¹ Sasa vayi ɔ, Mawu ɖo egbe nɔ mí be mí a yi gbɔngbɔndomɛ 'ju ci yi ye drado dadɛ nɔ mí mɛ yí egbeɖu lɔ kpɔtɔ li nɔ mì egbɛ. Nɛnɛ ɔ, mì kpɔ míwo ɖekiwo ji nɔ míwo domɛtɔ ɖe ŋgbe gli emɔnukpɔkpɔ cɛ ci yí mí a sɔ ɖo gbɔngbɔndomɛ lɔ mɛ do go. ² Ɖo míwo ɔ, mí se Mawu 'ŋɛnyui lɔ shigbe lehanci yi míwo tɔgbuiwo sii do le zoxu sakli sakli lɔ mɛ nɛnɛ. V ɔ ɔ, enɛ lɔ ci wo do nɔ wo de hɛn ɖagbe ɖe va nɔ woo nɔ ci yi wo de xɔ enyɔ lɔ ji se o ŋci. ³ Míwo ciwo yi xɔɛ ji se ɔ, mí a ɖo gbɔngbɔndomɛ 'ju cɛ lɔ mɛ. É yí nu yi, é nu so be: «Ɖo hwecinu yí ŋ wa dɔmɛzi ɔ, ŋ ta enyɛɖeki be wo d'a ɖo gbɔngbɔndomɛ 'ju ci yí ŋ drado daɖɛ mɛ gbeɖe go!» Mawu ɖegbɔ yi 'dɔwawawo le xexe lɔ gɔnmɛjeje mɛ ɖii gbɔxwe yi ɖo egbe lɔ. ⁴ Ɖo ɔ, e nu yí wo ŋwlɛ do afiɖeka le Mawu 'nyɔ wemawo mɛ so ŋkeke amadrɛtɔ lɔ nu bé: «Mawu gbɔn domɛ le edɔ ciwo pleŋ yi e wa nu le ŋkeke amadrɛtɔ lɔ ji.» ⁵ E gbe nu yi wo ŋwlɛ daɖɛ do afi bu le wema lɔwo ke mɛ bé: «Wo d'a ɖo gbɔngbɔndomɛ 'ju ci yi ŋ drado daɖɛ mɛ gbeɖe go.!» ⁶ Ci yí e le nɛnɛ han ɔ, amɛ ŋkɔtɔ ciwo yi se mawu 'ŋɛnyui lɔ de ɖó gbɔngbɔndomɛ 'ju lɔ mɛ go. Ɖo ɔ, wo tri eto. Nɛnɛ hanke ɔ egbeɖu lɔ gbe kpɔtɔ li yi nɔ́ amɛɖewo hɛn ɔ, wowo a ɖo gbɔngbɔndomɛ 'ju lɔ mɛ. ⁷ E yi na taɖo ɔ, mawu gbe trɔ ɖo azan bu ke. Azan lɔ yi nyi «Egbɛ». Boo ɔ égbe xo nuxu so nu to Davidi ji shigbe lehanci yi wo nui do sasa nɛnɛ le wema lɔ ke mɛ be: «Nɔ mí se yi Mawu yɔyɔ mí egbɛ ɔ, mí a ɖo eto yí; mí ŋgbe shin ŋta go.» ⁸ Ɖo nɔ e nyi kpɔ be Ʒozuwé kplɔ jukɔn lɔ yí gbɔngbɔndomɛ 'ju lɔ mɛ sasa ɔ,Mawu d'a gbe va xo nuxu le i godu mɛ so azan bu nu go. ⁹ Nɛne han ɔ, gbɔngbɔndomɛ li nɔ Mawu jukɔn lɔ yi gbɔngbɔndpmɛ cɛ lɔ ɖyi gbɔngbɔndomɛ ci yí le ŋkeke amadrɛtɔ lɔ ji. ¹⁰ Ɖo amɛ ci yí ɖo gbɔngbɔndomɛ 'ju ci yí Mawu drado ɖɛ mɛ gbɔnnɔ domɛ le edɔ ciwo yi e wa nu shigbe lehanci yi Mawu gbɔdomɛ le yi 'dɔwawawo nu do nɛnɛ. ¹¹ E yí na taɖo ɔ, mí na nɔ mí a ɖɔ eŋ yí a ɖo gbɔngbɔndomɛ ju lɔmɛ. Nɛnɛ ɔ, amɛɖe d'a va sɛn eto le mí mɛ shigbe míwo tɔgbuiwo nɛnɛ yi a juin go. ¹² Ɖo Mawu 'nyɔ lɔ le agbe yi hlɔnhlɔn le ŋu. E ɖa xlɛxlɛxlɛ sɔwu dekpui enuve ɖekpokpoi. É ɖonɔ amɛ mɛ kaka yi a ma ese kodo gbɔngbɔn mɛ yi a ma kpekpexukpekpexuwo kodo exumɛmiwo mɛ le agbetɔ mɛ. é kilenɔ agbetɔ 'drowo kodo yi 'jimɛ nyɔwo kpɔ yi a kpɔ be wo nyɔ mɛn. ¹³ Enuɖe de le Mawu 'nuwawawo mɛ yí wla do Mawu go. Enushanu le Maama yí le dandanŋgbe le yi ŋkuviwo mɛ. Eyɛ yí mí ɖo a jo kɔnŋta nɔ. ¹⁴ Avɔsatɔ gangantɔ lɔ ɖeka le mí shi. E yi nyi Yesu, Mawu Eviɛ lɔ ci yí yi Mawu gbɔ le jeŋkushi mɛ. ci yi e le nɛnɛ han le amɛshamɛ ŋmɛ do ashi goguiɖe. ¹⁵ D'e nyi avɔsatɔ ci yí d'a sɛn eŋ se enugɔnmɛ nɔ mì le míwo gbɔjɔgbɔjɔ hwenuwo yí le mí shi go. Vɔ ɔ, míwo 'vɔsatɔ gangantɔ lɔ tó tetekpɔwo mɛ kpɔ le enushanu mɛ shigbe míwo han nɛnɛ gankegan yí dé wa enuvɔn kpɔ go. ¹⁶ É yí na taɖo kankandoji ɔ, mi na nɔ́ mi a tegogo mawu 'Fiɔʒinkpin lɔ fini ci yí xomɛvuwo le. Le hɔn ɔ Mawu a kú ŋshishi nɔ́ mí yí a gbe na xomɛvunuwo mí. Nɛnɛ nɔ mí va ʒian yi 'lɔdu ɔ, cí kpedo mì nú.