn shila ɖɔ́ɛ. Sɔja lɔwo sɔ kocan ɖeka ʒin do mɛ yí sɔ trɔn aci ci yí wo yɔ nɔ be «Izɔpu» nu yí doi ɖaɖa enu gbɔ nɔ́ Yesu. ³⁰ Yesu nu vɛn shila lɔ. Le i godu ɔ; é nu be: «Wo wa enuwo pleŋ ɖegbɔ.» Eyi ci yí é nu nɛnɛ vɔ, é do eta egu yí fá. ³¹ Gbecigbe yí Yesu kuku ɔ do lɔ trɔ nyi gbɔngbɔngbe lɔ 'zandrogbe. Yuɖatɔwo 'gawo de ji be ecɔ lɔwo a nɔ aci lɔwo ji le gbɔngbɔn gbe go. Ɖo azan gangan ɖaka yí gbɔngbɔngbe ci yí gbɔgbɔ lɔ a nyí. Eyi wo va biɔ so Pilati gbɔ be yi lé dɔ nɔ wo a gban afɔwo nɔ́ amɛ ciwo yí wo kan do acisoga nu yí a dɔ nɔ wo a ɖe wowo 'cɔwo sii. ³² Eyi sɔja lɔwo yí wo bɔ kán do acisoga nu kodo Yesu. Wo gban wo nɔ amɛɖeka doŋkɔ yí va gban nɔ́ amɛvetɔ lɔ. ³³ Ci yí wo va ɖo Yesu gbɔ ɔ, wo kpɔ be yi kú vɔ. É yi dɔ taɖo wo de gban afɔwo nɔ eyɛ go. ³⁴ Vɔ ɔ, sɔja ɖeka sɔ yi 'hwan trɔn axamɛ nii yí ehun kodo eshi kɔ zeɖeka. ³⁵ Amɛ ci yí nunuɔ enyɔ lɔwo kpɔ enu lɔwo tɔxu. Kunu ci yí é ɖeɖeɛ so enu lɔwo nú nyi nyɔnɔnui. Amɛ lɔ yɛ nya be ye totoɔ nyɔnɔnui. É xoxoɔ nuxu so enyɔ lɔwo nú nɔ́ mìwo cán mì axɔ enyɔ lɔwo ji se. ³⁶ Enu lɔwo jɔ nɛnɛ nɔ enyɔ ci yí wo ŋwlɛ ɖɛ dó Mawu 'nyɔ wemawo mɛ a vá mɛ. Wo ŋwlɛ daɖɛ be: «Wo d'a gban yi 'xú ɖekpokpoi go.» ³⁷ Wo gbe ŋwlɛ do afi bú nɔ́ Mawu 'nyɔ wema be: «Wo a sɔ ŋkuviwo dado amɛ ci yí wo tɔ ehwan lɔ jí.» ³⁸ Le i godu ɔ, Ʒosɛfu ci yí so Ali ma le jygab mɛ vayi biɔ so Pilati gbɔ be yí lé ná egbe ye nɔ ye a yi sɔ Yesu 'cɔ lɔ yí a sɔɛ ɖyii. Ʒosɛfu lɔ trɔ nyi Yesu nukplanviwo domɛtɔ ɖeka le bebemɛ. Ɖó é vɔnvɔn nɔ yuɖatɔwo 'gawo. PIlati na egbe lɔ yí é vayi sɔ Yesu 'cɔ lɔ. ³⁹ Nikodɛmu, ŋsu ɖeka ci yí va Yesu gbɔ dó ezanmɛ nu vayi can va ehɔn lɔ. É hɛn ami ci yí wo sɔ́ milu kodo alowɛsi wa sɔ shinɔ nɔ́ ecɔ gbɔxwe yí a ɖyii kiloŋ egban han vɛ́ɛ. ⁴⁰ Wo amɛve lɔwo kɔ́ Yesu 'cɔ yí sɔ gaga ɖeka ɖeka sɔ doi yí sɔ amihwɛnte lɔ wu doi shigbe lehanci yí yuɖatɔwo wɛɛni do nɔ́ wo jijiɛ a ɖyii wowo 'cɔwo nɛnɛ. ⁴¹ Xɔkpagble ɖeka le fini ci yí wo kán Yesu do acisoga nu le. Yɔdu ɖeka le xɔkpagble lɔ mɛ. Yi wo de ɖyi amɛɖe do mɛ kpɔ vayi go. ⁴² Yuɖatɔwo Gbɔngbɔngbe 'zandrɔgbe yí wo wawa enu lɔ. Eyi ci yí yɔdu lɔ gbe sɔ ehɔn gbɔ́ vɔ, wo sɔ Yesu yí ɖyi do mɛ.