¹ Eviɛ ɖe, Míwo dɔkunɔwo, mí ɖo eto ŋ nyuiɖe! mí fan avi, mí do axwa dó jɔgbzvɔin ciwo yí gbɔgbɔ a vá jɔ do mí ji ŋci! ² Míwo dokunuwo bé yí kɔsubabawo ɖu míwo 'wuwo. ³ Míwo shika kodo 'hó je ehwe yí wowo 'hwejeje lɔ a ɖe kunu so mí hun. Ehwejeje lɔ a bi míwo lankpu shigbe ezo nɛnɛ. le ŋkeke godugodutɔ lɔwo mɛ ɔ, mí hotɛ dɔkunuwo ɖɛ́! ⁴ Efɛncu ci yí mí ɖo a cú nɔ́ amɛ ciwo yí wa edɔ nɔ mí le míwo bomɛwo yí mí tafu dó ɔ le axwa do ɔ. Bomɛdɔwatɔ lɔwo gbedoɖa ɖyi kaka yí ɖó etomɛ nɔ axwetɔ zebawoti. ⁵ Acɔnu ganganwo mɛ mí nɔnɔ le xexe lɔ mɛ yí le agbe ɖu ɔ leci yí e dro mí do. Mí ɖu enu kaka yí kla ɖɛ nɔ́ gbecigbe yí wo a kplɔ mí yi wuwutɔxu. ⁶ Mí so ekuhwɛ nɔ amɛ, mí wu amɛ jɔjɔɛ. Kpɔ́ d'é sɛ̀n eŋ eŋ yí gbenɔ mí kaka yí a sɛun ji go. ⁷ Nɔvinyɛwo, nɔ́ é le nɛnɛ ɔ, mí do eji kaka a sɔnanɔ hwecinun yí Axwetɔ lɔ a trɔgbɔ. Mí kpɔ leci yí agbledetɔ nɔnɔ ete kpɔ jinuku le ebomɛ do ɖá! É donɔ eji yí a nɔ ete kaka agblemɛ nuku ŋkɔtɔwo kodo vɔvɔɛtɔwo a tó. ⁸ Míwo cán ɔ mí do eji mí na nɔ́ miwo 'yexa a ló edo. Ɖó ɔ Axwetɔ trɔtrɔgbɔ 'zan gogo vɔ. ⁹ Nɔvinyɛwo, mí ŋgbe jenɔ ehwɛ nɔ míwonɔnɔwo go. Nɛnɛ ɔ kpɔ́ wo d'a vá ɖo kojo kodo mí go. Kojoɖotɔ lɔ gbɔgbɔ vɔ kaka yí le agboji nɔ́ mì! ¹⁰ Nɔvinyɛwo, le efunkpekpe kodo ejidodo 'nyɔ mɛ, mí sɔ kpɔwɛ Axwetɔ 'ŋɛdotɔ ciwo yí é dɔ ɖaɖa yí wo xo nuxu le yí nyikɔ mɛ sasa vayi. ¹¹ Mí nunuɔ be yí nyɔ́ nɔ́ amɛ ciwo totoɔ efunkpekpe mɛ kodo ejidodo. Mí se yí wo xo nuxu ejidodo ʒɔbu tɔ hun nɔ́ mí. Mí gbe se vɔvɔnu ci yí Axwetɔ daɖɛ nɔ́ yí 'nyɔ. Ɖó ɔ, Axwetɔ ɖɔ kodo dɔmɛnyɔnyɔ kodo xomɛvuwawa. ¹² Doŋkɔ nɔ enuwo pleŋ ɔ, nɔvinyɛwo, mí ŋgbe tanɔ enu go. Mí ŋgbe ta jiŋkushi alo nyigban, alo enuɖe to alɔkpa ɖe ji go. Nɔ́ mí nu be: «Oo» ɔ, lé nyí «Oo». Gahɔnmɛ ɔ, mí d'a va je kojoɖoɖo mɛ go. ¹³ Amɛɖe le miwo domɛ yí le efun kpe ɔ a? Léwa gbedoɖa nɔ́ Mawu. Amɛɖe le jijɔ kpɔ́ ɔ a? Le ji eha yi a kanfu mawu. ¹⁴ Amɛɖe lé edɔ le míwo domɛ a? Lé yɔ́ ehamɛmɛganwo nɔ wowo a wa gbedoɖa nii yí a gbe shi ami do eta nii le Axwetɔ nyikɔ mɛ. ¹⁵ Xɔse gbedoɖawawa a hwlɛn edɔnɔ lɔ gán yí axwetɔ a ná yí á fɔn. Nɔ́ é wa enuvɔn ɖé ɔ, Mawu a sɔ́ kii. ¹⁶ Mí hun míwo 'nuvɔnwo gɔnmɛ nɔ míwonɔnɔwo yí a gbe wa gbedoɖa a biɔ́ enunyui dó eta nɔ míwo nɔnɔwo nɔ́ Mawu a da edɔwo nɔ́ mí. Amɛjɔjɔɛ gbediɖawawa wanɔ edɔ ŋsɛntɔ koŋ haa . ¹⁷ Mí kpɔ Eli ɖa, agbetɔ, ci yí ɖó míwo jɔjɔmɛ hɛnnɛ ke yí é nyi. E wa gbedoɖa nɔ́ Mawu kodo kpakpa yí biɔ́ bé eshi ŋgbe gbe ja go. Eyi eshi mi jaja le nyigban lɔ ji kaka sɔnanɔ exwe amɛtɔ kodo efan. ¹⁸ Le i godu ɔ, e gbe va trɔwa gbedoɖa ké nɔ́ Mawu. Eyi jiŋkushi gbe hɛn eshijaja va kaka nyigban gbe sɛn jinukuwo. ¹⁹ Nɔvinyɛwo, nɔ́ amɛɖe bú le nyɔnɔnui 'mɔ́ lɔ jí le míwo domɛ yí yi kpena ɖé va trɔɛgbɛ va emɔ lɔ ji ɔ, ²⁰ amɛ lɔ lé nyá bé amɛ ci yí trɔ́ enuvɔn watɔ lɔ so emɔ ci jí yí é bu dó lɔ ji hwlɛn agbe gan nii so eku mɛ. Nɛnɛ ɔ, Mawu a sɔ́ amɛ ci yí trɔgbɔ lɔ 'nuvɔn sugbɔ lɔwo kii.