¹ Nɔvinyɛwo, Mawu can mí do akpo nɔ yiɖeki. Eyi na taɖo ɔ, míwo susuwo le nɔ Yesu ji. Mi hunhun mɛ le amɛshamɛ ŋmɛ be yi nyi Mawu 'mɛdɔdɔ kodo avɔsatɔ gangantɔ lɔ. ² Ɖo ɔ, e nɔ egbeji nɔ Mawu ci yi ciin nɔ edɔ cɛ lɔ shigbe lehanci yi Mɔyizi nɔ egbeji nɔ Mawu do yi wa edɔ nii le yi 'xwe lɔ pleŋ ci yi nyi yi jukɔn lɔ mɛ do nɛnɛ. ³ Wo donɔ bubu amɛ ci yí cu axwe nu sɔwu axwe lɔ ŋtɔ. Nɛnɛke yi éle nɛ be bubu a yi wo do Yesu nu gangan sɔwu ci yi wo do Mɔyizi nu nɛ. ⁴ Axwe ɖe de li yi d'é nyi agbetɔ yi cui go. Vɔ ɔ, enuwopleŋwatɔ yi nyi Mawu. ⁵ Vayi ɔ, Mɔyizi yɛ nɔ egbeji nɔ mawu le edɔwavi ci yi e nyi nii le 'xwe mɛ mɛ yi do a xonɔ nuxu nɔ yi 'xwemɛtɔwo lɔwo pleŋ wo nu. ⁶ Vɔ ecɛyɛ ɔ, Kliso lɔ yɛ nɔ egbeji nɔ Mawu le Evi ci yi e nyi yi Mawu ciin yi sɔ ɖo etɔ do enu nɔ Mawu 'xwe lɔ. Míwo yi nyi Mawu 'xwe lɔ nɔ mi kpɔtɔ kankan do mawu ji kodo nɔ mi kpɔtɔ le emɔkpɔkpɔ mɛ kodo jijɔ. ⁷ E yi na taɖo shigbe lehanci yi Gbɔngbɔn kɔkɔɛ nui do nɛnɛ: «Nɔ mí se yi Mawu yɔyɔ mí egbɔɛ ɔ, ⁸ mí a ɖo eto yi mí ŋgbe sɛn ŋta shigbe lehanci yi mí wɛɛ do sasa yi fɔn egu do ji gbecigbe yi mi duikpɔ le zoxu sakli sakli ji nɛnɛ go. ⁹ Ci ŋ wawa le ŋmɛ nɔ wo kaka sɔnanɔ exweeka can wo viɔn enu kpɔ nɔ ŋ le zoxu sakli sakli lɔ mɛ. ¹⁰ Eyi na taɖo ɔ ŋ do dɔmɛzi do wowo yi nu be: "wo ɖeɖe wowo susuwo so ŋ nu mamimami, wo de mɔnmɔn eŋje enu ci yi ŋ jiji so wo gbɔ mɛ go." ¹¹ Eyi le dɔmɛzi lɔ mɛ ɔ, ŋ ta enyɛɖeki be: "wo da ɖo gbɔngbɔndomɛ 'ji ci yi ŋ drado daɖɛ mɛ gbeɖe go!"» ¹² Nɔvinyɛwo, mí kpɔ nyuiɖe nɔ amɛɖe ŋgbe nɔ míwo domɛ yi susu a kpotui nii go. yi a gbe Maxujimaxɔse yi a ɖe yi susuwo so Mawu agbeagbe lɔ ji go. ¹³ Vɔ ɔ, mí donɔ ŋsɛn míwonɔnɔwo tɛgbɛɛ kaka a sɔnanɔ «Agbe» 'nyɔ cɛ xi yi wo nu le afiɖeka le Mawu 'nyɔ wemawo mɛ hwenu a ɖo. Gahɔnmɛ ɔ, amɛɖe d'a gbe eto nɔ Mawu le mi mɛ yi a je enuvɔ mɛ go. ¹⁴ Ɖo ɔ mí a nyi kliso yumɛjetɔwo nɔ e nyí kpɔ bé kankandoji ci yí le mí shi le gɔnmɛjeje kpɔtɔ li kaka sɔyi vɔvɔnu. ¹⁵ wo ŋwlɛ daɖɛ do afiɖeka le Mawu 'nyɔ wemawo mɛ be: «Nɔ mí se yí Mawu yɔyɔ mí egbɛɔ, mí a ɖo eto yi mí ŋgbe shin ŋta shigbe lehanci yí mí mɛɛ do sasa yí fɔ́n egu do ji nɛnɛ go.» ¹⁶ Ci yí é le nɛnɛ han ɖee, míwo yí se yi mawu yɔyɔ wo gankegan yi wo fɔn egu do ju ɔ? D'é nyi amɛ ciwo yí Mɔyizi je ŋkɔ nɔ yí kpɔlɔ tii so Eʒikputu 'ju mɛ vayisasa yɔ bà? ¹⁷ Míwo yi Mawu wa dɔmɛzi do kaka na exwe eka ɔ? D'e nyi amɛ ciwo yi wa enuvɔn yi ku do zoxy sakli sakli lɔ mɛ yi e wa dɔmɛzi do ba? ¹⁸ Gacimɛ yi Mawu ta enu be: «Wo d'a ɖo gbɔngbɔndomɛ 'ju ci yi ŋ drado ɖɛ nɔ wo mɛ gbeɖe go.» ɖee, mi nu yi e xoxoɔ nuxu so ɔ? D'é nyi amɛ ciwo yí fɔn egu nu yi e xoxoɔ nuxu so ba? ¹⁹ Mi kpɔ be wo de sɛn eŋ yi vati ɖo gbɔngbɔndomɛ 'ju cɛ lɔ mɛ go nɔ ci yi wo gbe xɔse maɖo ŋci.