¹ FIni yí ahwawawawo kodo enuwawa ciwo yí le míwo domɛ sonɔ ɔ? Míwo 'nudroamu baɖa ciwo yí nɔnɔ ahwawawa ji mamimami le míwo lankpu blebu lɔ mɛ gbɔ í wo sonɔ. ² Enuwo cinɔ ŋmɛ nɔ mí, vɔ kpɔ́ wo de sunnɔ mí shi go. Míwo 'jiwo ɖɔnɔ kodo ŋhwan baɖa , mí wunɔ amɛ yí kpɔ́ mí de dɛ́n ɛŋ yí a kpɔ́ enuɖe a xɔ go. Mí tɔnɔ evuwo yí a le enyɔwo dɔn kpɔ. Mí de ɖó enu ciwo yí ́mí jinɔ go. Ɖo mí de biɔnɔ enu go. ³ Nɔ́ mí biɔnɔ enu cán ɔ, mí de kpɔ́ yí xɔnɔ go. Ɖó ɔ mí wa afɛn yí biɔnɔ enu yí é nyi enu ciwo yí mí a zán a sɔ́ cí enuɖoamu manyɔ manyɔwo míwotɔwo shikɔ ɖekɛwo yí mí biɔnɔ. ⁴ Mawu 'gbejimanɔtɔwo! Mí de nyá bé xexemɛnuwo lɔnlɔn ɔ, egufɔnfɔn do Mawu hun yɔ́ bá? Amɛ ci yí jinɔ bé ye a nyí xexemɛ 'xlɔ sɔ́ yíɖeki ɖonɔ ketɔ nɔ Mawu. ⁵ Mí bunɔ be enyɔ gbali nuɔ yí Mawu 'nyɔ wemawo le yí nú bé: «Mawu jijî gbɔngbɔn ci yí é sɔ dó mì mɛ xaxaxa shigbe enuɖetɔ nɛnɛ.» ⁶ Gankegan ɔ, xomɛvunu ci yí é wanɔ nɔ mì gangan sugbɔ sɔwu hɔn. Ɖó wo nu hɛnnɛ bé:«Mawu trɔnɔ kpanŋkɔ egoyitɔwo vɔ yí wanɔ xomɛvunu nɔ́ amɛɖekisɔhwetɔwo.» ⁷ Ci yí é le nɛnɛ ɔ, mí bɔbɔ míwoɖekiwo nɔ Mawu. Mí trɔkpe Legba; eyi á shi nɔ́ mí. ⁸ Mí tegogo Mawu eyi Mawu a tegogo mí. Enuvɔnwatɔwo ɔ, mí klɔ eɖyi wo le alɔwo 'ji do! ⁹ Mí kpɔ leci yí mí nyi amɛwaŋshishiwo dó ɖá! Mí ci ŋshishi mɛ yí a fan avi! Mí ŋgbe kokoɔ nukui go. Mí fa avi. Mí ŋgbe kpɔkpɔ jijɔ go, mí ci ŋshishi mɛ. ¹⁰ Mí bɔbɔ míwoɖekiwo le Axwetɔ ŋmɛ nɔ́ á kɔ mí do eji. ¹¹ Nɔvinyɛwo, mí ŋgbe donɔ ehwɛ nɔ míwonɔnɔwo go. Amɛ ci yí donɔ ehwɛ nɔ nɔviɛ alo ci yí ɖonɔ kojo kodii ɔ, amɛ lɔ dodo ɔ ehwɛ mawu 'se lɔ yí gbe ɖoɖo ɔ kojo kodii. É trɔ nyi kpɔ́ bé nɔ́ é ɖoɖo ɔ kojo kodo ese lɔ ɔ, d'è nyí amɛ ci yí wanɔ do ese lɔ jí go. Vɔ ɔ, kojoɖotɔ é va nyí. ¹² Le mɛ ɔ amɛ kuɖeka kpáŋ yí nyí esewatɔ kodo kojoɖotɔ. e yí lɔ yí nyí amɛ ci yí a sɛ́n eŋ a hwlɛn amɛ gan yi a gbe trɔn amɛ. Ci yí é le nɛnɛ ɖee, mi yí eo nyi yí vá ɖoɖoɔ kojo kodo ao kpena ɔ? ¹³ Míwo ɔ, mí ɖo eto yí a se enyɔ cɛ nyuiɖe nɔ́ ŋ, Míwo ci yí nunɔ bé: «É nyɔ! Egbɛ alo esɔ ɔ, mì a yí jugan cɛ mɛ yí mì a nɔ mɛ yí a wa exwe ɖeka yí a do ajɔ keŋ yí a kpɔ́ eho.» ¹⁴ Kpɔ́ míwo ciwo yí nunɔ nɛnɛ ɖe mí de nyá enu ci yí míwo 'gbe a nyí esɔ ci yí a ke go! Mí trɔ le shigbe azɔ ci yí cunɔ yí sabaaɖe ɔ, azɔ lɔ gbe kannɔ gbíin nɛnɛ. ¹⁵ Enyɔ ci han yí mí ɖo a nunɔ sasa ge: «Nɔ é dro Axwetɔ ɔ, mì a nɔ agbe yí a wa enu cɛ alo enu hɔn.» ¹⁶ Vɔ eviɛ ɔ, mí gezenɔ le enu gangan ci drɔ yí mí le mɛ. Gezegeze hɔntɔ hunɖe trɔ́ nyí enu manyɔ manyɔ. ¹⁷ É yí ná taɖo nɔ́ amɛɖe nyá enunyui wawa ɖɛ gankegan yí d'é wɛɛwɛ go ɔ, enuvɔn yí é nyi yí é wa.